खास चेला 13

बरनाबास अर साऊल गो भेज्यो जाणो

1 आनत्किया गी बिस्वासी मण्डली में कई परमेसर गी बात बताण आळा अर उपदेस देण आळा हा। आमै बरनाबास अर समौन झिको निगैर कुहावंतो, कुरैन गो लुकियोस अर चौथाई देस गै राजा हेरोदेस गा साथी मनाहेम अर साऊल। 2 एक दिन बे उपवास गै सागै प्रभु गी उपासना करा तो पवितर आत्मा केयो, मेरै खातर बरनाबास अर साऊल नै मैं झिकै काम खातर बुलाया, बानै न्यारा करो। 3 जद बा उपवास अर पराथना कर'गे बांगै सिर पर हात रखयो अर बानै विदाई दी।

पौलुस गी पेली परचार यातरा

4 पवितर आत्मा गै द्वारा बरनाबास अर साऊल सिलिकिया अर बठूं बे जहाज में बैठगै सैप्रस उड़ग्या। 5 जद बे सलामिस नगर पूगग्या तो बा यहुदियां गै सतसंग घरां में परमेसर गो संदेस सुणायो अर यूहना बांगी मदद करण खातर बांगै सागै हो।

6 बे बि सारै राज में परचार करता होया पाफूस पूग्या। बठै बानै एक जादू टूणा करण आळो एक झूठो बात बताण आळो मिल्यो। बिंगो नाम बर यीसू हो। 7 बो राजपाल सिरगियुस पौलुस गै सागै हो, बो एक ग्यानी आदमी हो। बण बरनाबास अर साऊल नै आपगै कनै परमेसर गो बचन सुणण खातर बुलाया हा। 8 पण इलिमुस झिको बर यीसू गो युनानी बोली गो नाम है झिकै बांगो बिरोध करयो अर राजपाल नै केयो कै आपगी बात पर बिस्वास ना कर। 9 जद साऊल झिकै गो नाम पौलुस बी है पवितर आत्मा ऊं भरगे बि कानी देख्यो अर केयो, 10 “सारै भले काम नै रोकण आळो अर झूठ ऊं भरेड़ो सैतान गो उळाद अर सदा ई गळत काम करण आळो, तू परमेसर गै रा नै बांको करणो चावै। 11 अब तू देख, प्रभु तेरै सागै के करै? तू कई दिना तांई आंधो रेवेगो अर तनै सूरज ना दिखेगो।” बि टेम ई बिनै धूंधळो दिखण लागग्यो अर इनै बिनै हात मारण लागग्यो कै कोई बिंगो हात पकड़गे लेज्य।

12 जद राजपाल झिको कीं होयो देख्यो अर अचंभो होगे प्रभु गै संदेस पर बिस्वास करयो।

पिसिदिया गै अन्ताकिया में पौलुस

13 पौलुस अर बिंगा साथी पाफूस ऊं पाणी गै जहाज में चड़गे पम्फूलिया गै पिरगा में आया। अर यूहना बानै छोडगे यरुसलेम आ'ग्यो। 14 बठूं पिसिदिया गै अन्ताकिया में पूगग्या अर सब्त गै दिन सतसंग घर में जा'गे बैठ ग्या। 15 मूसा गै नेम विधान अर परमेसर गी बात बताण आळा गी किताब पढण गै बाद सतसंग घर गै मुख्य बानै केयो, “मेरा यहुदी बेलियों, थारै कनै आ लोगां गो होसलो बधाण खातर कीं है तो बता दयो।”

16 जद पौलुस खड़यो होगे हात गो इसारो कर'गे केयो, “हे इसराएली लोगों अर गेर यहुदी परमेसर नै मानण आळा सुणो, 17 आ इसराएली लोगां गै परमेसर आपणै बडेरा नै चुण लिया अर जद बे मिस्र देस में परदेसी हा तो बांगी उन्नती खातर आपगो लंबो हात कर'गे काड़ ल्यायो। 18 बो चालीस साला तांई बन उजाड में बांगी मदद करतो रेयो। 19-20 अर कनान देस में सात जातिया गो नास कर'गे बांगो देस चार सौ पचास साला तांई इसराएल गै लोगा नै दे दियो। इंगै बाद बण सामुएल परमेसर गी बात बताण आळै गै टेम तांई बानै भोत सारा न्याय करण आळा दिया।

21 बिंगै बाद बा एक राजा मांग्यो अर परमेसर 40 सालां खातर बिन्यामीन जाती गो कीस गै बेटै साऊल नै बा पर राजा बणा दियो। 22 फेर साऊल नै हटागै परमेसर दाऊद नै राजा बणायो झिकै गै बारे में आ गवाई दी, मैं यिसै गै बेटै दाऊद नै एक आच्छो आदमी बतायो झिको मेरो मन पसंद है, बो ई मेरी इच्छा पूरी करसी।”

23 ईं आदमी गै वंस ऊं आपगै वायदे गै अनुसार परमेसर इसराएल में मुकतीदाता यीसू गै रूप में ल्यायो। 24 बिंगै आण ऊं पेला यूहना सारै इसराएल में मन फिराव अर बतिस्मो गो परचार करयो। 25 जद यूहना आपगी सेवा पूरी कर ली तो बण केयो मनै थे के समझो हो। मैं मसी कोनी, बो मेरै बाद आवैगो। मैं तो बिंगै बुंटा गो फितो खोलण गै लाइक कोनी हूं।

