Lwiikö 5

Zezwii yɛ 'ɔ tɛkägänɩwaa wäzɩ

(Matie 4.18‑22; Maakö 1.16‑20)

'Ylɩ ‑bhlʋ 'mö,

‑lɛ Zenezalɛɛtɩ a 'nyu 'kɔdʋʋ yɔwʋ,

Zezwii ‑wʋ ‑lɛ.

Nɩkpa a ‑bɛ ‑binɔɔ,

wa 'kä Lagɔwɛlɩɩ 'yukwli ‑pʋnɩ.

2 'N ɔ yiɛ ‑lɛ 'nyunuë 'wʋ 'gwälɩ 'sɔ 'ylɩmö.

Yɩ ‑lowluwaa,

‑dɛdapäwa wa glɩnɩɛ.

Wa'aa ‑mä 'wa gwälɩɩ 'mö ‑wʋ,

‑maa wa ‑wʋ 'wa ‑dɛdɩɩ wɔlʋ dɔ'wʋ.

3 Gwälɩ 'la gla'mö,

‑mä Simɔɔ a ‑nʋʋ ‑wʋä.

‑Mä wʋ 'mö ‑mä Zezwii ‑gbälɛɛ.

'N ɔ yoo wäzɩ,

ɔ lɛ naa:

«Simɔɔ,

'dianɩ 'tikïyie 'wʋ gɔlʋʋ kïkëa gwë.»

'N ɔ yiɛ ‑mä gɔlʋʋ 'mö sɛ glɩ,

'n ɔ yuëë 'cɩa.

4 Zezwii bhïlaa 'wëë,

'n ɔ yi'ɛɛ Simɔɔ 'dɩ 'nyɛ,

ɔ lɛ naa:

«Simɔɔ,

dɛɛ nyuu 'bhʋɔnɩɛ tenyii 'möö,

‑n ‑nyɛ gɔlʋʋ nɩ 'dio ‑lɛ,

‑n ‑nyɛ ‑na'a nɩkpaa 'sɔ,

a 'kä ‑lɛ 'a ‑dɛdɩɩ 'pä.»

5 Ɔ lɛ naa:

«‑Atʋ,

‑a ‑wʋ sabʋ'ɔ ‑dɛdɩ 'pä dɔ'wʋ ‑këë 'n zlɩ yiɛ zɩ,

‑aaa 'wuë ‑lu 'lɩbhä 'lɩlɩlɩ.

‑Maa ‑nmö gbä yɩa'aa ‑sɩbhä zaa,

‑a yi ‑lɛ 'pä.»

6 ‑Maa wa 'pää ‑lɛ ‑dɛdɩɩ,

wa 'kɩa'a ‑mä ‑sɛɛ yii,

wa 'niɛ bhɛnɩ,

zibhï a dɔ'wʋ,

yɩ lɛ 'kä 'kpɔ do.

7 Zaa,

wa 'bhɩa ‑wa ‑wʋä ‑mä gɔlʋ ‑mu'la 'möö,

'n wa yuëë wäzɩ wa 'kʋä kwänɩɛ yi.

'N wa yiɛ yi 'n wa yiɛ ‑mä zibhï ‑sɛ,

'n wa yiɛ ‑mä gwälɩ 'sɔ ‑kpɔ 'mö 'wʋ yie.

‑Maa zibhï a zunɔɔ a za,

gwälɩɩ a'bhï lɛ 'kä ‑mä 'nyu 'mö 'wlu 'mla.

8 ‑Maa Simɔɔ wa la'ɛɛ Piɛlɩ,

ɔ 'yɩɛ ‑li 'la 'wuë 'ylɩmöö,

'n ɔ yiɛ ‑lɛ Zezwii a dlɩ 'mö ‑kokomïladigbï glu 'pä.

Ɔ lɛ naa:

«‑Alowli,

'dionɩɩ gwë,

‑maa 'nyinylolinʋnyɔ n glɩnɩɛ.»

