कुरनेलियुस गो पतरस नै बुलाणो
10
1 कैसरिया में कुरनेलियुस नाम गो एक आदमी हो। बो रोमी सेना गी इतालियन दळ गो सुबेदार हो।
2 बो अर बिंगो परिवार परमेसर नै मानण आळो हो। बो गरीबा नै मदद करतो हो अर सदा ई परमेसर ऊं पराथना करतो हो।
3 दिनगे दोफारे बाद बण एक दरसण देख्यो कै प्रभु गो एक दूत बिंगै कनै आयो अर बिनै हेलो मारयो, हे कुरनेलियुस।
4 ओ सुणगे ओ डर गयो अर बिनै पूछयो, “हे प्रभु ओ के है?” सुरगदूत केयो, “तेरी पराथना अर तेरो दीन दुखिया नै देयड़ो दान परमेसर कनै पूग्यो है।”
5 अब कई जणां नै याफा में घाल्या अर बोल्यो, बो समौन नाम गै आदमी गै घरै ठेरेड़ो हो झिको पतरस कुवावे, अठै बुला।
6 बो बठै समौन नाम गा एक चमडे़ गै काम करण आळा गै घरै हो, बिंगै घर समुन्दर गै किनारै हो।
7 जद बो सुरगदूत उड़ गेयो। इंगै बाद कुरनेलियुस बिंगा दो सेवक अर एक सिपाई झिको परमेसर नै मानण आळो हो बिनै बुलायो।
8 अर बिनै सारी बातां बतागे याफा भेज्यो।
पतरस गो सपनो
9 अगले दिन दोफारे गै टेम जद बे नगर गै कनै पूगण आळा तो पतरस उपर गो चोबारो में पराथना करण खातर उड़ग्यो।
10 जद बिनै भूख लागी अर कीं खाणो चायो हो, बि टेम बिनै एक दरसण मिल्यो।
11 अर बण देखयो कै आकास खुलग्यो अर एक मोटी चादर बरगी चीज झिकी गी चारूं कूंटा लटकती होई धरती कानी आवैई।
12 अर बि पर हर तरियां गा पसू अर धरती पर रेंगण आळा जीवा अर आकास गा उड़ण आळा जानवर हा।
13 फेर बण इंया आवाज सुणी, “पतरस, झिको कीं तनै दिखै है आमूं कोई बी चीज तू बणागे खा सकै है।”
14 बण केयो, “नई प्रभु, मैं हरेक चीज कदी कोनी खाई क्यूंकै ऐ चिजां मना करेड़ी है।”
15 दूसरी बार इंया आवाज आयी कै परमेसर खाण खातर झिकी चीजा बणाई है बामे कोई ना खाण आळी हे के?
16 तीन बारी इंया ई होयो अर बाद में ऐ चिजां उपर आकास में ले ली गेयी।
17 जद पतरस दरसण गै बारे में सोचण लागरयो बि टेम झिकै आदमियां नै कुरनेलियुस चमड़ै गै काम करण आळा समौन गै घर में भेज्या बे बारनै पर आया।
18 अर हेलो मारगे पूछयो कै समौन झिको पतरस कुवावे, बो अठै हे के?
19 अजे बी पतरस बि दरसण गै बारे में सोचण लागरयो हो, बि टेम पवितर आत्मा बिनै केयो, सुण, तनै तीन आदमी डूंडण लागरया है।
20 अर उठगे बा कनै जा अर बिना सोचे बिचार बांगै सागै जाण खातर तैयार होज्या, क्यूंकै बानै मैं ईं भेज्या।
21 बो उठगे बा कनै गेयो अर केयो, देखो थे झिकै नै डूंडो बो मैं ईं हूं। मेरूं थानै के काम है?
