8
1 साऊल स्तिफनुस नै मारण में मदद करी। बि दिन ऊं यरुसलेम गी बिस्वासी मणडलिया पर दंगा गा दिन आग्या। खास चेला नै छोड़ सारा बिस्वासी लोग यहुदियां अर सामरिया गै गामां में तितर बितर हो'ग्या।
बिस्वासी लोगां नै तंग करया जाणा
2 कीं जणा झिका परमेसर गी आराधना करता बे लोग स्तिफनुस नै भोत दुख अर सोक गै सागै दफना दियो।
3 साऊल बिस्वासी मण्डली गै लोगा नै तंग करणो सरू कर दियो, अर घर घर जा'गे लुगाईयां अर आदमियां नै घीस घीस गै ले जा'गे जेळ में बंद करण लागग्यो।
सामरिया में फिलिप्पुस गो परचार
4 झिका लोग दूसरा देसां में तितर बितर हो'ग्या बे ईं सुब समाचार गो संदेस सुणाण लागग्या।
5 फिलिप्पुस सामरिया नगर में जा'गे बठै मसी गो समाचार सुणाण लागग्यो।
6 भोत लोग एक मन होगे फिलिप्पुस गी बात सुणता अर बिंगा करेड़ा चमत्कार देखता।
7 भोत सारै लोगा मूं ओपरियां रोळो मचावंती निकळती अर भोत सारा लकवै गा रोगी अर लंगड़ा ठीक होवंता।
8 अर बि नगर में भोत खुसी होगी।
जादू करण आळो समौन
9 बि नगर में समौन नाम गो एक आदमी रेवंतो झिको जादू टूणो करतो। बो सामरिया प्रदेस गै लोगां नै हेरान करतो अर अपणै आपनै एक मोटो आदमी पेस करतो।
10 बि नगर गा आम अर खास लोग सारा बिंगी बाता ध्यान ऊं सुणता अर केवंता, ईं आदमी नै म्हान होण खातर परमेसर सकती दी है।
11 बे लोग भोत दिना ऊं बिंगी बात सुणता आण लागरया क्यूंकै बण भोत दिना ऊं बानै आपगै चकर में घाल राख्या।
12 पण जद बा फिलिप्पुस ऊं परमेसर गै राज गी बात अर यीसू मसी गै नाम गो संदेस सुणयो तो बिस्वास कर'गे भोत आदमिया अर लुगाईयां बतिस्मो लियो।
13 अर समौन बी बिंगी बातां पर बिस्वास कर'गे बतिस्मो लियो अर बो फिलिप्पुस गै द्वारा होवंता चमत्कारा नै देख भोत अचंभित होवंतो।
सामरिया में पतरस अर यूहना
14 यरुसलेम में खास चेला जद सुणयो कै समरिया गा लोगा परमेसर गो बचन मान लियो तो बा पतरस अर यूहना नै बांगै कनै घाल्या।
15 जद बे पूग्या तो बा खातर पराथना करी कै बानै पवितर आत्मा मिलै।
16 क्यूंकै अजे तांई पवितर आत्मा कीं कोनी उतरयो सिरफ प्रभु यीसू गै नाम ऊं बतिस्मो लियो।
17 जद पतरस अर यूहना बा पर हात राख्यो जद बानै पवितर आत्मा मिली।
18 जद सीमोन देख्यो कै खास चेला गै हात राखण ऊं बिस्वासी लोगां नै पवितर आत्मा मिलै तो बो बानै रिपिया देवंता होया बोल्यो,
19 “आ सकती मन्नै दे कै, मैं झिकै पर हात रखूं बिनै पवितर आत्मा मिलज्य।”
20 पतरस केयो, “तू अर तेरो धन नास होवै क्यूंकै तू इंया सोच्यो कै परमेसर गै वरदान नै रिपियां ऊं मोल लियो जा सकै।
21 ओ काम करण खातर तू बिलकुल योग्य कोनी क्यूंकै परमेसर गी नजर में तेरो मन साफ कोनी।
