मकिदुनिया, युनान अर त्रोवास में पौलुस
20
1 जद रोळो रुकग्यो तो पौलुस चेला नै बुला'गे बांगो होसलो बधायो अर बा कनूं विदा ली अर मकिदुनिया कानी चाल पड़यो।
2 बि टेम सारै प्रदेस ऊं होगे चेलां नै भोत होसलो देगे बो युनान में आयो।
3 बठै तीन मिंना रेगे जहाज में सिरिया जाण गी तैयारी में हो तो यहुदी बिंगै बिरोध में होगे लारै हो'ग्या। ईंखातर बण ओ फैसलो लियो कै मकिदुनिया होगे पाछो उड़ जाऊं।
4 बिरिया गै पिरूस गो बेटा सोपत्रुस अर थिसलुनिकिया में रेण आळा अरिस्तरखुस अर सिकुन्दुस अर दिरबे गो गायुस अर तीमुथियुस अर आसिया गो तुखिकुस अर तरफिमुस बिंगै सागै हो'ग्या।
5 बे आ'गे जा'गे त्रोवास में म्हारी उडीक करां।
6 अर फसह गै त्यूंहार गै दिनां गै बाद फिलिप्पी ऊं जहाज में चड़ गै पांच दिनां में बिंगै कनै गेया। अर सात दिन बठै ई रेया।
त्रोवास में युतुखुस नै जींवतो करयो जाणो
7 हफ्ते गै पेलै दिन जद म्हे रोटी तोड़ण खातर इकट्टा होया। पौलुस नै अगले दिन जाणो हो ईंखातर आदी रात तांई बांऊं बात करतो रेयो।
8 झिकै माळिया में म्हे इकट्टा हा बिमै भोत दिया जगा।
9 अर युतुखुस नाम गो एक जवान बारी कनै बैठयो अर बिनै नींद आ'गी। जद पौलुस भोत देर तांई बात करतो रेयो तो बो नींद में तीसरी मंजील ऊं नीचे पड़ग्यो अर पडताई मर ग्यो।
10 पण पौलुस उतरगे बिंगै बांथ भरली अर गळै लाग गै केयो, “ओ मरयो कोनी अजे जींवतो है।”
11 अर उपर जा'गे प्रभु भोज में सामिल हो'ग्यो अर इती देर बांगै सागै बात करतो रेयो अर दिन उगग्यो अर फेर बो उडग्यो।
12 अर बे बि जवान नै जींवतो ले आया अर सारा नै भोत सांती मिली।
त्रोवास ऊं मिलेतुस गो सफर
13 म्हे पेला ई जहाज में बैठगै अस्तुस कानी चाल पड़या क्यूंकै म्हे पौलुस नै जहाज में चढाणो चावा। पण बो खुद पैदल आणो चावो।
14 बो अस्तुस में म्हानै मिल्यो तो म्हे बिनै जहाज में बिठा लियो अर एक सागै मितलेन में चाल पड़या।
15 दूसरै दिन बठूं चालगे म्हे खियुस गै सामै जा पूग्या अर अगले दिन सामोस गेया अर फेर बिंगै बाद एक दिन में मिलेतोस में आया।
16 पौलुस पिन्तिकुस्त गै दिन यरुसलेम पोंचणो चावै हो। जद बण इंया सोच्यो कै इफिसुस गै कनकर आसिया में बिना रुक गै बेगो जाऊं।
इफिसुस गै बडेरा नै संदेस
17 बण मिलेतुस में इफिसुस ऊं संदेस घालगे बिस्वासी मण्डली गै बुडे लोगां नै बुलाया।
18 जद बे बिंगै कनै आया तो बण केयो, “थे जाणो हो कै पेलै दिन ऊं लेगे आज तांई आसिया में मैं थारै सागै किंया रेयो।”
19 मैं आसिया आण गै दिनूं ई यहुदियां मनै रोकण गी भोत कोसिस करी अर मनै तंग करयो। फेर बी मैं आंसू भा भागे दीनता गै सागै परमेसर गी सेवा करतो ई रेयो।
20 झिकी झिकी बातां थारै बिस्वास नै मजबूत करण गी है, बे लोगां गै घर घर जा'गे सिखाण में कदी कोनी घबरायो।
21 यहुदियां अर गेर यहुदियां सामणै गवाई देवंतो रेयो कै परमेसर कानी मन फिरावो अर मन फिरागे म्हारै प्रभु यीसू मसी पर बिस्वास करणो चाइयै।
22 पवितर आत्मा नै मानगे मैं यरुसलेम जाऊं अर मनै पतो कोनी मेरै सागै बठै के बितेगो?
23 पवितर आत्मा मनै हर एक नगर में मेरै सागै होण आळो दुख अर परेसानी बतावै है। इंगै अलावा आ'गे के हो'सी मनै पतो कोनी।
24 मैं आपगै प्राण नै कीं कोनी समझू पण मैं आपगी सेवा पूरी करूं झिकी परमेसर गी किरपा ऊं सुब समाचार सुणाण गी गवाई देण खातर यीसू मसी कनूं मनै मिली है।
25 मैं जाणूं कै सारा झिकै नै परमेसर गो राज गो परचार करयो हो थे बिनै अब कोनी देखूंगा।
26 मैं थानै सारो कीं पेला बता दियो। जद कीं लोगा मेरी बातां नै कोनी मानी तो अब बा जिमेदारी मेरी कोनी।
27 क्यूंकै मैं परमेसर गी सारी इच्छा थानै बताण ऊं कदी कोनी लारै हट्यो।
28 ईंखातर आपगी अर आपगै बिस्वासी लोगां गी रुखाळी करता रेओ। जिंया पवितर आत्मा थानै बांगी रुखाळी करण खातर बणाया है कै थे परमेसर गै बा बिस्वासियों गो ध्यान राखो झिका नै बण आपगै खून गै बदले मोल लिया है।
29 मैं जाणूं हूं कै मेरै जाण गै बाद गळत सिक्सा देण आळा भेड़िया बरगा लोग थारै मां आवैगा अर थानै पूरी तरियां खिंडा दयगा।
30 आपणै बिचाळूं हिस्या हिस्या लोग उठेगा झिका बिस्वासियां नै साची बात तोड़ मरोड़ गै बतासी अर आपगै लारै लगा लेसी।
31 ईंखातर सावधान रेवो। याद राखो कै मैं तीन साला तांई दिन रात थानै सचेत करणो कोनी छोड़यो।
32 अर अब मैं थानै परमेसर गै अर बिंगी किरपा गै बचन नै थारै हाता में देऊं झिको थारी तरकी कर सकै अर सारै पवितर करेडा लोगां गै बिचाळै थानै आपगा वारिस बणा सकै।
33 मैं किंगैई धन अर गाबा गो लालच कोनी करयो।
34 थे आप ई जाणो है कै मैं आ हाता ऊं मेरै अर मेरै साथियां गी जरूरत नै पूरी करी।
35 मैं काम कर'गे भोत सारा बेसारा लोगां नै संभाळ्या, ईं बात गो थानै पतो है। प्रभु गो बचन इंया केवै है कै लेण आळै ऊं जादा देण आळो भलो होवै है।