मसी गो खास चेलो
4
1 ईंखातर कोई बी जन म्हारै बारे में इंया सोचणो चईयै कै म्हे मसी गा सेवक हा अर परमेसर आपगै लकोगे राखेड़ै ग्यान गै भंडार थानै समझाण खातर म्हानै दे दियो।
2 हर एक सेवक आपगै मालिक गै सागै इमानदारी ऊं काम करण आळो होणो चाइयै।
3 थे लोग या कोई माणसां गो न्याय करण आळो मेरै बारे में कीं बोलै तो बिऊं कीं कोनी होवै। मेरो काम भलो है अर बुरो है, इंगै बारे में मैं बी कोनी सोचूं।
4 मेरो मन साफ है। इंगो मतलब ओ कोनी कै मैं लगातार आच्छा काम करूं। मनै परखण आळो प्रभु है।
5 ईंखातर प्रभु आण ऊं पेला कोई बी चीज गै उपर न्याय ना करो। प्रभु आ'गे अंधेरे में लुकेड़ी बातां नै चानणै में दिखावैगो अर लोगां गै मन गी बात बतावैगो अर बि टेम परमेसर गी ओर ऊं हरेक आदमी गै कामां गै अनुसार न्याय होवैगो।
6 हे मेरा भाईयो अर भेनों, मैं आपगै नाम नै अर अपुलुस गै नाम नै मिसाल गै रूप में बतायो है। जे थे मेरै द्वारा पवितर सासतर में लिखेड़ी बातां नै ध्यान ऊं पडोगा तो थे लोग इंया कोनी के सकोगा कै एक सेवक दूसरो सेवक ऊं बोळो मोटो है।
7 दूसरा ऊं मोटो समझण खातर तेरै कनै के है? परमेसर कनूं मिलेड़ी चिजां नै छोडगे तेरै कनै के है? तूं घमण्ड गै सागै इंया किंया बोल सकै कै ओ सारो कीं मैं आप ई करयो, परमेसर कनूं कोनी होयो।
8 थे इयां ना सोचो कै थानै के चिजां गी जरूरत है बे चिजां पेला थारै कनै है। थे इयां ना सोचो कै पवितर आत्मा ऊं मिलण आळी सारी आत्मिक आसिस म्हारै कनै हे। अर थे इंया ना सोचो है कै म्हे सेवक लोगां नै छोडगे राज करण लागरया हो। जे थे लोग राज करो तो आच्छी बात है क्यूंकै म्हे बी थारै सागै राज कर सकां।
9 मैं इंया सोचूं है कै परमेसर म्हे सेवक लोगां नै इता खास कोनी बणाया। म्हे लोग बा लोगां बरगा हा झिका नै दूसरै लोगां गै सामणै मारण खातर ले जायै जावै। क्यूंकै आ बात संसार गा सारा लोग अर सुरगदूत बी देखे।
10 म्हे सेवक लोग यीसू मसी गै बारे में परचार करा हा ईंखातर लोग म्हानै मूरख समझै है। थे लोग इंया सोचो है कै, “म्हे ग्यानी लोग हा क्यूंकै म्हे यीसू मसी गै सागै एक हो'ग्या।” लोग म्हारै बारे में इंया सोचो है कै, “म्हारै कनै कोई अधिकार कोनी।” थे लोग इंया सोचो है कै, “म्हारै कनै ताकत है। लोग थारो आदर मान करै है पण म्हारो आदर कोनी करै।”
11 ईं टेम तांई म्हारै कनै खाण पीण खातर कीं कोनी हो। पेरण खातर आच्छा गाबा बी कोनी हा। लोग म्हानै मारता हा। म्हे इनै बिनै फिरता रेवंता क्यूंकै म्हारै कनै रेण खातर घर बी कोनी हो।
12 म्हे भोत काम कर'गे आपगो गुजारो करता हा। लोगां म्हानै बुरी बातां बोली तो म्हे बानै आसिस दी अर जद लोगां म्हानै तंग करया तो म्हे सेह लियो।
13 जद लोग म्हारो नाम बदनाम करै तो म्हे बांगै सागै आच्छी तरियां बात करां। सरू ऊं आज तांईं लोगां म्हानै बिलकुल कचरै जिंया समझ्या।
14 मैं थानै सरम मारण खातर ऐ बातां कोनी लिखण लागरयो हूं पण मैं आपगै टाबर जिंया समझगे थानै आग्या देऊं।
15 यीसू मसी गै बारे में थानै भोत लोग सिखाण आळा होणता तो बी मैं एक पिता जिस्यो पेली बारी थारै कनै सुब समाचार लेगे आयो। ईं कारण थे लोग यीसू मसी पर बिस्वास करयो।
16 ईंखातर मैं थानै बिनती करूं हूं जिंया मैं मसी गै रा पर चालूं बिंया थे बी चालो।
17 ईं कारण मैं तीमुथियुस नै थारै कनै घालूं हूं। बो प्रभु पर बिस्वास करै अर मेरै बेटै जिस्यो है। मैं बिऊं प्रेम करूं अर प्रभु गै काम में बी मैं बि पर भरोसो राखूं। जद बो थारै कनै आवैगा तो थानै बतावैगो कै मैं प्रभु में किंया चालूं जियां मैं न्यारी न्यारी जिग्या में जा'गे बिस्वासी लोगा नै बतायो हो।
18 थारै मूं केई लोग इंया सोचै है कै पौलुस म्हारै कनै कोनी आवैगो। थे लोग इंया सोचगे घमण्ड करो हो।
19 पण जे प्रभु गी इच्छा है तो मैं थारै कनै बेगो ई आऊंगा। मैं आ'गे बांगै घमण्ड गी बात कोनी देखणो चाऊं पण बे प्रभु गो काम किती ताकत ऊं करै बो देखणो चाऊं।
20 जे परमेसर म्हारै में राज करै तो परमेसर गै बारे में बात करण गै अलवा म्हानै हर एक काम परमेसर गी ताकत ऊं करणो ई पड़सी।
21 अब थे लोग सोच्यो कै जद मैं थारै कनै आऊंगा तो मैं थारै सागै किंया करूं? जद तांई मैं थारै कनै आऊं थे थारी गलती नै समझल्यो नई तो मैं मेरै अधिकार ऊं समझाऊंगा। पण जे थे ठीक हो'ग्या तो मेरी दया अर प्रेम थानै दिखाऊंगा।