22 बो बोल्यो कै कुरनेलियुस झिको धरमी अर परमेसर नै मानण आळो है, अर सारा यहुदी लोग बिंगी इज्जत करै बणी मनै भेज्यो है क्यूंकै एक सुरगदूत बिनै केयो थानै ल्यागे थारूं बचन सुणै।
23 ईं पर पतरस बिनै मा बुलायो अर रोकण खातर जिग्या दी। फेर अगले दिन तैयार होगे याफा गै कीं बिस्वासियां गै सागै उड़ग्या।
कुरनेलियुस गै घरै पतरस
24 दूसरै दिन कैसरिया पूग्या अर बठै आपगै बेलियां अर रिस्तेदारा नै बुला'गे बांगी उडीक करण लागरया।
25 जद पतरस बिंगै कनै आयो तो कुरनेलियुस बिंगै पगां पड़ग्यो।
26 पण पतरस बिनै इंया करण ऊं मना करयो अर केयो, मैं बी तेरै बरगो एक आदमी हूं।
27-28 फेर बण बिंगै सागै बात करता करता देख्यो कै बठै भोत लोग इकट्टा हो'ग्या। बण बानै केयो थे जाणो हो कै एक यहुदी गेर यहुदी सागै रिसतो राखै ओ नेम विधान गै खिलाफ है। पण मेरूं परमेसर बात करी है कै तू कोई बी आदमी नै असुद्ध समझण में सोच बिचार ना करी।
29 ईंखातर मनै जद बुलायो तो बिना कोई सोच बिचार गै आ'ग्यो। अब मैं थानै पूछूं कै मनै क्यूं बुलायो है?
30 कुरनेलियुस केयो, “चार दिन पेला में दोफारे बाद आपगै घरै पराथना करै हो तो एकदम चमकिला गाबा पेरेड़ो एक आदमी मेरै सामणै आयो,
31 अर केयो, कुरनेलियुस तेरी पराथना सुण ली अर दीन दुखिया गै देऐडे़ दान नै परमेसर याद करयो।
32 ईंखातर किनैई याफा में भेज गै चमडे गो काम करण आळै समौन गै घरै समौन पतरस एक आदमी है बिनै बुला।
33 ईंखातर जद मैं तनै बुलाण खातर बानै भेज्या अर थे अठै आया, आ भोत आच्छी बात है। झिको संदेस अब प्रभु थारै द्वारा सुणावोगा बो सुणण खातर म्हे सारा अठै भेळा होया हा।”
पतरस गो संदेस
34 पतरस बिनै केयो, “अब मैं समझग्यो कै परमेसर किंगैई सागै भेदभाव कोनी करै।
35 परमेसर हर एक जाती गो झिको बिंगी बात नै मानै अर बिंगो आदर मान करै बो बिनै स्वीकार करै।
36 प्रभु यीसू मसी झिको सारा गो प्रभु है बिंगै द्वारा सारै इसराएल गै लोगा नै सांती गो संदेस दियो ओ थानै पतो है।
37 यूहना गै द्वारा बतिस्मै गो संदेस देण गै बाद गलील ऊं सरू होगे पूरै यहुदियां में के हो'ग्यो, बिंगो बी थानै पतो है।
38 यीसू नासरी गै बारे में अर परमेसर बिनै किंया पवितर आत्मा दी थानै पतो है। बण भला काम अर सैतान ऊं बंदेड़ा नै छुड़ाया क्यूंकै परमेसर बिंगै सागै हो।
39 यहुदी प्रदेस अर यरुसलेम में झिका काम बण करया बांगा में म्हे खास चेलो गवाह हा। पण यहुदियां बिनै काठ पर लटकागे मार दियो।
40 पण परमेसर बिनै तीसरै दिन पूठो जींवतो कर दियो अर म्हानै दिखा बी दियो।
41 सारै लोगां पर कोनी पण बे गवाह झिका पेला चुण लिया। बे म्हे हा, बिंगै मरण ऊं जी उठण गै बाद बिंगै सागै खाणो पीणो करयो हो।
42 अर बण म्हानै आग्या दी कै लोगां में परचार करो अर गवाई देओ कै परमेसर बिनै मरेड़ा अर जींवता गो न्याय करण गो अधिकार दियो।
43 झिको यीसू मसी पर बिस्वास करै बिनै पापां ऊं माफी मिलैगी, आ बात म्हे सारा परमेसर गी बात बताण आळा गै मू ऊं सुणी है।”
गेर यहुदियां पर पवितर आत्मा गो उतरणो