खास चेला 21

पौलुस गो यरुसलेम जाणो

1 जद म्हे बाऊं विदाई लेगे जहाज खोल्यो अर सीदे रा मूं कोस में आया अर दूसरै दिन रोदुस में अर बठूं पतरा में आया। 2 बठै एक जहाज फीनिक में जावंतो मिल्यो अर म्हे बि पर चड़ गया। 3 जद साईप्रस टापू सामणै दिखण लागरयो तो म्हे बिनै बायै हात छोड़ दियो अर सिरिया में जा'गे सूर में उतरया। क्यूंकै बठै जहाज ऊं समान उतरणो। 4 चेलां नै मिलगे म्हे बठै सात दिन रेया। बा पवितर आत्मा में होगे पौलुस नै यरुसलेम जाण ऊं रोक्यो। 5 बठै रेण गो आपगो टेम पूरो कर'गे बठूं विदाई ली अर आपगी यातरा पर चाल पड़या। बठै गा लोग लुगाईयां अर टाबरां गै सागै नगर गै बारै म्हारै सागै आया। अर म्हे बठै समुन्दर गै किनारै म्हे गोढा टेकगे पराथना करी। 6 जद म्हे बा लोगां ऊं मिलगे जहाज में चड़ग्या अर बे लोग आप आपगै घरां कानी चाल पड़या।

7 जद सुरु ऊं समुनदर यातरा पूरी कर ली तो पतुलिमायिस में पूगग्या अर बिस्वासियां नै निमस्कार कर'गे बांगै सागै एक दिन रेया। 8 दूसरै दिन बठूं चालगे कैसरिया में आया अर यीसू मसी गो संदेस सुणाण आळै फिलिप्पुस गै घरै झिको बा साता मूं एक हो। बि कनै रेया। 9 बिंगी चार कुवारी बेटियां ही झिकी परमेसर गी बात करती।

10 म्हे बठै भोत दिन रेया तो अगबुस नाम गो एक परमेसर गी बात बताण आळो बठै आयो। 11 बण म्हारै कनै आ'गे पौलुस गो साफो लियो अर आपगा पग बांदगे केयो, “पवितर आत्मा इंया केवै झिकै गो साफो है बिनै यरुसलेम में यहुदी इंया ई बांधेगा अर गेर यहुदियां गै हात में देवैगा।”

12 जद म्हे ऐ बातां सुणी तो म्हे अर बठै गै बिस्वासी लोगां बिऊं बिनती करी कै यरुसलेम में ना जा। 13 ईं पर पौलुस उतर दियो, “इंया मेरो दिल ना तोड़ो, मैं यरुसलेम में बंधण खातर ई कोनी पण यीसू मसी खातर मरण खातर बी तैयार हूं।” 14 जद म्हानै पतो लागग्यो कै म्हे बिंगै मन गै फैसले नै बदळ कोनी सका। अर म्हे इंया केगे चुप हो'ग्या अर बिनै केयो जिंया प्रभु गी मरजी है बिंया होण दयो।

15 अर बठै केई दिन रेगे यरुसलेम कानी चाल पड़या। 16 कैसरिया गा बिस्वासी लोग म्हारै सागै हो'ग्या अर बे म्हानै मनासोन नाम गै एक साईप्रस गै पुराणै चेले गै घरै ले आया कै म्हे बिंगै सागै रेवा।

पौलुस गी याकूब सागै बात चीत

17 जद म्हे यरुसलेम पूगग्या तो बठै गा बिस्वासी बडी खुसी गै सागै म्हारूं मिल्या। 18 दूसरै दिन पौलुस म्हानै लेगे याकूब कनै गेयो जठै सारा बुडा लोग भेळा हा। 19 बण बानै निमस्कार कर'गे झिका काम परमेसर बिंगी सेवा गै द्वारा गेर यहुदियां में करया एक एक कर'गे सारा बताया।