22 ईंखातर तू आपगी बुराई नै दूर कर अर परमेसर ऊं पराथना कर, हो सकै झिको तेरै मन में बिचार हो बिनै परमेसर माफ कर दय।
23 मनै ईं बात गो पतो है कै तेरै मन में जलन है अर पूरी तरियां पाप ऊं भरेड़ो है।”
24 सीमोन पतरस अर यूहना नै केयो, “थे प्रभु ऊं मेरै खातर पराथना करो कै थे झिको कीं मनै केयो है बिमुं कोई बी बात मेरै पर ना घटै।”
25 जद खास चेला आपगी गवाई अर बचन सुणागे रा में भोत सारा सामरी गामां में परचार करता होया यरुसलेम आग्या।
फिलिप्पुस अर कूस देस गो अधिकारी
26 प्रभु गै दूत फिलिप्पुस नै केयो, “दकसिण ऊं बि रा पर जा झिको गाजा कानी जावै बि पर भोत कम लोग रेवै।”
27 बो उठगे चाल पड़यो अर देख्यो कूस देस गो एक आदमी आवै हो, बो खुसरो हो अर कूसियां गी राणी कन्दाके गो मत्री अर खजानची हो। बो आराधना करण खातर यरुसलेम आ'गे पाछो जावै हो।
28 बि टेम बो रथ में बैठगे यसयाह परमेसर गी बात बताण आळै गी किताब पढण लागरयो हो।
29 जद फिलिप्पुस नै पवितर आत्मा केयो, “रथ गै कनै जा अर बिंगै सागै होले।”
30 फिलिप्पुस जद रथ कानी भाज गै गयो तो बण बिनै यसयाह परमेसर गी बात बताण आळै गी किताब पढता सुणयो अर पूछयो, “तू झिको कीं पडै़ है बिनै समझै हे के?”
31 जद बण केयो, “जद तांई कोई समझाण आळो ना होवै मैं किंया समझ सकूं।” फेर बण फिलिप्पुस नै आपगै सागै बिठायो।
32 पवितर सासतर गो ओ बचन बो पढण लागरयो,
“बो काटण आळी भेड़ गै समान काटण आळी जिग्या पर पूगग्यो,
जिंया मेमणियों ऊन कतरता टेम चुप रेवै बिंया ई बो चुप रेयो।
33 बिंगी दीनता में बिंगो न्याय कोनी होयो।
बिंगी पीढी गी बातां कुण बतासी क्यूंकै धरती ऊं बिंगो जीवन ले लियो हो।”
34 ईं बात पर खुसरे फिलिप्पुस नै केयो, “किरपा कर'गे मनै बता कै परमेसर गी बात बताण आळो किंगै बारे में केवै है। आपगै बारे में ओर दूसरै गै बारे में।”
35 जद फिलिप्पुस आपगो मूं खोल्यो अर सासतर ऊं सरू कर'गे बिनै यीसू गो सुब समाचार सुणायो।
36 आ'गे जावंता होया बे पाणी आळी जिग्या पूग्या फेर बण खुसरे फिलिप्पुस नै केयो, “देख अठै पाणी है, थे मनै अब बतिस्मो दे दयो।”
37 फिलिप्पुस केयो, “जे तू सारै मन ऊं बिस्वास करै तो ले सकै है।” बण उतर दियो, “मैं बिस्वास करूं कै यीसू मसी परमेसर गो बेटो है।”
38 बण रथ रोकण गी आग्या दी अर दोनूं पाणी में उतरया अर फिलिप्पुस बिनै बतिस्मो दियो।
39 जद बे पाणी ऊं बारै निकळया तो फिलिप्पुस नै प्रभु गी आत्मा लेगी अर खुसरे फिलिप्पुस नै कदी कोनी देखयो अर बो खुसी गै सागै बठूं चाल पड़यो।
40 फिलिप्पुस असतोद में आ'ग्यो, अर जद तांई बो कैसरिया ना पूग्यो जद तांई बो नगर नगर में सुब समाचार सुणावंतो रेयो।