रोमी 4

अबरहाम गी मिसाल

1 आपां आपणै बडेरै अबरहाम गै बारे में सोचो है कै बो किंया परमेसर गी नजर में निरदोस बण गेयो। 2 अबरहाम कोई आच्छो काम कर'गे परमेसर गी नजर में निरदोस ठेरायो जावंतो तो बिमै घमण्ड कर सकै हो पण परमेसर गी नजर में बो घमण्ड करण गै लायक कोनी है। 3 पवितर सासतर में इंया लिखेड़ो है कै, “अबरहाम परमेसर पर बिस्वास करयो, बि कारण बो परमेसर गी नजर में एक निरदोस आदमी बण्यो।”

4 काम करण आळै आदमी नै मजदूरी मिलणी जरूरी है, ओ कोई दान कोनी, मजदूरी लेणो बिंगो हक है। 5 कोई बी आदमी काम कर'गे परमेसर गी नजर में निरदोस कोनी बण सकै। बिनै परमेसर पर बिस्वास करणो ई चईयै। झिका लोग पापी है जे बे परमेसर पर बिस्वास करसी तो बे बी परमेसर गी नजर में निरदोस बण जावेगा। 6 पवितर सासतर में दाऊद बी इंगै बारै में लिखै है कै झिका लोग परमेसर पर बिस्वास करै है बे लोग धन्य है, बिना कोई काम करया बी बे लोग परमेसर गी नजर में निरदोस बण ज्यगा।

7 कोई बी आदमी गा पाप माफ करया है तो, बो धन्य है।

8 बे बी धन्य है कै झिका गा पाप गो लेखो प्रभु कोनी लेवै।

9 दाऊद धन्य केवै है के यहुदियां नै या गेर यहुदियां नै? आपां इंया केवा हा अबरहाम परमेसर पर बिस्वास करयो ईंखातर परमेसर बिनै आपगी नजर में निरदोस गिण्यो। 10 आ बात अबरहाम गै खतनो करण ऊं पेला होई या फेर बाद में। आ बात खतनो करण ऊं पेला ई होगी। 11 परमेसर पर भरोसो राखगे बिंगी नजर में निरदोस बणन गै भोत साल बाद एक निसानी गै जिंया परमेसर गी नजर में निरदोस आदमी बणग्यो बो दिखाण खातर अबरहाम आपगै सरीर में खतनो करयो। ईंखातर अबरहाम नै सारा गो पिता मानै है झिका परमेसर पर बिना खतनै गै बिस्वास करयो कै बे बी परमेसर गी नजर में निरदोस बण जावै। 12 अबरहाम नै खतनो करेड़ा गो बी पिता मानै है झिका लोगां खतनो ना करेड़ो हो पण आपणै पिता अबरहाम खतनो करण ऊं पेलो परमेसर पर बिस्वास राखयो है बि बिस्वास पर चालतो हो।

बिस्वास गै द्वारा परमेसर गो वायदो मिलणो

13 परमेसर अबरहाम अर बिंगी आण आळी पीढी नै संसार गा वारिस बणाण गो वाय्दो करयो। ओ वायदो परमेसर अबरहाम नै नेम विधान गो पालण करण ऊं कोनी दियो पण परमेसर पर बिस्वास कर'गे बिंगी नजर में निरदोस बणन ऊं दियो। 14-15 परमेसर आपगै वायदे नै जे नेम विधान पालण करण आळा नै देवै तो परमेसर गै उपर आपणो बिस्वास गो कोई मतलब कोनी अर परमेसर गो वायदो बी बेकार है। क्यूंकै कोई बी परमेसर गो नेम विधान गो पालण कोनी करै। लोग नेम विधान गो पालण ना करै तो परमेसर बानै सजा देवै है। जठै नेम विधान कोनी बठै बिनै तोड़ण गी बी जरूरी कोनी।

16 झिका लोग परमेसर पर बिस्वास करै है बा पर परमेसर गो वायदो पूरो होवै है। ओ वायदो परमेसर आपगी दया ऊं मुफ्त में देवै है। ओ वायदो अबरहाम गी पीढी नै मिलतो रेसी झिका नेम विधान नै मानै अर अबरहाम बरगो बिस्वास परमेसर पर करै है बानै बी मिलसी। 17 पवितर सासतर में इंया लिखेड़ो है, परमेसर केवै है, “मैं तनै भोत सारी जाता गो पिता बणास्यूं। बि परमेसर गी नजर में अबरहाम आपणो पिता है झिकै परमेसर पर बिंगो बिस्वास है। बो ई परमेसर मरेड़ा नै जींवता करै है अर झिकी बाता ही कोनी बिमुं सारो कीं बणा दियो।”

18-19 परमेसर अबरहाम नै केयो तू भोत जाता गो पिता हो'सी, पण सो साल तांई बिनै एक बी टाबर कोनी मिल्यो अर बिंगी घराळी सारां बी बुढि होण गै कारण टाबर कोनी पैदा करण में कमजोर होगी। फेर बी अबरहाम आपगो भोरोसो कोनी छोड़यो अर आसा गै सागै बण परमेसर पर बोळो भरोसो राख्यो। 20 परमेसर गै वायदे पर बण कदी आपगो भरोसो कोनी छोड़यो, पण बण आपगो बिस्वास बोळो तकड़ो राखगे परमेसर नै आदर दियो। 21 अबरहाम नै पूरो भरोसो हो झिको वायदो परमेसर करयो है बो जरूर पूरो करसी। 22 ईं बिस्वास गै कारण परमेसर अबरहाम नै बिंगै नजर में एक निरदोस आदमी बणायो। 23 पवितर सासतर में इंया लिखेड़ो है कै, “परमेसर गी नजर में अबरहाम एक निरदोस आदमी है।” ना केवल बिंगी खातर लिख्यो गेयो। 24 जिंया अबरहाम परमेसर गी नजर में एक निरदोस आदमी बणग्यो बिंया आपां बी जे परमेसर झिको प्रभु यीसू मसी नै मरेडा ऊं जींवतो कर लियो बि पर भरोसो राखा तो आपां नै बी निरदोस बणा देसी। 25 आपां परमेसर गो नेम तोड़ दियो इंगै बदले में यीसू मसी नै मारण खातर दे दियो अर आपां नै परमेसर गी नजर में निरदोस बणाण खातर परमेसर यीसू मसी नै मरेड़ा ऊं जींवतो कर दियो।