महा पंचायत गै सामणै पतरस अर यूहना
4
1 जद पतरस अर यूहना लोगां ऊं बात करां हा बि टेम कीं याजक लोग, मिन्दर गै सिपाईयां गो मोटा अधिकारी लोग अर कीं यहुदी धरम गै लोगां गो झुंड बांगै कनै आयो।
2 ऐ लोग भोत रीस में हा क्यूंकै ऐ दो खास चेला लोग यीसू मसी गै बारे में बतागे मरेड़ा ऊं जी उठण गो परचार करता हा।
3 ईंखातर बा दोनां नै अगले दिन खातर बंद कर दिया।
4 भोत सारै लोगा पतरस अर यूहना गो संदेस सुणगे यीसू मसी पर बिस्वास करयो। बिस्वास करण आळा गी आदमियां गिणती लगभग पांच हजार होगी।
5 अगले दिन बांगै बुजरग नेता अर यहुदी धरम सासतरी यरुसलेम में पंचायत रखी।
6 हना महा याजक, कैफा, यूहना, सिकन्दर अर महा याजक गै परिवार गा दूसरा लोग बी आया।
7 बे लोग बा दोना नै पूछण लागग्या कै ओ काम करण गो अधिकार थानै कण दियो?
8 फेर पतरस पवितर आत्मा ऊं भरिज्गै बानै केयो, हे नेताओं अर बुडा लोगों,
9 आज थे लोग ओ लंगडो आदमी किंया ठीक होयो इंगै बारे में पूछणो है तो म्हारूं बात करो।
10 थानै अर पूरै इसराएली लोगां नै पतो होणो चईयै ओ काम नासरी यीसू मसी गै द्वारा होयो है। थे लोग यीसू मसी नै करूस पर चढायो पण परमेसर बिनै मरेडा ऊं जींवतो कर दियो।
11 यीसू गै बारे में पवितर सासतर में इंया लिखेडो कै, “थे झिकी ईंट नै बेकार कर'गे समझी बाई एक कूंट पर लागाणाळी आच्छी ईंट बणगी।”
12 ईंखातर म्हानै यीसू मसी में ई मुकती मिलै हे अर पूरी दुनिया में मुकती पाण खातर परमेसर इंगै बिना कोई दूसरो नाम कोनी दियो।
13 बे लोग समझ गया कै पतरस अर यूहना बांगै कनूं जमाई कोनी डरै। ऐ दोनूं अणपड़ अर आम आदमी है, बानै पतो लागग्यो कै ऐ यीसू मसी गै सागै रेवंता, ईं बात गो बानै अचंभो हो'ग्यो।
14 ठीक होएड़ो आदमी पतरस अर यूहना कनै खडयो देखगे बां कनै बोलण गी हिमत कोनी रेयी।
15 बा बानै यहुदी पंचायत ऊं बारै काड़ दिया अर आपसरी में आंगै बारे में बात चीत करण लागग्या।
16 आ लोगां पर आपां कीं कोनी कर सकां क्यूंकै यरुसलेम में रेण आळा हर कोई जाणै बांगै द्वारा एक आच्छो चमत्कार होयो है अर आपां बिनै मना कोनी कर सकां
17 पण आपां बानै चेतावनी देवां कै बे यीसू मसी गै नाम ऊं करेडै़ चमत्कार नै किनैई ना बतावै कै ईं बात नै फेलण ऊं रोक्यो जा सकै।
18 बा बानै यहुदी पंचायत में बुलाया अर चेतावनी दी कै बे यीसू गो नाम किनैई ना बतावै अर ना बि नाम गो उपदेस देवै।
19 पतरस अर यूहना केयो, “परमेसर गी नजर में थानै परमेसर ऊं जादा आदर थानै देणो आच्छो या कोनी, इंगो फैसलो थे आप ई करो।”
20 झिको कीं यीसू मसी कनूं सीख्यो अर देख्यो बो दूसरा नै बताणो ई पडे़गो।
21 बा पतरस अर यूहना नै धमकाया अर छोड़ दिया अर बानै सजा कोनी दी क्यूंकै पेला होयडै़ चमत्कार नै लेगे भोत सारा लोग परमेसर गी बडाई करा हा।
22 झिकै आदमी पर चमत्कार होयो बिंगी उंमर चालीस साल ही।
बिस्वासियां गी पराथना
23 महा पंचायत ऊं छूट'गे पतरस अर यूहना दूसरै बिस्वासी लोगा कनै आया झिको कीं महा याजकां अर बुडे लोगां बतायो बानै बता दियो।
24 आ बात सुणगे सारा एक सागै मिलगे परमेसर गी बडाई करी अर केयो, “म्हारा म्हान प्रभु, सुरग, धरती अर समुन्दर अर झिको कीं आंगै मा है सारो कीं थे ईं बणायो।”
25 थे पवितर आत्मा गै द्वारा आपगै सेवक दाऊद ऊं केयो, गेर यहुदी लोगां रोळो क्यूं मचायो, अर लोगां बेकार गी बातां क्यूं सोची,
26 धरती गा राजा एक सागै प्रभु
अर मसी गै खिलाफ लडाई करण खातर खड़या हो'ग्या।a
27 हेरोदेस अर पुन्तियुस पिलातुस ईं नगर में गेर यहुदी अर इसराएली लोगां सागै मिलगे थारै सेवक यीसू गो बिरोध करयो। थे ईं थारै सेवक यीसू मसी गो अभिसेक करयो
28 थे सरवसकतिमान हो, झिको कीं थे पेला फैसला करयो बो ई अब हो'ग्यो।
29 अब प्रभु बा लोगां नै धमकाण आळी बात सोचगे म्हानै बिना डरगे सुब समाचार सुणाण ऊं थे मदद करो।
30 ठीक करण खातर थे आपगो हात लोगां गै उपर राख अर निसान अर चमत्कार गा काम थारै पवितर सेवक यीसू गै नाम ऊं करया जावै।
31 जद बे पराथना करां हा तो झिकी जिग्या में बे सारा बैठया बा जिग्या हालगी अर बे सारा पवितर आत्मा ऊं भरिजग्या अर परमेसर गो बचन बिना डर गै सुणावंता।
बिस्वासिया गो जीवन
32 यीसू मसी पर बिस्वास करण आळा सारा एक मन अर एक चित हा। कोई बी इंया कोनी केवंतो कै बिंगी कोई बी चीज आपगी है, बांगै कनै झिको कीं होवंतो बो सारो आपसरी में बाट लेवंता।
33 अर बे खास चेला बडी ताकत अर खुसी ऊं प्रभु गै जी उठण गी गवाई देवंता। परमेसर कनूं झिकी आसिस बा पर ही बो दूसरा नै देवंता।
34-35 बा कनै कोई बी चीज गी कमी कोनी क्यूंकै झिको कीं बा कनै खेत अर घर होवंतो बिनै बे बेचगे झिको धन मिलतो खास चेला नै ल्या देवंता अर किनै बी जरूरत होवंती बे आपसरी में बांट लेवंता।