रोमी 5

परमेसर सागै मेळ

1 परमेसर गै उपर बिस्वास करण ऊं परमेसर आपां नै आपगी नजर में निरदोस बणाया। प्रभु यीसू मसी गै करूस पर बलिदान गै द्वारा आपणो आच्छो मेल मिलाप परमेसर सागै हो'ग्यो। 2 प्रभु यीसू मसी गै द्वारा आपणै बिस्वास गै कारण बण आपगी दया आपणै पर करी झिकी गै काबिल आपां कोनी हा। अर परमेसर गी मेमा में भागिदार होण'गी पक्की आसा है। ईंखातर आपां अब खुसी में हा। 3 आ बात कोनी, कोई बी परेसानी ऊं आपां खुस रेवा, ओ जाण गै कै परेसानी ऊं आपां नै धीरज राखण गी ताकत मिलसी। 4 धीरज ऊं आपणो सभाव बोळो तकड़ो हो'सी झिको परमेसर नै आच्छो लागै अर ईं तकड़ो सभाव ऊं पक्की आसा पैदा हो'सी। 5 पक्की आसा ऊं आपां नै कदी बी सरम कोनी आवै क्यूंकै जद पवितर आत्मा आपां नै दी जद परमेसर आपगै प्रेम ऊं आपणो जीवन नै भर दियो।

6 आपणै पापा ऊं आपां अपणै आपनै बचा कोनी सका अर परमेसर गी आग्या पिछाण कोनी सका बो ई ठीक टेम मसी आपां झिका परमेसर नै कोनी मानता हा आपणै पापा खातर बलिदान हो'ग्यो। 7 झिका लोग नेम गै आ'गे पीछै जावै बां खातर कोई बी आदमी बड़ी मुसकिल ऊं मरै पण हो सकै झिका लोग भलाई अर दूसरै सागै प्रेम करै है बा खातर प्राण देण खातर कोई बी तैयार हो जावै। 8 पण परमेसर आपणूं भोत प्रेम करयो। क्यूंकै आपां पापी हा फेर बी मसी आपणै पापा खातर बलिदान हो'ग्यो।

9 मसी गै खून गै कारण म्हे परमेसर गै नजर में निरदोस बण गयो। मसी गै कारण परमेसर गै आखर न्याय गी दिन गी सजा ऊं बी बच जावांगा। 10 जद आपां परमेसर गा बैरी हा जद बिंगै बेटै गी मोत गै द्वारा आपगै मेल मिलाप परमेसर गै सागै करवा दियो अर मसी जींवतो है इंगै कारण आपां परमेसर गी सजा ऊं जरूर बच जावांगा। 11 आ बात कोनी, पण प्रभु यीसू मसी गै द्वारा आपणो परमेसर गै सागै आच्छो मेल मिलाप होयो। ईं कारण आपां ओर बी भोत राजी होवां।

आदम गी मोत अर मसी ऊं जीवन

12 पेला ई एक मिनख आदम पाप करयो अर बिंगै द्वारा संसार में पाप आ गयो। अर पाप गै द्वारा मोत आई अर ईं रीत ऊं मोत सारा लोगां पर फेलगी, क्यूंकै सारा ईं पाप करै। 13 मूसा गै नेम विधान आण ऊं पेला संसार में पाप हो। जद तांई कोई नेम विधान ना होवै तो किंगोई पाप गिण्यो कोनी जावै। 14 आदम परमेसर गी आग्या नै तोड़गे पाप करण गै कारण आदम ऊं लेगे मूसा तांई संसार गै सारा लोग झिका पाप कोनी करयो बांगै उपर बी मोत आयी। आदम बी बिस्यो हो जिसो मसी आण आळो हो।

15 आदम गै द्वारा करेड़ै पाप अर परमेसर गी दया ऊं देयड़ो वरदान झिको यीसू मसी है आ दोना में भोत फरक है। आदम गै द्वारा भोत लोग मर गया पण यीसू मसी गै द्वारा परमेसर गी किरपा बोळै लोगां पर भोत भोत होयी। 16 आदम परमेसर गी आग्या नै तोडगे पाप करयो अर परमेसर गी दया ऊं देयड़ै वरदान में एक फरक ओ है कै आदम गो पाप दण्ड गो कारण हो'ग्यो पण आपां पापी होंता होया बी परमेसर गी नजर में निरदोस बणन खातर आपगो वरदान म्हानै दियो। 17 एक आदमी ऊं परमेसर गी आग्या तोडण गै कारण मोत सारै संसार पर राज करयो। पण झिका लोग परमेसर गो किरपा अर परमेसर गी नजर में निरदोस बणन गो वरदान यीसू मसी गै द्वारा लियो बे लोग पाप अर मोत गै उपर राज करसी।

18 क्यूंकै आदम परमेसर गी आग्या नै तोड़ी ईंखातर सारै लोगा नै सजा मिली पण यीसू मसी परमेसर गी आग्या गो पालण कर'गे सारै लोगा नै परमेसर गी नजर में निरदोस बणनै अर अनन्त जीवन लेण गै बी मदद करी। 19 एक आदमी परमेसर गी आग्या तोड़ण गै कारण भोत लोग पापी बण गया। बिंया ई एक दूसरै आदमी परमेसर गी आग्या पालण करण गै कारण भोत लोग परमेसर गी नजर में निरदोस बण गया।

20 लोग आपगै पापा नै समझण खातर परमेसर बानै नेम विधान दे दियो पण जठै लोग बोळा पाप करण लागरया बठै परमेसर गी किरपा बी बिऊं बोळी होगी। 21 जियां पाप लोगां पर राज करयो अर बो लोगां गै मरण गो कारण बण गयो बिंया ईं आपणो प्रभु यीसू मसी गै द्वारा परमेसर गी किरपा बी अनन्त जीवन मिलण खातर परमेसर गी नजर में निरदोस बणावंती होयी राज करै।