Zezwii yɛ ‑mä Zeluzalɛɛmö plɛ
11
Zezwii ‑nyɛ 'ɔ ‑gänɩwaa 'sɔ wa 'dio Zeluzalɛɛmö a ‑glɔ yɔwʋ,
wa lɛ 'kää ‑gwlɩ 'tikïyiea wa laa Bɛtɩfazee 'n Betanii ghlɩɛ yii,
Olivieswii a ‑gägaa yɔwʋ a daa,
wa nɛmö ‑lɛ,
'n Zezwii yiɛ 'ɔ ‑gänɩwaa a gla'mö a nɩkpa 'sɔ tie.
2 'N ɔ yuëë 'dɩ 'nyɛ,
ɔ lɛ naa:
«‑Glɔɔ ‑wʋ ‑wʋä mä'a a 'yukuu,
a nɩ mö ‑mä.
A ‑kä ‑mä plɛ cuu,
a yi ‑sʋkʋfanɩ a ‑dɩgba ‑bhlʋ 'ylɩmö,
a ‑glɛ.
Nɩkpɛ 'naa ‑bhlɛ tɛkäsɛ ‑gömö ‑gbälɛ,
a nɩ ‑daa 'kpɔ a ‑ka'ma ‑lɛ.
3 'N nɩkpɛ ‑kaanyɩ nimï 'yɩbhä nɩɩ,
'saa bhä 'n a zʋ bhä sa'a?
A nɩ 'nyɔ 'dɩ nɩɩ,
‑Alowli mɔɔ yɩbhaa.
‑Maa ɔ yeanya ‑sɩkaa ‑lɛ.»
4 Wa möä,
wa lɛ 'bhöö 'lɛ,
‑lɛ 'yio yɔwʋ,
‑budu ‑bhlʋ a ‑gbëlea yɔwʋ,
‑sʋkʋfanɩ a ‑dɩgba ‑glɛ ‑lɛ.
N wa yeaa 'kpɔ ‑dɩ.
5 'N ‑wa ‑wʋ a ‑lɛ a gla'mö a ‑mumuë yuëë nimï 'yɩbhä nɩɩ:
«'Saa a nʋ bhä?
'Saa bhä 'n a dɩ ɔ ‑sʋkʋfanɩ a ‑dɩgba 'kpɔ?»
6 Sɛɛ Zezwii gbä a‑a wa nɩ gbää,
'n wa yiɛ ‑sɩbhä gbä.
N wa yuëë kɛ yɔwʋ ‑sɛ.
7 'N wa yeaa ‑mä Zezwii kwä,
‑lɛ a ‑gömö,
'n wa yiɛ ‑lɛ 'wa ‑banɩɩ lʋlʋ 'n Zezwii yeaa ‑gömö ‑gbälɛ.
8 'N nɩkpa a 'kɔkɔmlɛ yiɛ ‑lɛ 'yio 'wʋ 'wa ‑banɩɩ lʋlʋ.
'N ‑mumuë yiɛ ‑gapatɩɩ wa ‑dɩ a‑a ‑mä 'wa 'lagbïlea 'mö ‑lɛ 'yio zʋ.
9 Muë ‑gänɩ Zezwii 'yuku ‑muë ‑gänɔ nimï,
wa 'wuë 'n wa kpaa 'mö,
'n wa nʋä:
«Ozana!
‑Ɔ yiɛ dɛ'ɛ ‑Alowli Lagɔ a 'nglɩ 'möö,
Lagɔ nɩ 'pɔ 'nyu aa!
10 'Bhlɩlowlii ‑ɔ 'kää ‑aa dɩba 'kɔdɔ Daviidɩ a saa 'kämanɩɩ,
ɔ yɛ yi.
Lagɔ nɩ 'pɔ 'nyu aa!
Ozana ‑mä Lagɔtapɛ 'wʋ aa!»
11 'N Zezwii yiɛ ‑mä Zeluzalɛɛmö ghlɛ,
'n ɔ yiɛ ‑mä Lagɔbudu 'Kɔdʋʋ 'mö plɛ.
'Saa plɩɛ ‑mä 'wʋ 'wuë,
'n ɔ yiɛ 'ylɩmö,
'n ɔ yiɛ ‑mä 'wlʋ.
Swe lɛ 'kä 'yluä mö,
ɔ ‑nyɛ wa kʋgbä'sɔ ‑kpɔ 'sɔ,
'n wa yiɛ Betanii 'mö.
Zezwii yɛ su bhätlɩnɩ
12 Zlɩ zɩɛ,
Zezwii ‑nyɛ 'ɔ ‑gänɩwaa 'sɔ wa 'bhöönɩ ‑mä Betanii,
'n ngɔmʋ yoo 'lɩbhä.
