Maakö 1

Zezwii Kliisɩ 'a 'Mänatɩtɩɩ

Maakö

'cɛlɩɛ

Zaa Batisɩ 'a Lagɔwɛlɩɩ

(Matie 3.1‑12; Lwiikö 3.1‑18; Zaa 1.19‑28)

'Mänatɩtɩɩ ‑yɩ bhïlaa Lagɔ 'a Yuu Zezwii Kliisɩ a dɛɛ,

dɛ'ɛ yɩ tɛɛnɩɛ.

2 Lagɔ a 'möbhïlanɩnyɔ Ezayii,

sɛ ɔ 'cɛlɩ a‑a ‑mä 'ɔ Lagɔbɔgʋʋ 'mö nɩɩ,

Lagɔ lɛ naa:

Yɩɛ,

'na ‑gbäglɛyii 'mö n tiee ‑mä ‑na 'yuku,

ɔ 'kä ‑na'a 'yioo ‑sɛ.

3 Nɩkpɛ ‑bhlʋ ‑wʋ ‑mä 'muse 'klʋ,

ɔ pä wɛlɩ,

sɛ'ɛ ɔ nʋä nɩɩ:

A nɩ gïganɩ 'ywii 'wuë 'wlu.

A nɩ zlɔmanii 'mö,

‑maa ‑Alowli Lagɔ ‑wʋ yi dɔ'wʋ.^a

4 Sɛɛ Ezayii 'cɛlɩ a‑a 'tɩɩ,

‑sɩbhä Zaa Batisɩ 'wlʋnɩɛ ‑mä 'muse 'klʋ 'yli.

'N ɔ nyɛɛ nɩkpa 'dɩ nɩɩ:

«A nɩ ligba a 'kä 'a ‑lizokuu kɛ'mö ‑sɛ,

n 'kanyɩ 'wlu wɔlʋ,

nzɩɩ Lagɔ 'käa 'a 'nyinylolii a gbʋʋ 'yi 'tatinɩ.»

5 ‑Mä Zeluzalɛɛmö a ‑nʋa,

wa ‑nyɛ ‑mä Zwidee‑bhölɩ ‑gömö a ‑nʋa 'wuë 'sɔ,

'n wa yi a‑a ‑lɛ Zaa Batisɩ yɔwʋ,

wa ‑kä 'wa 'nyinylolii a bïï ‑sɛ 'wëë,

'nyudɔlʋ 'kɔdʋʋ wa laa Zludɛɛ 'mö 'n ɔ wɔlʋnuë ‑mä 'wlu.

6 Zaa Batisɩ,

nɩmadebïli a ‑bäna ɔ ‑plaa 'mö,

'n ɔ ‑bhlɩnɩɛ nɩmɛkubɛtʋ 'mlɩ.

‑Gägö ɔ liɛ 'n ɔ mɛnɩɛ lɔgʋkpö.

7 Nɩkpaa ‑wa yiɛ ‑lɛ ɔ yɔwʋʋ,

sɛ'ɛ ɔ nyʋä 'dɩ nɩɩ:

«Nɩkpɛ ‑gä nimï,

ɔ yi yi,

n ‑nyɔɔ 'nɩɛ ‑bhëgabhëganɩ.

Ɔ 'ghïli tenyii ɔ ziii 'wʋ.

N 'kɔ yɔwʋ 'dio,

n 'kä 'ɔ 'siikplii bulonɩ a dɔ'wʋ,

n'n‑ä 'ke ‑kä.

8 ‑Amö na a,

'nyu 'mö n wɔlʋnanyɩɛ 'wlu,

‑maa ɔbhlɩ,

ɔ ‑kä yii,

'Wugɔmʋʋ 'Wlɩlɩ 'mö ɔ 'kanyɩɛ 'wlu wɔlʋnɩ.»

Zaa Batisɩ yɛ Zezwii 'wlu wɔlʋ

(Matie 3.13–4.11; Lwiikö 3.21‑22; 4.1‑13)

9 'Tɛnyɩ 'mö Zaa Batisɩ ‑wʋä nɩkpa 'wlu wɔlʋ dɔ'wʋʋ,

Zezwii 'bhöö ‑mä Galilee a ‑glɔ wa laa Nazalɛɛtɩ,

'n ɔ yoo ‑mä Zludɛɛ yɔwʋ ghlɩ,

'n Zaa yoo 'wlu wɔlʋ.

