Zezwii Kliisɩ 'a 'Mänatɩtɩɩ
Zaa
'cɛlɩɛ
Zezwii Kliisɩ mɔɔ glɩnɩɛ Wɛlɩ
1
'Pɩwʋ a tɛɛnɩdɛ,
‑mɔ wa laa Wɛlɩɩ,
ɔ ‑bhölɩ a.
‑Mä Lagɔ yɔwʋ ‑mä ɔ ‑wʋ a‑a.
Ɔ'bhë,
Lagɔ 'mö ɔ glɩnɩɛ.
2 'Pɩwʋ a tɛɛnɩdɛ,
‑mä Lagɔ yɔwʋ,
‑mä ɔ ‑wʋ a‑a.
3 'Mö Lagɔ ghlɛnɩɛ 'mö,
'n ɔ yiɛ 'pɩwʋ a ‑lii 'wuë ‑bhɛ.
‑Lu a ‑mu Lagɔ ‑bhɛɛ,
'n ɔ 'nɔɔ 'mö ghlɛnɩɩ,
wʋ'ʋä ‑bhölɩ.
4 Ɔ 'mö,
‑mä ‑bhölɩbhölɛ ‑wʋ a‑a,
‑bhölɩbhölɛ 'la,
mɛɛ glɩnɩ a‑a nɩkpa 'wuë a lɩlɛ.
5 Lɩlɛ 'la,
mɛɛ lɩnɩɛ ‑mä guylukwëa 'mö,
‑maa guylukwëa 'nɛɛ 'wlu 'mänanɩ.
6 Nɩkpɛ ‑bhlʋ 'mö wa laa Zaaa,
'mö Lagɔ tiee.
7 Nɩkpɛ 'la,
mɔɔ yiɛ,
ɔ 'kä ‑ɔ glɩnɩɛ lɩlɛ a dɛ bhïla,
ɔ za,
wa 'kɔ dlɩ 'tɛɛnɩ.
8 Zaa a'bhë,
ɔnyɩgäsɛ mɔɔ 'nɩɛ lɩlɛ glɩnɩ,
‑maa ɔ 'kʋä ‑ɔ glɩnɩɛ lɩlɛ a 'dɩ 'nyɛ,
nza ɔ yiɛ.
9 ‑Ɔ glɩnɩɛ Wɛlɩɩ,
mɔɔ glɩnɩɛ ‑tiamö a lɩlɛ.
Ɔ 'kä nɩkpa 'wuë 'wʋ ngäla,
nza ɔ yiɛ mä'ä dʋdʋ 'wʋ.
10 'Mö Lagɔ ghlɛnɩ a‑a 'mö,
'n ɔ yi a‑a wa 'wuë 'wäla.
‑Sɩbhä yɩ ‑wʋ 'mö,
‑maa ɔ yiɛ mä'ä wa jijo'wʋʋ,
wa 'nɔɔ ‑sɩbhä yɩbhlɩnɩ.
11 Ɔnyɩ a ‑nʋa jijo'wʋ,
‑mä ɔ yiɛ,
‑maa wa 'nɔɔ päla.
12 ‑Sɩbhä yɩ ‑wʋ 'mö,
‑maa wa gla'mö a 'yɛya pälɔɔ,
mʋa 'tɛɛnɔɔ wabhlɩ dlɩ.
Nɩkpa 'la ‑wa pälɔɔɔ,
'ɔ 'mötɛɛnɔɔ 'mö,
mʋa 'zʋä Lagɔ a 'yuë.
13 Sɛɛ nɩkpɛ zʋä mä'ä 'pɩwʋ a dɔ'wʋ nɩkpɛ a 'yuu,
‑sɩbhä wa'aa Lagɔ a 'yuë 'zʋ.
Ɛ'ɛ ‑bhö'ɛ sɛɛ nɩkpɛ 'yɩbhɩɛ a za,
‑maa Lagɔ a'bhë,
mɔɔ 'yɩbhɩɛ ‑sɩbhä.
14 ‑Ɔ glɩnɩɛ Wɛlɩɩ,
mɔɔ 'zʋä nɩkpɛ,
'n ɔ yiɛ mä'ä ‑aa jijo'wʋ ‑bhölɩnɩɛ yi.
Ɔ 'wuë,
ngäzɩdlɩɛ,
'ɔ ngli a wɛlɩɩ 'wuë gbëaa yɩ glɩnɩɛ.
