ब्या गै बारे में
7
1 थे मनै खत गै द्वारा एक सवाल पूछयो कै,
“कोई माणस गी लुगाई गै सागै गळत संबन्ध राखणो आच्छो हे के कोनी?”
इंगो उतर मैं थानै देऊंगा।
2 कै भोत बेबीचार होण गै कारण हर एक आदमी नै आपगी घराळी राखणी चईयै अर हर एक लुगाई नै आपगो घराळो राखणो चईयै।
3 ब्या करेड़ै एक आदमी नै पती होण'गी पूरी जिमेदारी निभाणी चईयै। बिंया ई ब्या करेड़ी लुगाई नै बी पत्नी होण'गी पूरी जिमेदारी निभाणी चईयै।
4 ब्या करेड़ी लुगाई गो आपगै सरीर पर कोई हक कोनी। पण बिंगै सरीर पर हक बिंगै पती गो है। बिंया ई ब्या करेडै़ आदमी गो सरीर पर हक आदमी कनै कोनी पण बिंगै सरीर पर हक बिंगी पत्नी गो है।
5 पती पत्नी दोनां गी सहमती ऊं पराथना करण गै टेम नै छोडगे न्यारा न्यारा ना रेईयो। इंगै बाद दोनां नै एक सागै रेणो चईयै। इंया ना है तो थे थारै मन नै बस में ना राखण गै कारण सैतान थानै परखेगो।
6 मैं थानै ईं बात गी राए देऊं, पण ओ हुकम कोनी।
7 मैं इंया चाऊं कै मेरै तरियां बिना ब्या गै रेओ। पण परमेसर केई लोगां नै ब्या ना करण गो वरदान दियो है अर केईयां नै ब्या करण गो वरदान दियो है।
8 मैं थानै ओ बताऊं कै अजे तांई झिकै लोगां गो ब्या कोनी होयो अर झिकी अब विधवा है बानै बिना ब्या गै ई रेणो ठीक है।
9 पण जे कोई आदमी अपणै आपनै बस में कोनी राख सकै तो ब्या करणो चईयै क्यूंकै बे लोग गळत काम करण गी इच्छा नै रोक कोनी सकै ईंखातर ब्या करणो ई ठीक है।
10-11 ब्या करेड़ै लोगां नै मैं एक आग्या देणी चाऊं। आ आग्या मेरी ओर ऊं कोनी पण प्रभु गी ओर ऊं है। पत्नी आपगै पती ऊं न्यारी ना होवै। जे न्यारी होगी तो बिना ब्या गै रेणो चईयै। जे बा इंया कोनी रे सकै तो बिनै आपगै पती सागै रळ जाणो चईयै। अर पती नै बी आपगी पत्नी नै कदैई छोडणो ना चईयै।
12 अब दूसरा नै प्रभु गी ओर ऊं कोनी मेरी ओर ऊं केणो चाऊं कै, कोई मसी भाई गै अबिस्वासी घराळी है तो जे बा लुगाई बिंगै सागै रेणो चावै है तो बिनै छोडणी ना चईयै।
13 इंया ई कोई मसी लुगाई गै अबिस्वासी घराळो है तो बो आदमी बिंगै सागै रेणो चावै तो बिनै छोडणो ना चईयै।
14 क्यूंकै एक अबिस्वासी घराळे नै आपगी बिस्वासी लुगाई गै कारण परमेसर बिनै आपगै लोगां जिसो समझै। बिंया ईं एक अबिस्वासी घराळी नै आपगै बिस्वासी आदमी गै कारण परमेसर बिनै आपगै लोगां जिसो समझै। जे इंया ना होवंतो तो आंगा टाबर परमेसर नै ना मानण आळा बरगा होवंता। पण अब ऐ टाबर परमेसर गा ई बण गया।
15 एक अबिस्वासी घराळो आपगी बिस्वासी लुगाई ऊं अर अबिस्वासी घराळी आपगै बिस्वासी आदमी ऊं ब्या तोड़णो चावै तो बानै ना रोको। इसी हालत में बिस्वासी आदमी अर बिस्वासी लुगाई नै ब्या होयड़ो जिसो रेणो जरूरी कोनी। परमेसर आपां नै सांती ऊं रेण खातर बुलाया।
16 बिस्वासी लुगाई नै मैं ओ केणो चाऊं थे आपगै अबिस्वासी घराळे नै बिस्वास में ल्या सको हो। बिंया ई एक बिस्वासी आदमी नै मैं ओ केणो चाऊं कै थे आपगी अबिस्वासी घराळी नै बिस्वास में ल्या सको हो।
17 मेरी बोलेडी सारी बातां गो सार ओ है कै हर एक आदमी नै परमेसर बुलायो जद बो जिसी हालत में हो बिमै ई बणयो रेवै। आ'ईं बात नै मैं सारी बिस्वासी मण्डली गै लोगा नै सिखाऊं।
18 जद थे बिस्वासी बणया बि टेम थारो खतनो करेड़ो या ना करेड़ो होवै इऊं कोई फरक कोनी पडै़। थे जियां हो बियां ई बणया रेवो।
19 खतनो करणो ना करणो इतो खास बात कोनी पण परमेसर गी आग्या नै मानणी ई खास बात है।
20 हर एक आदमी किंया बिस्वासी बणया बिंया ई रेणो चईयै।
21 जद थे बिस्वासी बणण गै टेम गुलामी में हा तो ईं बात गै बारे में चिंता ना करो। पण जे थानै आजादी मिलै तो थारी आजादी नै आच्छा काम खातर लगावो।
22 जे एक गुलाम आदमी नै परमेसर गै बुलाण पर बो एक बिस्वासी बण गयो तो बि आदमी नै आजादी मिल गेई क्यूंकै प्रभु यीसू मसी बिनै आजाद कर दियो। इंया ई झिको आदमी बिस्वासी बणण गै टेम गुलामी में कोनी हो बो अब मसी में होगे मसी गो दास बणग्यो।
