खास चेला 3

लंगड़े भिखारी नै ठीक करणो

1 एक दिन पतरस अर यूहना दोफारे गै बाद तीन बजे मिन्दर में पराथना करण लागरया हा। 2 बि मिन्दर गै कनै सुन्दर नाम गो बारनो हो, हर रोज कई आदमी जन्म ऊं लंगडै़ एक आदमी नै बठै मिन्दर में जाण आळै ऊं भीख मांगण खातर ले जाण लागरया हा। 3 जद पतरस अर यूहना मिन्दर गै मां जाण लाग्या तो बण बा कनूं भीख मांगी। 4 पतरस अर यूहना बि कानी देखगे अर पतरस केयो, “म्हारै कानी देख।” 5 जद बण बा दोना कनूं कीं मिलण गी आस राख गै देख्यो।

6 जद पतरस बिनै केयो, “मेरै कनै सोनो अर चांदी तो हे कोनी, पण झिको कीं मैं कर सकूं हूं बो मैं तेरै खातर करूंगा।” जद पतरस बिनै हुकम दियो कै नासरी यीसू मसी गै नाम ऊं खड़यो हो'जा अर चाल पड़। 7 फेर बिंगो दाहिणो हात पकड़ गै बिनै उठायो, बि टेम ईं बिंगै गोढा अर पगां में जान आ'गी। 8 अर बो आपगै पगां पर उछळयो अर चालण लागग्यो। बो उछळतो अर चालतो अर चालतो फिरतो परमेसर गी स्तुति करतो बांगै सागै मिन्दर में उड़ग्यो। 9 सारै लोगा बिनै चालता अर परमेसर गी स्तुति करता देख्यो। 10 बा बिनै पहचाण लियो कै बो बोई है झिको मिन्दर गै सुन्दर नाम गै बारनै में बैठगै भीख मांगतो। बिंगै सागै झिको कीं घट्यो बि पर बे लोग अचंभो करयो।

मिन्दर में पतरस गो संदेस

11 जद बो पतरस अर यूहना कनै सुलेमान गै बरामदे में हो जद सारा लोग अचंभो करता भाजगे बा कनै आया। 12 ओ देखगे पतरस लोगां नै बोल्यो, हे इसराएल गा लोगों थे ईं बात पर अचंभो क्यूं करो अर इंया म्हानै क्यामी देखो? थे लोग इंया सोचो हो कै मैं आपगी सकती ऊं इनै चालण गै योग्य कर दियो या म्हे परमेसर गो बोळो आदर मान करा हा, इंगै वास्ते इंया होयो। 13 म्हारा बडेरा अबरहाम, इसहाक ओर याकूब गै परमेसर यीसू मसी नै मेमा दी अर थानै दियो। थे लोगां बिनै मरवाण खातर पिलातुस नै दे दियो। पिलातुस बिनै छोडण गो बिचार करयो पण थे बिनै नकार दियो। 14 थे बि पवितर अर भले आदमी नै स्वीकार कोनी करयो अर ओ मांगयो कै एक हतियारै नै म्हारै खातर छोड़ दियो जावै। 15 लोगां नै जीवन गी रा दिखाण आळै नै थे मरवा दियो पण परमेसर बिनै मरेड़ा ऊं जींवतो कर दियो, म्हे ईं बात गा गवा हा। 16 यीसू मसी पर बिस्वास करण ऊं ईं आदमी नै चालण गी ताकत मिली, म्हारै बिस्वास पर यीसू मसी इनै पूरी तरियां ठीक करयो। आ बात थे देखी।

17 मेरा इसराएलियों बेलियों अब मैं जाणू हूं थे अर थारा नेता लोगा झिको काम यीसू मसी करयो बो थारी अग्यानता गी बजह ऊं होयो। 18 पण झिकी बाता नै परमेसर आपगी बाता बताण आळै सारै लोगा गै मूं ऊं बता दी ही कै बिंगै मसी नै दुख उठाणो पड़सी अर बण इंया पूरो बी करयो हो। 19 ईंखातर थे आपगो मन बदळो अर परमेसर कानी मूड़ जाओ कै थारा पाप धो दिया जावै। 20 अर परमेसर थारै सागै रेगे थानै भोत बारी होसलो देवै अर परमेसर थारै खातर यीसू मसी नै भेजेगो झिकै नै परमेसर थारै खातर पेला ई चुण लियो है। 21 भोत पेला परमेसर आपगै पवितर परमेसर गी बात बताण आळा गै द्वारा बताएड़ी बाता पूरी करण तांई मसी सुरग में ई रेवेगो। 22 मूसा इंया केयो, “प्रभु परमेसर केवै कै थारै माऊं एक मेरै बरगो परमेसर गी बात बताण आळो खडयो करूंगा, बिंगी बात थे ध्यान ऊं सुणियो। 23 अर झिको कोई आदमी बिंगी बातां ना सुणैगो बिनै पूरी तरियां नास कर दियो जावैगो।”

24 समूएल अर बिंगै बाद में आया सारा परमेसर गी बात बताण आळा जद कदी कीं केयो आ दिनां गी बात करी। 25 अर थे तो बा परमेसर गी बात बताण आळा अर बि वाचा गा भागी हो झिकै गो परमेसर थारै बडेरा सागै वाय्दो करयो। परमेसर अबरहाम नै केयो, तेरी उळादा ऊं धरती गा सारा लोग आसिस पावेगा। 26 परमेसर आपगै सेवक मसी नै चुणगे थारी आसिस खातर पेला ई थारै बीच में घाल्यो कै थे थारै गन्दे रास्तै ऊं हट जाओ।