खास चेला 24

महाराज फेलिक्स गै सामै पौलुस

1 पांच दिना गै बाद हनन्याह नाम गो महा याजक केई बुडे लोग अर तिरतुलुस नाम गै बकिल नै लेगे आयो। बो अधिकारिया गै सामै पौलुस पर दोस सिद्ध करण आयो। 2 जद पौलुस नै बुला'गे तिरतुलुस बि पर दोस लगागे केण लागग्यो, हे महाराज फेलिक्स, तेरै बारे में म्हे बडा खुस हा क्यूंकै थारै राज में म्हे सारा भोत उन्नती करी अर म्हानै सांती बी मिली। 3 इनै म्हे हर जिग्या हर प्रकार ऊं धन्यवाद गै सागै माना। 4 पण मैं थारो जादा टेम कोनी लेणो चाऊं, मैं बिनती करूं कै किरपा कर'गे म्हारी दो बात सुणो।

5 म्हे ईं आदमी नै झगडालू अर सारै जगत में लडाई कराण आळो अर नासरी धरम गा एक मोटो आदमी मान्यो है। 6 अण मिन्दर नै असुद्ध करणो चायो पण म्हे इनै पकड़ लियो। म्हे इनै आपगै अनुसार सजा देण खातर सोच्यो। 7 (पण पलटण गै मुखिया लुसियास बिनै धकै ऊं म्हारै कनू छुड़ा लियो)। 8 अर दोस लगाण आळा नै थारै सामणै आण गी आग्या दी। थे आप ई आ बातां गी जांच करो तो थानै पतो चालज्य गो कै ऐ बात सच्च है।

9 यहुदियां बी बांगै सागै रळगे केयो, ऐ बातां सच्च है।

10 जद महाराजा पौलुस नै बोलण गो इसारो करयो तो बण उतर दियो मैं जाणूं हूं कै थे ईं जाती गो भोत सालां ऊं न्याय करण लागरया हो। मैं बडी खुसी ऊं आपगी बात थारै सामै रखूं। 11 मनै यरुसलेम आराधना करण आया तो बारा दिन कोनी होया। आ बात थे जाणो हो। 12 बा मनै ना नगर में, ना सतसंग घर में, ना मिन्दर में, ना किंगैई सागै ऊंच नीच करता अर ना भीड इकठ्ठी करता देख्यो। 13 अर बे झिकी बातां गो दोस लगावै है थारै सामणै सच्च कोनी साबित कर सकै। 14 प्रभु नै मानण आळै एक आदमी जिसो मैं मेरा बडेरां गै परमेसर गी आराधना करतो रेवूं। मैं परमेसर गै नेम विधान अर परमेसर गी बात बताण आळा गी किताब में लिखेडी सारी बातां नै मानूं। फेर बी ऐ लोग मेरै बिस्वास नै गलत बतावै है। 15 मैं परमेसर पर भरोसो राखूं बिंया ई बे बी करै कै धरमी अर अधरमी दोनां गो जी उठणो हो'सी। 16 ईंखातर मैं आप ई कोसिस करतो रेवूं कै परमेसर अर आदमियां कानी मेरो मन सदा साफ रेवै।

17 भोत सालां गै बाद मैं आपगै लोगां में दान देण अर भेंट चढाण आयो। 18 बा मनै मिन्दर में बिना भीड़ गै सागै अर बिना लडाई करता भेंट चढावंता पकड़यो। 19 आसिया गा केई यहुदी बठै हा। जे मेरै खिलाफ कीं बात ई तो बे थानै आ'गे बता सका। 20 अठै झिका लोग है थे बानै पूछो कै जद मैं पंचायत में खड़यो होयो जद मेरै में के दोस देखियो? 21 एक बात नै छोड़गे झिकी मैं बांगै बिचाळै खड़यो होगे केई कै मरेडां गै जी उठण गै बारे में। बि खातर आज थारै सामै मुकदमो होण लागरयो है।

22 महाराज फेलिक्स नै प्रभु गी बातां नै ठीक ठीक जाणै हो फेर बी बण केयो, “पलटण गो मुखिया लुसियास आवैगो तो तेरो फैसलो करूंगा।” 23 सुबेदार नै हुकम दियो कै पौलुस नै कीं छूट दे दयो। कोई बिंगी जरूरत पूरी करै तो बिनै ना रोको।

फेलिक्स अर दुरसिला गै सामै पौलुस

24 केई दिनां गै बाद महाराज फेलिक्स आपगी लुगाई दुरसिला झिकी यहुदिनी ही सागै लेगे आयो अर पौलुस नै बुला'गे बिंगो झिको बिस्वास यीसू मसी पर हो बिंगै बारे में सुण्यो। 25 जद पौलुस परमेसर गी नजर में आच्छै कामा गै बारे में अर म्हारी सारी इच्छा नै काबू राखण गै बारे में अर परमेसर गै न्याय गै दिन गै बारे में बी बतायो। तो बो डर गयो अर उड़ग्यो अर केयो, “तूं अठुं उड़जा, जे मनै तेरूं जरूरत हो'सी तो मैं तनै बुलाऊंगा।” 26 बिनै पौलुस कनूं कीं रिस्वत मिलण गी बी आस ही। ईंखातर बिनै बारी बारी बुला'गे बात करतो।

27 दो साल गै बाद पुरुखियुस फेस्तुस फेलिक्स गी जिग्या पर आयो अर फेलिक्स यहुदियां नै खुस करण खातर पौलुस नै केद में ई छोड़ ग्यो।