23 परमेसर थानै भोत मोटो मोल देगे आजाद करया। ईंखातर अब थे माणसां गा गुलाम ना बणो।
24 हे मेरा भाईयो अर भेनों, जद थानै परमेसर बुलाया अर जिसी हालत में थे हा बि हालत में ईं परमेसर गै सागै बण्या रेओ।
कुंवारा अर बिधवावां गै बारे में
25 बिना ब्या होएड़ी लुगाईयां गै बारे में थारै द्वारा पुछेडे़ सवाल गै बारे में प्रभु कनूं मनै कोई बी उतर कोनी मिल्यो। फेर बी प्रभु गै द्वारा मिलेड़ै ग्यान ऊं मैं थानै कीं बताणो चाऊं।
26 आज काल बिस्वासी लोगां गै बिचाळै भोत परेसानी होण लागरी है। ईंखातर मैं थानै आ बात बताणी चाऊं कै जे कोई आदमी गो ब्या ना होयो तो बिनै इंया ई रेणो ठीक है।
27 जे कोई ब्या करेड़ो आदमी है तो बिंगी घराळी नै छोडी ना अर जे किंगोई ब्या अजे तांई कोनी होयो तो ब्या कराण खातर लुगाई डूंडी ना।
28 पण जे कोई ब्या करै तो बी कोई पाप कोनी। अर जे बिना ब्या करेडी लुगाई ब्या करेगो तो बी कोई पाप कोनी। पण इयां करण आळां गै जीवन में दुख आवंता रेवै। मैं इंया चाऊं कै थे बि परेसानी ऊं बचगे रेओ।
29 ईंखातर मेरा भाईयो अर भेनों, मेरो केण गो मतलब ओ है, आपगै कनै ईं दुनियां में इतो टेम कोनी। ईंखातर आपणै जीवन गै बारे में इती चिंता ना करो। ब्या करेड़ो आदमी आपगी पत्नी ऊं ज्यादा परमेसर गी सेवा में ध्यान राखै।
30 अर रोण आळा ना रोण आळा जिसा समझगे रेओ अर खुसी मनाण आळा खुसी ना मनाण आळा जिसा रेओ अर मोल लेण आळो इंया समझगे रेओ कै बिंगै कनै कीं कोनी है।
31 ईं दुनियां गी कोई बी चीज काम में ले सकां। पण बा चीजा नै इती खास कोनी समझणी। एक दिन हिस्यो आवैगो ओ संसार अर झिको कीं इंगै मां है सारो कीं खत्म हो जावैगो।
32 मैं ओ चाऊं कै थे ईं संसार गी बाता नै सोचगे चिंता में ना पड़ो। एक ब्या ना करेड़ो आदमी परमेसर गै काम में बोळो टेम बितावै क्यूंकै बो सोचै है कै मैं इंया कर'गे परमेसर नै खुस कर सकूं।
33 ब्या करेड़ो आदमी आपगी घराळी नै खुस करण खातर ईं संसार गी बातां गै बारे में सोचै है।
34 ईंखातर बो आदमी दो तरियां गी बात सोचतो रेवै कै मैं किंया प्रभु नै खुस करूं अर किंया आपगी घराळी नै खुस करूं। बिना ब्या करेड़ी लुगाई अर विधवा परमेसर गै काम गै बारे में सोचती रेवै क्यूंकै इंगै द्वारा बे पूरो तन मन ऊं परमेसर नै समरपण कर सकै। पण ब्या करेड़ी लुगाई आपगै घराळे नै खुस करण गै खातर ईं संसार गी बातां गै बारे में सोचती रेवै।
35 मैं ऐ सारी बातां थारै फैयदा खातर बोलूं। मैं ऐ बातां थारी परेसानी खातर कोनी पण परमेसर गा लोग किंया जीवन बितावै है मैं थानै बिंया ई जीवन बिताण खातर मदद करणी चाऊं कै थे लोग संसार गी बातां नै ना सोचगे परमेसर गो काम आच्छी तरियां कर सको।
36 जे कोई आदमी आपगी बेटी गो ब्या कोनी करयो है पण बो सोचै है मेरी सोच इती आच्छी कोनी है क्यूंकै मेरी बेटी गो ब्या करण गी उमर होण लागरी है। इंया है तो बेटी गो ब्या करणो चईयै। जे बो इंया करै तो कोई पाप कोनी।
37 इंगै बदळै में बो आदमी इंया सोचै कै बिना किंगी दबाब गै मनै मेरो आपगो फैसलो देणो अधिकार है। इंया सोचगे जे बो आदमी बो आपगी बेटी गो ब्या ना करणो चावै तो बण आच्छो काम करयो है।
38 ईंखातर एक आदमी आपगी बेटी गो ब्या करवावे ऐ बात आच्छी है पण बो आपगी बेटी गो ब्या ना करवावे, तो आच्छी बात आ है।
39 जे एक बिस्वासी लुगाई गो ब्या होयड़ो है तो जद तांई बिंगो आदमी जींवतो है बिनै बिंगै सागै ई रेणो पड़सी। जे आदमी लुगाई ऊं पेला मर जावै तो बा लुगाई कोई मसी आदमी सागै ब्या करै तो कोई दिकत कोनी।
40 पण मेरो बिचार इंया है जे बा लुगाई बिना ब्या करै रेवै तो ओर ई आच्छी बात है। मैं इंया सोचूं हूं कै परमेसर गी आत्मा मेरूं इंया बात करै है।