खास चेला 23

1 पौलुस महा पंचायत कानी देख्यो अर केयो, “हे भाईयो, मैं आज तांई परमेसर खातर सच्चै मन ऊं जीवन बितायो है।” 2 ईं पर हनन्याह महा याजक झिको बिंगै कनै खड़यो बिंगै मू पर थपड़ मारण गो हुकम दियो। 3 जद पौलुस बिनै केयो, “ऐ कळी करेड़ी कंद, परमेसर तेरै मारसी। तू मूसा गै नेम विधान गै अनुसार मेरो न्याय करण खातर बैठयो है अर विधान गै विरुद्ध मेरै मारण गी आग्या देवै।”

4 झिका बिंगै कनै खडया, बा केयो, “तू परमेसर गै महा याजक नै आच्छो माड़ो क्यूं बोलै।”

5 पौलुस बिनै उतर दियो, “मैं कोनी जाणूं है कै बो महा याजक है।” पवितर सासतर में इंया लिखेड़ो है, “आपगै लोगां गै प्रधान नै भलो बुरो ना केवै।”

6 जद पौलुस ओ जाण्यो कै ओ झुण्ड संदूकियां गो अर दूसरो फरीसियां गो है। बण पंचायत नै हेलो मारगे केयो, “हे भाईयां, मैं एक फरीसी हूं अर मेरा बडेरा बी फरीसी हा। मेरै बिस्वास ओ कै सारा मरेड़ा नै जी उठण गै बाद एक जीवन ओर मिलैगो, ईं बात गो मेरै पर मुकदमा चालै।” 7 जद बण आ बात केई तो फरीसियां अर संदूकियां में लडाई होगी अर पंचायत में फूट पड़गी। 8 क्यूंकै संदूकियां जी उठण अर सुरगदूत अर आत्मा गै बारे में कोनी मानता हा पण फरीसी लोग आ बाता नै मानता हा।

9 जद बोळो रोळो मच गेयो अर कीं सासतरी झिका फरीसियां गै दल गा, खडया होगे बोलण लागग्या, म्हे ईं आदमी में कोई बुराई कोनी देखी। कोई आत्मा अर सुरगदूत बिंगै सागै बात करी हो'सी। 10 जद बोळो रोळो मच गयो तो पलटण गै मुखय नै ओ डर ग्यो कै लोग पौलुस गा टुकड़ा टुकड़ा ना कर दय। ईंखातर बण मुखय सिपाईयां नै हुकम दियो कै बिनै धका ऊं पकड़गे किले में ले आओ।

11 बि रात प्रभु बिंगै कनै खड़यो होगे केयो, “पौलुस, सबर राख क्यूंकै जिंया यरुसलेम में तू मेरी आ गवाई दी है बिंया रोम में बी गवाई देणी हो'सी।”

पौलुस नै मारण गी योजना

12 जद दिन उगग्यो तो यहुदियां चाल चाली अर सोगन खाई कै जद तांई म्हे पौलुस नै मार ना दया जद तांई मैं खाणो पीणो कोनी करांगा। 13 झिका सोगन खाई बे लगभग 40 जणा हा। 14 बा मुख्य याजक अर बुडे लोगां गै कनै जा'गे केयो, म्हे ईं बात में मन बणा लियो कै जद तांई पौलुस नै मार ना दया जद तांई कोई चीज गै मूं कोनी लगावां। 15 ईंखातर अब पंचायत समेत मुख्य नै समझावो कै बिनै थारै कनै ले आवै। थे बानै केवो कै म्हे इंगी ठीक ठीक जांच करणी चावां। बिंगै पोंचण ऊं पेला ई म्हे बिनै मारण खातर तैयार रेवांगा।

16 जद पौलुस गै भाणजै सुण्यो कै बे बिंगी झाक में है तो किले में जा'गे पौलुस नै बता दियो।

17 पौलुस सुबेदार मूं एक नै आपगै कनै बुलायो अर केयो, “ईं जवान नै मुख्य गै कनै ले ज्याओ, ओ बिनै कीं केणो चावै है।” 18 ईंखातर बण बिनै मुख्य गै कनै जा'गे केयो, “बंदी पौलुस मनै बुला'गे बिनती करी है कै ओ जवान मुख्य नै कीं केणो चावै। इनै बिंगै कनै ले जावो।”

19 पलटण गै मुख्य बिंगो हात पकड़गे न्यारो कर'गे पूछयो, “तू मनै के केणो चावै।”

20 बण केयो, “यहुदियां योजना बणाई है कै म्हे बिंगी ठीक ठीक जांच करणी चावां अर ईंखातर बे तेरूं बिनती करसी कै काल पौलुस नै पंचायत में ल्याओ।” 21 पण बांगी ना मानियो क्यूंकै बे चालीस आदमी ईं झाक में है झिका मन बणा लियो जद तांई बे पौलुस नै मार ना दय जद तांई ना कीं खावै ना कीं पीयै। इंया करण खातर अब बे तैयार है थारै आदेस गी उडीक करै।

22 जद पलटण गै मुख्य जवान नै आग्या कर'गे विदा करयो कै किनैई ना बताई तू आ बात मनै बताई है।

पौलुस नै फेलिक्स गै कनै घाल्यो जाणो

23 जद बण दो सुबेदार नै बुला'गे केयो, दो सौ सैनिक, सतर सवार अर दो सौ भाला रात नौ बजे कैसरिया में जाण खातर तैयार राखो। 24 अर पौलुस गी सवारी खातर घोड़ा तैयार राखो कै बिनै फेलिक्स गै कनै राजी खुसी पोंचा दय।

25 बण ईं तरियां फेलिक्स नै खत बी लिख्यो।

26 महाराज फेलिक्स क्लोदियोस लुसियास गो निमस्कार।

27 ईं आदमी नै यहुदी लोगां पकड़गे मारणो चायो। जद मनै पतो लागग्यो कै बो रोमी है तो पलटण घालगे छुड़ा लियो। 28 बि पर क्यामी दोस लगावै है मैं ओ जानणो चावै हो, बे लोग बि पर क्यामी दोस लगावै, ईंखातर बिनै बांगी पंचायत में लेग्यो। 29 जद मैं जाण लियो कै बे आपगै नेम विधान गै बारे में बि पर दोस लगावै है। पण मारण अर बांधण गै लायक इमै कोई दोस कोनी। 30 जद मनै पता लागग्यो कै बे ईं आदमी गी झाक में है, तो मैं बि टेम ई बिनै तेरै कनै घाल दियो। अर बा लोगां नै हुकम दियो कै बे तेरै कनै आ'गे झिको दोस लगावै बो थानै बतावै।

31 जिंया सैनिकां नै आग्या दी बे बिंया ई पौलुस नै रातो रात अंतिपतरिस में ले आया। 32 दूसरै दिन बे घोडां गै सवार नै बिंगै सागै जाण खातर छोड़गे आप किले में उड़ग्या। 33 बा कैसरिया पोंचगे हाकिम नै खत दियो अर पौलुस नै बी बिंगै सामै खड़यो करयो। 34 बण खत पढगे पौलुस नै पूछयो, “तू गिसै प्रदेस गो है।” पौलुस उतर दियो कै, “मैं किलिकिया प्रदेस में रेण आळो हूं।” 35 फेर महाराज केयो, “जद तेरै पर दोस लगाण आळा आ ज्यगा तो मुकदमा पर बात चीत करांगा।” अर बण बिनै हेरोदेस गै किले में सुरक्सा में राखण खातर हुकम दियो।