स्तिफनुस गो संदेस
7
1 जद महा याजक स्तिफनुस नै पूछयो, “आ बात साची हे के?”
2 बण बानै केयो, “मेरा यहुदी बेलियों अर बुजुरगों, मेरी बात सुणो। हारून में रेण ऊं पेला आपणो बडेरो अबरहाम मिसुपुतियोमा में हो, जद मेमा गै योग्य परमेसर बिनै दरसण देगे केयो,
3 ‘आपगै देस अर आपगै लोगां नै छोडगे बठै जा जठै मैं तनै केऊं।’”
4 ईंखातर बि मिसुपुतोमिया गो दूसरो नाम कसदिया गो देस कुहावै, जद बो बिनै छोडगे हारून में बस गयो। आपगै पिता गै मोत गी बाद बिनै परमेसर बि देस में भेज्यो जठै थे अब रेवो हो।
5 बि देस में परमेसर अबरहाम नै कीं कोनी दियो। पण परमेसर बिनै वायदो करयो कै तनै अर तेरै वंस नै सारो कीं दे देऊंगा, बि टेम बिंगै उळाद बी कोनी।
6 परमेसर बिनै इंया बी केयो, “तेरा वंस दूसरै देस में रेण आळै लोगा सागै रेसी अर चार सौ साल तांई बानै दास बणागे बांगै सागै भोत बुरो सलूक करसी।”
7 परमेसर केयो, “दास बणाण आळै लोगां नै दण्ड देऊंगा अर बिंगै बाद बे बि देस ऊं बारे आ'गे ईं देस में मेरी सेवा करेगा।”
8 परमेसर बिऊं खतनै गी वाचा बांध दी। ईंखातर अबरहाम गै बेटै इसहाक पैदा होण गै आठ दिन गै बाद बिंगो खतनो करयो अर इसहाक आपगै बेटै याकूब नै खतनो दियो याकूब आपगै बारा बेटां नै खतनो दियो। अर ऐ लोग है म्हारा बारा गोतर।
9 ऐ लोग आपगै छोटे भाई युसुफ पर जलन राखता। आ बिनै मिस्र देस में दास बणन खातर बेच दियो। पण परमेसर बिंगै सागै हो।
10 अर बिनै सारी मुसकिला ऊं बचागे परमेसर मिस्र गै राजा फिरोन गी नजर में बिनै बुद्धी अर ग्यान दियो। अर फिरोन बिनै सारै मिस्र पर अर आपगै घर पर हाकिम बणा दियो।
11 जद मिस्र देस अर कनान देस में अकाळ पड़यो अर आपणै बडेरा नै बी खाण खातर कीं कोनी मिल्यो अर भोत ज्यादा क्ळेस फेल ग्या।
12 जद याकूब नै पतो लागग्यो कै मिस्र देस में अनाज है तो पेली बार बो युसुफ गै मोटै भाईयां नै बठै भेज्या।
13 जद युसुफ गा भाई दुसर अनाज लेण आया तो युसुफ बानै आपगै बारे में बतायो अर राजा फिरोन नै बी युसुफ गै बारे में पतो लागग्यो।
14 युसुफ आपगै मोटै भाईयां नै केगे भेज्यो कै आपगै पिता याकूब अर परिवार गा बाकी पचैतर लोगां नै लेगे आइयो।
15 जद याकूब मिस्र देस में आ गयो अर बठै बो अर आपणा बडेरा लोग मर गेया।
16 आंगी ल्हास सेकेम में लेगे आया अर बि कबर में राखी झिकी अबरहाम हामोर गी संतान कनूं मोल ली।
17 जद परमेसर झिको वायदो अबरहाम नै दियो हो बो पूरो करण गो टेम आयो तो मिस्र में आपणा लोग भोत हो'ग्या।
18 फेर मिस्र में दूसरो राजा होयो तो बो युसुफ नै कोनी जाणतो।
19 बण आपणै बडेरां सागै बुरो बरताव करयो अर बानै खत्म करण गी सोची अर बांगै टाबरां नै बारे फेंकण गो हुकम दियो कै बे मर ज्य।
20 बि टेम मूसा गो जन्म होयो। बो परमेसर गी नजर में भोत सुणो हो। बो तीन मिनां तांई आपगै पिता गै घर में पाळयोग्यो।
