कुरुन्थियुस नगर में
18
1 इंगै बाद पौलुस एथेंस छोड़गे कुरिन्थुस आयो।
2 बठै बिनै पुन्तुस में रेण आळो अक्विला नाम गो एक यहुदी मिल्यो। बो आपगी घराळी प्रिस्किल्ला गै सागै इटली आयो क्यूंकै क्लोदियोस राजा सारै यहुदियों नै रोम ऊं बारै जाण गो हुकम दियो।
3 पौलुस बांगै सागै रेयो अर काम करतो क्यूंकै बे दोनों तंबु बणाण गो काम करता।
4 पौलुस हर एक सब्त गै दिन सतसंग घर में जा'गे बठै गै यहुदी अर गेर यहुदी लोगां नै यीसू गै बारे में बतावंतो अर यीसू पर बिस्वास करण खातर बानै तैयार करतो।
5 जद सीलास अर तीमुथियुस मकिदुनिया ऊं आया तो पौलुस बचन सुणाण गी ताक में यहुदियां नै गवाई देण लागग्यो कै यीसू ई मसी है।
6 जद यहुदी लोग पौलुस गो बिरोध करण लागग्या बण आपगा गाबा झाड़गे केयो थारो खून थारी नस पर रेवै। मैं बे कसूर हूं। अब मैं गेर यहुदियां कनै जा'गे बचन सुणावूंगा।
7 बठूं चालगे बो तूतुस युसतुस गेर यहुदी गै घरै गेयो झिको परमेसर गी आराधना करतो। बिंगो घर सतसंग घर गै कनै हो।
8 सतसंग घर गै मुख्य क्रिसपुस आपगै घराणै सागै बिस्वास करयो अर कुरुन्थियों में रेण आळै भोत लोगां बिस्वास करयो अर बतिस्मो लियो।
9 पौलुस नै सपने में दरसण देगे प्रभु केयो, “मेरै बारे में बोलतो जा, चुप ना रे।
10 क्यूंकै मैं तेरै सागै हूं अर कोई बी तेरो नुक्सान कोनी कर सकै। ईं नगर में मनै मानण आळा भोत लोग है।”
11 ईंखातर पौलुस बठै बानै परमेसर गो बचन सिखाण खातर डेढ साल रेयो।
12 जद गलिया आख्या देस गो मुख्य अधिकारी हो तो यहुदी लोगां एक्को कर'गे पौलुस नै न्याय करण आळा गै सामणै खडयो कर दियो।
13 अर केयो, ओ आदमी इंया केवै है कै परमेसर गी उपासना ईं रीति ऊं करो झिकी नेम विधान गै खिलाफ है।
14 जद पौलुस गै बोलण ऊं पेला ई गलियो यहुदियां नै केयो, ओ कोई मोटो अपराध होवंतो तो मैं थारी सुणतो।
15 पण जे ओ वाद विवाद कीं सब्दां अर कीं नामां अर थारी नेम विधान गै बारे में है तो इऊं थे आप ई निपटो, मैं आ कामां गो न्याय कोनी करणो चाऊं।
16 फेर बण बानै कचेड़ी ऊं बारै काड़ दिया।
17 जद सारै लोगां सतसंग घर गै मुख्य सोसतिनोस नै पकड़गे कचेड़ी में मारयो। पण गलियो ईं बात गी कोई चिंता कोनी।
अन्ताकिया ऊं पाछो आणो
18 पौलुस भोत दिना तांई कुरुन्थी में रेयो। बिंगी मन्नत गी अनुसार बण किखिया में रोड़ कडवाई अर बिस्वासियां कनूं विदा लेगे प्रिसकिल्ला अर अक्विला गै सागै सिरिया उड़ग्यो।
19 बण इफिसुस में पोंचगे बानै बठै छोडया अर आप सतसंग घर में जा'गे यहुदियों ऊं बात चीत करण लागग्यो।
20 जद बा बिऊं बिनती करी कै म्हारै सागै बी कीं दिन रेओ तो बो ना मान्यो।
21 अर बानै ओ केगे विदा होयो कै परमेसर चायो तो थारै कनै फेर आऊंगा। जद बो इफिसुस ऊं चाल पड़यो।
22 जद कैसरिया में उतरगे यरुसलेम गेयो अर बिस्वासियो ऊं निमस्कार कर'गे अन्ताकिया में आयो।
पौलुस गी तीसरी परचार यातरा
23 फेर केई दिन रेगे बठूं उड़ग्यो अर गलातिया अर फिरगिया प्रदेसां गै बिस्वासियां नै मजबूत करतो रेयो।
24 अब सिकन्दरिया में रेण आळो अपुल्लोस नाम गो एक यहुदी इफिसुस में आयो। बो एक ग्यानी अर पवितर सासतर नै आच्छी तरियां जानण आळो हो।
25 बण प्रभु गी रा गी सिक्सा ली अर मन लगायो। यीसू गै बारे में ठीक ठीक सुणावंतो अर सिखावंतो पण बो सिरफ यूहना गै बतिस्मो गै बारे में जाणतो।
26 बो सतसंग घर में बिना डर गै बोलण लागग्यो। प्रिस्किल्ला अर अक्विला बिंगी बातां सुणगे बिनै आपगै सागै ले आया अर परमेसर गै बारे में ओर ठीक ऊं सिखायो।