खास चेला 9

साऊल गो मन बदळणो

1 साऊल प्रभु गै चेला नै मारण गी धमकियां देवंतो रेवंतो हो अर महा याजक कनै गेयो। 2 अर बि कनूं दमसिक गै संतसंग घरां गै नाम ऊं अधिकार खत लियो कै बठै कोई बी आदमी अर लुगाई यीसू मसी नै मानण आळो मिलज्यै तो बिनै बांदगे यरुसलेम में ले आवै। 3 जद बो चालतो चालतो दमसिक गै कनै आयो तो बिंगै च्यारूंमेर आकास ऊं चानणो होयो। 4 अर बो धरती पर पड़ग्यो, बण एक इंया आवाज सुणी, “साऊल अरै साऊल, तू मनै क्यूं तंग करै है?”

5 साऊल बिनै पूछयो, “तू कुण है?” बण केयो, “मैं यीसू झिकै नै तू तंग करै है।”

6 अब तू खड़यो हो'जा अर नगर में जा, बठै तनै के करणो है बता दियो जावैगो।

7 झिका आदमी बिंगै सागै सफर में हा बे डरग्या क्यूंकै बा आवाज तो सुणी पर कीं दिख्यो कोनी। 8 जद साऊल धरती पर ऊं खड़यो होयो तो बिनै कीं कोनी दिख्यो। बे बिनै हात पकड़गे दमसिक ले गया। 9 तीन दिनां तांई बो ना देख सकयो ना रोटी खाई ना पाणी पीयो।

10 दमसिक में एक हनन्याह नाम गो एक चेलो हो। प्रभु दरसण देगे बिनै केयो, “हनन्याह,” बण केयो, “हा प्रभु।”

11 प्रभु बिनै केयो, “खड़यो हो अर यहूदा गी गळी झिकी नै सीधी केवै है, बिंगै मां बिंगै घर पर जा'गे तरसूस गै रेण आळै साऊल नै जा'गे मिल, क्यूंकै बो अब पराथना करै है।” 12 बण इंया एक दरसण देख्यो कै हनन्या नाम गो एक आदमी नै अठै आयो अर बि पर हात रख्यो अर बिनै दिखण लागग्यो।

13 हनन्याह उतर दियो, “यरुसलेम में तेरै पर बिस्वास करण आळै लोगा सागै अण आदमी भोत बुरो सलूक करयो, बो मैं सुण्यो है।” 14 ओ आदमी थारै पर बिस्वास करण आळा नै पकडण खातर महा याजक कनूं आदेस लेगे दमसिक आयो।

15 पण प्रभु बिनै केयो, “तू जा।” क्यूंकै मैं इनै ईंखातर चुण लियो कै मेरो सुब समाचार गेर यहुदियां अर राजावां अर इसराएल में मेरै नाम गो परचार करै। 16 मेरै नाम खातर बिनै कितो दुख सेणो पडे़गो ओ मैं बिनै आप बताऊंगा।

17 जद हनन्याह चाल पड़यो अर बिंगै कनै गेयो अर साऊल पर आपगो हात रखयो अर केयो, “भाई साऊल, प्रभु यीसू मनै भेज्यो है झिको तेरै रा में परगट होयो कै तू फेर ऊं देख सकै अर पवितर आत्मा ऊं भरज्य।” 18 फेर बि टेम ई फूसके बरगो गी कोई चीज बिंगी आंख्या ऊं निकळया अर बो देखण लागग्यो जद बो खड़्यो होयो अर बतिस्मो लिओ, 19 फेर थोडो खाणो पीणो करण गै बाद बिनै सकती मिली। बो कीं दिन बिंगै चेलां गै सागै दमिसिक में हो।

दमिसिक में साऊल गो परचार

20 फेर बो बेगो ई यहुदी सतसंग घर में जा'गे यीसू गो परचार करण लागग्यो अर केयो, “ओ यीसू परमेसर गो बेटो है।” 21 आ बात झिका बठै सुणी बे लोग चोकना हो'ग्या अर बोल्या कै ओ बो ई आदमी है झिको यरुसलेम में यीसू मसी पर बिस्वास करण आळा नै पकड़गे मार देवंतो हो। इंगो अठै आण गो मतलब ओ ई है कै अठै गै बिस्वासियां नै पकडगे महा याजक कनै लेज्य। 22 साऊल ओर बोळो सकतीसाली होवंतो गेयो अर दमिसिक में रेण आळै यहुदियां नै ओ केगे साबित करतो कै यीसू ई मसी है अर यहुदियां गी बोलती बंद करतो रेयो।

