पौलुस गो तीमुथियुस नै सागै ले जाणो
16
1 फेर पौलुस दिरबे अर लिस्तरा में गेयो बठै तीमुथियुस नाम गो एक चेलो हो। बिंगी मां एक यहुदिनी बिस्वासी अर बिंगो बाप एक गेर यहुदी हो।
2 लिस्तरा अर इकुनियुम में रेण आळा भाईयां गा तीमुथियुस गै सागै आच्छी उठ बैठ ही।
3 पौलुस तीमुथियुस नै आपगै सागै लेणो चावै हो। झिका यहुदी लोग बठै रेवंता बांगै कारण बिंगो खतनो करयो क्यूंकै बे जाणा है कै इंगो बाप गेर यहुदी है।
4 अर नगर नगर जावंता होया बे विधियां झिकी यरुसलेम गा खास चेला अर बुडे लोगां बणाई ही बानै मानणी सिखावंता गेया।
5 ईं तरियां बिस्वासियों गो बिस्वास मजबूत होयो अर हर एक दिन भोत सारा लोग ओर जुड्या।
त्रोवास में पौलुस गो सपनो
6 बे फिरगिया अर गलातिया प्रदेस में होगे गेया क्यूंकै पवितर आत्मा बानै आसिया में बचन सुणाण ऊं रोक दिया।
7 बा मूसिया प्रदेस गै कनै जा'गे बितुनिया में जाणो चायो, पण यीसू गी आत्मा बानै फेर रोक दिया।
8 ईंखातर मूसिया में होगे बे त्रोवास में आया।
9 बठै पौलुस रात नै एक सपनो देख्यो कै एक मकदूनियो गो आदमी खड़यो होगे बिऊं बिनती कर'गे केवै, पार उतरगे मकदुनिया में अर म्हारी मदद कर।
10 ओ दरसण देखताई म्हे बि टेम ई मकदुनिया जाणो चायो। बा ओ समझयो कै परमेसर म्हानै सुब समाचार सुणाण खातर बुलायो।
फिलिप्पी में लुदिया गो मन बदळणो
11 ईं तरियां म्हे पाणी आळै जहाज ऊं समोथ्रोके गेया अर दूसरै दिन बठूं नियापुलिस में गेया।
12 बठूं म्हे फिलिप्पी पूग्या झिको मकदुनिया प्रदेस गो खास नगर अर रोमियां गो गाम हो। अर बठै म्हे केई दिन रेया।
13 सबत गै दिन म्हे नगर गै फाटक गै कनै नेर गै किनारै ओ समझगे गेया कै बठै पराथना करण गी जिग्यां हो'सी अर बैठगे बठै आएड़ी लुगाईयां सागै बात करण लागग्या।
14 तुयातुरा नगर में रेण आळी लिदिया नाम गी एक लुगाई बठै ही। अर बा बेंजनी रंग गा गाबा बेचती ही। बण पौलुस गी बात नै आच्छी तरियां सुणी। आ बात सुणण खातर प्रभु बिंगो मन खोल दियो अर बण पौलुस गी सारी बात नै मान ली।
15 जद बा आपगै घराणै समेद बतिस्मो लियो अर बण म्हारूं बिनती करी कै जे थे मनै प्रभु गी बिस्वासिनी समझो तो मेरै घरै चालो अर थानै मेरै घरै आणो ई पड़सी।
पौलुस अर सीलास जेळ में
16 जद म्हे पराथना करण गी जिग्या में जावा हा तो म्हानै एक नौकराणी मिली झिकी में सुगन बताणाळी ओपरी बडे़ड़ी। बा लोगां नै सुगन बतागे आपगै मालिकां नै भोत सारा रिपिया कमागे देवंती।
17 बा पौलुस अर म्हारै लारै आ'गे रोळो मचागे केयो कै ऐ लोग परम प्रथान परमेसर गा दास लोग हा अर झिका म्हानै मुकती देण आळो रा बतावै है।
