पतरस गै द्वारा आपगै काम गो बतायो जाणो
11
1 गेर यहुदी लोगां बी परमेसर गो बचन मान लियो आ बात यहुदियां में रेण आळा खास चेला अर दूसरै बिस्वासिया सुणी।
2 जद पतरस यरुसलेम में आयो तो यहुदी लोगां बिंगै सागै वाद विवाद करयो।
3 अर बिनै केयो, “थे गेर यहुदी लोगां कनै जा'गे बांगै सागै खाणो पीणो करयो।”
4 बि पर पतरस बानै झिको कीं घटयो सुणा दियो।
5 जद मैं याफा नगर में पराथना करै हो तो इंया एक दरसण देख्यो कै आकास खुल गयो अर एक मोटी चादर बरगी चीज झिकी गी चारूं कूंटा लटकती होई धरती में मेरै कानी आवैई।
6 जद मैं चादर गै मां देखयो तो बि पर हर तरियां गा पसू अर धरती पर रेंगण आळा जीव अर आकास गा उड़ण आळा जानवरा हा।
7 फेर मैं इंया आवाज सुणी, “पतरस, झिको कीं तनै दिखै है आमूं कोई बी चीज तू बणागे खा सकै है।”
8 मैं केयो, “नई प्रभु, मैं कोई बी चीज कदी कोनी खाई क्यूंकै ऐ चिजां मना करेड़ी है।”
9 दूसरी बार इंया आवाज आयी कै परमेसर झिकी खाण खातर चिजां बणाई है बामे कोई ना खाण आळी हे के?
10 तीन बारी इंया ई होयो अर बाद में ऐ चिजां उपर आकास में ले ली गयी।
11 बि टेम कैसरिया गा तीन लोग बठै आया जठै मैं रुखेड़ो।
12 पवितर आत्मा मनै केयो बिना सोच बिचार गै आंगै सागै उड़जा। अर याफा गै छ बिस्वासी लोगां सागै म्हे सारा कैसरिया में कुरनेलियुस गै घरै पूगग्या।
13 कुरनेलियुस मनै केयो, “मेरै घरै एक सुरगदूत आयो अर बण केयो याफा में किनैई भेजगे समौन पतरस ऊं मिल ले।”
14 बो तनै बचन सुणावेगो झिकै ऊं तू अर तेरो सारो परिवार मुकती पावेगो।
15 जद मैं बचन सुणावै हो तो पवितर आत्मा बा पर उतरी जिंया आपणै पर सरू में उतरी।
16 जद मनै प्रभु गी बात याद आयी कै यूहना तो पाणी में बतिस्मो देवंतो हो पण थानै पवितर आत्मा ऊं बतिस्मो दियो जावैगो।
17 जिंया आपां नै यीसू मसी पर बिस्वास करण ऊं पवितर आत्मा मिलै बिंया ई गेर यहुदियां नै बी परमेसर पवितर आत्मा गो वरदान दियो तो मैं कुण हो झिको परमेसर नै रोक सकै?
18 ओ सुणगे बे चुप हो'ग्या अर परमेसर गी बडाई कर'गे केण लागग्या परमेसर गेर यहुदियां नै बी मन फिराव करण अर अनन्त जीवन गो मोको दियो।
अन्ताकिया गा बिस्वासी
19 बे लोग स्तिफुनुस गै टेम आया अर दुख गै कारण न्यारा न्यारा हो'ग्या अर ऐ फिरता फिरता फीनिक, साईप्रस अर अन्ताकिया में पूगग्या। बे यहुदियां नै छोड़गे ओर किनै सुब समाचार कोनी सुणावंता।
20 पण कीं साईप्रस अर कुरैन गा बिस्वासी लोग अन्ताकिया जा'गे गेर यहुदी लोगा नै बी प्रभु यीसू गै बारे में बतायो।
21 प्रभु बानै सुब समाचार बोलण में भोत मदद करी, ईंखातर भोत लोग बिस्वास कर'गे प्रभु कानी मूड़या।
22 आ बात यरुसलेम गी बिस्वासी मण्डली जद सुणी तो बरनाबास नै बा बठै भेज्यो।
23 बरनाबास जद बठै पूगग्यो तो परमेसर गी किरपा देखगे भोत राजी हो'ग्यो अर सारै बिस्वासी लोगां नै केयो कै बिस्वास में ओर मजबूत हो जाओ।
24 बरनाबास एक आच्छो आदमी हो अर पवितर आत्मा गै सागै चालण आळो अर परमेसर पर बिस्वास राखण आळो हो। ईंखातर इंगै द्वारा भोत लोग बिस्वास में आया।
25 फेर बो साऊल नै डूंडण खातर तरसूस उड़ग्यो।
26 फेर बिनै डूंड़गे अन्ताकिया ल्यायो। बे पूरै एक साल तांई सारै बिस्वासियां नै मिलता रेया अर प्रभु गो संदेस देवंता रेया। सारा ऊं पेला अन्ताकिया में रेण आळा बिस्वासियां नै मसी कुहायो।
27 बा दिना में कई परमेसर गी बात बताण आळै यरुसलेम ऊं अन्ताकिया आया।
28 बामूं अगबुस नाम गो एक परमेसर गी बात बताण आळो पवितर आत्मा गै द्वारा परमेसर गी बात करी कै सारै संसार में एक भयानक अकाळ पढण आळो है। बो अकाळ क्लोदियोस गै टेम में पड़यो।
29 ईंखातर अन्ताकिया में रेण आळा सारै बिस्वासियां यरुसलेम में रेण आळा गी कीं मदद करी।
30 बठै गै बुडा लोगां कनै देण खातर बिस्वासी लोगा झिको कीं इकट्टा करयो बो बरनाबास अर साऊल गै हाता में दियो।