पौलुस थिस्सलुनीके नगर में
17
1 फेर पौलुस अर सीलास अम्फिपुलिस नगर अर अपुल्लोनिया नगर मूं होगे थिस्सलुनिकि नगर में आया बठै यहुदियां गो सतसंग घर हो।
2 पौलुस आपगी रीति रिवाज गै अनुसार तीन सब्त गै दिन तांई पवितर सासतर ऊं बांगै सागै बात चीत करी।
3 अर पवितर सासतर गो अरथ खोलगे समझावंतो कै मसी नै दुख झेलणो अर मरेड़ा ऊं जी उठणो जरूरी हो। पौलुस केवै है के मैं बतायो बो यीसू मसी है।
4 आ बात सुणण आळा कीं यहुदी लोग अर परमेसर गो डर मानण आळा कीं गेर यहुदी लोग अर कीं खास लुगाईयां पौलुस अर सीलास गै सागै रळ गी अर आंगी बात मान ली।
5 पण यहुदी लोग बळ गया, बा बजार मूं बदमास लोगा नै इकट्टा करया अर जलूस काड़गे नगर में दंगा करा दिया। बे यासोन गै घर कनै उड़ग्या अर केयो, पौलुस अर सीलास नै बारै सामै ल्यावो।
6 पण जद पौलुस अर सीलास कोनी मिल्या तो बे लोग यासोन अर कीं बिस्वासी लोगां नै कचेड़ी गै मोटै अधिकारी कनै घीसगे लेग्या अर रोळो मचायो कै आ लोगां सारी दुनिया नै उळट पुळट कर दी। अर अब अठै बी आग्या।
7 यासोन बानै आपगै घरै रोक्या है अर ऐ सारा इंया केवै है कै यीसू ई राजा है अर कैसर गी आग्या गो बिरोध करै है।
8 जद नगर गै लोगां अर कचेड़ी गै मोटै अधिकारी लोगां ओ सुण्यो तो भोत बळग्या।
9 अर बा यासोन अर बाकी लोगां नै जमानत पर छोड़ दिया।
पौलुस अर सीलास बिरिया नगर में
10 बिस्वासिया रातो रात पौलुस अर सीलास नै बिरिया घाल दिया। अर बे बठै यहुदियां गै सतसंग घर में गेया।
11 ऐ लोग तो थिस्सलुनिकि गै लोगां ऊं आच्छा हा अर बड़ी लालसा ऊं बचन सुणता अर हर रोज पवितर सासतर में ढूंढता रेवा कै झिकी बात पौलुस बताई सई है के?
12 ईंखातर बामूं भोत सारी खास युनानी लुगाईयां अर आदमियां बिस्वास करयो।
13 जद थिस्सलुनिकि यहुदी लोगा नै पतो लागग्यो कै पौलुस बिरया में बी परमेसर गै बचन गो परचार करै है तो बा लोगां बठै बी रोळो मचाणो सरू कर दियो।
14 जद बिस्वासियां बि टेम ई पौलुस नै विदा दे दी कै समुन्दर गै किनारै में उड़ज्या। सीलास अर तीमुथियुस बठै ई रेग्या।
15 पौलुस नै छोड़ण आळा बिनै एथेंस तांई लेग्या। पौलुस आनै बतायो कै सीलास अर तीमुथियुस नै मेरै कनै जल्दी भेज देईयो।
पौलुस एथेंस नगर में
16 पौलुस एथेंस में दोना गी उडीक करता टेम नगर में सारी जिग्या मूरतिया देखगे भोत दुखी होयो।
17 बो सतसंग घर में यहुदी अर गेर यहुदी लोगां झिको परमेसर नै मानण आळा गै सागै अर चोंक में झिका लोग बिनै मिलता बा सारा ऊं हर रोज बात करतो।
18 जद इपीकुरी अर स्तोईकी ग्यानियां ऊं केई पूछण लागग्या अर केईयां केयो, “ओ बकवादी आदमी के केणो चावै?” जद दूसरा केयो, “ओ दूसरै देवतावां गो परचारक लागै क्यूंकै बो यीसू गै दुसर जी उठण गो सुब समाचार सुणावंतो रेवै।”
19 जद बे बिनै पकड़गे अरियुपगुस गी पंचायत में लेग्या अर केयो कै, “तू झिको परचार करै है बा क्यांगी सिक्सा है?”
20 तू तो अनोखी बातां सुणावै है। म्हे जानणो चावा है आंगो मतलब के है?
21 एथेंस में रेण आळा अर परदेसी लोग नुई बातां सुण नै अर बोलण में बोळो टेम बितावंता अर इंगै अलावा कोई काम कोनी करता।
अरियुपगुस गै पंचायत में पौलुस गो संदेस
22 जद पौलुस अरियुपगुस गी पंचायत में खड़यो होगे केयो, “हे एथेंस में रेण आळा लोगों, मैं देखूं, थे देवतांवा गी हर बात नै मानण आळा हो।
23 क्यूंकै मैं फिरतो होयो थारी पूजा करण आळी सारी चिजां नै देखी है अर एक इसी बेदी बी देखी झिकी पर लिखेड़ो अणजाण परमेसर खातर। ईंखातर थे झिकै नै जाणो कोनी बिंगी आराधना करो हो। मैं थानै बांगी बात बताऊं।”
24 झिकै परमेसर दुनिया में सारो कीं बणायो है। बो सुरग अर धरती गो मालिक है। बो लोगां गै हात ऊं बणाएड़ै मिन्दर में कोनी रेवै।
25 बिनै माणस कनूं कोई बी चीज लेण गी जरूरत कोनी। बो आप सारा नै जीवन, सांस अर सारो कीं देवै।
26 बण एक ई मूळ ऊं धरती गी सारी जाता बणाई अर बे सारा धरती पर बस जावै। बणी लोगां गो टेम अर मोसम बणायो अर बा जिग्या बठै बे रेवै बिंगी सीमा बणा दी।
27 क्यूंकै परमेसर ओ चावै कै लोग मनै डूंडै जद तांई ना लादै ढूंढताई रेवै। बो आपणूं दूर कोनी है।
28 म्हे बिंगा द्वारा ई जींवता रेवा हा अर चाला फिरा हा। जिंया थारै कवियां केवो है म्हे तो बिंगी उळाद हा।
29 आपां परमेसर गा वंस गा हा। जिंया मिसतरी सोनै, चांदी अर पथर ऊं कलपना कर'गे कीं बणावै आपां इंया कोनी।
30 ईंखातर परमेसर अणजाणपणै गै टेम में ध्यान कोनी दियो पण अब सगळी जिग्या सारा लोगां नै आपगै पापा ऊं दूर होगे मन बदळण गो परमेसर कनै आण गी आग्या देवै।
31 जगत गो धरम ऊं न्याय करण खातर परमेसर एक आदमी नै चुणगे एक दिन ठेरायो। बिनै मरेड़ा ऊं जींवतो कर'गे आ बात पक्की कर दी।