मूरतियां पर चढ़ाएड़ै चढावै गै बारे में
8
1 अब मूरती गै सामै चढाएड़ी चीज गै बारे में थारै सवाल गो मेरो बिचार ओ है कै “आपां सारा नै ग्यान है,” ग्यान लोगां नै घमण्ड ऊं भर देवै पण प्रेम ऊं बिस्वास मजबूत होवै।
2 जे कोई सोचै है कै बो सारो कीं जाणै है तो बिनै समझणो चईयै कै बो ओर बी सीखै।
3 जे कोई परमेसर नै प्रेम करै है तो परमेसर बिंगै बारे में आच्छी तरियां जाणै है।
4 मूरती गै सामै चढाएड़ी चिजां गै बारे में थे इंया केवो है कै म्हानै पतो है कै “मूरती दुनियां में परमेसर कोनी पण परमेसर एक ई है ओ आपां सारा नै पतो है”
5 धरती अर आकास में लोगां गै द्वारा बुलाया जाण आळा भोत सारा देवता अर प्रभु है।
6 पण आपां समझा कै एक ई परमेसर है। बो ई पिता परमेसर है झिकै सारी चिजां बणाई। बिंगै खातर आपां सारा हा अर एक ई प्रभु है, बो यीसू मसी। परमेसर इंगै द्वारा सारो कीं बणायो अर इंगै द्वारा ई आपां जींवता हा।
7 पण सारै बिस्वासी लोगां नै ईं बात गो इतो ग्यान कोनी। पेलां ऐ लोग मूरती गै कनै जा'गे बिनै पूजा करता हा। ईंखातर भोत सारा लोग आपगै मन में इंया सोचै है कै मूरती जींवती है। ईंखातर बे मूरती गै चढाएड़ी चिजां नै मूरती गी चिजां समझगे खावै। ईंखातर बांगी सोच इती कमजोरी होगी। अर बे लोग गलती ऊं इंया सोच्यो कै मूरती नै चढाएड़ी चिजां खा'गे म्हे पाप कर लिया।
8 खाण गी चीज परमेसर कनै कोनी ले जा सकै। जे आपां ऐ चीजा ना खावै तो बी कोई नुकसान कोनी अर जे खावै तो कोई फायदो बी कोनी।
9 थे कोई बी चीज सोच समझ गै खा सको हो। थारै खाण गी चीज गै कारण कमजोर बिस्वासी लोग पाप में ना पड़ज्यै।
10 तनै इंगै बारे में भोत ग्यान है। ईंखातर तू मिन्दर में मूरती गै चढाएड़ी चीज खाण में तेरै कोई फरक कोनी पडै़। पण जे बिस्वास में कमजोर आदमी तेरी आ बात देखसी तो बिंगी मन गी कमजोरी गै कारण ऊं मूरती गै चढाएड़ी चीज खाणी पाप समझगे बी बो तेरै सागै खाण खातर जासी।
11 ईंखातर थारै ग्यान गै कारण बो कमजोर बिस्वासी झिकै खातर प्रभु यीसू मसी मर गयो बो आखिर में नास हो जावैगो।
12 बिस्वास में कमजोर लोगां गै खिलाफ थे इंया पाप कर'गे अर बांगै कमजोर मन नै दुखी कर'गे थे प्रभु यीसू गै खिलाफ पाप करो हो।
13 ईंखातर मूरती गै चढाएड़ी चीज खाण गै कारण दूसरा बिस्वासी लोग बिस्वास छोडै़ तो मैं हिसी चिजां नै कदी कोनी खाऊंगा अर मैं दूसरै बिस्वासियां गै बिस्वास छोडण गो कारण बि कोनी बणूंगा।