पाप खातर मरणो अर मसी में जींवतो रेणो
6
1 कोई पूछै है के आपां पाप करता रेवा कै परमेसर गी किरपा आपणै उपर ओर बोळी होवंती रेवै। आ बात बिलकुल कोनी हो सकै।
2 आपणै जीवन पर पाप गो राज कोनी है तो आपां पाप किंया कर सका हा?
3 मैं थानै याद करवाऊं हूं कै आपां यीसू मसी गै सागै भागिदार होण खातर अर बिंगै लारै चालण खातर बतिस्मो लिओ है। इंगै द्वारा आपां यीसू मसी गी मोत गा बी भागिदार बणग्या।
4 बतिस्मै गै द्वारा यीसू मसी गी मोत गा भागिदार होयड़ा आपां लोग बिंगै सागै दफनायेड़ा बी हा कै पिता परमेसर गी मेमा गी सकती ऊं जिंया यीसू मसी नै मरेडा ऊं जी उठगे एक नुओ जीवन मिल्यो बिंया ई आपां नै बी एक आच्छो नुओ जीवन मिल्यो है।
5 क्यूंकै जे आपां बिंगी मोत में भागिदार होण लागरया तो बिंगै तरियां जरूर जिंया बिनै जी उठणै गै बाद एक नुओ जीवन मिल्यो बिंया ई आपां नै बी एक नुओ जीवन मिलैगो।
6 क्यूंकै आपां जाणा हा कै आपणो पेला आळो पापी सभाव यीसू मसी गै सागै करूस पर चढाईजग्यो। ईंखातर आपणो पापी सभाव आपणै पर अब जोर कोनी कर सकै अर अब आपां पाप गो गुलाम ना बणा।
7 यीसू मसी गै सागै आपां मर गया ईंखातर आपां पाप गी गुलाम ऊं छूट ग्या।
8 जद आपां मसी गै सागै मरग्या हा तो ओ बिस्वास आपां करा कै बिंगै सागै जीयांगा बी।
9 आपां ओ जाणा हा कै मसी मरगे जींवतो हो'ग्यो अर अब दुसर कदी कोनी मरसी। बि पर कदी बी मोत गो हक कोनी हो'सी।
10 क्यूंकै मसी जद मर ग्यो तो बि पर पाप गो कोई अधिकार कोनी। परमेसर नै मेमा देण खातर अब बो जींवतो है।
11 ईं तरियां इंया समझो कै थे पाप ऊं न्यारा हो'ग्या पण परमेसर खातर यीसू मसी में जींवता हा।
12 ईंखातर थारो नासवान होण आळै सरीर पर पाप नै राज ना करण देओ कै थे बिंगी लालसा गै अधीन होज्यो।
13 आपगै सारै सरीर नै बुरी बाता पर ना लगावो, थे लोग पेला मरेड़ा हा पण अब परमेसर थानै जींवता करया है। ओ जाण गै आपगै सरीर नै आच्छी बाता झिकी परमेसर नै राजी करै है बां पर लगावो।
14 अब थारै पर पाप राज ना करै क्यूंकै थे नेम विधान गै अधीन कोनी पण परमेसर गी किरपा गै अधीन में हो।
धारमिकता गा दास
15 आपां नेम विधान गै अधीन कोनी पण परमेसर गी किरपा ऊं जींवता हो। फेर आपां कोई पाप करता रेवा हा के? नई कदी कोनी।
16 जद थे कोई मालिक गी आग्या माना हा तो थे बिंगै नीचे काम करण आळा दास बणग्या। जे थे पाप नै मालिक बणा लेवांगा तो जरूर मर ज्यांगा पण जे परमेसर गी आग्या मानांगा तो बिंगी नजर में निरदोस बण ज्यांगा।
17 पेला पाप थारो मालिक हो अर पाप थारै उपर राज करयो। पण अब थे सिखायेड़ी सिक्सा नै पूरै मन ऊं मानी। ईंखातर परमेसर नै धन्यवाद देणो भोत जरूरी है।
18 परमेसर थानै पाप गी सकती ऊं छुड़ा लिया अर आच्छा काम करण खातर परमेसर गा दास बणग्या।
19 मैं थानै आच्छी तरियां समझण खातर एक मिसाल बताऊं जिंया थे थारै सरीर ऊं बेबीचार अर भोत बुरी बातां करी बिंया अब आपगै सरीर ऊं परमेसर गी नजर में एक आच्छो काम कर'गे एक पवितर आदमी बण जाओ।
20 क्यूंकै जद थे पाप गी गुलामी में हा, जद परमेसर गी नजर में कोई आच्छो काम कोनी कर सकया।
21 थारै करेडै़ पाप गै कारण थानै के लाभ होयो, आ बात सुणगे थे सरमिन्दा हो। क्यूंकै आखरी न्याय गै दिन थानै मोत गी सजा जरूर मिलसी।
22 पण अब थे पाप गी गुलामी छोड़गे परमेसर गा दास बणग्या हो, ईंखातर थे अब पवितर हो अर थानै अनन्त जीवन मिलग्यो है।
23 क्यूंकै पाप गो इनाम मोत है पण झिको इनाम परमेसर देवै है बो आपणै प्रभु यीसू मसी में अनन्त जीवन है।