10 Ɔ wɔlɔɔɔ 'wlu 'wëë,

Zezwii ‑wʋ ‑mä 'nyu 'mö 'wlʋ dɔ'wʋ,

ɔ lɛ zʋ a sɛ'ɛ cuu,

zlɩ yɛ nuë do,

'n Lagɔ 'a 'Wugɔmʋʋ yiɛ sɛ 'sibhë,

Zezwii yiloo 'wʋ,

ɔ 'kä ‑bhɩɛ ‑kpakʋ,

'n ɔ yoo ‑gömö yi.

11 ‑Mä zlɩ 'mö,

'n wɛlɩ yiɛ ‑mä 'bhöönɩ,

yɩ lɛ naa:

«‑Nmö glɩnɩɛ 'na dlɩsɛkäyuu,

‑nmö ‑bhööä 'mäna 'wʋ.»

12 ‑Mi'la 'plɩɛ 'wëë,

'n Lagɔ 'a 'Wugɔmʋʋ ‑nyɛ Zezwii yiɛ ‑mä 'muse 'klʋ mö.

13 Ɔ ‑sɛ ‑mä 'ylɩ a gwlɩ 'sɔ.

Ylɩ 'la 'wuë 'mö,

‑sɩbhä Sataa pɔɔ ‑mä.

‑Mä 'muse 'klʋ,

‑mä 'kwlɛnɩma jijo'wʋ ‑mä Zezwii ‑wʋ a‑a 'n Lagɔzuzukuu ‑wɔɔɔ 'yli.

Zezwii yɛ 'ɔ libhoo tɛɛ

(Matie 4.12‑22; Lwiikö 4.14‑15; 5.1‑11)

14 Wa köbhää Zaa Batisɩ wa 'pɔɔ ‑jie 'mö 'wëë,

'n Zezwii yiɛ ‑mä Galilee‑bhölɩɩ 'mö Lagɔ 'a 'Mänatɩtɩɩ bia mö.

15 Ɔ lɛ:

«'Tɛnyɩ Lagɔ gaa a‑a,

mɛɛ dɛ'ɛ.

'Pɩwʋ mää Lagɔ 'kämanɩɛ yɛ 'dio.

Zaa,

a nɩ ligba a 'kä 'a ‑lizokuu kɛ 'mö sɛ.

A nɩ nglu Lagɔ 'a 'Mänatɩtɩɩ 'wʋ.»

Zezwii yɛ ‑dɛdapäwa ‑mʋäna wäzɩ

16 'Ylɩ ‑bhlʋ 'mö,

Zezwii 'nɛmö ‑mä Galilee a 'nyu 'kɔdʋʋ yɔwʋ,

'n ɔ yiɛ Simɔɔ 'ylɩmö,

ɔ ‑nyɛ ɔ ‑daayu Adlee 'sɔ,

‑dɛdapäwa wa glɩnɩɛ zaa wa ‑wʋ ‑dɛda 'pä dɔ'wʋ.

17 'N ɔ yuëë wäzɩ.

Ɔ lɛ:

«A nɩ yi,

a ‑kaa ‑gänɩ.

Sɛ a sɛɛ ‑mä 'nyu 'mö zïbhïï,

n 'kanyɩ ‑sɩbhä nɩkpa a sɛtɩlɩwa 'wʋ 'zʋa.»

18 Ɔ 'nyʋää sa'a 'dɩ cuu,

'n wa yiɛ 'wa ‑dɛdɩɩ ‑lɛ tɩ,

'n wa yoo 'bɩwʋ bhlinɩ.

19 Ɔ ghlɛɛ 'yukudɛɛ,

'n ɔ yiɛ Zaakö 'ylɩmö,

Zebedee a yowli,

ɔ ‑nyɛ ɔ ‑daayu Zaa 'sɔ,

wa ‑wʋ'ɛ wabhlɩ ‑mä 'wa gɔlʋʋ 'mö.

Wa ‑wʋ 'wa ‑dɛdɩɩ 'wlu gïganɩ dɔ'wʋ.

20 Zezwii yuëë 'ylɩmöö,

cuu 'n ɔ yuëë wäzɩ.

Wa tɩ wa dɩba Zebedee ‑nyɛ libhonʋwaa 'sɔ ‑mä gɔlʋʋ 'mö,

'n wa yoo 'bɩwʋ bhlinɩ.

Zezwii yɛ nɩkpɛ zuzukwëzokwë ‑gömö kpëti

(Lwiikö 4.31‑37)

21 ‑Glɔɔ wa laa Kapɛnaɔmö,

‑mä Zezwii ‑nyɛ 'ɔ ‑gänɩwaa 'sɔ möä.

‑Gwlɛnɩzlɩɩ ghlɛɛ,

'n ɔ yiɛ ‑mä a Lagɔbuduu 'mö plɛ.

'N ɔ yiɛ nɩkpa Lagɔwɛlɩɩ 'cɩa.

