इकुनियुम में पौलुस अर बरनाबास
14
1 पौलुस अर बरनाबास जिंया अन्ताकिया नगर में सतसंग करी बिंया ई इकुनियुम में बी यहुदी सतसंग घर में करी अर ईं तरियां गो संदेस दियो कै भोत सारा यहुदी अर गेर यहुदी लोगां बिस्वास करयो।
2 पण झिकै यहुदियां बिस्वास कोनी करयो बानै यहुदी भडकाया अर बांगै विरुद्ध खडया होण खातर केयो।
3 बे भोत दिना तांई बठै रेया अर प्रभु गै भरोसै पर भोत हिम्मत ऊं परचार करता रेया। यीसू मसी बानै चमत्कार करण में मदद करी, ईं तरियां आंगै द्वारा देऐडे़ संदेस नै समझण लागग्या अर इमै सच्चाई है ओ बी जाणग्या।
4 बठै फूट पड़गी, केई यहुदियां कानी अर केई खास चेला कानी हो'ग्या।
5 फेर यहुदी अर गेर यहुदी लोगां आपगै नेतावां सागै मिलगे बांगै सागै बुरो बरताव करयो अर बा पर पथर फेंकण गी तैयारी करी।
6 ईं बात गो पौलुस अर बरनाबास नै पतो लागग्यो तो बे लुकाउनिया गै लिस्तरा अर दिरबे नगरां गै नेडै़ नेडै़ इलाके में भाजग्या।
7 अर बठै सुब समाचार सुणाणा लागग्या।
लुस्त्रा अर दिरबे में पौलुस
8 लिस्तरा में एक हिसो आदमी हो झिको जन्म ऊं ई लंगडो हो अर कदी कोनी चाल्यो।
9-10 बो लंगड़ो आदमी पौलुस गी बातां सुणै हो अर पौलुस बि कानी देख्यो अर समझग्यो कै इमै बिस्वास है। अर बण केयो, “आपगै पगां पर सीधो खड़यो होज्या। बि टेम ई बो उछळ गै खड़यो हो'ग्यो।”
11 जद लोगां पौलुस गै ओ चमत्कार देख्यो तो लुकाउनिया गी बोली में ऊंची आवाज में केयो, देवता आदमियां गै रूप में होगे म्हारै कनै उतरायो है।
12 बा बरनाबास नै जेऊसa केयो अर पौलुस प्रभु गो संदेस दियो। ईंखातर बिनै हेरमोसb केयो।
13 नगर गै सामणै जेऊस गै मिन्दर में एक याजक रेवंतो। बो लोगां गै सागै कीं बलिदान करणो चावै हो।
14 जद बरनाबास अर पौलुस नै ईं बात गो पतो लागग्यो तो आपगा गाबा पाड़ दिया अर भीड़ नै केयो,
15 हे साथियों, थे ओ काम ना करियो। म्हे बी थारै बरगा आदमी हा। म्हे थारै खातर आच्छो संदेस लेगे आया हा। परमेसर चावै है कै दूसरै देवी देवता नै छोड़गे आपां बिंगी आराधना करां बणी सारा कीं झिको धरती गो उपर अर धरती गो मां है बणायो है।
16 बित्यै टेम में बण सारी जातियां नै बांगी आपगी आपगी इच्छा पर चालण दियो।
17 फेर बी बण आपां नै छोडया कोनी। पण बो भलाई करतो रेयो अर आकास ऊं मेह अर मोसम गै अनुसार फसल दी कै थे खुसी गै सागै खा पीगे जींवता रे सको।
18 इतो केण गै बाद बी बा लोगां नै बड़ी मुसकिल ऊं रोक्यो कै बली ना चढावै।
19 पण कीं यहुदियां अन्ताकिया अर इकुनियुम ऊं आ'गे लोगां नै आप कानी कर लिया। अर पौलुस पर पथराव करयो। आपगी जाण में मरेड़ो समझगे नगर ऊं बारे खींच गै लेग्या।
20 पण जद चेला बिंगै कनै आ'गे खडया होया तो बो उठगे नगर में आयो अर दूसरै दिन बरनाबास गै सागै दिरबे उड़ग्यो।
सिरिया गै अन्ताकिया ऊं पाछो आणो
21 बा बि नगर में सुब समाचार सुणायो अर भोत सारा चेला बणागे लिस्तरा, इकुनियुम अर अन्ताकिया में पाछा आग्या।
22 अर चेला नै बिस्वास में पक्को होण गो होसलो देगे बानै केयो, परमेसर गै राज में जाण खातर आपां भोत दुख सेणो पडे़गो।
23 हर एक बिस्वासी मण्डली में एक मोटो आदमी बणायो अर उपवास गै सागै पराथना कर'गे बानै प्रभु गै हात में दे दिया झिकै पर बानै बिस्वास हो।
24 बे पिसिदिया माखर पम्फूलिया गेया।
25 फेर पिरगा में संदेस सुणागे इटली में आया।