Lwiikö 20

‑Ɔ tie bhä Zezwii?

(Matie 21.23‑27; Maakö 11.27‑33)

'Ylɩ ‑bhlʋ 'mö Zezwii ‑wʋ ‑mä Lagɔbudu 'Kɔdʋʋ 'mö nɩkpa Lagɔ 'a 'Mänatɩtɩɩ 'nyɛ dɔ'wʋ,

Zwiiföwa 'a Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ,

Zwiiföwa 'a 'nɛɛnɩwa 'kädɩɩ kökä,

wa 'wuë 'n wa yoo ‑mä ghlɩ.

2 Wa lɛ naa:

«'Saa ‑n ‑wʋä dɛ'ɛ nʋ dɔ'wʋʋ,

‑ɔnyɩ 'nglɩ 'mö ‑n nʋnu bhä?

‑Ɔ tieamö bhä 'nɩ?»

3‑4 Zezwii lɛ naa:

«N kɩ 'nʋ,

‑maa n 'kanyɩ'ɛ na a 'kïbhë ‑bhlʋ 'wʋ 'yɩbhänɩ.

N nɛ naa,

Zaa Batisɩ,

‑ɔ tio a bhä 'n ɔ wɔlʋ a bhä nɩkpa 'wlu 'nɩ?

Lagɔ mɔ 'nɩɩ,

‑maa nɩkpɛ bhä ‑a?

A nɩ nyɩaaa ‑ka 'dɩ.»

5 Ɔ gbää sa'aa,

'n wa yiɛ ylɩ 'mö mö,

wa lɛ naa:

«Sɛ ‑a 'kä bhä gbä 'nɩ?

A‑a ‑kä nɩɩ,

Lagɔ mɔɔ tio a‑a nʋʋ,

sɛ'ɛ ɔ 'kää nɩɩ:

Zaa,

'saa bhä 'n a 'nɔ a bhä dlɩ 'wʋ ‑kä 'nɩ?

6 A‑a ‑kä'ɛ nɩɩ,

nɩkpɛɛ tio a‑a nʋʋ,

nɩkpa 'wuë 'kɩ dlɩ 'wʋ nɩɩ,

Zaa Batisɩ,

Lagɔ a 'möbhïlanɩnyɔɔ ɔ glɩnɩ a‑a zaa,

'kpɩ 'mö wa ‑kanyɩɛ 'lɩbhä.»

7 'N wa yiɛ Zezwii 'dɩ 'nyɛɛ mö.

Wa lɛ naa:

«Zaa Batisɩ,

‑aaa ‑ɔ kɔ a tiee ‑yi.»

8 Zezwii lɛ:

«‑Aa!

N kɩ 'nʋ.

Zaa,

yɩ ‑kä sa'a 'mö ‑wʋʋ,

'naa 'kanyɩ'ɛ na a ‑ɔ tieaaa sʋlʋnɩ.»

Libhonʋwazokuu a ninea

(Matie 21.33‑46; Maakö 12.1‑12)

9 Zezwii 'nyɛɛ sa'a Zwiiföwaa a 'kädɩɩ 'dɩ 'wëë,

'n ɔ yiɛ nɩkpa 'wuë 'nine ‑bhlʋ 'pänɩ,

ɔ lɛ naa:

«Nɩkpɛ ‑bhlʋ mɔɔ glʋä 'likpïï ‑yɩnyɩɩ 'bhï wa bhɛɛ duvɛɛ 'wʋ a 'lagblɛ.

'N ɔ yee libhonʋwa yowʋ 'nyɛ.

'N ɔ yiɛ lɛgä 'mö mö,

ɔ 'kä ‑mä gwälɛ.

10 Ɔ ‑wʋ ‑mä,

‑sɛsɛtɛnyɩɩ ghlɛɛ,

'n ɔ yiɛ ‑mä libhonʋwaa a 'bɛyɩ ɔ 'yliwʋnyɔ ‑bhlʋ tie,

'saa wa ‑sɛɛ,

wa 'kʋ 'ylimö dlinɩ,

wa 'kɔ 'ɔ daa yowʋ 'nyɛ.

Nɩkpɛ 'la 'n ɔ yiɛ ‑mä mö.

‑Maa ɔ ghlɛɛ ‑mä,

'n libhonʋwaa yoo 'wʋ gbulo,

'n wa yoo 'sɛlɩ,

'n wa yoo 'wlu Sɩbha.

Wa 'nɔɔ ‑lu 'nyɛ.

11 'N 'lagblɛlowlii yi'ɛɛ ‑mä ‑mɔmɔɔ tie.