22 Sɛɛ Gböö a 'cɩawaa 'cʋä a‑a 'kwädlɩ,

‑sɩbhä ɔ 'nuëë 'cɩa,

‑maa gbëaa 'mö ɔ 'cɩanuëë.

Nɩkpɛ a ‑mɔ Lagɔ ‑wʋ ‑gömö a sɛ,

zaa wa zuzuu mʋʋ möä.

23 ‑Mä Lagɔbudu 'la 'mö,

nɩkpɛ ‑bhlʋ ‑wʋ a ‑mä.

Zuzukwëzokwë ɔ kää ‑gömö,

'n ɔ yiɛ 'mö 'kpa,

ɔ lɛ:

24 «O‑o aa!

Nazalɛɛtɩ a Zezwii aaa,

'saa‑wɛlɩ ‑wʋnyɩ bhä jijo'wʋ 'nɩ?

‑N ‑kanyɩ 'yli bhɩa a za ‑n yi bhä ‑a?

N ‑yi ‑mɔ ‑n glɩnɩ.

‑Ɔ ‑wʋ 'Wlɩlɩ,

‑ɔ 'bhöönɩ ‑mä Lagɔ dlɩ 'mö,

mö ‑n glɩnɩɛ.»

25 'N Zezwii yiɛ zuzukwëzokwëa yɔwʋkanɩsɛ 'dɩ 'nyɛ nɩɩ:

«'Pä ‑lɛ ‑na'a nuëa,

'bhöö ‑sɩkaa nɩkpɛ nɩ ‑gömö.»

26 'N zuzukwëzokwëa yiɛ ‑glasɛ nɩkpɛɛ 'mö 'siasianɩ,

'n a yiɛ 'mö 'kpa,

'n a yoo ‑gömö 'bhöö.

27 ‑Wa ‑wʋä ‑lɛ 'wuë,

'n zuzu yuëë ‑gömö 'bhöö,

'n wa 'yɩbhäyɩbhänɩɛ nimï nɩɩ:

«'Saa bhä sɛ ‑ma nɩ 'nɩ?

‑Lilili ɔ 'cɩa 'kämanɩnyɔ a sɛ.

'Ɔ bhïlawɛlɩɩ 'wuë 'mötɛɛnɔ yɩ kää.

Ɔ ‑kä zuzukuzokuu 'wʋ 'kpanɩɩ,

'klʋkpamö yɩ zoo.»

28 ‑Sɩkaa cuu,

'n Zezwii 'a nglɩɩ yiɛ ‑mä Galilee‑bhölɩɩ 'mö a ‑gwlɩ 'wuë ‑gömö mlɩmanɩ.

Zezwii yɛ guzuwa a ‑bɛ yɛmanɩ

(Matie 8.14‑17; Lwiikö 4.38‑41)

29 Zezwii ‑nyɛ Zaakö 'sɔ,

Zaa kökä,

wa 'wlʋä ‑mä Lagɔbudu 'möö,

'n wa yiɛ ‑mä Simɔɔ ‑nyɛ Adlee 'sɔ a 'ligbë 'mö mö.

30 Wa lɛ 'bhöö 'lɛ,

Simɔɔ a 'wʋtɛnglɛ wëtlokwëë lɩbhɔɔ zaa,

ɔ pö‑ö sɛ.

Zezwii ghlɛɛ ‑lɛ cuu,

'n wa yoo 'dɩ 'nyɛ nɩɩ,

ɔ'ɔɔ 'mö nɛnɩ.

31 'N Zezwii yoo yɔwʋ 'dio,

'n ɔ yoo sɔ köbhänɩ,

'n ɔ yoo 'wlu 'libhï.

'N wëtlokwëa yoo ku 'mö bhɩɛ,

'n ɔ yuëë 'wʋ pi.

32 ‑Kidosɛ,

ylʋʋ bhliɛ 'wëë,

'n nɩkpa yiɛ Zezwii guzuwaa 'wuë ‑nyɛ ‑wa kää zuzukuzoku ‑gömö 'sɔ ‑lɛ.

33 ‑Buduu ɔ ‑wʋä 'mö a ngloluë 'wʋ,

'n ‑mä glɔ 'mö a nɩkpaa 'wuë yiɛ ‑lɛ 'wlu 'titanɩ.

34 Guzuwa a ‑bɛ,

sɛɛ gwii lɩbhʋää bhʋlʋbhlʋ 'n ɔ yuëë ‑sɩbhä yɛmanɩ.

'N ɔ yiɛ ‑mumuë a ‑bɛ zuzukuzoku ‑gömö kpëti.

