Wa yɛ ‑mä Kanaa 'nglɔ 'wʋ bhli
2
Yɩ 'plɩɛ sa'a 'wë a ylɩɩ a tanɛɛ 'mö,
‑mä Galilee‑bhölɩɩ 'mö a glɔ ‑bhlʋ wa laa Kanaa,
'n wa yiɛ ‑mä 'nglɔ 'wʋ 'bhli.
Nglɔɔ a 'wʋbhlidɛ 'la,
Zezwii a ‑da ‑wʋmö a ‑lɛ.
2 Zezwii a'bhë,
ɔ ‑nyɛ 'ɔ ‑gänɩwaa 'sɔ wa wäzɩmuë a,
wa 'kä nglɔɔ 'wʋ 'bhli.
3 ‑Maa wa ‑wʋä nglɔɔ 'wʋ 'bhli dɔ'wʋʋ,
duvɛɛ wa nɩmä a‑a,
'n ɛ yiɛ bhɩɛ,
'n Zezwii a ‑da yoo 'dɩ 'nyɛ,
ɔ lɛ naa:
«Yɩɛ,
nʋʋ yɛ bhɩɛ.»
4 Zezwii lɛ naa:
«'Nyɩa,
'na 'saa n 'kää nʋʋ,
‑nmö ‑kaa bhä 'dɩ 'nyɛ n 'kʋ nʋ ‑a?
'Na 'tɛnyɩ 'nɩɛ ‑bhlɛ ghlɛ.»
5 Zezwii gbää sa'aa,
'n ɔ da yiɛ fɛtɩɩ a 'yliwʋwaa 'dɩ 'nyɛ nɩɩ:
«Na yowli,
sɛ ɔ 'kanyɩɛ ɔ'bhë 'dɩ 'nyɛɛ,
‑sɩbhä a nɩ 'zʋ.»
6 Lɛ 'ligbë 'la 'mö,
‑balakï 'kädɩ gbʋplʋ ‑wʋ a ‑lɛ.
Yɩ bhɛnɩ yɩ 'kä bhʋlʋbhlʋ 'nyukpälɩ a gwlɩ ngbï a sɛ 'mö plɛ.
‑Lakï 'la,
Zwiiföwaa ‑kä wa 'kä Lagɔ bhibhee,
sɛɛ Gböö gbää wa nɩ wɔlɔ kplɩ yɔwʋ,
wa 'kä 'wlɩlɩ plɛ Lagɔ a 'yila 'klʋ a dɔ'wʋʋ,
wa ‑kä ‑sɩbhä 'zʋä yii,
yɩ 'mö,
‑mä wa luä.
7 'N Zezwii yiɛ 'fɛtɩɩ a 'yliwʋwa 'la 'dɩ 'nyɛ nɩɩ:
«A nɩ yie ‑lakï nɩ 'nyu 'wʋ.»
'N wa yiɛ nyuu 'wʋ yie ‑blɛblɛ.
8 Wa yiiɛ 'wëë,
Zezwii lɛ naa:
«A nɩ 'lua'a ‑sɩkaa 'tikïyie,
‑ɔ ‑wʋä lilea 'ylii,
a 'kɔnyɩ ‑mä kwä.»
'N wa yonyɩɛ ‑mä kwä.
9 'N ɔ yuä ngli 'yɩ.
Ɔ lɛ zʋ a sɛ'ɛ,
nʋä.
Ɔ'ɔ a'bhë dɛɛ nʋ 'la yɛ 'bhöönɩ ‑yi,
‑maa 'yliwʋwaa ‑wa 'lu a‑a nyuu,
wa ‑yi wabhlɩ sɛ.
Ɔ 'yuä ngli 'wëë,
'n ɔ yiɛ nglʋkwänyɔɔ a'bhë wäzɩ.
10 Ɔ lɛ naa:
«Wa ‑kä 'kwädlɩ 'bhlii,
nʋ a ‑nʋʋ,
'mö wa nyɛɛ nɩkpaa 'wë,
wa ‑käa'a ‑bɛ 'wʋ 'nɩmää,
‑wʋʋä sasɛ nɛnɩɩ,
'n wa lɛmuä.
‑Maa ‑nmö ‑naa,
nʋ a ‑nʋʋ mö ‑n kwïlaa ‑këë,
n‑n 'wulua'aa ‑sɩkaa 'yli.»
11 ‑Mä Galilee a ‑glɔɔ wa laa Kanaa,
sa'a ‑sɩbhä Zezwii 'pänɩɛ ‑mä 'ɔ tɛkäzɩzɛɛ,
'n ɔ yiɛ ‑sɩbhä 'ɔ 'ghïlinɔɔ 'yli 'wälanɩ.
'Bhöönɩa'a da'a,
'ɔ ‑gänɩwaa,
dlɩ wa 'tɛɛnɔɔa'aa.
12 Yɩ 'plɩɛ sa'a 'wëë,
'n ɔ yiɛ 'wʋ ‑sɔ.
Ɔ ‑da mɔ,
ɔ ‑daayuë muë,
'ɔ ‑gänɩwaa kökä,
‑glɔɔ wa laa Kapɛnaɔmö,
'n wa yiɛ ‑mä mö.
Wa ‑sɛ ‑mä 'ylɩya.
Zezwii yɛ ‑mä Lagɔbudu 'Kɔdʋʋ 'mö a 'pɛlʋpäwaa kpëti
13 Zwiiföwaa 'a Galɛ'möwlʋfɛtɩɩ mɛɛ lɛ 'kää ghlɛ,
zaa,
'n Zezwii yiɛ ‑mä Zeluzalɛɛmö mö.