9 'Fʋ Simɔɔ 'nɩɛ ‑sɩbhä nʋ,

‑maa ɔ ‑nyɛ 'ɔ nɩkpaa 'wuë 'sɔ,

wa 'yɩɛ zibhï a zunɔɔ 'ylɩmöö,

‑kpöö köbhʋää.

10 Ɔ 'bhɩa ‑muë'la,

‑sɩbhä ‑kpö köbhämuë'ɛɛ wabhlɩ.

Nɩkpɛ ‑bhlʋ wa laa Zebedee,

ɔ yowluwa muëë.

‑Mɔ a nglɩɛ Zaakö,

‑mɔ a nglɩɛ Zaa.

'N Zezwii yiɛ Simɔɔ 'dɩ 'nyɛ nɩɩ:

«Simɔɔ,

tɩ ‑gu,

‑maa ‑bhlɛ a dɔ'wʋ,

zibhï ‑n sɛ a‑a 'nyu 'mö,

‑maa tɛɛnɩa'a dɛ'ɛ,

nɩkpa ‑n 'käa'aa 'kwlɛ 'mö ‑sɛ.»

11 Zezwii gbää sa'aa,

Simɔɔ ‑nyɛ ɔ 'bhɩa 'sɔ,

wa glɛɛ 'wa gwälɩɩ 'wëë,

'n wa yiɛ 'wa ‑lii 'wuë 'wʋ ylɛ,

'n wa yoo 'bɩwʋ bhlinɩ.

Zezwii yɛ 'zlalɩbhänyɔ yɛmanɩ

(Matie 8.1‑4; Maakö 1.40‑45)

12 'Tɛnyɩ ‑mɛmɛɛ 'mö,

‑mä Galilee‑bhölɩɩ 'mö a ‑glɔ 'kɔdʋ ‑bhlʋ 'mö,

'n Zezwii yiɛ ‑mä nɩkpɛ ‑bhlʋ ghlɩnɩ.

Ɔ 'wuë 'zla.

Ɔ 'yɩɛ Zezwii 'ylɩmöö,

‑lɛ ɔ dlɩ 'mö 'n ɔ yiɛ 'klʋ glu 'pä.

Ɔ lɛ naa:

«‑Alowli,

n bhiamö,

‑n ‑kä 'wʋ ngluu,

‑n mlɩnɩ ‑n ‑kaa yɛmanɩ n 'kä 'wlɩlɩ plɛ.»

13 Ɔ nʋä sa'aa,

'n Zezwii yiɛ sɔ 'mö plu,

'n ɔ yoo kɛ zɩ.

Ɔ lɛ naa:

«N ngulu 'wʋ,

zaa,

yɛmanɩ.»

Ɔ gbää sa'a cuu,

'n zlaa yiɛ nɩkpɛɛ yɔwʋ bhɩɛ.

14 'N Zezwii yoo kä'mö 'titli,

ɔ lɛ naa:

«‑N ‑kä möö,

tɩa sɛ ‑n yɛmanɩɛ a 'tɩtɩ nɩkpɛ 'nyɛ.

‑Maa mö ‑n 'kä ‑nanyɩ Lagɔbʋbɔnyɔɔ 'ylimö tulanɩ 'wë,

bʋbɔnɩlii Moyizɩ gbä a‑a nɩɩ,

'zlalɩbhänyɔ ‑kä yɛmanɩ ɔ nɩ bʋbɔnɩ,

nzɩɩ ɔ 'kä 'wlɩlɩ plɛ Lagɔ a 'yila 'klʋ a dɔ'wʋʋ,

‑n 'kɩ Lagɔ bʋbɔnɩ,

yɩ 'kä nɩkpabhë 'ylimö tulanɩ nɩɩ,

‑n yɛ yɛmanɩ.»

15 ‑Sɩbhä yɩ ‑wʋ 'mö,

‑maa Zezwii 'a nglɩɩ mö tenyii 'yize.

Nɩkpa a ‑bɛ yo 'kwädlɩ yɔwʋ wa 'kä 'ɔ wɛlɩɩ 'yukwli ‑pʋnɩ ɔ 'kʋä'ɛ yɛmanɩmö a za.