20 बा ओ सुणगे परमेसर गी मेमा करी। अर केयो, “नेम विधान नै आच्छी तरियां मानण आळै यहुदी लोगा मूं केई हजार जणा बिस्वास करयो। 21 बे यहुदी लोग तेरै बारे में इंया सोचै है कै तू गेर यहुदियां में रेण आळा यहुदियां नै मूसा गी बात ना मानण खातर सिखावै अर केवै आपगै टाबरां गो खतना ना करावो अर ना बांगै नेम विधान पर चालो। 22 फेर के करयो जावै? लोग जरूर सुणेगा कै तू आयो है। 23 ईंखातर झिको कीं म्हे तनै केवां बिंया ईं कर। म्हारै अठै चार आदमियां मन्नत मानी। 24 बानै लेगे बांगै सागै अपणै आपनै सुद्ध कर अर बांगै खातर खरचो दे बे रोड़ कढावै। जद आ बात सारा जाण लेसी कै झिकी बाता तेरै बारे में केयेड़ी है बे सारी झूठ है अर बे इयां बी सोचेगा कै तू आप ई नेम विधान नै मानण आळो है। 25 पण बा गेर यहुदियां गै बारे में झिका बिस्वास करयो म्हे ओ फैसलो कर'गे लिख भेज्यो कै बे मूरतियां गै सामणै चढाएड़ी चीज अर लोई अर गळ घोटेड़ै गो मांस अर बेबीचार ऊं बचगे रेवै।”

26 ईंखातर पौलुस बानै सागै लेगे दूसरै दिन मिन्दर में जा'गे सुद्ध होयो। बठै जा'गे बण बानै बता दियो कै अपणै आपनै सुद्ध करण गा दिन कद पूरा हो'सी अर म्हारै मूं हर एक खातर चढावो कद तांई चढायो जावैगो।

मिन्दर में पौलुस गो पकड़यो जाणो

27 जद सात दिन पूरा होया तो आसिया प्रदेस गै यहुदियां पौलुस नै मिन्दर में देख्यो अर सारै लोगां नै भड़काया। अर रोळो मचागे पकड़ लियो। 28 हे इसराएल गा लोगों, मदद करो। ओ बो ई आदमी है झिको सारी जिग्या में जा'गे इसराएली लोगां गै विरुद्ध बात करै अर मूसा गै नेम विधान गै खिलाफ अर ईं मिन्दर गै खिलाफ सिखावै है। अठै तांई गेर यहुदियां नै मिन्दर में ल्यागे पवितर जिग्या नै अपवितर करै है। 29 बा आ बात ईंखातर बोली कै इफिसुस वासी त्रोफिमुस नै इंगै सागै नगर में देख्यो अर इंया सोच्यो कै पौलुस बिनै मिन्दर में ले आयो है।

30 जद सारै नगर में रोळो मच गेयो अर लोग भाजगे भेळा हो'ग्या अर पौलुस नै मिन्दर मूं खीचगे बारे काड़ ल्याया। अर बारनो बंद कर दियो। 31 बे बिनै मार देणो चावा जद पलटण गै मुख्य नै संदेस मिल्यो कै सारै यरुसलेम में रोळो मच गेयो। 32 जद बो बि टेम ई सैनिकां अर सुबेदारां नै बांगै कनै लेगे भाज्यो आयो। अर बा पलटण गै मुख्य अर सैनिकां नै देखगे पौलुस नै मारणो कूटणो छोड़ दियो।

33 पलटण गै मुख्य बिंगै कनै आ'गे बिनै पकड़ लियो अर दो सांकळां ऊं हुकम दियो अर पूछयो, “कुण है? अर के करयो है?” 34 पण भीड़ ऊं कण कीं केयो कण कीं केयो, रोळै गै मा बिनै समझ कोनी आयी तो बिनै किले में ले जाण गो हुकम दियो। 35 जद बो पेडियां पर पूग्यो तो इंया होयो कै भीड़ गै कारण सैनिकां बिनै चक'गे ले जाणो पड़यो। 36 क्यूंकै इंया रोळो मचावै ई अर बिंगै लारै पड़ गयी, इनै मार दियो।

पौलुस लोगां सागै बात करै

37 जद पौलुस किले में पूगण आळो तो बण पळटण गै मुख्य नै केयो, मैं तनै कीं पूछूं, बण केयो, “तू युनानी बोली बोलै हे के?

38 तू चार हजार लोगां नै बन उजाड में लेग्यो, तू बी मिस्री हे के?”

39 पौलुस केयो, “मैं तरसूस गो यहुदी हूं। किलिकिया गै तरसूस नगर गो रेण आळो हूं। मैं तेरू बिनती करूं कै मनै लोगां ऊं बात करण दे।”

40 जद बण आग्या दी तो पौलुस पेडियां पर खड़यो होगे लोगां नै हात ऊं इसारो करयो, जद बे चुप हो'ग्या तो पौलुस इब्रानी बोली में बोलण लागग्यो।