21 फेर जद बिनै बारै फेंक दियो तो फिरोन गी बेटी बिनै आपगो बेटो बणागे घरै ले आई अर बिंगी देखभाल आपगै बेटै गै रूप में करी।
22 मूसा मिसरियां गी सारी सिक्सा लेगे बचन अर करम दोनां में सामरथ होगे एक खास आदमी बणग्यो।
23 जद बो चालीस साल गो हो'ग्यो तो बण इसराएल में आपगै बेलियां अर रिस्तेदार कनै जाण गो फैसलो करयो अर गेयो।
24 एकर एक मिस्री आदमी इसराएली आदमी सागै लड़ पड़यो अर बिनै मार दिओ। मूसा आयो अर मिस्री नै मारगे बदळो लियो।
25 मूसा सोच्यो कै बिंगा इसराएली भाई लोग इंया सोचेगा कै परमेसर बानै बिंगै हात ऊं छुटकारो दिरावैगो। पण बे लोग कोनी समझाया।
26 दूसरै दिन दो इसराएली लोग आपसरी में झगड़ो करै हा। मूसा बानै केयो, थे आपसरी में भाई हो इंया ना लड़ो।
27 झिकै आदमी दूसरै आदमी गो बोळो नुक्सान करयो बण मूसा नै केयो, “परने जा। तनै म्हारो न्याय करण खातर कण बुलायो?
28 जिंया तूं काल मिस्री नै मारयो बिंया मनै बी मारणो चावै हे के?”
29 आ बात सुणी तो मूसा बठूं उड़ग्यो अर मिदान देस में रेण लागग्यो। बठै बिंगै दो बेटा होया।
30 जद चालीस साल बीत गया तो सिनाई नाम प्हाड़ कनै बन उजाड में एक जगते झाड़के में परमेसर गै सुरगदूत बिनै दरसण दियो।
31 मूसा जद ओ देखयो तो भोत हेरान होयो, जद बो झाड़के गै ओर कनै गेयो तो बिनै प्रभु गी वाणी सुणीजी।
32 मैं तेरै बडेरा अबरहाम, इसहाक अर याकूब गो परमेसर हूं। जद डर गै कारण मूसा कीं देखण गी हिम्मत ना करी।
33 जद प्रभु बिनै केयो, “तू आपगी जूती उतार दे क्यूंकै तू झिकी जिग्या पर खडयो बा पवितर है।”
34 मैं मिस्र में आपगै लोगां सागै बुरी दसा अर बांगो रोणो सुण्यो है। बानै छुड़ाण खातर मैं नीचे उतरयो हूं अर अब मैं तनै मिस्र भेजूंगा।
35 ओ बो ई मूसा है झिकै नै इसराएल गै लोगां ओ केगे नकार दियो अर बिनै केयो म्हारै पर राज अर न्याय करण गो अधिकार तनै कण दियो है। बिनै ई परमेसर झाड़के में सुरगदूत गै द्वारा दरसण देगे भेज्यो कै इसराएलियां पर राज करण खातर अर बानै मिस्र मूं छुड़ागे लेगे आण खातर।
36 बो ई मूसा मिस्र अर लाल समुन्दर अर बन उजाड में चालीस साला तांई चमत्कार गा काम कर'गे इसराएलियां नै काड़ ले आयो।
37 बो ई मूसा है झिकै इसराएलियां नै केयो परमेसर थारै मूं थारै खातर मेरै बरगो एक परमेसर गी बात बताण आळो खडयो करेगो।
38 बण ई इसराएल लोगां नै इकठ्ठा करया, सुरगदूत सिनाई प्हाड़ पर बिऊं अर आपणै बडेरा ऊं बात करी अर परमेसर गो जीवित बचन देगे मनै दियो।
39 पण आपणै बडेरा बिंगो केणो कोनी मान्यो अर बिंगी बात बी कोनी सुनणी चाई, आपगै मन में मिस्र पाछा जाण गी सोची।
40 अर बा हारून नै केयो, “म्हारै खातर एक हिस्यो देवता बणा झिको म्हानै आ'गे ले जावै। ओ मूसा झिको म्हानै मिस्र ऊं काड़ ले आयो म्हानै कोनी पतो है बिनै के होयो है?”