13 'N ɔ yiɛ ‑mä 'yuku fiigösu 'ylɩmö.
Wʋ 'wlu a ‑patɩkwëa a 'käda.
'N ɔ yuä zɛmö plɛ,
'n ɔ yuä 'wlu yɩlɩ,
wʋ ‑kä a 'bhï 'wlu ‑kä a za.
‑Maa ɔ 'nʋä 'bhë ‑bhlʋ a'bhë 'wlu ghlɩ.
'Wʋ tlʋtlʋtɛnyɩɩ 'nɩɛ ‑bhlɛ ghlɛ zaa,
kpɩ a 'yize wʋ kää 'wlʋ.
14 'N Zezwii yuä bhätlɩnɩ,
ɔ lɛ naa:
«‑Nmö su nɩ,
‑bɛ nɩ tɩa'a 'kwädlɩ ‑na 'yli a'bhë li.»
Ɔ gbää sa'aa,
'ɔ ‑gänɩwaa 'nʋ.
Zezwii yɛ 'pɛlʋpäwaa ‑mä Lagɔbudu 'Kɔdʋʋ 'mö kpëti
15 Zezwii ‑nyɛ 'ɔ ‑gänɩwaa 'sɔ 'n wa yiɛ ‑mä Zeluzalɛɛmö ghlɛ,
'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ.
Nɩkpa ‑wa 'pänɩɛ ‑mä 'pɛlʋ ‑nyɛ ‑wa pɩaa 'sɔ,
'n ɔ yuë ‑mä kpëti.
‑Wa zigbanɩɛ moni 'mö,
'n ɔ yiɛ wa 'tebhli dlɩsɛ ‑gbïli,
‑wa pää ‑kpakwiea 'pɛlʋ 'a ‑klikpïï kökä.
16 'Plɩplɩwa ‑mumuë ‑wa ‑suä 'wlu,
‑wa ‑dɩnɩɛ Lagɔligbëa 'möö,
wa 'wuë 'n ɔ yuëë 'nigba.
17 'N ɔ yuëë 'cɩa.
Ɔ lɛ naa:
«Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ,
Lagɔ lɛ naa:
'Na ‑buduu,
ngäya 'wuë ‑kaa ‑mä bhibhenɩ a ‑luä.a
‑Maa abhʋa abhlɩ,
'mö a 'zʋaa 'wiwa a ‑budu 'wʋ.»
18 Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ,
wa 'nʋä wɛlɩ 'laa,
sɛ wa 'kää zʋ wa 'kä Zezwii 'lɩbhä ɔ 'kä 'ku,
‑sɩbhä wa tɛlɩɛ sɛ.
‑Maa nɩkpa 'kɔkɔmlɛ ‑wa ‑pʋnɔɔɔ 'yukwlii,
'ɔ 'cɩacɩasaa,
‑sɩbhä zuzu a ‑sʋä ‑gömö,
zaa,
Zwiiföwaa 'a 'kädɩ 'la,
‑ngänɩ wa ‑ngänɩɛ wa 'kɔ 'lɩbhä a dɔ'wʋ.
19 ‑Kidosɛ ghlɛɛ,
Zezwii ‑nyɛ 'ɔ ‑gänɩwaa 'sɔ 'n wa yiɛ ‑mä Zeluzalɛɛmö 'bhöö,
n wa yiɛ mö.
Dlɩ'wʋkänɔɔ a libhoo
20 Zlɩ zɩɛ,
wa ‑wʋ 'plɩ dɔ'wʋ,
fiigösuu Zezwii bhätlɩnɩ a‑a,
'n 'ɔ ‑gänɩwaa yuë 'ylɩmö,
wʋ ku‑u.
21 'N Piɛlɩ a dlɩ yiɛ wʋ da bhlinɩ,
ɔ lɛ naa:
«‑Atʋ,
yɩɛ,
fiigösuu ‑n bhätlɩnɩ a‑a,
wʋ yɛ 'ku.»
22 'N Zezwii yuëë 'dɩ 'nyɛ nɩɩ:
«A nɩ 'tɛɛnɩ Lagɔ dlɩ!
23 ‑Tiamö n nyanyɩɛ dɛ'ɛ 'dɩ,
'n nɩkpɛ ‑kä ‑gäga nɩ 'dɩ 'nyɛ nɩɩ:
'Bhöö ‑sɩkaa dɛ'ɛ n 'kä ‑mä gïnyɛ 'mö bhlinɩɛ mö,
'n gʋgɔgʋgʋ 'nɔ dlɩzɛmö ‑wʋ,
‑maa 'n ɔ ‑kɩɩ dlɩ 'wʋ ‑kä nɩɩ,
sɛ ɔ gbää da'a ‑sɩbhä yi 'yli 'wlʋnɩɩ,
‑sɩbhä yi ‑tiamö 'yli 'wlʋnɩ.
