पवितर आत्मा गो उतरणो
2
1 पेन्तिकुस्त गै दिनa सारा बिस्वासी एक जिग्या में भेळा हा।
2 बि टेम एकदम बठै सुरग ऊं भयानक आंधी आयी अर झिकै घर में बे बैठया बो भरिजग्यो।
3 अर आग बरगी लपट बठै सामणै दिखण लागगी। बा आग सारा गै उपर टिक गी।
4 बे सारा पवितर आत्मा ऊं भरिजग्या अर पवितर आत्मा गी सामरथ ऊं बे दूसरी भासा में बोलण लागग्या।
5 बि टेम बठै यरुसलेम में सारा देसा ऊं आएड़ा यहुदी नेम विधान नै मानण आळा रेवंता।
6 जद बा आंधी गी आवाज सुणी तो भीड़ एक पासै होगी। बे लोग अचंभे में पड़ गया क्यूंकै हर कोई आपगी बोली में बोलतो सुणीज्यो।
7 बे सारा अचंभे में होगे बोल्या, “ऐ बोलन आळा सारा लोग गलील परदेस ऊं आएड़ा है के?
8 फेर म्हे हर एक म्हारी आपगी बोली में बोलता किंया सुणा हा?”
9 बठै पारथी, मेदी अर एलामी, मिसुपुतोमिया गा निवासी, यहुदियां अर कप्पूदूकिया, पुन्तुस अर एसिया,
10 फिरगिया अर पम्फूलिया, मिसर ओर साइरीन नगर गै नेडै़ लीबिया गै कीं प्रदेसा गा लोग, रोम ऊं आया लोग झिका में यहुदी अर गेर यहुदी झिको यहुदी धर्म ग्रहण करण आळा लोग, क्रेती अर अरब में रेण आळा।
11 म्हे सारा परमेसर गै चमत्कार गै कामां नै आप आपगी बोली में सुणन लागरया हा।
12 बे सारा अचंभे में पड़गै आपसरी में पूछण लागग्या ओ के होवै?
13 पण दूसरा लोगां खास चेला गो मजाक करता केयो, “आ सारी बात बोळै दारू पीणूं होगी है के?”
पतरस गो संदेस
14 पतरस ग्यारा खास चेला गै सागै खडे़ होगे इंया बोल्यो, “यहुदी बेलियों अर यरुसलेम में रेण आळा सारा लोगों मेरी बात सुणो, इंगै बारे में मैं थानै बताऊं।
15 जिंया थे समझो बिंया आ दारू कोनी पीओ क्यूंकै अब दिनगे गा नौ बजया है।”
16 पण आ बा बात है झिकी गै बारे में योएल परमेसर गी बात बताण आळो केयो हो,
17 परमेसर केवै है, “अंत गै दिना में,
मैं सारै आदमियां पर आपगी आत्मा दे देऊंगा
थारा बेटा अर बेटियां परमेसर गी बात बोलण लागज्यगा।
अर थारै जवान लोगा नै परमेसर दरसण देवैगो अर थारै बुडै़ लोगा नै परमेसर सपनो दिखावैगो।
18 बा दिना में परमेसर गी सेवा में झिका आदमी अर लुगाईयां हो'सी बानै आपगी आत्मा ऊं भर देऊंगा
अर बे परमेसर गी बात करसी।
19 मैं आकास में अचंभे गा काम करूंगा,
अर धरती पर चमत्कार दिखाऊंगा
मतलब खून, आग अर धूए गा बादळ दिखाऊंगा।
20 प्रभु गै आण गै खास अर मोटै दिन ऊं पेला सूरज अंधेरे में
अर चांद लोई में बदळ जावैगो।
21 अर प्रभु नै बुलाणे आळै सारा नै बो बचावेगो।”
22 हे इसराएल गै लोगों मेरी बात सुणो, यीसू मसी गै द्वारा परमेसर झिका चमत्कार गा काम करया हा बे थे सारा देखया हा, बिंगै अधिकार गै बारे में बी थानै पतो है।
23 परमेसर गी योजना गै अनुसार यीसू मसी नै थारै हात में दे दिओ अर थे लोग गळत लोगां गै हात ऊं बिनै करूस पर चढागे मार दिओ।
24 पण परमेसर बिनै जींवतो करयो अर मोत गै वस ऊं बिनै छुडा लिओ क्यूंकै यीसू मसी नै मोत गै वस में राखणो असंभव है।
25 दाऊद बिंगै बारे में केयो, “मैं, यीसू प्रभु नै सदा ई आपगै सामणै देख्यो, बो मेरै सागै है, ईंखातर मैं पड़ ना जाऊं।