23 अर भोत दिन गै बाद यहुदियां बिनै मारण गी योजना बणाई। 24 बे नगर गी मोटोड़ी गळी गै कनै दिन रात ताक में बैठ्या रेवंता कै बिनै पकडगे मार दया। पण साऊल नै बांगी चाल गो पतो लागग्यो। 25 पण बिंगा चेला बिनै रात नै ई टोकरे में घालगे अर नगर गी चार दिवारी गै दूसरै पासै लटकागे नीचे उतार दियो।

26 फेर बो जद यरुसलेम पूग्यो तो चेला सागै मिलण गी कोसिस करी। बे सारा बिऊं डर ग्यो, बानै बिस्वास कोनी होवै कै ओ यीसू गो चेलो बण गयो के? 27 बरनबास खास चेला नै साऊल गै बारे में बतायो, इंगै सागै रा में किंया होयो अर प्रभु इंगै सागै किंया बात करी अर किंया बिना डर गै सागै दमसिक में यीसू गो परचार करयो। 28-29 फेर साऊल बांगै सागै यरुसलेम में बिना डरगे आवंतो जावंतो अर यीसू मसी गो परचार करतो रेयो। अर युनानी बोली बोलण आळा यहुदी लोगां सागै बात करतो हो पण बे बिनै मारणो चावा। 30 जद बिस्वासी लोगा नै ईं बात गो पतो लागग्यो तो बिनै कैसरिया ले गया अर बाद में तरसूस पुगा दियो।

31 अर सारा यहुदियां, गलील अर सामरिया गा बिस्वासी लोग बडी सांती ऊं रेण लागग्या। पवितर आत्मा गै द्वारा ऐ लोग बिस्वास में ओर बोळा मजबूत हो'ग्या अर प्रभु गै डर गै सागै बढती जावै।

लुदिया अर याफा में पतरस

32 इंया पतरस सारी जिग्या में घूमता टेम एकर लुदिया देस गै बिस्वासी लोगा नै मिलण गेयो। 33 बठै आठ साल ऊं लकवै गो बीमार एनियास मिल्यो। 34 पतरस बिनै केयो, “एनियास, यीसू मसी तनै ठीक करै है, उठ जा।” बि टेम ई बो खड़यो हो'ग्यो। 35 ओ चमत्कार देगे लिदिया अर सारोन में रेण आळा सारा लोग प्रभु कानी मूड़ गेया।

36 याफा में तबीता नाम गी एक बिस्वासी लुगाई रेवंती झिकी नै युनानी बोली में दोरकास केवंता, इंगो मतलब है “हिरनी।” बा भोत आच्छा काम करती। 37 बा बीमार होयी अर मरगी। बिंगी ल्हास गो नहागे उपर गै कमरे में रख दी। 38 याफा लिदिया गै कनै हो। जद बिस्वासियां सुण्यो कै पतरस लिदिया में है तो बा बि कनै दो आदमी घाल्या अर बिनती करी कै म्हारै कनै जल्दी आवै।

39 पतरस बा कानी चाल पड़यो। जद पतरस बठै गेयो तो बिनै कमरे में ले गया। बठै विधवा लुगाईयां रोणती होई अर बिंगै हात ऊं बणाएड़ा गाबा दिखाण लागी।

40 पतरस सारा नै बारै काड़ दिया अर घुटना टेके पराथना करी अर ल्हास कानी देखगे अर केयो, “तबीता, खडी हो'जा।” बण आपगी आंख्या खोली अर पतरस कानी देखण लागी। 41 पतरस बिंगो हात पकड़गे खडी करी अर सारी विधवां अर बिस्वासी लोगां नै बुला'गे बानै दे दी। 42 सारै याफा में ईं बात गो पतो लागग्यो अर भोत लोग प्रभु में बिस्वास करयो। 43 फेर याफा में सीमोन नाम गो एक चमड़ै गो काम करण आळो रेवंतो, बिंगै कनै पतरस भोत दिनां तांई बि कनै रेयो।