26 हे मेरा यहुदी बेलियों, “थे झिका अबरहाम गी उळाद अर परमेसर नै मानण आळा गेर यहुदियों, ओ मुकती देण आळो संदेस आपणै खातर घाल्यो। 27 यरुसलेम में रेण आळा अर बांगै मुख्य लोगां बिनै पिछाण्यो कोनी। हर सब्त गै दिन परमेसर गी बात बताण आळा गी किताब पढी जावंती फेर बी कोनी समझा अर बिनै दोसी बणा दियो अर बा बातां नै पूरी करी। 28 बिनै मारण गो कोई बी दोस बिमै कोनी मिल्यो फेर बी पिलातुस नै बिनती करी कै इनै मरवा दयो। 29 बिंगै बारे में लिखेड़ी सारी बातां पूरी होण गै बाद बिनै करूस पर ऊं उतारगे कबर पर राख्यो। 30 पण परमेसर बिनै मरेड़ा ऊं जींवतो करयो। 31 अर बे झिका बिंगै सागै गलील ऊं यरुसलेम आया हा बानै भोत दिना तांई देखतो रेयो अर अब लोगां गै सामै बे ई बिंगै जींवते होण गा गवाह है।”

32 म्हे थानै बि वायदे गै अनुसार सुब समाचार सुणावां झिको म्हारै बडेरा सागै करयो। 33 अब ओ सुब समाचार म्हानै सुणायो झिका बडेरा गी उळाद हा।

पवितर सासतर में इंया लिखेड़ो है, “तू मेरो बेटो है,

आज'ईं मैं तनै जन्म दियो है।”

34 परमेसर यीसू मसी नै मरेड़ा ऊं जींवतो करयो अर बिनै गळन कोनी दियो। पवितर सासतर में इंया लिखेड़ो है, मैं थारै बडेरै दाऊद सागै करेड़ो वायदो पूरी तरियां थानै देऊंगा।

35 ईंखातर पवितर सासतर में इंया बी लिखेड़ो है कै, तू आपगै पवितर जन नै कदी गळन कोनी दयगो।

36 क्यूंकै दाऊद तो परमेसर गी इच्छा पर चालगे मर गयो अर आपगै बडेरा में जा मिल्यो अर गळ बी ग्यो। 37 पण झिकै नै परमेसर जींवतो करयो बिनै गळन कोनी दियो।

38-39 हे मेरा यहुदी बेलियों, “थे जाणो हो कै यीसू गै द्वारा ई पापां ऊं माफी गो संदेस थानै दियो है। इंगै द्वारा हर कोई बिस्वास कर'गे पापा ऊं माफी ले सकै। मूसा गो नेम विधान पापा ऊं माफी कोनी दिरावै। 40 ईंखातर चेते में रेओ। इंया ना होवै कै झिको कीं परमेसर गी बात बताण आळा केयो बो थारै पर आ पड़ै।”

41 हे चुगली करण आळो, “देखो अर अचंभित होवो अर नास हो जाओ

क्यूंकै थारै दिना में मैं हिस्यो काम करूंगा कै

बि काम गी जे कोई थारै मूं बात करै तो थे कदी बी बिस्वास ना करियो।”

42 पौलुस अर बरनाबास सतसंग घर ऊं बारै जावंता टेम लोगा बाऊं बिनती करी कै अगले सब्त गै दिन ऐ बातां म्हानै फेर सुणाइयो। 43 जद सतसंग खतम होगी तो भोत सारा यहुदी अर यहुदी लोग झिको यहुदी भगतों पौलुस अर बरनाबास ऊं पीछै हो'ग्यो। बा बानै केयो अर होसला दियो कै परमेसर गी किरपा में बणया रेवो।

पौलुस गो गेर यहुदियां में परचार सरू

44 अगले सब्त गै दिन नगर गा सारा लोग बचन सुणन खातर इकट्टा हो'ग्या। 45 पण यहुदी लोग भीड़ नै देखगे बळग्या अर पौलुस गी बातां गो बिरोध अर निंदा करण लागग्या।

46 पण पौलुस अर बरनाबास केयो, “थानै परमेसर गो बचन पेला सुणायो जाणो हो। पण थे बिऊं दूर जावै हो अर अपणै आपनै अनन्त जीवन ऊं दूर करयो। ईंखातर म्हे अब गेर यहुदियों नै परमेसर गो बचन सुणावांगा। 47 प्रभु म्हानै आग्या दी है कै, मैं थानै गेर यहुदियां खातर जोती बणायो है कै धरती गै च्यारा कूंटा तांई तू मुकती गो रा बता सकै।”

48 ओ सुणगे गेर यहुदी लोग खुस होया अर परमेसर गै बचन गी बडाई करी अर जिता अनन्त जीवन खातर ठेराएड़ा बा बिस्वास करयो।

49 जद प्रभु गो बचन सारै देस में फेल गयो। 50 पण यहुदियों नै यहुदी नेम विधान गो पालण करण आळी लुगाईयां अर नगर गा खास आदमियां पौलुस अर बरनाबास गो बिरोध करणो सरू कर दियो अर बानै आपगै इलाके ऊं बारे काड़ दिया। 51 जद बां बांगै सामै पगां गो रेतो झाड़गे इकुनियुस में उड़ग्या। 52 अर अन्ताकिया गा बिस्वासी लोग खुसी अर पवितर आत्मा ऊं भरिजग्या।