खास चेला 12

पतरस गो जेळ ऊं छूट जाणो

1 बि टेम राजा हेरोदेस बिस्वासी मण्डली गै लोगा नै तंग करणो सरू करयो। 2 बण खास चेला यूहना गै भाई याकूब नै तलवार ऊं मरवा दियो। 3 ईंखातर लोग भोत राजी होया अर हेरोदेस आ बात सुणी तो बण पतरस नै बी पकड़ लियो। आ बात फसह गै त्यूंहार गै दिनां गी है। 4 अर पतरस नै जेळ में बंद कर दियो। बिंगी निगरानी खातर चार चार सिपाईयां गा चार पेरा बणाया। हेरोदेस इंया सोच्यो कै इनै फसह त्यूंहार गै बाद ई लोगां गै सामणै ल्याऊंगा।

5 पण पतरस जेळ में बंद हो, जद सारा बिस्वासी लोग एक मन होगे बिंगै खातर पराथना करा।

6 हेरोदेस पतरस नै लोगां गै सामणै ल्याण गी पेली रात पतरस दो सांकळां ऊं बांदेड़ो अर दो सिपाईयां गै बिचाळै में सुत्यो हो अर सिपाई बारनै में रुखाळी करा। 7 जद एकदम चानणो होयो अर प्रभु गो एक सुरगदूत बठै आ खडे़ होयो। बण पतरस गी पांसळी पर हात मारयो अर केयो बेगो खड़यो हो। बि टेम सांकळां हाता मूं खुल गै नीचे पड़गी।

8 सुरगदूत बिनै केयो, “जूती पेर अर कमर बांद गै तैयार होज्या अर मेरै लारै आ'ज्या।” 9 बो बारे निकळ्यो अर बिंगै लारै हो'ग्यो। पण ओ कोनी समझयो कै झिको कीं सुरगदूत केयो है बो साची है, बण इंया सोच्यो कै मैं सपनो देखूं। 10 जद बे दो पेहरा में खडया सिपाईयां नै छोडगे लोह गै फाटक कनै उड़ग्या। बो फाटक आपी खुल गयो झिको नगर कानी हो। सुरगदूत बिनै एक गली में छोड़गे उड़ग्यो।

11 जद पतरस गै समझ में आयो कै प्रभु आपगो सुरगदूत घालगे मनै जेळ ऊं छुड़ायो है अर यहुदियां गी सारी आसा पर पाणी फिरग्यो।

12 इंगै बाद यूहना झिको मरकुस कुहावै हो, बिंगी मा गै घरै गेयो बठै भोत सारा लोग इकट्टा होगे पराथना करा हा। 13 जद बण बारनो बजायो तो एक रुदे नाम गी दासी देखण आयी। 14 पतरस गी बोली सुणगे बा बारनो कोनी खोल्यो पण खुसी ऊं भाजगे मां गेयी अर सारा नै बतायो कै बारे पतरस आयो है।

15 बा केयो, “तू पागल होगी हे के?” बण केयो, “ना'ई, आ बात साची है।” जद बा केयो, “बिनै संभाळो कोई सुरगदूत होलो।”

16 पण पतरस बारनो बजावंतो रेयो अर बा आ'गे बारनो खोल्यो अर बिनै देख्यो तो हेरान हो'ग्या। 17 जद बण बा कानी इसारो कर'गे केयो, “अर बतायो कै मनै किंया जेळ मूं काड़गे ल्यायो हो” अर केयो आ बात याकूब अर सगळा नै बता देईयो। इतो केगे बो दूसरी जिग्या उड़ग्यो।

18 दिन उगतांई सिपाईया में हेलो मचग्यो कै पतरस किनै गेयो। 19 जद हेरोदेस बिनै खोज करवाई अर जद ना लादयो तो बण सिपाईयां नै मारण गो हुक्म दियो। अर बो यहुदियां में छोड़गे कैसरिया में रेण लागग्यो।

हेरोदेस गी मोत

20 हेरोदेस सूर अर सेदा गै लोगा ऊं नाराज रेवंतो। बे भेळा होगे बिंगै कनै आया अर बलासतुस झिको राजा गो एक करमचारी हो। बिनै लेगे हेरोदेस गै सागै समझेतो करवाण आया। क्यूंकै बांगो पालण पोसण बिंगै देस ऊं होवंतो।

21 आ लोगा ऊं मिलण खातर हेरोदेस एक खास दिन ठेराएड़ो। बि दिन हेरोदेस आपगा राज कपड़ा पेरगे कुरसी पर बैठयो अर उपदेस देण लागग्यो। 22 जद लोग ऊंची आवाज में केयो, “ओ सबद देवता गो है, माणस गो कोनी।” 23 बण परमेसर नै मेमा कोनी दी अर प्रभु गै एक सुरगदूत बिनै बीमार कर दियो अर बिमै कीड़ा पड़ग्या अर बिनै खाण लागग्या अर फेर बो मर ग्यो।

24 पण परमेसर गो बचन फलतो फुलतो गेयो।

25 जद बरनाबास अर साऊल आपगी सेवा पूरी कर ली तो यूहना झिको मरकुस कुहावंतो सागै लेगे यरुसलेम आग्या।