कुरुन्थी सैहर गै मसी लोगा गै नाम
यीसू मसी गै खास चेलै पौलुस गो पेलो खत
1
1 मैं पौलुस ओ खत आपणै बिस्वासी भाई सोस्थिनिस गै सागै कुरुन्थी सैहर में रेण आळै बिस्वासियां खातर लिखण लागरयो हूं। मनै परमेसर आपगी इच्छा गै अनुसार यीसू मसी गो खास चेलो कर'गे बुलायो है।
2 ओ खत थारै खातर है झिका यीसू मसी में पवितर करया है। अर सारा लोग बठै ई रेगे आपगै प्रभु यीसू मसी गै नाम गी पराथना करै है बांगै खातर बी लिखण लागरयो हूं। बो बांगो अर आपां सारा बी प्रभु गा हा।
3 थानै पिता परमेसर अर प्रभु यीसू मसी गी ओर ऊं किरपा अर सांती सदा ई मिलती रेवै। आमीन।
प्रभु में आसिस
4 हे मेरा भाईयो अर भेनों, थानै यीसू मसी गी ओर ऊं परमेसर गी किरपा मिली है। ईंखातर मैं थारै खातर परमेसर गो सदा धन्यवाद करूं हूं।
5 थे यीसू मसी गै सागै एक होण गै कारण थानै आत्मिक जीवन में भोत आसिस मिली। परमेसर गो बचन समझण अर दूसरा नै समझाण खातर बी ग्यान मिल्यो है।
6 म्हे थानै झिकी सारी बातां यीसू मसी गै बारे में बताई है बे साची है। अब थानै ईं बात गो पतो लागग्यो है।
7 परमेसर थानै सारा नै सारा आत्मिक वरदान दिया है। ईंखातर थे सगळा आपणै प्रभु यीसू मसी गै आण गी उडीक करता रेओ।
8 प्रभु यीसू मसी सारी माणस जाती गो न्याय करण खातर आण गै टेम तांई परमेसर थानै पाप ऊं बचागे थारै बिस्वास नै मजबूत कर'गे राखसी।
9 आपगै बेटै प्रभु यीसू मसी गी संगती में थानै बुलाण आळो परमेसर बिस्वास लायक है।
बिस्वासी मण्डली गै लोगां में फूट
10 हे मेरा भाईयो अर भेनों, मैं थानै प्रभु यीसू मसी गै नाम ऊं बिनती करूं कै थे लोग आपसरी में लड़ाई झगड़ा कर'गे न्यारा न्यारा ना हो। थारा सारा कामां में एक मन अर एक बात होवै।
11 क्यूंकै खलोए भेन गै घर गै लोगां मनै पेला बतायो कै थारै बिचाळै लड़ाई झगड़ा होवैे।
12 मेरो केण गो मतलब ओ है कै थारै मूं लोग न्यारी न्यारी बातां करै है। कोई केवै, “म्हे पौलुस गै सागै हा,” कोई केवै, “म्हे अपुलुस गै सागै हा,” कोई केवै, “म्हे पतरस गै सागै हा” अर केई केवै, “म्हे मसी गै सागै हा।”
13 आ बात बिलकुल गळत है। मसी न्यारा न्यारा झुण्ड कोनी बणाया। मैं पौलुस थारै खातर करूस पर मरयो कोनी अर मेरै नाम में थे बतिस्मो बी कोनी लियो।
14-15 कोई बी इंया कोनी बोल सकै कै मैं पौलुस गै नाम में बतिस्मो लियो है। ईंखातर मैं परमेसर गो धन्यवाद देऊं कै भाई क्रिसपुस अर भाई गयुस नै छोड़गे मैं किनैई बतिस्मो कोनी दिओ।
16 अर ओ बी मनै याद है कै भाई स्तिफनुस गै घराणै गै लोगां नै मैं बतिस्मो दियो।
17 क्यूंकै मसी मनै बतिस्मो देण खातर कोनी घाल्यो पण सुब समाचार सुणाण खातर घाल्यो। मैं सुब समाचार बतावंतां टेम आपगी समझ कोनी बरतूं, जे मैं इंया करतो तो लोग मसी गै करूस पर मरण गी बात नै भूल जावंता अर बिनै इतो आदर कोनी देवंता।
