खास चेला 1

यीसू मसी गै खास चेला गा करेड़ा काम

जाण पिछाण

1 हे थियुफिलुस, झिका काम यीसू सुरू ऊं लेगे सुरग जाणूं पेला करया अर सिखाया बा बातां नै मैं मेरी पेली किताब में बता चुक्यो। 2 बो सुरग जाणूं पेला झिका खास चेला नै चुणया बानै पवितर आत्मा गै द्वारा आग्या दी। 3 आपगै मरण गै चालीस दिनां गै बाद में बो बांगै सामणै आ'ग्यो, रोटी खायी, बांगै सागै बात कर'गे अपणै आपनै जींवतो दिखायो। बिंगै बाद बो परमेसर गै राज गी बातां करतो रेयो। 4 एकर यीसू मसी बांगै सागै रोटी खांता टेम आग्या दी कै थे लोग यरुसलेम ना छोड़ो, क्यूंकै मेरै द्वारा बतायड़ी बात झिको पिता परमेसर पवितर आत्मा देण गो वायदो करयो है बिंगी उडीक करता रेओ। 5 यूहना तो पाणी में बतिस्मो दियो पण थोडे़ दिनां गै बाद थे पवितर आत्मा ऊं बतिस्मो पाओगा।

6 बा सारा जणां भेळा होगे पूछयो कै, “हे प्रभु, थे अब इसराएल गो राज पाछो ल्या देवैगा के?”

7 बण बानै केयो कै, “झिका काम पिता परमेसर आपगै हात में राखै बानै जानणो थारो काम कोनी। 8 पण पवितर आत्मा थारै पर आवैगी जद थानै सामरथ मिलैगी अर थे यरुसलेम अर सारै यहुदियां अर सामरिया अर धरती गी च्यारा कूंटा तांई मेरा गवा बणोगा।”

9 ओ केगे बो बांगै देखता देखता उपर सुरग में चक लियो गयो अर बादळा बिनै लको लियो।

10 अर बिंगै उपर जांवता टेम बे आसमान कानी देखयो तो दो आदमी धोळा गाबा पेरेड़ा बांगै कनै आया। 11 अर केण लागग्या, “हे गलीली आदमियों थे सुरग कानी क्यामी देखो। ओ यीसू थारै कानूं सुरग में उठा लियो है अर जियां थे इनै जावंता देखयो है बिंया ई आवंता देखोगा।”

एक नुए खास चेले नै चुण्यो जाणो

12 फेर खास चेला जेतुन नाम गै प्हाड़ ऊं यरुसलेम पाछा आया, इंगी दूरी एक सबत गै दिन गै बराबर है। 13 अर बठै पूगगे बे उपर गै बि कमरे में गेया जठै पतरस, यूहना, याकूब, अन्द्रियास, फिलिप्पुस, थोमा, बरतुल्मै अर मत्ती, हलफई गो बेटो याकूब, समौन जेळोतोस अर याकूब गो बेटो यहूदा ठरैड़ा हा। 14 ऐ सारा मिलगे पराथना करता हा, आंगै सागै केई लुगाईयां अर यीसू गी मां मरियम अर यीसू गा भाई बी हा।

15 कई दिना गै बाद बिस्वासी लोगा गी एक पराथना सभा गै मां पतरस खड़यो होगे बात करी, ऐ लगभग 120 आदमी हा। 16-17 “हे मेरा भाईयां अर भेनों, यीसू नै पकडाण आळै नेता यहूदा गै बारे में पवितर आत्मा दाऊद गै द्वारा पवितर सासतर में भोत पेला ई बता दियो, बो पूरो होणो जरूरी हो। यहूदा सेवक इंगै मां म्हारै सागै हो।”

18 बुरे काम खातर यहूदा नै झिको धन मिल्यो बि धन ऊं बण एक खेत मोल लियो। अर फेर बो मुंदो पड़यो अर बिंगो पेट फाट ग्यो अर सारा आंतडा बारे निकळ ग्या। 19 अर इंगै बारे में यरुसलेम में रेण आळै सारै लोगा नै पतो लागग्यो। ईंखातर बि खेत गो नाम बांगी बोली में हक्लदमा राख्यो ग्यो झिकै गो मतलब है “लोई गो खेत।”

20 पतरस इंया बी केयो हो क्यूंकै भजन संहिता में इंया लिखेड़ो है कै,

“बिंगो घर उजड़ जावै

अर बिमै रेण आळो कोई ना बचे”

अर इंया बी लिखेड़ो है कै,

बिंगो काम कोई ओर ले ले।

21-22 ईंखातर जद प्रभु यीसू म्हारै सागै हो जद यूहना बतिस्मो देणो सरू करयो बि टेम ऊं लेगे यीसू मसी सुरग में लियो गयो बि टेम तांई झिका लोग म्हारै सागै हा बामूं एक जणो चुण्यो जाणो झिको यीसू मसी गै जी उठण गी गवाई दे सकै।

23 ईंखातर बा दो आदमियों नै चुण्या। बिमै एक युसुफ हो, बिंगो यहुदी नाम युसुफ बरसब्बा हो अर बिंगो रोमी नाम युसतुस हो। अर दूसरो मत्तियाह हो। 24-25 फेर बे ओ केगे पराथना करण लागग्या कै, “हे प्रभु तू सब गै मना नै जाणै है, म्हानै बता कै आ दोना मूं थे किनै चुण्यो है। झिको एक खास चेलो गै रूप में झिको काम नै यहूदा छोड़गे आपगी जिग्या पर उड़ग्यो बो ई काम जिमेदारी ऊं पूरो कर सकै।” 26 फेर बा परची घाली अर परची मत्तियाह गै नाम गी निकळी। ईं तरियां बो ग्यारा खास चेला में सामिल हो गयो।