बेबीचार करण आळां गै खिलाफ चेतावनी
5
1 थारै बिचाळै गळत काम होण लागरयो है। आ बात मैं सुणी। परमेसर नै ना मानण आळा बी इसा काम कोनी करै। मैं इंया सुण्यो कै थारी बिस्वासी मण्डली में एक आदमी आपगै पिता गै दूसरी घराळी गै सागै रेवै।
2 आ बात होण गै बाद बी थे लोग घमण्ड करो हो। ईं बात ऊं थानै दुख होणो चईयै। हिस्या गळत काम करण आळा माणस नै थारै बिचाळ ऊं काड़ देणो चईयै।
3 मैं सरीर गै रूप में थारै कनै कोनी पण मन ऊं थारै कनै हूं। इंया मानो कै मैं थारै सागै होगे गळत काम करण आळा आदमी नै बिंगै खिलाफ में आपगो फैसलो सुना दियो।
4-5 अर थे लोग प्रभु यीसू गै नाम ऊं इकट्टा होण गै टेम अर मैं मन ऊं थारै सागै होण गै टेम आपां प्रभु यीसू मसी गै नाम ऊं अर बिंगी ताकत ऊं बि गळत काम करण आळै आदमी नै सैतान गै हात में देणो चाइयै क्यूंकै बिंगो बुरो सभाव नास होणो चईयै अर जद प्रभु मसी गै दुसर आण गै टेम बिंगी आत्मा बच जाणी चईयै।
6 फेर बी थे लोग घमण्ड करो हो। आ बात आच्छी कोनी। थे लोग जाणो हो कै थोडो सो खमीर पूरै गुंदेड़े आटे नै खमीर बणा देयै।a
7 ईंखातर पुराणै खमीर नै छोड़गे अपणै आपनै सुद्ध करो। अर बिना खमीर गो गूदेड़ो आटो बण जाओ क्यूंकै यहुदियां गै फसह गै त्यूंहार गै टेम एक मेमणियो गो भेंट चढायो जावंतो इंया ई यीसू मसी आपणै सारै पापां खातर बलिदान हो'ग्यो।
8 ईंखातर आपां बिना कपट अर सच्चाई ऊं बिना खमीर गी रोटी ऊं फसह गै त्यूंहार मनावां झिको ना पुराणै खमीर ऊं अर ना बुराई ऊं, अर ना दुस्टता गै सागै होवै।
9 बेबीचार करण आळै गै सागै संबन्ध कोनी राखण गै बारे में पेलो ई मैं थानै लिखयो है।
10 मैं ईं संसार गै अबिस्वासी लोगां गै बारे में कोनी झिको बेबीचार करै है, अर लालची, लुटेरा, अर मूरती पूजा करण आळा। इंया है तो थानै ईं संसार ऊं निकळ जाणो चईयै।
11 पण अब मैं थानै लिखण लागरयो हूं कै थारै में कोई माणस बो गळत काम करै है अर लालची है, अर मूरती पूजा करै है, अर दूसरा गै खिलाफ बुरी बात बोळण आळो है, अर पियक्ड़ है, अर लुटेरो है तो बिंगै सागै मेळ ना राख अर ना'ई खाणो पीणो कर।
12-13 बिस्वासी मण्डली गै बारे गै लोगां गो न्याय करणो मेरो काम कोनी। ओ काम परमेसर करसी। बिस्वासी मण्डली गै मां झिका लोग पाप करै है बांगो न्याय करणो थारो काम है। पवितर सासतर में इंया लिखेडो है कै,
“बुरा काम करण आळा नै थारै मूं काड़ दयो।b”