खास चेला 19

इफिसुस नगर में पौलुस

1 जद अपुल्लोस कुरिन्थुस में हो पौलुस मांयलै सारै प्रदेसा में सफर करतो होयो इफिसुस में आयो। बठै बिनै कीं बिस्वासी लोग मिल्या। 2 बण बानै पूछयो, “जद थे बिस्वास करयो तो पवितर आत्मा मिली के? बा केयो म्हे तो पवितर आत्मा गी बात ई कोनी सुणी।”

3 पौलुस बानै केयो, “थे फेर किंगै नाम में बतिस्मो लियो?” बा केयो, “यूहना गै बतिस्मो लियो।”

4 पौलुस केयो, “यूहना तो ओ केगे मन बदळण गो बतिस्मो दियो कै झिको मेरै बाद आण आळो है, बि यीसू मसी पर बिस्वास कर।” 5 ओ सुणगे बा प्रभु यीसू गै नाम पर बतिस्मो लियो। 6 जद पौलुस बा पर हात रख्यो अर तो पवितर आत्मा बा पर आई अर बे न्यारी न्यारी बोली बोलण अर परमेसर गी बात बोलण लागग्या। 7 ऐ सारा बारा आदमी हा।

8 पौलुस सतसंग घर में जा'गे तीन मिंना तांई कोई बिना डर गै बोलतो रेयो अर परमेसर गै राज गै बारे में बात चीत करतो अर समझावंतो रेयो। 9 पण केई लोगां बिंगी बात कोनी मानी अर प्रभु गै खिलाफ कीं बुरी बात केण लागग्या। ईंखातर पौलुस कीं बिस्वासियां नै सागै लेगे तरन्नुस गी पढण आळी जिग्या में लेग्यो अर हर रोज बानै सिखावंतो रेवंतो। 10 दो साला तांईं इंया होंतो रेयो अर ईंखातर आसिया गा रेण आळा सारा यहुदी अर गेर यहुदी प्रभु गो बचन सुण लियो।

11 परमेसर पौलुस गै हात ऊं अनोखो काम दिखावंतो रेयो। 12 अर बिंगो साफो अर साफा बिंगै सरीर गै लगागे बीमार गै लगावंता तो बीमारी दूर हो जावंती अर ओपरी बी निकल जावंती।

13 जद कीं यहुदी झिका नगर नगर में जा'गे जादू टूणा करता। झिकै लोगां में ओपरी बडेड़ी होवंती बानै केवंता कै यीसू गै नाम ऊं निकळ जा। बि यीसू गै नाम लेगे केवूं झिकै गो परचार पौलुस केवै है बि नाम ऊं आग्या देऊं कै इमूं निकळ जा। 14 स्कीवा नाम गै यहुदी महा याजक गै सात बेटा हा, बे सारा इंया करता। 15 एकर ओपरी बानै केयो, “यीसू नै मैं जाणूं अर पौलुस नै बी मैं जाणूं, थे लोग कुण हो?” 16 झिकै आदमी में ओपरी ही बिमुं निकळगे बामै बड़गी अर बांगी हिसी हालत करी कै बे नांगा घायल होगे बि घर ऊं निकळगे भाजग्या।

17 आ बात इफिसुस में रेण आळा सारा यहुदी अर गेर यहुदी जाणग्या अर सारा डर गया अर प्रभु यीसू मसी गै नाम गी बडाई करी। 18 झिका बिस्वास करयो बामूं भोत सारा आप आपगै करेड़ा गळत कामां नै सारा गै सामणै मान लिया। 19 टूणा करण आळा भोत सारा आपगी आपगी किताबा भेळी कर'गे सारां गै सामै बाळ दी अर जद बांगो मोल जोड़यो तो पचास हजार चांदी गै सिकां गै बराबर होयी। 20 ईं तरियां प्रभु गो बचन बड़ी सामरथ ऊं फेलतो गेयो।

21 जद सारी बातां होगी तो पौलुस सोच लियो कै मकिदुनिया अर अखाया ऊं होगे यरुसलेम जाऊं। बठै जाण गै बाद मनै रोम गै बिस्वासियां नै बी मिलणो है। 22 ईंखातर आपगै दो साथियां तीमुथियुस अर इरास्तुस नै मकिदुनिया घालगे आप केई दिन आसिया में रेयो।