Mɔɔ glɩnɩɛ ɔ dɩba Lagɔ 'a yuu ‑bhʋlʋ ‑kpɔ.
‑A 'yoo 'ylɩmöö,
'ghïlinɔɔ ɔ dɩba Lagɔ 'nyɔɔ,
a‑a yuä yɩbhlɩnɩ.
15 Ɔ dɛ Zaa bhïlaa,
ɔ 'yoo 'ylɩmöö,
'n ɔ yiɛ wɛlɩ 'pä,
ɔ lɛ naa:
«Nɩkpɛɛ n gaa a‑a mɔɔ da'a.
Sɛ'ɛ n gbä a‑a ɔ dɛ nɩɩ:
Nɩkpɛ ‑bhlʋ,
ɔ ‑gä nimï.
Mɔɔ 'ghïliɛ,
mɔɔ ziiiɛ 'wʋ.
Ɛ'ɛ ‑bhö nyɩasɛ,
‑maa na'bhë dɛɛ n'n a‑a ‑bhlɛ 'wlʋʋ,
ɔ ‑bhölɩ a ɔbhlɩ.»
16 ‑A 'wuë sɛɛ Lagɔ 'pää ɔ za ‑aa ngäzɩdlɩ,
'n ɔ paanyɩɛ 'kwädlɩ 'nyuu,
‑sɩbhä 'nɩɛ yɛkanɩyi ‑kä.
17 Lagɔ ‑kanyɩɛ 'ɔ Gböö sʋlʋnɩɛ yii,
Moyizɩ 'mö ɔ ghlɛnɩɛ 'mö 'n ɔ ‑yinyiɛ sʋlʋnɩ.
‑Maa ɔ 'kää ‑aa ngäzɩdlɩ 'pää yii,
ɔ ‑kanyɩɛ gbëaa 'nyɛɛ yii,
Zezwii Kliisɩ 'mö,
‑mä ɔ ghlɛnɩɛ.
18 ‑Bɛ 'nɩɛ ‑bhlɛ tɛkäsɛ Lagɔ 'ylɩmö,
‑maa 'ɔ yuu ‑bhʋlʋ ‑kpɔ,
‑ɔ glɩnɩɛ Lagɔ,
‑ɔ ‑wʋä ‑mä ɔ yɔwʋʋ,
mɔɔ sʋlʋnɩnyɔɔ.
Zaa Batisɩ lɛ mɔɔ 'nɩɛ Kliisɩ glɩnɩ
19 ‑Mä Zeluzalɛɛmö a Zwiiföwaa mʋa tie Zaa Batisɩ nɩkpa 'wʋ.
'Wa Lagɔbʋbɔwa ‑mumuë,
wa ‑nyɛ Leviiwa ‑mumuë 'sɔ,
'mö wa tioo 'wʋ wa 'kɔ nimï 'yɩbhä nɩɩ:
«‑Mɔ a'bhë ‑n glɩnɩ bhä 'nɩ?»
20 Wa 'yɩbhɔɔ nimïï,
ɔ'ɔɔ 'wʋ ‑gɔ,
‑maa nɩkpabhë a 'yila 'klʋ,
'dɩ ɔ 'nyuää gbëaa,
ɔ lɛ naa:
«Kliisɩ,
Puënyɔɔ Lagɔ ‑sɛɛ ‑lɛ,
'mö n 'nɩɛa glɩnɩ.»
21 Wa lɛ:
«Zaa,
‑mɔ ‑n glɩnɩ bhä 'nɩ?
Lagɔ 'a 'möbhïlanɩnyɔɔ Elii 'mö ‑n glɩnɩ bhä ‑a?»
Ɔ lɛ:
«N'nn,
'mö n 'nɩɛ glɩnɩ.»
Wa lɛ:
«Zaa,
Lagɔ 'a 'möbhïlanɩnyɔɔ ‑a ‑kʋnɩɛ mö ‑n glɩnɩ bhä ‑a?»
Ɔ lɛ:
«N'nn.»
22 Wa lɛ:
«'Ɔɔ!
Zaa,
‑mɔ ‑n glɩnɩ bhä a'bhë 'nɩ?
‑Mɔ ‑n libhï bhä ‑nanyɩ 'mö 'wʋ 'nɩ?