16 ‑Maa Zezwii ɔbhlɩ mää nɩkpɛ 'nɩɛ ‑wʋʋ,

‑mä ɔ möä 'kwädlɩ 'n ɔ bhibhenɩɛ ‑mä Lagɔ.

Zezwii yɛ kpälɛkpälɛnyɔ yɛmanɩ

(Matie 9.1‑8; Maakö 2.1‑12)

17 'Ylɩ ‑bhlʋ 'mö,

Zezwii ‑wʋä nɩkpa Lagɔwɛlɩɩ 'cɩa dɔ'wʋʋ,

Falizɩɛwa ‑mumuë ‑nyɛ Moyizɩ 'a Gböö a 'cɩawa ‑mumuë 'sɔ,

wa ‑wʋmö a ‑lɛ.

‑Mumuë 'bhöönɩ ‑mä Galilee‑bhölɩɩ a ‑gwlɩɩ 'wuë 'mö,

‑muë 'bhöönɩ ‑mä Zwidee‑bhölɩɩ a ‑nɩɩ 'wuë 'mö.

‑Mumuë 'bhöönɩ'ɛ ‑mä Zeluzalɛɛmö a'bhë.

Wa 'wuë wa glɩ ‑lɛ 'n wa ‑pʋnɩɛ Zezwii 'yukwli.

Zezwii,

Lagɔ 'a 'mötɛɛnɔɔ ‑wɔɔ ‑gömö,

'n ɔ yɛmanɩɛ guzuwa.

18 'N nɩkpa ‑mumuë yiɛ yi.

Wa ‑su ‑gbɔpʋ 'wʋ kpälɛkpälɛnyɔ ‑bhlʋ.

Wa ghlɛɛ ‑lɛ,

wa yɩbhä a nyɩasɛ wa 'kä ‑mä ‑budu 'mö plɛ,

wa 'kɔ ‑lɛ Zezwii a 'yila 'klʋ sɛ 'pïla.

19 ‑Maa nɩkpaa a zunɔɔ a za,

wa'aa dɛ wa 'kä ghlɛnɩɛ ‑yi.

Zaa,

'n wa yiɛ ‑mä ‑budu 'wlu ‑gbälɛ 'n wa yiɛ ‑mä ‑fële ‑dɩ.

Kpälɛkpälɛnyɔɔ pö ‑sɛpʋ 'mö,

'n wa yoo 'wʋ 'libhï,

'n wa yoo 'likpï 'mö 'kwïlanɩ.

‑Mä nɩkpaa jijo'wʋ,

Zezwii a dlɩ 'mö,

'n wa yoo ‑lɛ sɛ 'pïla.

20 Zezwii 'yɩɛ sɛ wa 'tɛɛnɔɔ dlɩ 'ylɩmöö,

'n ɔ yiɛ kpälɛkpälɛnyɔɔ 'dɩ 'nyɛ nɩɩ:

«'Tua,

‑na'a 'nyinylolii a gbʋʋ ‑kamö ‑gömö 'bhöö.»

21 Zezwii gbää sa'a cuu,

Moyizɩ 'a Gböö a 'cɩawaa,

wa ‑nyɛ Falizɩɛwaa 'sɔ,

wa dila zɛmö a dɔ'wʋ wa lɛ naa:

«Nɩkpɛ a ‑mɔ bhä dɛ'ɛ ‑ɔ nyima sa'a Lagɔ a 'nglɩ 'nɩ?

‑Ɔ bhɛnɩ bhä ɔ 'kä nɩkpɛ 'nyinyloli a gbʋ ‑gömö ‑sɛ,

'n ɛ 'nɩ ‑bhö Lagɔ a 'yize mɔɔ.»

22 Zezwii yɩbhlɩnɩɛ 'wa dlɩpäsaa,

'n ɔ yuëë nimï 'yɩbhä nɩɩ:

«Sɛ yɩ ‑wʋ ɔ 'mö 'n a pä bhä sa'a dlɩ 'nɩ?

