हनन्याह अर सफीरा
5
1 अर हनन्याह अर बिंगी लुगाई सफीरा दोनां रळगे आपगी जमीन गो कीं हिसो बेच दियो।
2 बि धन मूं लुगाई गी जाणकारी में कीं धन बण न्यारो राख दियो अर बाकी खास चेला नै दे दिओ।
3 पण पतरस हनन्याह नै केयो, सैतान तेरै मन में आ बात किंया घाली कै तू थोडो धन बचा गै न्यारो रख। थे पवितर आत्मा नै झूठ बोल्यो।
4 खेत बेचणूं पेला अर बाद में बी ओ धन तेरो ईं हो। पण तू झूठ क्यूं बोल्यो। तू मिनखा ऊं कोनी पण परमेसर ऊं झूठ बोल्यो है।
5 जद हनन्याह आ बात सुणी तो पड़ग्यो अर मर ग्यो। झिका लोग आ बात सुणी बे भोत डर गेया।
6 अर कई जवान लोग उठगे बिनै कफन में बांदगे बारै ले जा'गे दफना दिओ।
7 तीन घंटा बाद झिको कीं घटयो बिऊं अणजाण बिंगी घराळी पतरस कानी आयी।
8 जद पतरस बिनै पूछयो, “बता, तू अर तेरै पती मिलगे इतै गो ई खेत बेच्यो हे के?” बण केयो, “हा।”
9 पतरस बिनै केयो, “थे दोनों मिलगे प्रभु गी आत्मा गी परीक्सा क्यूं लेवै हो। तेरै पती गी लास चकणाळा अठै खड़या है, बे लोग तनै बी ले जावेगा।”
10 फेर बा पतरस गै पगां पड़गी अर मरगी। फेर जवान लोग आ'गे बिनै लेग्या अर बिंगै पती कनै दफना दी।
11 आ बात सुणगे सारा बिस्वासी लोग अर कण बी सुणी, सारां पर भोत भय छा गयो।
निसान अर चमत्कार गा काम
12 खास चेला गा द्वारा लोगां गै बिचाळै भोत सारा निसान अर चमत्कार करया जावंता हा। बे सारा मिन्दर में सुलेमान गै बरान्दा में इकठ्ठा होवंता।
13 सारा लोग बिस्वासी लोगां गो आदर मान करता, फेर बी बांगै सागै मिलण गी हिम्मत ना होवंती।
14 पण भोत लोग प्रभु पर बिस्वास कर'गे बिस्वासी लोगां सागै मिलता रेवंता।
15 लोग आपगै बीमारां नै सडक गै किनारै मांचा अर चादरां पर ल्यागे बिठा लेवंता कै जद पतरस बठूं जावैगो तो बिंगी छाया बा पर पड़ै।
16 यरुसलेम गै आसपास गै गामां ऊं भोत लोग बीमार अर ओपरी बडेड़ा लेगे आवंता बे सारा ठीक हो जावंता।
खास चेला गो पकड़यो जाणो
17 जद महा याजक अर संदूकियां भोत रीस में बांगै सामणै खडयो हो'ग्यो।
18 बा खास चेला नै बंदी बणा लिया अर बानै सरकारी जेळ में डाल दिया।
19 पण एक सुरगदूत झिकै नै परमेसर घाल्यो। बण रात गै टेम जेळ गो बारणा खोल दियो अर बानै बारे ले जा'गे केयो,
20 “जाओ, मिन्दर में खडया होगे ईं नुए जीवन गै बारे में सारा नै बताओ।”
21 जद बा ओ सुणयो तो दिनगे ई बे मिन्दर में उड़ग्या अर उपदेस देण लागग्या। फेर जद महा याजक अर बांगा साथी पूगग्या तो बा यहुदी बुडे लोगां गी एक पंचायत बुलाई। फेर बा खास चेला नै जेळ मूं ल्याण गी आग्या दी।
22 पण जद अधिकारी जेळ में गया तो बठै बानै खास चेला कोनी मिल्या। बा पाछा आ'गे बानै सूचना दी।
23 अर केयो म्हे इंया देख्या कै जेळ गै ताळा लगाएड़ा हा अर गेटां पर सिपाई खडया है। पण जद म्हे बारनो खोल्यो तो मां कोई कोनी हो।
24 जद मुख्य याजकां अर मिन्दर गै सिपाईया गा मुख्य आ बात सुणगे सोचण लागग्या कै खास चेला नै के हो'ग्यो?
25 फेर कणी आ'गे बतायो झिका नै थे जेळ में घाल्या हा, बे मिन्दर में खडया लोगां नै उपदेस देवै है।
26 जद मिन्दर गै करमचारियां गा मुखिया अर आपगै अधिकारियां गै सागै जा'गे खास चेला नै बिना ताकत गै ले आया क्यूंकै बानै डर हो कै लोग म्हानै पथर ना मारै।
27 बा बानै मां ल्यागे सारी पंचायत गै सामणै खडया कर दिया अर महा याजक बानै केयो,
28 म्हे थानै ईं नाम ऊं उपदेस ना देण गो हुकम दियो पण थे फेर बी सारै यरुसलेम में उपदेस सुणा दियो अर बिंगी मोत गो इलजाम म्हारै उपर लगाणो चाओ।
29 जद पतरस अर दूसरा खास चेला उतर दिओ म्हानै आदमी गी ना मानगे परमेसर गी बात मानणी चईयै।
30 बि यीसू नै म्हारै बडेरां गै परमेसर फेर ऊं जींवतो कर दियो झिकै नै थे मार दियो।
31 लोगां नै राज करण खातर अर मुकती देण खातर परमेसर यीसू नै भोत आदर मान दियो कै लोग मन बदळगे आपगै पापा गी माफी पा सकै।
32 म्हे लोगां नै आ बात बतावां हा, पवितर आत्मा बी आ'ईं बात केवै है। परमेसर आपगी आग्या नै मानण आळै नै आपगी आत्मा देवै है।
33 ओ सुणगे बे बळग्या अर बानै मार देण गो सोच्यो।
34 पण गमालिएल नाम गो एक मोटो फरीसी झिको यहुदी नेम विधान सिखाणाळो हो अर बिंगी बातां सारा मानता हा। बण इंया आग्या दी कै आनै थोड़ी देर खातर बारे कर दयो।
35 फेर बण पंचायत में केयो, मेरा यहुदी बेलियों, झिको कीं आंगै सागै करणो चावो हो सोच समझ गै करियो।
36 कीं दिन पेला थियूदास नाम गो एक आदमी अपणै आपनै मोटो मानै हो अर चार सौ लोग बिंगै सागै हा। पण फेर बी बो मारयो गयो अर बिंगै सागै आळा सारा लोग खिंड ग्या।
37 बिंगै बाद गलील में रेण आळो यहूदा नाम गो आदमी उठयो अर कीं लोग बिंगै लारै बी हो'ग्या। बिनै बी मार दियो अर बिंगै सागै आळा सारा लोग खिंड गेया।
38 मैं अब गी बात गै बारे में बताणो चाऊं हूं कै आंगै खिलाफ कीं ना करो। आनै एकला छोड़दयो, आंगो काम माणसां कानूं है तो खतम हो जावैगो,
39 पण परमेसर कानूं है तो रोक कोनी सको क्यूंकै थानै पतो चालेगो कै थे परमेसर गै खिलाफ काम करया।
40 फेर बा बिंगी बात नै मान ली। खास चेला नै बुला'गे कुटवाया अर हुकम दियो कै दुबारा यीसू मसी गी बात ना करियो। ओ केगे बानै छोड़ दिया।