Nyɩanyɩ 'dɩ,
‑wa tianyɩɛ,
‑a 'kʋä ‑mä 'dɩ kwä.»
23 Wa gbää sa'aa,
Zaa lɛ naa:
«Ezayii,
Lagɔ a 'möbhïlanɩnyɔ,
sɛ'ɛ ɔ gbä a‑a nɩɩ:
Nɩkpɛ ‑bhlʋ ‑wʋ ‑mä 'muse 'klʋ,
ɔ pä wɛlɩ nɩɩ:
A nɩ ‑sɛ 'ywii 'wuë a 'kɩ 'mö zlɔmanɩ ‑Alowli a za,
‑maa ɔ ‑wʋ yi dɔ'wʋ.b
‑Lɛ a nɩkpɛ 'la,
'mö n glɩnɩɛ.»
24 Nɩkpaa wa tiee Zaa 'wʋʋ,
Falizɩɛwaa.
25 'N wa yo'ɛɛ nimï 'yɩbhä nɩɩ:
«‑N ‑nɛɛ Kliisɩ mö ‑n 'nɩɛ glɩnɩ.
Elii mö ‑n 'nɩɛ glɩnɩ.
Lagɔ 'a 'möbhïlanɩnyɔɔ ‑a ‑kʋnɩɛ,
mö ‑n 'nɩɛ'ɛ glɩnɩ.
Zaa,
sɛ yɩ ‑wʋ ɔ 'mö n‑n wɔlʋ bhä nɩkpa 'wlu 'nɩ?»
26 Ɔ lɛ naa:
«‑Amö na a,
'nyu a 'yize n wɔlʋnanyɩɛ 'wlu cuu.
‑Maa ‑mä a gla'mö,
nɩkpɛ ‑mɔmɔɔ ‑bhlʋ ‑wʋ ‑mä.
A 'nɔɔ ‑bhlɛ ‑yi.
27 Ɔ ‑gä nimï,
‑maa n'n‑ä a'bhë 'ke ‑kä n 'kä 'ɔ 'siikplii a 'likpïï bulonɩ.»
28 ‑Li 'la 'wuë,
‑mä Zludɛɛ ‑gömö,
‑mä a glɔ ‑bhlʋ wa laa Betanii,
mää Zaa glɩ a‑a 'n ɔ wɔlʋä nɩkpaa 'wluu,
‑mä yɩ 'plɩnɩɛ 'wʋ.
Zaa Batisɩ lɛ Zezwii mɔɔ glɩnɩɛ Lagɔ 'a 'bhlawadɩgbaa
29 Zlɩ zɩɛ,
Zaa lɛ zʋ a sɛ'ɛ,
Zezwii yinɔ.
Ɔ 'yoo 'ylɩmöö,
ɔ lɛ naa:
«A yɩɛ,
Lagɔ 'a 'bhlawadɩgbaa ‑a 'kää mä'ä 'pɩwʋ a nɩkpaa 'wa 'nyinylolii a gbʋʋ ‑gömö ‑sɛɛ,
ma‑a da'a.
30 Ɔ dɛ n bhïla a‑a ‑kido 'wʋ nɩɩ:
Nɩkpɛ ‑bhlʋ,
ɔ ‑gä nimï,
‑maa n ‑nyɔɔ 'sɔ a dɔ'wʋ,
mɔɔ 'ghïliɛ mɔɔ ziiiɛ 'wʋ.
Ɛ'ɛ ‑bhö nyɩasɛ,
‑maa dɛɛ n'n a‑a ‑bhlɛ 'wlʋʋ,
ɔ ‑bhölɩ a ɔbhlɩ.
31 Na'bhë,
n'n a ‑mɔ ɛ 'kä glɩnɩɛ ‑yi.
‑Maa n 'kɔ Yizlaɛlɩ a ‑nʋa sʋlʋnɩ nza n yiɛ nɩkpa 'nyu 'mö 'wlu wɔlʋnɩɛ.
32‑33 Sɛ'ɛ n gbää nɩɩ,
na'bhë n'n a ‑mɔ ɛ 'kä glɩnɩɛ ‑yi.
‑Maa Lagɔ ‑ɔ tieaa a‑a nɩɩ,
n nɩ wɔlʋnɩ nɩkpa 'nyu 'mö 'wluu,
mɔɔ nyɩaa a‑a 'dɩ nɩɩ:
‑N yi nɩkpɛ ‑bhlʋ 'ylɩmö,
'na 'Wugɔmʋʋ yo ‑gömö yi,
ɔ 'kɔ 'kwädlɩ ‑gömö ‑wʋ.