14 Ɔ ghlɛɛ ‑mä,
'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ.
Ɔ lɛ 'bhöö'ɛ,
'pɛlʋpäwa su ‑mä.
‑Muë pä 'bhila 'pɛlʋ,
‑muë pä wïla 'pɛlʋ,
‑muë pä ‑kpakwie 'pɛlʋ.
Moni a 'mözigbanɩwa ‑wʋmö'ɛ ‑mä.
Wa glɩ 'wa 'tebhlii yɔwʋ.
15 'N Zezwii yiɛ 'likpï 'wʋ 'libhi,
'n ɔ yiɛ ‑kpliyi lɩbhä,
nɩkpa 'la 'wuë,
'n ɔ yuëë kpëti,
wa ‑nyɛ 'wa wïlaa ‑nyɛ 'wa bhilaa 'sɔ.
'Wa zigbanɩ a‑a moni 'möö,
'wa monii,
'n ɔ yee 'kwlɛ 'mö 'päpänɩ.
'Wa 'tebhlii,
'n ɔ yiɛ 'gbliza.
16 'N ɔ yiɛ ‑kpakwiea a 'pɛlʋpäwaa 'dɩ 'nyɛ nɩɩ:
«A ‑nyɛ 'a ‑kpakwiea nɩ 'wlʋ ‑mä.
‑Maa na dɩba Lagɔ 'a ‑buduu,
a nɩ tu 'pɛlʋpädɛ 'wʋ 'zʋa!»
17 Zezwii 'nyʋää ‑sɩbhä 'dɩɩ,
'n 'ɔ ‑gänɩwaa yiɛ ‑mä Lagɔ 'a 'bɔgʋʋ 'mö a wɛlɩkïbhë ‑bhlʋ 'wʋ ligbanɩ.
Wɛlɩkïbhë 'la sɛ'ɛ a nʋä nɩɩ:
‑Na'a ‑buduu a ‑wawʋʋ a za,
na dlɩ si.
18 Zwiiföwaa a 'kädɩ ‑mumuë ‑wa ‑wʋmö a‑a ‑lɛ,
'n wa yiɛ Zezwii nimï 'yɩbhä nɩɩ:
«'Saa ‑n nʋä dɛ'ɛɛ,
Lagɔ mɔɔ tiamu bhä 'wʋ ‑a?
Ɛ ‑kä ‑sɩbhä ma‑a,
'pänɩɛ ‑ka dɛ'ɛ ‑aa 'yila 'klʋ zɩzɛ,
‑a 'kä sɛ ‑yi.»
19 Zezwii lɛ naa:
«Lagɔbudu 'Kɔdʋ nɩ,
a nɩ wlʋ.
‑Maa a ‑kʋʋ wlɛ 'wëë,
n yu 'ylɩ ta 'mö 'wlu 'libhïnɩ.»
20 Wa lɛ:
«'Ylʋbö a gwlɩ 'sɔ 'ylʋbö gbʋplʋ,
'mö wa 'sɩbhänɩɛ Lagɔbudu 'kɔdʋ nɩ.
Mö ‑n gbä bhä ‑naa,
wa nɩ wlɛ,
‑n 'kʋ 'ylɩ ta 'mö 'sɩbhänɩ ‑a?»
21 ‑Maa Zezwii nʋä da'a nɩɩ,
Lagɔbudu 'Kɔdʋʋ,
‑tiamö a ‑budu ɔ'ɔɔ gaaa,
‑maa ɔnyɩ ɔ gaa.
22 Zaa,
‑zlɩ Zezwii 'kuä 'wë a ylɩɩ a tanɛɛ 'mö,
ɔ gɔlɔɔ,
ɔ 'wlʋä gluu,
'n 'ɔ ‑gänɩwaa 'a dilaa yiɛ wɛlɩkïbhë nɩ a da bhlinɩ,
'n wa yiɛ sɛ yɩbhlɩmanɩ nɩɩ,
Lagɔ 'a 'bɔgʋʋ 'mö a wɛlɩɩ ‑nyɛ ɔ'bhë 'a bhïlawɛlɩɩ 'sɔ,
‑tiawɛlɩ yɩ glɩnɩɛ.
Zezwii ‑yi nɩkpɛ a 'mlɩ a dlɩ
23 Zwiiföwaa 'a Galɛ'möwlʋfɛtɩ 'la a 'tɛnyɩ ‑bhʋlʋ ‑kpɔ 'mö,
Zezwii ‑wʋ ‑mä Zeluzalɛɛmö,
zɩzɛ ɔ pää,
nɩkpa a ‑bɛ 'yɩɛ 'ylɩmö a za,
wa kɔ dlɩ 'wʋ.
24 ‑Maa Zezwii ɔbhlɩ,
wa 'wuë ɔ 'nuëë dlɩ 'wʋ ‑kä.
Ɛ'ɛ ‑bhö nyɩasɛ,
‑maa wa 'wuë ɔ ‑yuë sasɛ.
25 'Saa nɩkpɛ glɩnɩɛ,
wa 'kɔnyɩ sʋlʋnɩ,
ɔ 'niɛ sɛ tɛlɩ,
ɛ'ɛ ‑bhö fʋ,
‑maa ɔ'bhë,
ɔ ‑yi nɩkpɛ a 'mlɩ a dlɩ.