मसी लोगां में मुकदमाबाजी ना करण गो सुझाव
6
1 थारै में एक बिस्वासी गो दूसरै बिस्वासी गै सागै कोई लडाई झगड़ो होवै तो बिंगो फैसलो करवाण खातर थे अबिस्वासी लोगां कनै क्यूं जावो? थारा झिका बिस्वासी पवितर लोग है बांगै कनै जाणो चईयै।
2 ईं बात गो थानै पतो कोनी कै आण आळै दिनां में थे परमेसर गा पवितर लोग ईं संसार गो न्याय करोगा। जे थे संसार गो न्याय कर सको हो तो आ छोटा लडाई झगड़ा गो फैसलो क्यूं कोनी करो हो?
3 थे कोनी जाणो कै आपां आण आळै दिनां में सुरगदूतां गो बी न्याय करांगा। इंया है तो थानै संसार गी बातां गो फैसलो करण में के दिकत है?
4 जे थानै संसार गै लोगां गो न्याय करण गो अधिकार है तो थे थारै आपसरी गै झगड़ा नै लेगे अबिस्वासी कनै क्यूं जावो?
5 ईं बात गी थानै सरम आणी चईयै। थारै बिस्वासी लोगां गै झगडै़ गो फैसलो करण खातर थारै में कोई ग्यानी कोनी के?
6 थारै बिचाळै लडाई झगड़ो होण गै टेम थे फैसलो करवाण खातर अबिस्वासी लोगां कनै जावो, आ बात जमाई ठीक कोनी।
7 जद थे एक बिस्वासी नै अबिस्वासी लोगां कनै न्याय करण खातर लेजो तो थे परमेसर गी नजर में हार गया। इंगै अलावा जे बण बिस्वासी थारै खिलाफ कीं करयो तो बिनै सेह लेणो चईयै अर जे बण बिस्वासी थानै लूट लियो है तो थे बिनै देणो ईं चईयै।
8 इंगै बदळै में थे लोग आपसरी में अन्याय करो हो अर एक दूसरै नै लूटो हो। ओ सारो कीं थे थारै बिस्वासी लोगां खातर करो हो।
9-10 थानै ईं बात गो पतो है कै दूसरा गै खिलाफ न्याय करण आळा लोग परमेसर गै राज गै वारिस कोनी होवैगा। ईंखातर थे धोखो देण आळा गी बात ना मानो। मैं ईं तरियां गै लोगां गै बारे में बात करूं झिका परमेसर गी नजर में बेबीचार करै है अर मूरती पूजा करै है, अर दूसरा गी लुगाईयों गो लालच करण आळा अर झिका आदमी आदमी गै सागै गळत काम करै है, अर चोरी करण आळा, अर लालच करण आळा, अर पियकड़ अर झिको दूसरा गै खिलाफ बुरी बात बोलण आळा, अर लुटेरा लोग है।
11 पेला इंया ई थारै में हिस्या पापी लोग हा। पण प्रभु यीसू मसी अर परमेसर गी आत्मा थारै पापां नै धो दिया अर थानै पवितर अर धरमी ठेराया।
सरीर मसी गी मेमा खातर
12 जिंया मैं चावूं बिंया कर सकूं पण ऐ सारी बातां फायदेमंद कोनी। जिंया मैं चावूं बिंया कर सकूं पण मैं किंगी बात गै दबाब में कोनी रेऊंगा।
13 रोटी पेट खातर अर पेट रोटी खातर। पण आण आळै दिनां में परमेसर आ दोनां चिजां नै खतम करेगो। आपणो सरीर दूसरा गै सागै बेबीचार करण खातर कोनी पण प्रभु गी सेवा खातर है। प्रभु आपणै सरीर गो ध्यान राखै।
14 परमेसर आपगी ताकत ऊं प्रभु नै मरेड़ा मूं जींवतो करयो बिंया ई आपां नै बी जींवतो करसी।
15 थानै पतो है कै थारो सरीर यीसू मसी गो एक एक अंग है। इंया है तो यीसू मसी गै अंग नै लेगे बेबीचार करण आळी लुगाई गै सरीर गो अंग किंया बणावो? आ बात कदी कोनी होवै।
16 थानै ई बात गो पतो है कै जे एक आदमी बेबीचार करण आळी लुगाई गै सागै सो जावैगो तो बे दोनूं एक ईं सरीर बण जावेगा। पवितर सासतर में इंया लिखेड़ो है कै,
“बे दोनूं एक ई सरीर बण जावेगा।a”
17 पण कोई बी आदमी प्रभु गी संगती में मिलगे रेवेगो तो बो आपगी आत्मा में बिंगै सागै एक हो जावैगो।
18 आ बात थे लोग ध्यान ऊं सुणो। दूसरा गै सागै बेबीचार बिलकुल ना करो। क्यूंकै ओ पाप भोत बुरो है। इनै छोडगे दूसरा पाप सरीर गो नुकसान कोनी करै पण झिको बेबीचार करै बो आपगै सरीर नै गंदो करै है।
19 थानै ईं बात गो पतो है कै थे परमेसर गा मिन्दर हो अर पवितर आत्मा थारै में वास करै। अर आ आत्मा परमेसर ई थानै दी है। ईंखातर थारो अपणै आप पर कोई अधिकार कोनी।
20 परमेसर भोत मोटो मोल भरगे थानै मोल ले लिया। ईंखातर थे परमेसर गो थारै सरीर गै द्वारा आदर मान करो।