खास चेला 22

1 हे मेरा यहुदी साथियों अर मेरा बुजुरगों सुणो, मैं मेरै कनूं कीं केणो चाऊं। 2 बे सारा ओ सुणगे चुप हो'ग्या क्यूंकै बो बांगी इब्रानी बोली में केवै हो।

3 मैं तो एक यहुदी हूं झिको किलिकिया गै तरसूस में पैदा होयो, ईं नगर में गमालिएल गै पगां में बैठगे पढयो अर बाप दादा गो देयड़ो नेम विधान ठीक ठीक सीख्यो अर परमेसर गै खातर हिसी लगन लागी कै जिंया आज थानै सारां नै लागरी है। 4 झिका यीसू मसी नै मानण आळा हा बानै सताया अर मरवा बी दिया। मैं भोत सारी लुगाईयां अर आदमियां नै बांदगे जेळ में रेड़या। 5 ईं बात गा महा याजक अर बुड़ा लोग गवाह है। मैं बांगै कनूं बिस्वासियां गै नाम गी चिट्टी लेगे बानै बांधण अर जेळ में केद करण खातर दमिसक गेयो हो कै बांदगे यरुसलेम में ल्याऊं।

आपगै मन बदळण गी गवाई

6 जद मैं चालतो चालतो दमसिक कनै पूगग्यो तो दोफारे एकदम मोटी जोती चमकी अर मेरै च्यारूंमेर होगी। 7 मैं जमीन पर पड़ग्यो अर ओ सुणयो, “हे साऊल हे साऊल, तू मनै क्यूं तंग करै?”

8 मैं उतर दियो, “हे प्रभु तू कुण है?” बण मनै केयो, “मैं यीसू नासरी हूं झिकै नै तू तंग करै है।”

9 मेरै साथिया जोती तो देखी पण झिकी आवाज मेरै खातर आयी, बा ना सुणी।

10 जद मैं केयो, “हे प्रभु मैं के करूं?” प्रभु मनै केयो, “तू उठगे दमसिक जा, झिको तनै करण खातर ठेरायड़ो है बो बठै तनै बता दियो जावैगो।”

11 बा जोती इती तेज ई कै मनै बी कीं कोनी दिख्यो, मैं आपगै साथिया गो हात पकड़गे दमसिक में आयो।

12 बठै एक हनन्याह नाम गो परमेसर गै नेम विधान नै मानण आळो हो अर सारा लोग बिंगी इज्जत करता, बो मेरै कनै आयो। 13 अर केयो, “हे साऊल, फेर ऊं देखण लागज्या। बि टेम ई मेरी आंख खुलगी अर दिखण लागग्यो।”

14 जद बण केयो, “म्हारै बडेरां गै परमेसर गी इच्छा नै जानण खातर अर बि धरमी नै देखण खातर अर बिंगी बातां सुणण खातर तनै चुण्यो है।” 15 क्यूंकै तू बिंगी ओर ऊं सारै आदमियां गा सामणै बा बातां गो गवाह है तू देखी अर सुणी है। 16 अब देर क्यामी करै? उठगे बतिस्मो ले ले अर बिंगै नाम ऊं सारै पापा नै धो ले।

गेर यहुदियां में परचार सरू

17 फेर मैं यरुसलेम में आ'गे मिन्दर में पराथना करै हो तो बेसुद्ध हो'ग्यो। 18 अर मैं एक दरसण देख्यो कै बो मनै केवै है, जल्दी यरुसलेम ऊं बारै निकळ जा क्यूंकै बे मेरै बारे में बताएड़ी तेरी बाता कोनी मानै।

19 मैं केयो, “प्रभु मैं थारै पर बिस्वास करण आळा नै जेळ में बंद करतो अर सतसंग घरां में जा'गे बानै कुटतो, आ बात बे लोग जाणै है।” 20 जद तेरै गवाह स्तिफनुस नै मारयो जावै हो तो मैं बठै खड़यो हो अर बांगै सागै सेमत हो अर मारण आळा गै गाबा गी रुखाळी करै हो।

21 पण प्रभु मनै केयो, “उठ जा, मैं तनै गेर यहुदियां कनै घालूंगा।”

22 बे इतै तांई बिंगी सुणता रेया। फेर ऊंची आवाज में केयो, “हिस्यै आदमी नै खत्म करो, इंगो जींवतो रेणो ठीक कोनी।”

23 बे लोग रोळो मचावा हा अर गाबा खोलगे फेंका अर रेतो उडावा। 24 तो पलटण गै मुख्य केयो, “इनै ले गै मां ले जाओ अर कोडा मारगे जांच करो, जिऊं ठा लागै कै लोग इंगै बिरोध में इता रोळा क्यामी मचावै?” 25 जद बिनै कोडा मारण खातर बांधा है तो पौलुस सुबेदार नै केयो, “आ बात आच्छी है के, थे एक रोमी आदमी नै बिना दोस गै कोडा मारो?”

26 सुबेदार ओ सुणगे पलटण गै मुख्य कनै जा'गे केयो, “थे ओ जाणो हे कै, ओ तो रोमी है।”

27 पलटण गै मुख्य बिंगै कनै आ'गे केयो, “मनै बता, तू रोमी है?” बण केयो, “हां।”

28 ओ सुणगे पलटण गै मुख्य केयो, “मैं रोमी होण गो पद भोत रिपिया लगागे लियो।” पौलुस केयो, “मैं तो जन्म जात ऊं रोमी हूं।”

29 जद झिका लोग बिंगी जांच करावा हा बे सारा लारै हटग्या अर पलटण गा मुख्य बी ओ जाणगे कै बो रोमी है जद डर गया।

पंचायत गै सामै पौलुस

30 दूसरै दिन पलटण गा मुख्य बिंगी सई जांच कराणी चाई कै यहुदी बि पर दोस क्यामी लगावै। ईंखातर बिनै खोल दियो अर मुख्य याजकां अर सारी पंचायत भेळी होण गो हुकम दियो। अर पौलुस नै ले जा'गे बांगै सामणै खड़यो कर दियो।