खास चेला 15

यरुसलेम गी पंचायत

1 फेर केई लोगां यहुदियां ऊं आ'गे बिस्वासी लोगां नै सिखाण लागग्या कै जे मूसा गी रीति पर थारो खतनो ना होयो तो थे मुकती कोनी पा सको। 2 जद पौलुस अर बरनाबास बांगै सागै ऊंचा नीचा हो'ग्या तो ओ फैसलो करयो कै पौलुस अर बरनाबास बामूं कीं आदमी ईं बाता गो फैसलो करण खातर खास चेलो अर बुडा लोगा कनै यरुसलेम जावै। 3 अर बिस्वासी मण्डली गा लोगां बा खातर रा में खाण पीण गी जरूरत पूरी कर'गे छोड़ दिया अर बे फीनिक अर सामरिया गै माखर चालता गेर यहुदियां गो मन बदळण गो सुब समाचार सुणावंता गया अर बिस्वासी भाई भोत खुस होवंता। 4 जद बे यरुसलेम पूग्या तो बिस्वासी लोग, खास चेला अर बडेरा लोग बांगै सागै भोत खुसी ऊं मिल्या अर बा बतायो कै परमेसर म्हारै सागै होगे किता चमत्कार करया।

5 पण कीं फरीसियां गै दळ गा बिस्वासी लोगां उठगे केयो कै गेर यहुदी लोगां नै खतनो अर मूसा गै नेम विधान मानण गी आग्या देणी चईयै।

6 जद खास चेला अर बुडा लोग ईं बात पर बिचार करण खातर इकट्टा होया। 7 जद बा आपसरी में बात चीत करी तो पतरस खड़यो होगे केयो, हे मेरा साथियों, थे जाणो है कै केई दिन पेला थारै मूं मनै परमेसर चुण लियो कै मेरै द्वारा गेर यहुदियां में संदेस सुणगे बे बिस्वास करै। 8 मना नै जांचण आळै परमेसर म्हारै तरियां ई बानै बी पवितर आत्मा देगे बांगी गवाई दी। 9 अर बिस्वास गै द्वारा बांगा पाप माफ कर'गे बामै अर म्हारै में कोई भेदभाव कोनी करयो। 10 फेर थे अब परमेसर नै क्यामी परखो हो कै चेला गी नस पर एक इसो जूड़ो रखो झिकै गो भार ना म्हे चक सकया ना म्हारा बडेरा। 11 म्हारो ओ बिचार है कै झिकी रीति ऊं प्रभु यीसू गै किरपा ऊं यीसू मसी म्हानै मुकती दी बि रीति ऊं बानै बी देसी।

12 फेर सारा लोग चुप रेग्या अर बरनाबास अर पौलुस गा बात सुणण लागग्या कै परमेसर बांगै द्वारा गेर यहुदियां में किता मोटा मोटा चमत्कार अर निसान दिखाया। 13 जद बे चुप होया तो याकूब केयो, “मेरी बात सुणो।” 14 परमेसर पेला गेर यहुदी लोगां ऊं एक दळ आपगै नाम खातर चुण लियो, आ बात पतरस थानै बताई ही। 15 परमेसर गी बात बताण आळा गी किताब में ऐ बातां मिलै है जिंया लिखेड़ो है।

16 “इंगै बाद में मैं फेर आ'गे दाऊद गो पडे़ड़ो राज बणाऊंगा। झिको राज पड़ग्यो बो दुबारा बणाऊंगा।

17 ईंखातर बचेड़ा आदमी अर सारा गेर यहुदी झिका मेरै नाम पर बिस्वास करै है, प्रभु गी खोज करै,

18 ऐ बातां ओ ई प्रभु केवै है झिको जगत गी उतपत्ती ऊं बतावंतो आयो है।”

19 ईंखातर मेरो बिचार ओ है कै गेर यहुदियां मूं झिका बिस्वास करयो है आपां बानै तंग ना करां। 20 आपां नै तो बानै बताणो चईयै कै, मूरतियां पर चढाएड़ो प्रसाद थानै नई लेणो चईयै अर बेबीचार ऊं बच गै रेवो, गळ घोटेड़ै कोई बी पसू गो मास ना खाओ अर लोई बी ना खाओ। 21 क्यूंकै आदि काल ऊं मूसा गो नेम विधान हर एक नगर गै सतसंग में सब्त गै दिन सिखायो जावंतो।

