2
1 हे मेरा भाईयो अर भेनों, जद मैं थारै कनै पेली बारी आण गै टेम ओखे सब्दा ऊं अर ग्यान ऊं सुब समाचार कोनी बतायो।
2 जद मैं थारै कनै बठै हो तो मैं ओ फैसलो लियो कै करूस पर मरेड़ै यीसू गै अलावा ओर कोई बात ना जाणूं।
3 मैं दीनता अर भय गै सागै कांपतो होयो थारै कनै आयो।
4 जद मैं थारै सागै परचार करते टेम मेरै ग्यान ऊं कीं कोनी बतायो पण मैं पवितर आत्मा गी सकती ऊं बतायो।
5 मैं माणस गै ग्यान ऊं कोनी पण परमेसर गी ताकत पर भरोसो राखण खातर आ बात केई।
परमेसर गो ग्यान
6 जद मैं थारै कनै सुब समाचार बोलता टेम ग्यान गी बात कोनी बताई पण जद म्हे परमेसर गै रा पर चालण आळा पक्का बिस्वासियां नै सुब समाचार सुणायो तो ग्यान ऊं सुणायो। ओ ग्यान ईं संसार अर संसार गै अधिकारियां गो ग्यान कोनी क्यूंकै ईं संसार गै अधिकारियां गो ग्यान खत्म हो जावै।
7 झिको ग्यान म्हे बतावां हा बो परमेसर गै लकोगे राखेड़ो ग्यान है। परमेसर धरती बणाण ऊं पेला फैसलो लियो कै परमेसर गो ग्यान आण आळै दिनां में आपां सारा नै एक आच्छो जीवन जीण खातर मदद देसी।
8 परमेसर गी ईं ग्यानी योजना गै बारे में ईं संसार गै अधिकारी लोगां नै पतो कोनी हो। जे इंगै बारे में जाणता तो बे लोग प्रभु नै कदी करूस पर ना चढावंता।
9 पवितर सासतर में इंया लिखेड़ो है कै,
“परमेसर आपगै प्रेम करण आळै लोगां गै सागै करेड़ी बातां गै बारे में अब तांई कणी कोनी देखी
अर कणी सुणी बी कोनी अर इंगै बारे में कणी सोच्यो बी कोनी।a”
10 पण परमेसर ऐ बाता आपगी आत्मा गै द्वारा आपां सारा पर परगट करी क्यूंकै बाई आत्मा सारी चिजां नै आच्छी तरियां समझै अर परमेसर गै मन गी गेरी बातां नै बी समझै।
11 कोई माणस गै मन गी बात बिंगै बिना ओर कोई दूसरो कोनी जाण सकै। बिंया ई परमेसर गी बातां परमेसर गी आत्मा ई जाणै।
12 परमेसर आपां सारा नै आपगी आत्मा दी। ईंखातर परमेसर आपां नै देयेड़ी बाता नै जाणै अर संसार गा लोगां जिंया सोचै बिंया आपां सारा कोनी सोचा।
13 माणस ऊं मिलेड़ै ग्यान ऊं म्हे थानै कोनी सिखावां पण परमेसर गै मिलेड़ै ग्यान ऊं सिखावा हा। परमेसर गी आत्मा ऊं मिलेड़ी साची बातां म्हे पवितर आत्मा मिलेड़ै लोगां नै बतावां।
14 झिकै माणस नै पवितर आत्मा कोनी मिली, परमेसर गी आत्मा ऊं बताएड़ी बातां नै समझै कोनी। बे आ बाता नै मूरखता गी बातां समझै। पवितर आत्मा मिलेड़ा माणस ई परमेसर गी आत्मा ऊं बताएड़ी बातां समझ सकै।
15 पवितर आत्मा मिलेड़ा माणस हर एक बात समझण में कामयाब होवै। पण झिका नै पवितर आत्मा कोनी मिली बे लोग पवितर आत्मा मिलेड़ै माणसां गै विचारां नै कोनी समझ सकै।
16 पवितर सासतर में इंया लिखेड़ो है कै,
“प्रभु गै मन नै कोई कोनी जाणै है।
प्रभु नै कोई बी सिखा कोनी सकै।”b
पण आपां आ बाता नै समझा हा क्यूंकै आपणै में मसी गो मन है।