मसी परमेसर गो ग्यान अर ताकत है
18 नास होण आळा लोग मसी गै करूस पर मरण गी बात नै म्हत्व कोनी देवै। पण आपां मुकती मिलेड़ा लोग आ बात जाणा हा कै आ परमेसर गी ताकत है।
19 पवितर सासतर में इंया लिख्यो है कै,
“मैं संसार गै ग्यानी लोगां नै कोई म्हत्व कोनी दियो।
मैं इंया कर'गे दिखाऊंगा कै बे लोग बिलकुल ग्यानी कोनी।a”
20 इऊं मनै पतो लागग्यो कै दुनिया गै ग्यानी लोगां गै ग्यान गी कोई किमत कोनी। अर मूसा गै नेम विधान नै सिखाण आळा गी कोई किमत कोनी। संसार में वाद विवाद करण आळा गी कोई किमत कोनी। परमेसर दुनिया ऊं मिलण आळै ग्यान नै कोई म्हत्व कोनी देवै।
21 परमेसर ग्यानी है। अर बण इंया फैसलो लियो कै दुनिया गा ग्यानी लोग आपगै ग्यान ऊं परमेसर नै मान कोनी सकै। पण इंगै बदले में म्हे झिका मसी गै बारे में परचार करण आळै सुब समाचार पर बिस्वास करण आळा नै बचाणो परमेसर नै आच्छो लाग्ग्यो।
22 यहुदी लोग सुब समाचार नै म्हत्व कोनी देवै क्यूंकै बे लोग सुब समाचार नै मानण खातर कोई निसान देखणो चावै अर गेर यहुदी लोग ईं सुब समाचार नै मानण खातर ग्यान मांगै है।
23 जद म्हे यीसू मसी गै करूस गी मरण गी बात यहुदी लोगां नै बतावा तो बे लोग ईं बात पर बिस्वास करण में मुसकिल होवै अर गेर यहुदी लोग ईं बात नै मूरखता गी बात समझै।
24 पण परमेसर गा चुणेड़ा यहुदी अर गेर यहुदी लोगां खातर मसी परमेसर गी ताकत अर ग्यान है।
25 परमेसर गी मूरख योजना संसार गै ग्यानी लोगां गी योजना ऊं उतम है। अर परमेसर गी कमजोरी संसार गै लोगां गी ताकत ऊं भोत ताकत्वर है।
26 हे मेरा भाईयो अर भेनों, जद थानै परमेसर बुलाया, बि टेम गा बारे में थे सोचो। दुनिया गै लोगां थानै इता ग्यानी कोनी समझै अर ना थे लोग इता ताकतवार हा अर ना थे कोई ऊंचै परिवार ऊं आया।
27 परमेसर ग्यानी लोगां नै सरम मारण खातर संसार गै मूरख लोगां नै चुण लिया अर संसार में ताकतवार लोगां नै सरम मारण खातर संसार गा बा लोगां नै चुण लिया झिका खास कोनी।
28 संसार गी खास बाता नै नास करण खातर परमेसर नीचा अर झिका कीं काम गा कोनी बानै चुण लिया।
29 परमेसर ऐ सारी बातां ईंखातर करी कै कोई बी माणस बिंगै सामै घमण्ड ना करै।
30 परमेसर थानै यीसू मसी गै सागै मिलायो अर बचायो। परमेसर मसी गै द्वारा आपां नै ग्यान दियो अर बण ई आपां नै परमेसर गै सामै धरमी बणाया अर बण ईं आपां नै परमेसर गै सामै पवितर लोग बणायो अर बण ई आपां नै सारी बुराई ऊं छुड़ाया।
31 ईंखातर पवितर सासतर में इंया लिख्यो कै, “कोई बी माणस घमण्ड करणो चावै तो बो प्रभु गी करेड़ी बातां नै याद कर'गे घमण्ड करै।”b