24 Nza n gbää nɩɩ,
a ‑kä Lagɔ bhibhe a ‑kɔɔ ‑lu 'yɩbhänɩɩ,
a nɩ kɩ dlɩ 'wʋ nɩɩ,
ɔ yɛ 'wʋ nglu ɔ 'kanyu 'nyɛ.
‑Lɛ a dɔ'wʋ ɔ yeanyu ‑tiamö 'nyɛ.
25 A ‑kä ghäyɩ 'nɩgbönɩ a ‑kä Lagɔ bhibhe dɔ'wʋ ‑wʋ,
'n a ‑kä nɩkpɛ a wɛlɩ 'mlɩɩ ‑kä,
a nɩ 'tatinii 'yi.
‑Lɛ a dɔ'wʋ a dɩba Lagɔ ‑ɔ ‑wʋä ‑mä ghäyɩ 'wʋʋ,
ɔ yi 'a 'nyinylolii a gbʋʋ 'yi 'tatinɩmö. [
26 ‑Maa ‑lizokuu a'bhɩa nʋanyɩɛ 'wlu 'n a 'nɩ yɩ gbʋ 'yi 'tatinɩɩ,
a dɩba Lagɔ ‑ɔ ‑wʋä ‑mä ghäyɩ 'wʋʋ,
ɔ 'naa 'kä 'a 'nyinylolii a gbʋʋ 'yi 'tatinɩmö.]»
‑Ɔ tie bhä Zezwii?
27 Zezwii ‑nyɛ 'ɔ ‑gänɩwaa 'sɔ,
'n wa yi'ɛɛ ‑mä Zeluzalɛɛmö 'bɩwʋ yi.
'N ɔ yiɛ ‑mä Lagɔbudu 'Kɔdʋʋ 'mö plɛ.
Ɔ ‑wʋ 'mö zi dɔ'wʋ,
Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ,
Zwiiföwaa a 'nɛɛnɩwa 'kädɩɩ kökä,
28 'n wa yoo nimï 'yɩbhä,
nɩɩ:
«‑Lii 'wuë ‑n nʋä,
‑ɔ tieami bhä 'wʋ,
‑ɔnyɩ 'nglɩ 'mö ‑n nʋni bhä?»
29 'N Zezwii yuëë 'dɩ 'nyɛ nɩɩ:
«'Kïbhë ‑bhlʋ ‑kpöö 'mö n 'kanyɩɛ 'wʋ 'yɩbhänɩ,
a ‑kaa ‑gömö ‑sɛ 'wëë,
‑ɔ tiaaa,
'n n 'kanyɔ sʋlʋnɩ.
30 N nɛ naa,
Zaa Batisɩ,
‑ɔ tio a bhä 'n ɔ wɔlʋ a bhä nɩkpa 'wlu 'nɩ?
Lagɔ mɔ 'nɩɩ,
‑maa nɩkpɛ bhä ‑a?
A nɩ nyɩaaa ‑ka 'dɩ.»
31 Zezwii gbää sa'aa,
'n wa yiɛ ylɩ 'mö mö,
wa 'kä yi wa 'kɩ ‑gömö ‑sɛ.
Wa lɛ naa:
«A‑a ‑kä nɩɩ Lagɔ mɔɔ tio a‑a nʋʋ,
sɛ'ɛ ɔ 'kää nɩɩ,
zaa,
saa bhä 'n a 'nɔ a bhä dlɩ 'wʋ ‑kä 'nɩ?
32 A‑a ‑kä'ɛ nɩɩ,
nɩkpɛɛ tio a‑a nʋʋ,
nɩkpabhë 'naa ‑kä ‑wa.»
Ɛ'ɛ ‑bhö nyɩasɩ ‑maa,
wa ‑yi sɛ nɩɩ,
Zaa Batisɩ,
Lagɔ a 'möbhïlanɩnyɔɔ ɔ glɩnɩ a‑a ‑tiamö.
Zaa 'n wa yiɛ ‑gu.
33 'N wa yiɛ Zezwii 'dɩ 'nyɛɛ mö nɩɩ:
«Zaa Batisɩ,
‑aaa ‑ɔ kɔ tiee ‑yi.»
Zezwii lɛ:
«‑Aa!
N kɩ 'nʋ.
Zaa,
'naa 'kanyɩ'ɛ na a ‑ɔ tieaaa sʋlʋnɩ.»