23 N 'kä nɩkpɛ nɩ 'dɩ 'nyɛ nɩɩ,

Lagɔ ‑kamö ‑na'a 'nyinylolii a gbʋʋ ‑gömö ‑sɛ,

n 'kä'ɛ nɩɩ,

‑sɔ 'wʋ ‑n 'kä nɛmö,

yɩ 'sɔɔ a dɔ'wʋ ‑mii 'tɛɛ bhä 'mö?

24 N kɩ 'nʋ,

‑maa n yɩbhä a 'kä sɛ yɩbhlɩmanɩ nɩɩ,

Nɩkpɛ a 'Yu,

mɔɔ kää ɔ 'kä mä'ä dʋdʋ 'wʋ Lagɔ a 'nglɩ 'mö nɩkpɛ 'nyinyloli a gbʋ ‑gömö ‑sɛ.

Zaa,

kpälɛkpälɛnyɔ nɩmä,

‑sɔ 'wʋ,

'libhï ‑na'a ‑sɛpʋʋ 'wʋ ‑n 'kä 'ligbë 'mö mö!»

25 Zezwii gbää sa'a cuu,

'wa 'wuë a 'yila 'klʋ 'n kpälɛkpälɛnyɔɔ yiɛ 'wʋ ‑sɔ 'n ɔ yiɛ 'ɔ 'wʋpölii 'wʋ 'libhï.

Ɔ ‑wʋ Lagɔ a 'nglɩ 'ghlimanɩ dɔ'wʋ,

'n ɔ yiɛ 'ligbë 'mö mö.

26 Wa 'wuë,

'n zuzu yuëë ‑gömö 'bhöö,

'n wa 'ghlimanɩɛ Lagɔ a 'nglɩ,

'n wa kluä ɔ gbʋ 'mö,

'n wa nʋä:

«'Ɔɔ!

‑A yɛ zɩ'ɛ käböli 'ylɩmö.»

Zezwii yɛ Levii wäzɩ

(Matie 9.9‑13; Maakö 2.13‑17)

27 Yɩ 'plɩɛ sa'a 'wëë,

'n Zezwii yiɛ ‑mä ‑glɔ 'la 'mö 'bhöö.

Ɔ ‑wʋ mö dɔ'wʋ,

'n ɔ yiɛ nɩkpɛ ‑bhlʋ 'ylɩmö.

Nɩkpɛ 'la,

lapoomoni a 'wʋbhlinyɔɔ zaa,

ɔ glɩ ‑mä lapoopɛnɩbuduu 'mö.

Ɔ nglɩɛ Levii.

'N Zezwii yoo wäzɩ,

ɔ lɛ naa:

«Levii,

yi,

‑n ‑kaa ‑gänɩ!»

28 'N Levii yiɛ 'wʋ ‑sɔ 'n ɔ yiɛ 'ɔ ‑lii 'wuë 'wʋ ylɛ 'n ɔ yoo 'bɩwʋ bhlinɩ.

29 Wa möä 'n Levii yoo ‑mä 'ɔ 'ligbëa 'mö lile 'käda 'wʋ pi.

Ɔ 'bhɩayie a ‑bɛ ‑wa bhlimöä lapoomoni 'wʋ 'n nɩkpa ‑mumuë a 'kɔkɔmlɛ ‑wʋmö a ‑lɛ.

Wa 'wuë 'n wa yiɛ 'wʋ linɩ.

30 ‑Maa Falizɩɛwaa ‑nyɛ Moyizɩ 'a Gböö a 'cɩawaa 'sɔ,

wa 'yiɛ 'ylɩmöö,

'n wa yiɛ 'ngungwa 'n wa yiɛ Zezwii 'a ‑gänɩwaa nimï 'yɩbhä nɩɩ:

«Sɛ yɩ ‑wʋ ɔ 'mö,

lapoomoni a 'wʋbhliwa ‑nyɛ nɩkpa ‑muë ‑wanyɩɩ nglɩɩ ‑nyimaa 'sɔ,

'n a ‑nyʋä linɩ bhä 'wʋ 'nɩ?»

