बिस्वासी मण्डली अर अगुवा लोग
3
1 हे मेरा भाईयो ओर भेनों, जद मैं थारै कनै हो तो जिंया पवितर आत्मा मिलेड़ा लोगां नै सिखाणो चईयै बिंया मैं थानै कोनी सिखायो। पण मैं ई दुनिया गै लोगां गै सागै जिंया बात करणी चईयै बिंया ई थारूं बात करी। जद थे बिस्वास में इता मजबूत कोनी हा ईंखातर जिंया छोटा टाबरां सागै बात करीजै बिंया ई थारूं बात करी।
2 ईंखातर जिंया टाबरां नै रोटी कोनी खुवाईजै अर दूध प्याओ जावै बिंया ई थानै परमेसर गो बचन भोत सोखै तरियां ऊं सिखायो। बि टेम थानै ओखो बचन समझ कोनी आवै हो। अजे तांई थे लोग बिंया ई हो।
3 अजे तांई थे लोग दुनियां गै लोगां गै पापी सभाव तरियां जीओ हो। थे लोग दूसरा पर बळो अर लडाई झगड़ा करो हो। आ बाता ऊं पतो लागै कै थे दुनिया गी बुराईयां गै सागै चालो अर थारै अर दुनियां गै लोगां में कोई फरक कोनी।
4 थारै मूं कोई बोलै है, “मैं पौलुस गो चेलो हूं” अर कोई बोलै है, “मैं अपुलुस गो चेलो हूं।”a फेर बी थे लोग दुनिया गै लोग झिका परमेसर नै कोनी जाणै बांगै बरगा है।
5 थे बताओ, पौलुस कुण है? अपुलुस कुण है? म्हे परमेसर गा सेवक हा। म्हे लोग थानै यीसू मसी पर बिस्वास करण में मदद करी। प्रभु म्हानै इंया करण में सहायता करी।
6 मैं थानै एक बूंटो लगाण गी तरियां सुब समाचार गो काम थारै मां चालू करयो अर अपुलुस बुंटा में पाणी घालण गी तरियां थानै ओर सिखागे आ'गे ले गयो। पण बुंटा नै मोटा करण आळा म्हे कोनी। परमेसर थारै बिस्वास नै मजबूत कर'गे बि काम नै पूरो करयो।
7 बुंटा लगाण आळो अर पाणी घालण आळो कीं कोनी। परमेसर ई खास है क्यूंकै बुंटा नै मोटो करण आळो बो ई है।
8 बुंटा लगाण आळो अर पाणी घालण आळै में कोई फरक कोनी। दोनूं एक बरगा है। परमेसर दोनां नै बांगै काम गै इसाब ऊं मजदूरी देवैगो।
9 क्यूंकै म्हे परमेसर गा साथी हा। थे लोग परमेसर गै खेत बरगा हो अर परमेसर गै बणाएडै़ घर बरगा हो।
10 परमेसर मेरै पर करेड़ी किरपा ऊं एक आच्छो मिस्तरी मकान बणावंता टेम जिंया नीव घालै बिंया ई मैं थारै में प्रभु गो काम सरू करयो। जिंया नीव गै उपर रदा लगागे मकान ऊंचो करयो जावै बिंया ई मेरै सरू करेड़ै काम नै दूसरै आ'गे करै। पण जिंया नीव घालण आळो अर मकान बणाण आळो जिमेदारी ऊं काम करै है बिंया ई परमेसर गो काम हर एक आदमी जिमेदारी में करै।
11 परमेसर यीसू मसी नै एक नीव जिंया ठेहरायो। एक नीव गै उपर दूसरो नीव कोनी घाल्यो जा सकै बिंया ई परमेसर ठेरेड़ा नीव यीसू मसी गै उपर ओर कोई रक्सा करण आळो कोनी हो सकै।
12 परमेसर गा देयेड़ा काम इमानदारी ऊं करया बे लोग बि नीव गै उपर सोनो, चांदी या भोत मेंगो पथर गा बणाएडै़ रदे बरगा है अर झिका लोग परमेसर गो काम इमानदारी ऊं कोनी करयो हो'सी बे लोग बि नीव गै उपर काठ या घास फूस गो बणाएड़ा रदे बरगा हो'सी।
13 एक दिन हर एक माणस गो काम परख्यो ज्यगा। जद न्याय गै दिन सारां गा काम सामणै परगट हो जावेगा। बि दिन किसी चीज आच्छी है अर किसी चीज माडी है पतो चालेगो। क्यूंकै ऐ सारी चिजां आग ऊं परखी जावैगी।
14 आच्छी चिजां ऊं बणाएड़ी नीव आग में बच जावैगी अर बिमै काम करण आळा लोगा नै बांगी मजदूरी मिलसी।
15 अर कमजोर चिजां ऊं बणेड़ी नीव आग में बळ जावैगी अर बिमै काम करण आळा नै मजदूरी कोनी मिलैगी। पण आग ऊं ऐ लोग बच जावेगा।
16 थे लोग जाणो हो कै थे परमेसर गा मिन्दर हो अर परमेसर गी आत्मा थारै में वास करै।
17 जे कोई परमेसर गै मिन्दर नै नास करेगो तो परमेसर बिनै नास करेगो क्यूंकै परमेसर गो मिन्दर पवितर है। अर बो ई मिन्दर थे हो।
18 अपणै आपनै मूरख ना बणावो। जे कोई इंया सोचै कै, “मैं ईं संसार गै हिसाब ऊं ग्यानी हूं तो बो सच्च में अपणै आपनै ग्यानी बणाण खातर बिनै मूरख समझै।”
19 ईं दुनिया गो ग्यान परमेसर गी नजर में मूरखता है। पवितर सासतर में इयां लिखेड़ो है कै,
“परमेसर बोळी होसियारी करण आळा
ग्यानी लोगां नै पकड़ लेवै।b”
20 पवितर सासतर में इंया बी लिखेडै़ है कै,
“जद लोग सोचै है कै ‘म्हे ग्यानी हा,’
तो प्रभु बानै कीं काम गा कोनी समझै।c”
21 ईंखातर कोई बी माणस पर घमण्ड ना करै। क्यूंकै परमेसर सारो कीं थारी भलाई खातर करयो है।
22 परमेसर मनै अर अपुलुस अर पतरस नै थारी भलाई खातर घाल्या। परमेसर ईं संसार नै थारी भलाई खातर बणायो। थे जीओ अर मरो बो बी परमेसर थारी भलाई खातर करै। अर परमेसर अब गी सारी आच्छी चिजां अर आण आळै दिनां गी सारी चिजां थारी भलाई खातर देवैगो।
23 पण याद राखियो, थे लोग मसी गा हो अर मसी परमेसर गो है।