Zuzukuzokuu ‑yi ‑mɔ ɔ glɩnɩ zaa,

ɔ'ɔ 'nyɩ 'tɛnyɩ,

yɩ 'kä gbʋ ‑dɩ.

Zezwii yɛ Galilee‑bhölɩɩ 'wuë 'mö a ‑nʋa Lagɔwɛlɩɩ 'nyɛ

(Lwiikö 4.42‑44)

35 'Zɔkpɔ 'pii 'mö,

zlɩ 'nɩɛ ‑bhlɛ sasɛ zɩ,

'n Zezwii yiɛ gɔlɔ,

dɛ ‑bhlʋ dɛɛ ‑bɛ 'nɩɛ ‑wʋ,

'n ɔ yiɛ ‑lɛ mö 'n ɔ yiɛ Lagɔ bhibhe.

36 Simɔɔ ‑nyɛ ɔ 'bhɩayiea 'sɔ,

'n wa yoo sɛ tɛlɩɛ 'mö.

37 Wa ghïloo 'n wa yoo 'dɩ 'nyɩ nɩɩ:

«Nɩkpa 'wuë tɛlɩmö sɛ.»

38 'N Zezwii yuëë 'dɩ 'nyɛ nɩɩ:

«A‑a nɩ mö ‑mä ‑kʋkʋ yɔwʋ a ‑gwlɩ ‑mi'la 'mö,

n kä n 'kä'ɛ ‑mä Lagɔ 'a 'Mänatɩtɩɩ biamö,

nza n yiɛ mä'ä 'pɩwʋ.»

39 'N ɔ yiɛ ‑mä Galilee‑bhölɩɩ 'wuë 'mö mö.

‑Mä a Lagɔbïdii 'mö,

'n ɔ bhïlanɩɛ ‑mä Lagɔwɛlɩɩ,

'n ɔ kpëtiɛ zuzukuzoku nɩkpa ‑gömö.

Zezwii yɛ 'zlalɩbhänyɔ yɛmanɩ

(Matie 8.1‑4; Lwiikö 5.12‑16)

40 'N 'zlalɩbhänyɔ ‑bhlʋ yoo ‑mä ghlɩ.

'N ɔ yiɛ ‑lɛ ɔ dlɩ 'mö ‑kokomïladigbï glu 'pä.

Ɔ lɛ naa:

«N bhiamö,

‑n ‑kä 'wʋ ngluu,

‑n mlɩnɩ ‑n ‑kaa yɛmanɩ n 'kä 'wlɩlɩ plɛ.»

41 Nɩkpɛ nʋä sa'aa,

'n ngäzɩ yiɛ Zezwii 'lɩbhä.

'N ɔ yiɛ sɔ 'mö plu,

'n ɔ yoo kɛ zɩ,

'n ɔ yoo 'dɩ 'nyɛ nɩɩ:

«N ngulu 'wʋ,

zaa,

yɛmanɩ.»

42 Zezwii gbää sa'a cuu,

'n zlaa yiɛ nɩkpɛ yɔwʋ bhɩɛ 'n ɔ yiɛ 'wlɩlɩ plɛ.

43 Ɔ yɛmanɩɛ cuu,

Zezwii lɛ ɔ nɩ mö,

'n ɔ yoo 'yukwli 'mö 'titli nɩɩ:

44 «‑N ‑kä möö,

tɩa sɛ ‑n yɛmanɩɛ a 'dɩ nɩkpɛ 'nyɛ.

‑Maa mö ‑n 'kä ‑nanyɩ Lagɔbʋbɔnyɔɔ 'ylimö tulanɩ,

'wë,

bʋbɔnɩlii Moyizɩ gbä a‑a nɩɩ 'zlalɩbhänyɔ ‑kä yɛmanɩ ɔ nɩ bʋbɔnɩ,

nzɩɩ ɔ 'kä 'wlɩlɩ plɛ Lagɔ a 'yila 'klʋ a dɔ'wʋʋ,

‑n 'kɩ bʋbɔnɩ,

nzɩɩ yɩ 'kä nɩkpabhë 'ylimö tulanɩ nɩɩ,

‑n yɛ yɛmanɩ.»

45 Zezwii 'nyɔɔ sa'a 'dɩ 'wëë,

nɩkpɛɛ möä,

sɛ ɔ yɛmanɩɛ a tɩtɩɩ,

'mö ɔ biaa saa 'wuë.

Yɩ za,

Zezwii 'nɩa'a mlɩnɩ ɔ 'kä ‑glɔdɛ 'sibhë,

‑maa dɛɛ ‑bɛ 'nɩɛ ‑wʋ,

‑lɛ ɔ möä glɩɛ.

Nɩkpaa 'bhöö saa 'wuë 'n wa mɔɔ yɔwʋ.