इफिसुस में लडाई झगड़ो

23 इफिसुस में बा दिना में प्रभु गै बारे में भोत रोळो पड़यो। 24 क्यूंकै देमोतिरियुस नाम गो एक सुनार हो, बो अरतिमुस देवी गा चांदी गा मिन्दर बणावंतो हो झिकै मूं मिसतरियां नै भोत काम मिलतो। 25 बण ओ काम करण आळै सारै मिसतरियां नै इकट्टा करया अर केयो, “हे भाईयां, थे जाणो है कै ईं काम में आपां नै कितो धन मिलै।” 26 पौलुस इफिसुस अर सारै आसिया में लोगां नै किंया बहकाया थानै पतो है। बो इंया ई लोगां नै इंया केवै कै आदमियां गै हात ऊं बणाएड़ो देवता साच्चो परमेसर कोनी है। 27 इमै आपणै काम गी बात कोनी पण म्हान देवी अरतिमुस गै मिन्दर नै बी कीं कोनी समझ्यो जावैगो। अर आसिया प्रदेस अर सारो जगत गी देवी गो पूरो म्हत्व खत्म हो जावैगो।

28 बे सारा ओ सुणगे रीस ऊं भर ग्या अर रोळो मचायो कै इफिसियों गी अरतिमुस देवी म्हान है। 29 अर सारा नगर में बड़ो रोळो मच गेयो अर मकिदुनिया ऊं आएड़ो गायुस अर अरिस्तरखुस झिका पौलुस गै सागै यातरी हा, बानै पकड़ लिया अर नगर गी एक खास जिग्यां जठै बांगी पंचायत होवंती बठै ले गया। 30 जद पौलुस लोगां गै कनै जाणो चायो तो चेला बिनै जाण कोनी दियो। 31 आसिया गै अधिकारियां मूं कीं बिंगा साथी हा। बा बिनै संदेस भेजगे बिनती करी कै बठै जाण गी गळती ना करी।

32 बठै कोई किंयाई रोळो मचावै, कोई किंयाई अर पंचायत में भोत हड़बडी होण लागरी है। भोत सारा लोगां नै तो पतो ई हो कै आपां अठै क्यामी आया। 33 यहुदी लोगां सिकन्दर नै आ'गे खड़्यो कर'गे केयो आ सारी घटना म्हानै बता। बो हातां ऊं इसारो कर'गे आपगी बात बताणी चावै हो। 34 पण बानै पतो लागग्यो कै बो यहुदी है तो सारै गा सारा एक ईं आवाज में दो घंटा तांई रोळो मचायो कै इफिसियां गी देवी अरतिमुस म्हान है।

35 नगर में खास फैसलो लेण आळो एक मोटै अधिकारी लोगां नै चुप करवागे केयो, “हे इफिसुस गा लोगों ई बात गो आपां सारा नै पतो है कै इफिसियो नगर गी म्हान देवी अरतिमुस गै मिन्दर अर जेऊस गी ओर ऊं पडे़ड़ो मूरती गो एक टुकड़ो है। 36 क्यूंकै आ बाता नै मना कोनी करयो जा सकै। ईंखातर थानै सांती ऊं रेणो चईयै। अर बिना सोच बिचार गै कीं कोनी करणो चईयै। 37 थे आ लोगां नै पकडगे अठै ल्याया हो, आ ना तो कोई मिन्दर लूटयो अर ना आपणो देवी गै खिलाफ कीं बोल्या है। 38 फेर बि देमेतएरियुस अर बिंगै साथी नै आंगै विरुद्ध कोई सिकायत है तो कचेड़ी खुली है अर बठै राजपाल है। बे आपसरी में एक दूसरी पर आपगी बात रख सकै। 39 पण थे जे ओर कीं बात गै बारे में पूछणो है तो पंचायत में फैसलो करयो जावैगो।” 40 आज गै रोळै गै कारण आपणै पर दोस लागणै गो डर है। ईंखातर इंगो कोई कारण कोनी आ भीड़ क्यामी इकठ्ठी होयी, आपणै कनै इंगो कोई उतर कोनी। 41 अर इतो केगे बण पंचायत नै बंद कर दी।