गेर यहुदियां नै खत

22 फेर सारा बिस्वासियां अर खास चेला अर बडेरै लोगां नै आच्छो लागग्यो कै आपणै मूं कीं लोग चुणगे आंगै सागै अन्ताकिया भेज्या जावै अर आनै चुणेड़ा हा, यहूदा झिको बरसब्बा कुहावंतो अर सीलास। ऐ दोनूं बिस्वासियां में खास हा। 23 फेर बांगै हात में एक खत लिखगै दियो अर इमै इंया लिखेड़ो कै,

यरुसलेम में रेण आळा बिस्वासियां, खास चेला अर बुडै़ लोगां गै द्वारा लिखेड़ो खत। अन्ताकिया, सिरिया अर किलिकिया गै गेर यहुदी भाईयां नै निमस्कार।

24 म्हे सुणयो कै म्हारै मूं केई बठै जा'गे थानै आपगी बातां बतागे डरा दिया अर थारो बिस्वास कमजोर कर दियो। पण म्हे बानै आग्या कोनी दी। 25 ईंखातर म्हे सारा एक मन होगे चुणेड़ा आदमियां नै बरनाबास अर पौलुस गै सागै थारै कनै घाल्या। 26 ऐ हिस्या आदमी है झिका आपगी जान यीसू मसी गै काम खातर दे राखी है। 27 ईंखातर म्हे यहूदा अर सीलास नै घाल्या है झिका आपगै मू ऊं थानै ऐ बातां बता देसी।

28 पवितर आत्मा अर म्हे ठीक समझ्यो कै आ पर जरूरी बाता नै छोड़गे ओर भार ना दियो जावै। 29 कै थे मूरतियां नै चढाएड़ी अर लोई अर गळ घोटेडै़ गो मांस अर बेबीचार ऊं दूर रेवै तो थारो भलो हो'सी।

30 फेर बे बठूं चालगे अन्ताकिया पूग्या अर सारा नै इकट्टा कर'गे बो खत बानै दियो। 31 बि खत में होसलो देण आळो संदेस पढगे भोत राजी होया। 32 यहूदा अर सीलास झिका परमेसर गी बात बताण आळा हा, बा बानै भोत सारो होसलो देण आळी बातां बतागे बानै बिस्वास में मजबूत करया। 33 बठै थोड़ो टेम रेगे सांती गै सागै विदा लेगे पाछा घालण आळा कनै आग्या। 34 (पण सीलास नै बठै रेणो आच्छो लागग्यो)। 35 पौलुस अर बरनाबास अन्ताकिया में रेग्या अर भोत सारै लोगां नै प्रभु गो संदेस सुणावंता रेया।

पौलुस गी दूसरी परचार यातरा

36 केई दिनां गा बाद पौलुस बरनाबास नै केयो आपां झिकै नगरां में प्रभु गै संदेस सुणायो है बा बिस्वासियां नै जा'गे मिला अर देखा हा बे किंया है? 37 जद बरनाबास यूहना नै झिको मरकुस कुहावै हो बिनै सागै ले जाण गो बिचार करयो। 38 पण पौलुस बिनै मना कर दियो क्यूंकै बण पम्फूलिया में बांगै सागै सेवकाइ में मदद कोनी करी अर ना बांगै सागै रेयो। आ बात पौलुस नै आच्छी कोनी मानी। 39 दोनां में हिस्यो विवाद होयो कै बे दोनूं एक दूसरै ऊं न्यारा हो'ग्या। बरनाबास मरकुस नै लेगे पाणी गै जहाज ऊं साईप्रस उड़ग्यो। 40 पण पौलुस सीलास नै चेलो बणा दियो अर बिस्वासियां कनै परमेसर गी किरपा में सोंपगे बठूं उडग्यो। 41 अर पौलुस किलिकिया अर सिरिया गै बिस्वासी लोगां नै मजबूत करतो होयो उड़ग्यो।