18 बा भोत दिना तांई इंया केवंती रेई। पण पौलुस दुखी होगे बि ओपरी नै केयो, “तनै यीसू मसी गै नाम ऊं आग्या देऊं, बिमुं निकळ जा।” बि टेम ई बा ओपरी बिमुं निकळगी।
19 जद बिंगै मालिकां देख्यो कै म्हारी कमाई गो साधन खत्म हो'ग्यो तो पौलुस अर सीलास नै पकड़गे चोंक में प्रधान कनै लेग्या।
20 फेर बानै सजा गै हाकिमा कनै ले जा'गे बोल्या, ऐ लोग यहुदी है, म्हारै नगर में गड़बडी फेलावै है।
21 ऐ हिस्या रीति रिवाज सिखावै झिका नै मानणा अर बा पर चालणो म्हारै रोमियो खातर ठीक कोनी।
22 जद बोळा सारा इकट्टा हो'ग्या अर सजा देण आळो मुख्य आदमियां हुकम दियो कै आंगा गाबा पाड़गे उतारगे आंगै बेंत मारणा।
23 भोत सारा बेंत मारण गै बाद जेळ में बंद कर दिया अर जेळ गै मुख्य आदमी नै हुकम दियो कै आ पर पेरो लगवायो जावै।
24 जेळ गै मुख्य अधिकारी बिनै मां आळी कोठड़ी में बंद कर दियो अर बिंगा पग काठ सागै बांध लिया।
पौलुस अर सीलास गो जेळ ऊं छूड़ जाणो
25 आदी रात नै पौलुस अर सीलास पराथना करता होया अर परमेसर गा भजन गावां अर केदी बानै सुणा।
26 इतै गै मां धरती हालगी अर जेळ गी नीम बी डोलगी अर सारा बारणा खुल गया। अर सारा केदीयां गै बंधन बी खुल गै पड़ग्या।
27 जेळ गो मुख्य अधिकारी जागग्यो अर जेळ गा सारा बारणा खुला देखगे मन में बिचार करयो कै सारा केदी भाजग्या। बण आपगी तलवार काड़गे अपणै आपनै मारणो चायो।
28 पण पौलुस बिनै ऊंची आवाज ऊं ओ करण ऊं रोक दियो अर बोल्यो म्हे सारा अठै ई हा।
29 जेळ गै मुख्य अधिकारी चानणो लेगे मां गेया अर बो डरगे बांगै सामणै पड़ग्यो।
30 अर बानै बारे ल्यागे बण केयो, “थे मनै बताओ मुकती पाण खातर मैं के करूं?”
31 बा केयो, “प्रभु यीसू मसी पर बिस्वास कर। तू अर तेरो सारो घराणो मुकती पासी।”
32 फेर बा बिनै सारै घराणै गै सागै प्रभु गो बचन सुणायो।
33 बि रात बानै घरै ले जा'गे बांगा जखम धोया अर आपगै सारै घराणै बि टेम ई बतिस्मो लियो।
34 अर बानै रोटी खुवाई अर घर गा सारा जणां परमेसर पर बिस्वास करयो अर खुसी मनाई।
35 जद दिन उगग्यो तो कचेड़ी गै मोटै अधिकारी आपगै सिपाईयां गै हात जेळ गै मुख्य अधिकारी नै हुकम भेज्यो कै बानै छोड़ देओ।
36 जेळ गै मुख्य अधिकारी बानै केयो कै, “कचेडी गै मोटै अधिकारी गो हुकम है थानै छोड़ दिया जावै। ईंखातर थे सांती ऊं जाओ।”
37 जद पौलुस बानै केयो, “म्हे रोमी हा।” बा म्हानै बिना दोस गै सारा गै सामै कुटवाया अर जेळ में बंद कर दिया अर अब म्हानै केवै होळे'सी उड़ जाओ। इंया म्हे कोनी करा। पण बे आप आ'गे म्हानै बारै काडै़।