41 बा दिनां में बा एक मूरती बणायी, मूरती पर बली चढाई अर खुसी मनाई।
42 जद परमेसर नै बा पर रीस आ'गी अर आकास गी सारी जोतीयां गी पूजा करण खातर बानै छोड दिया। जिंया पवितर सासतर में लिखेडो है कै, थे इसराएली लोगां चालीस साल तांई बन उजाड में म्हानै कोई बी बली कोनी चढायो।
43 थे लोग मोलेक गै तंबु
अर रिफान देवता गी तारे गी मूरती नै
झिकै नै आराधना करण खातर थे बणायो बिनै लिये फिरता,
ईंखातर मैं थानै बाबिलोण ऊं दूर ले जा'गे बसाऊंगा।
44 आपणै बडेरा बन उजाड में आराधना करण खातर एक तंबु बणायो अर बिमै आराधना करी। परमेसर जिंया मूसा नै तंबु बणाण गो हुकम दियो बण बिस्यो ई बणायो।
45 बिंगै बाद आपणै बडेरा लोग यहोसु गै सागै बि तंबु नै लेगे परमेसर भोत पेला आपणै बडेरा लोगां गै सामूं बारे काडेडा अन्य जाती लोगां गी धरती पर आ'गे अधिकार कर लियो। अर बो तंबु दाऊद गै टेम तांई रेयो।
46 परमेसर गी किरपा दाऊद पर होई अर बण परमेसर ऊं बिनती करी कै याकूब गै परमेसर खातर इसराएली लोग आराधना करण खातर एक मिन्दर बणावै।
47 पण बिंगो बेटो सुलेमान ई मिन्दर बणायो।
48 “पण परम प्रधान परमेसर हात गै बणाएडै़ मिन्दर में कोनी रेवै। पवितर सासतर में इंया लिखेड़ो हो कै,
49 सुरग मेरै बैठण गी जिग्या है,
धरती मेरा पगां गी चौकी है,
मेरै खातर थे किंया गो घर बणावेगा,
अर मेरै आराम करण गी जिग्या कीं तरियां गी होवैगी।
50 ऐ सारी चिजां मेरै हात गी बणाएड़ी है।”
51 “हे डीठ लोगों, थे लोग परमेसर गी बात सुनणी अर मानणी कोनी चाओ। सदा पवितर आत्मा गो बिरोध करो जिंया थारा बडेरा करतां।
52 थारा बडेरा सारा परमेसर गी बात बताण आळा नै इंया ईं तंग करया झिका भोत पेला बि धरमी मसी गै आण गी बात बताई, थे बिनै बी धोखो देगे मार दियो।
53 थे सुरगदूतां गै द्वारा देयड़ो नेम विधान तो ले लियो पण बि पर चाल्या कोनी।”
स्तिफनुस पर पथरवार
54 जद महा पंचायत आ बात सुणी तो भोत रीस आ'गी अर दांत पीसण लागग्या।
55 पण स्तिफनुस पवितर आत्मा ऊं भरिजगे सुरग कानी देख्यो अर परमेसर गी मेमा अर यीसू मसी नै परमेसर गै सजै पासै खडयो देखयो।
56 जद बण केयो, “देखो, मैं देखू कै सुरग खुलेड़ो है अर माणस गो बेटो परमेसर गै सजै पासै बैठियो।”
57 ईं पर बा रोळो मचायो अर आपगा कान बंद कर लिया। अर फेर सारा बि पर टूट पड़या।
58 बे बिनै घसीटता होया अर नगर गै बारे ले गया अर बि पर पथर मारण लागग्या। झिका लोग बिनै मारणो चावा हा बा आपगा गाबा उतारगे सौल नाम गै आदमी गै पगां में रख दिया।