31 Zezwii 'nʋä,

ɔ lɛ naa:

«‑Ɔ ‑yɛɛ,

ɔ'ɔ tɛlɩ ‑dʋtaa sɛ,

‑maa ‑ɔɔɔ ‑yɛ,

mɔɔ tɛlɩɛ ‑dʋtaa sɛ.

32 Zaa,

‑wa zlɔnɩɛ 'mö Lagɔ 'yila a 'klʋ a dɔ'wʋʋ,

wa za n'n‑ä yi.

‑Maa 'nyinylolinʋwaa a za n yiɛ,

wa 'kä ligba wa 'kä 'wa ‑lizokuu kɛ'mö ‑sɛ.»

Suplɛplʋʋ a wɛlɩɩ

(Matie 9.14‑17; Maakö 2.18‑22)

33 'Ylɩ ‑bhlʋ 'mö Falizɩɛwa ‑mumuë mʋa ghlɩɛ ‑mä Zezwii.

Wa lɛ naa:

«Zaa Batisɩ,

'ɔ ‑gänɩwaa,

wa plɛ ‑bɛ 'wʋ su,

'n wa bhibhee.

'N ‑aa ‑nʋa plɛmö'ɛ su.

‑Maa ‑na ‑nʋa ‑naa,

li wa liɛ 'kwädlɩ 'n wa nɩmää.»

34 'N Zezwii yuëë 'dɩ 'nyɛ,

ɔ lɛ naa:

«Nɩkpɛ ‑kä 'nglɔ kwä 'n ɔ ‑kä ɔ 'tuawa wäzɩ wa 'kä nglɔɔ 'wʋ 'bhlii,

nglɔɔ a 'luwlii ‑kʋä ‑bhlɛ jijo'wʋ ‑wʋʋ,

wa yi bhä wa nɩ tɩ li nʋ ‑a?

N'nn!

35 ‑Maa 'tɛnyɩ ‑mɛmɛɛ yi ghlɛ,

dɛ wa 'kʋä nglʋkwänyɔɔ jijo 'wʋ ‑sɛɛ.

‑Lɛ a 'tɛnyɩ 'la 'mö,

wa yi su plɛ.»

36 'N ɔ yuëë 'nine 'pänɩ,

ɔ lɛ naa:

«Wa ‑kä ‑bänalele 'pɩɔ 'wʋ ‑sɛɛ,

wa ‑kʋʋ ‑bänagɔgɔ yɔwʋ 'kplɛnɩɩ,

yɩ'ɩɛ nɛnɩ.

Ɛ'ɛ ‑bhö nyɩasɛ,

‑maa wa ‑kä ‑sɩbhä 'zʋʋ,

‑bänalelea 'mö wa yɛɛ da'a nyima,

‑yʋkʋpɩɔlulu 'nɩɛ'ɛ ‑bänagɔgɔ 'wʋ ‑ngwa.

37 Wa ‑kä nʋyɔlʋ 'kplabhëgɔgɔ 'mö pälɩɩ,

yɩ'ɩɛ'ɛ nɛnɩ.

Ɛ'ɛ ‑bhö nyɩasɛ,

‑maa wa ‑kʋʋ ‑mä pälɩɩ,

'kplabhëa,

ghɔlɔ a ghlɔɔ 'n nʋʋ 'suloo sɛ,

yɩ 'sɔɔ 'n yɩ nyimonɩɛ 'gämö.

38 ‑Sɩbhä a za wa kää wa 'kä nʋyɔlʋ ‑mä 'kplabhëlele 'mö pälɩ.

39 Sɛ'ɛ n gbä'ɛɛ nɩɩ:

Nɩkpɛ 'nɩ 'nɩmäa'a ‑gɔlʋsɩɛka a nʋ 'wë,

ɔ 'kä ‑gayɔlʋ a nʋ sɛ tɛlɩ.

‑Maa yɩ 'sɔɔ a dɔ'wʋ,

sɛ'ɛ ɔ 'kää nɩɩ,

‑gɔlʋsɩɛka a nʋʋ mʋʋ nɛnɩɛ,

mʋʋ ziɛ ‑mu'la 'wʋ.»