26 ईंखातर खुसी गै सागै परमेसर गी मेमा करूंगा अर मेरो सरीर बी आसा में जींवतो रेवेगो।
27 क्यूंकै तू मेरी प्राण नै पताळ में कोनी छोडे़गो, तू आपगै पवितर जन नै गळन कोनी देसी।
28 थे मनै जीवन गै रा गो ग्यान करायो है, आपगी हजूरी में तू मनै खुसी देसी।”b
29 हे मेरा यहुदी बेलियों, मैं बिस्वास गै सागै बडेरै दाऊद गै बारे में थानै कीं केणो चाऊं कै बिंगी मोत होगी अर बिनै दफना दिओ अर बिंगी कबर आज तांई अठै है।
30 क्यूंकै बो एक परमेसर गी बात बताण आळो हो। बो जाणै हो कै परमेसर बिनै बचन दियो है कै तेरै वंस ऊं किनैई सिंहासन पर बिठास्यूं।
31 दाऊद आ'गे गै बारे में देखगे मसी गै जी उठण गै बारे में इंया केयो है, “तू मेरी प्राण नै पताळ में कोनी छोडे़गो, तू आपगै पवितर जन नै गळन कोनी देसी।”
32 परमेसर यीसू मसी नै जींवतो कर दियो, इंगा म्हे सारा गवाह हा।
33 परमेसर यीसू नै आदर देगे आपगै दायै पासै बिठा लिओ। यीसू मसी परमेसर गै वायदे गै अनुसार पवितर आत्मा लेगे सारा नै भर दिया झिकै नै थे अब देखो अर सुणो हो।
34-35 दाऊद सुरग पर कोनी गेयो फेर बी बो इंया बोल्यो, “परमेसर मेरै प्रभु नै इंया केयो मेरै दांयै पासै बैठ। जद तांई मैं तेरा बैरियां नै तेरै पगां गी चोकी ना बणा दंयू।”c
36 ईंखातर सारा इसराएली लोगा नै ईं बात गो पक्को पतो है कै झिकै यीसू मसी नै थे करूस पर चढा गै मरा दियो बिनै प्रभु अर मसी ठेरायो।
37 आ बात सुणगे बे लोग भोत दुखी हो'ग्या अर पतरस अर दूसरा खास चेला नै पूछण लागग्या, “मेरा यहुदी बेलियों, म्हे के करां?”
38 पतरस बानै केयो, “मन बदळो, अर आपगै पापां गी माफी लेण खातर थानै सारा नै यीसू मसी गै नाम में बतिस्मो लेणो चईयै। फेर थे परमेसर गै वायदे गै अनुसार पवितर आत्मा पाओगा।
39 क्यूंकै ओ परमेसर गो वायदो थारै खातर अर थारी उळाद खातर अर दूसरा ओर लोग झिका दूर है आ सारा नै आपगो वायदो पूरो करण खातर बुलाया है।”
40 पतरस बांगै सागै न्यारा न्यारा बचनां गा द्वारा बानै समझाया अर बानै बिनती करी कै थे लोग, झिका लोग परमेसर नै कोनी मानै बाऊं बचगे रेओ।
41 अर झिकै लोगां बि संदेस नै मान्यो बां बतिस्मो लिओ। ईं तरियां बि दिन लगभग तीन हजार लोग यीसू पर बिस्वास करण आळा बण गया।
बिस्वासियां गी संगती
42 बे लोग अपणै आपनै समरपित कर'गे खास चेला गै संदेस अर संगती करणी अर प्रभु भोज में सामिल होणो अर हर रोज पराथना करण लागग्या।
43 इसराएल गै सारै लोगा पर बिस्वास गो भय छा गयो अर खास चेलां गै हाता ऊं भोत सारा चमत्कार देखता रेया।
44 अर सारा बिस्वासी लोग भेळा रेवंता हा अर बांगै कनै झिको कीं हो बे बांट लेवंता।
45 बां आप आपगी सारी जमीन बेच दी अर झिकै नै जरूरत ही बिनै बांट दी।
46 बे हर रोज मिन्दर में भेळा होगे एक सागै पराथना करता। बे बारी बारी ऊं प्रभु भोज सारां घरां में रखता अर सारा लोग खुसी गै सागै रोटी खावंता।
47 लोग परमेसर गी मेमा करता, सारा बांगै सागै खुसी ऊं रेवंता। प्रभु हर रोज भोत लोगां नै मुकती देगे बांगै सागै सामिल होण खातर मदद करतो।