‑Lɛ a nɩkpɛ 'la,
nɩkpɛ n ‑sɛɛ ‑lɛ ɔ 'kä nɩkpa 'na 'Wugɔmʋʋ ‑gömö 'zʋʋ,
mɔɔ.
Sa'a Lagɔ nyɩaaa 'dɩ.
‑Tiasɛ,
n yɩ 'Wugɔmʋʋ 'Wlɩlɩ 'ylɩmö,
ɔ 'kä ‑bhɩɛ ‑kpakʋ 'n ɔ yiɛ ‑mä ghäyɩ 'wʋ 'bhöönɩ,
'n ɔ yoo ‑gömö yi.
34 Na'bhë n 'yi ‑sɩbhä 'ylɩmö,
nza n gbää nɩɩ:
Zezwii,
mɔɔ glɩnɩɛ Lagɔ 'a Yuu.»
Zezwii yɛ 'ɔ tɛkägänɩwaa wäzɩ
35 Zlɩ zɩ'ɛɛ,
Zaa Batisɩ ‑nyɛ 'ɔ ‑gänɩwaa gla'mö a nɩkpa 'sɔ glɩ ‑bhlɛ da ‑bhʋlʋ ‑kpɔ 'yize,
‑gänɩwaa
36 'n Zezwii yiɛ 'plɩɛ yi.
Zaa Batisɩ 'yoo 'ylɩmöö,
ɔ lɛ nɩɩ:
«A yɩɛ,
Lagɔ 'a 'bhlawadɩgbaa ma‑a da'a.»
37 Ɔ gbää sa'aa,
'ɔ ‑gänɩwaa 'sɔ ‑kpɔ,
'n wa yiɛ 'wʋ ‑sɔ 'n wa yiɛ Zezwii 'bɩwʋ bhlinɩ.
38 Zezwii 'bhɛlɔɔ 'möö,
'n ɔ yuëë 'ylɩmö,
'n ɔ yuëë nimï 'yɩbhä nɩɩ:
«'Saa a tɛlɩ bhä sɛ?»
Wa lɛ:
«Ghlabii,
dɛ ‑n glɩ bhä?»
Wa 'bhigbʋ 'mö,
Ghlabii,
mɩɩ sɛɛ zɛmö nɩɩ,
'cɩanyɔɔ.
39 Wa 'yɩbhɔɔ sa'a nimïï,
ɔ lɛ naa:
«Dɛ n glɩɛ,
a nɩ yi,
a 'kä ‑lɛ 'ylɩmö.»
'N wa yiɛ mö.
Dɛ ɔ glɩɛ 'n wa yiɛ ‑lɛ 'ylɩmö.
‑Kidogïle ‑mʋäna 'mö a sɛ wa ghlɛɛ ‑lɛ.
Wa ‑nyɔɔ 'sɔ wa glɩ ‑lɛ ‑këë 'n swe yiɛ ylu.
40 Nɩkpa 'la 'sɔ ‑kpɔ,
Zaa 'nyɛ a‑a 'dɩ,
‑wa bhlinɩ a‑a Zezwii 'bɩwʋʋ,
wa gla'mö a ‑nɔ ‑bhlʋ 'mö wa laa Adlee.
Simɔɔ Piɛlɩ a ‑daayu mɔɔ.
41 Simɔɔ 'la,
'mö ɔ ‑daayu Adlee kwää tɛɛ 'dɩ nɩɩ:
«Simɔɔ,
Kliisɩ,
Puënyɔɔ Lagɔ ‑sɛɛ ‑lɛ,
‑a kɔ 'ylɩmö.»
42 Ɔ ‑nyɔɔ 'sɔ,
'n wa yiɛ Zezwii ‑mä ghlɩ.
Wa ghlɛɛ ‑mä,
Zezwii yɩlɩɛ Simɔɔ 'wʋ ‑këë,
ɔ lɛ naa:
«‑Nmö Zaa ‑yowli Simɔɔ,
tɛɛnɩa'a dɛ'ɛ,
‑na nglɩɛ Sefaasɩ.»
Wa 'bhigbʋ 'mö a dɔ'wʋ,
wa ‑kä Sefaasɩ nʋʋ,
miɛ nɩɩ Piɛlɩ,
yɩ zɛmöä nɩɩ kpayi.
Zezwii yɛ Filiipö ‑nyɛ Natanaɛlɩ 'sɔ wäzɩ
43 Zlɩ zɩɛ,
'n Zezwii yiɛ 'wʋ ‑sɔ,
'n ɔ yiɛ ‑mä Galilee‑bhölɩɩ 'mö mö.
Ɔ ‑wʋ mö dɔ'wʋ 'n ɔ yiɛ nɩkpɛ ‑bhlʋ wa laa Filiipö 'ylɩmö.
Ɔ lɛ naa:
«Filiipö,
yi ‑n ‑kaa ‑gänɩ.»
44 Filiipö,
Adlee ‑nyɛ ɔ ‑daayu Piɛlɩ 'sɔ,
wa 'bhele Bɛtɩsayidaa a nɩkpɛ ɔ glɩnɩɛ.
45 Filiipö 'bhöö'ɛɛ ɔbhlɩ ‑lɛ,
'n ɔ yiɛ Natanaɛlɩ ‑mä ghlɩ,
ɔ lɛ nɩɩ:
«Lagɔnɩkpɛɛ ‑ɔnyɩ dɛ Moyizɩ 'cɛlɩ a‑a ‑mä Lagɔ 'a Gböö a 'bɔgʋʋ 'mö,
‑ɔnyɩ dɛ Lagɔ 'a 'möbhïlanɩwaa bhïla a‑a,
‑a kɔ 'ylɩmö.
‑Mä Nazalɛɛtɩ ‑glɔ 'mö a nɩkpɛɛ Zɩzɛɛfʋ,
ɔ yowli Zezwii mɔɔ.»
46 Filiipö 'nyɛɛ ‑sɩbhä Natanaɛlɩ 'dɩɩ,
ɔ lɛ naa:
«‑Nn'n!
‑Mä Nazalɛɛtɩ glɔ 'mö abhlɩ,
‑lu a ‑lu bhɛnɩ bhä wʋ 'kä ‑mä 'bhöönɩ ‑a?»
Filiipö lɛ naa:
«Yi ‑n 'kɔ ‑na'bhë 'ylɩmö.»
47 Wa möä,
Zezwii 'yɩɛ Natanaɛlɩ 'ylɩmöö,
ɔ lɛ naa:
«Nɩkpɛ a ‑mɔɔ glɩnɩɛ ‑tiamö a Yizlaɛlɩyii,
mɔɔ yiɛ da'a ‑mä.
Ɔ'ɔɔ ylʋ ‑kä.»
48 Zezwii gbää sa'aa,
Natanaɛlɩ lɛ nɩɩ:
«Dɛ ‑n ‑yinɩɩ bhä 'nɩ?»
Ɔ lɛ:
«Dɛɛ Filiipö ‑nɩmöä a ‑bhlɛ wäzɩ,
‑lɛ fiigösuu zɛmö dɛ ɔ ghlɩnɩmöä,
‑n ‑wʋ a ‑bhlɛ ‑lɛ,
'n n ‑yimö a‑a 'ylɩmö.»
49 Zezwii gbää sa'aa,
ɔ lɛ naa:
«‑Atʋ,
Lagɔ 'a Yuu,
Yizlaɛlɩ 'a 'bhlɩlowlii,
mö ‑n glɩnɩɛ.»
50 Zezwii lɛ naa:
«Gbʋmö n gbä nɩɩ,
‑n ‑wʋ a ‑bhlɛ ‑mä fiigösuu zɛmö,
'n n ‑yimöä 'ylɩmö a za,
nza ‑n ‑kaa bhä dlɩ 'wʋ?
Dɩ n nyɩamöä dɛ'ɛ nɩɩ,
‑li a ‑mi ‑n 'kää 'ylɩmöö,
yɩ yi 'ghïli,
yɩ yi ‑mi nɩ 'wʋ zi.
51 ‑Maa ‑tiamö n nyanyɩɛ dɛ'ɛ 'dɩ nɩɩ,
zlɩ yi nuë do,
a yi Lagɔzuzuku 'ylɩmö,
Lagɔ yi Nɩkpɛ a 'Yu 'wʋ tie,
yɩ yi kwli yɩ yi ‑gbälɛ.»