Ɔ ghlɛɛ ‑mä,

'n wa yo'ɛɛ ɔbhlɩ 'lɩbhä,

'n wa yoo ‑di zia,

'n wa yoo 'wlu Sɩbha.

Wa 'nɔɔ'ɛ ‑lu 'nyɛ.

12 'N 'lagblɛlowlii yuëë tanɔ 'wʋ tie.

Ɔ ghlɛɛ ‑mä,

'kukusɛ wa 'lɩbhɔɔ 'n wa yoo zɛ 'wʋ bhïlanɩ 'n wa yoo kpëti.

13 'Lagblɛlowlii 'nwiɛ,

ɔ lɛ naa:

'Ɔ!

Sɛ n 'kä bhäa'a zʋ 'nɩ?

Yɩ ‑kä sa'a 'mö ‑wʋʋ,

'na yuu n ‑waa,

'mö n 'kää ‑mä tie,

'mö wa 'kää ‑kamä 'klʋkpamö zʋ.

14 'N ɔ yoo ‑mä tie.

Ɔ ghlɛɛ ‑mä,

wa 'yoo 'ylɩmöö,

'n wa yiɛ 'dɩ 'nyɛnyɛnɩ,

wa lɛ naa:

A yɩɛ,

‑ɔ 'kää zɩkö ɔ dɩba 'a gugbëa 'wʋ 'libhïï,

mɔɔ da'a.

Zaa,

a‑a nɩ 'lɩbhɔ ɔ 'kä 'ku,

nzɩɩ ‑a 'kä 'lagblɛɛ 'wʋ 'libhï.

15 'N wa yoo 'wʋ gbulo,

'n wa yoo ‑mä 'lagblɛɛ 'mö ‑sɛ,

'n wa yoo 'lɩbhä 'n ɔ yiɛ 'ku.

Zaa,

abhʋa n 'yɩbhää nimï nɩɩ,

'lagblɛlowlii ‑ka yii,

sɛ ɔ 'kä bhä libhonʋwa 'la zʋ 'nɩ?

16 Ɔ ‑kä yii,

‑mä ɔ 'kʋää ghlɩ,

ɔ 'kʋä 'lɩbhä wa 'kä 'ku,

ɔ 'kä 'lagblɛɛ nɩkpa ‑mumuë yowʋ 'nyɛ.»

Zezwii gbää sa'aa,

wa 'wuë wa lɛ naa:

«Wuëbhï,

sa'a a ‑li nɩ tɩ 'kwädlɩ ghlɛ.»

17 'N ɔ yuëë 'wʋ yɩlɩ,

ɔ lɛ naa:

«Wɛlɩkïbhë ‑bhlʋ cɛlɩ ‑mä Lagɔbɔgʋʋ 'mö,

sɛ'ɛ a nʋä nɩɩ:

Kpiyii,

'sɩbhäsɩbhäwaa gbä a‑a ‑ɛɛ nɛnɩɩ,

mɛɛ 'zʋa'aa ‑sɩkaa dɛsɛkäkpiyii.^a

18 Kpiyi 'la,

‑ɔ ‑kɛɛ 'wʋ bhlinɩɩ,

ɔ yi 'ku,

'n ‑mɔ ɛ ‑kä'ɛ 'wʋ bhlinɩɩ,

ɛ yoo 'wʋ 'titli.»

Wɛlɩ 'la,

sɛ yɩ sɛ bhä zɛmö 'nɩ?

Sezaa 'a lapoo

(Matie 22.15‑22; Maakö 12.13‑17)

19 Moyizɩ 'a Gböö a 'cɩawaa ‑nyɛ Lagɔbʋbɔwaa a 'kifiea 'sɔ,

wa ‑yi sɛ nɩɩ,

ninea Zezwii 'pää da'aa,

wa'bhï 'mö a kpɔɔ yɔwʋ zaa,

wa yɩbhä wa 'kɔ ‑gba ‑bhʋlʋ ‑kpɔ 'mö köbhä.

‑Maa nɩkpaa 'mö wa guä zaa,

wa 'nɔɔ köbhä.

20 Zaa,

'yli wa ‑gänɔa'aa.

'N wa yiɛ 'wi 'mö nɩkpa ‑mumuë 'wʋ 'libhï,

'n wa yuëë 'dɩ 'nyɛ nɩɩ:

«Nɩkpɛ 'la a nɩ ghïlo ‑mä.

A ‑kä möä,

a nɩ nʋ ‑lɛ ɔ 'yila 'klʋ Lagɔgänɩwa a ‑li.

A nɩ tɛlɔɔ ngli sɛ,

‑zlɩ ɔ ‑kä ‑gɔmlɩwaa a dɛ wɛlɩzoku bhïlaa,

a ‑nyɩɩ 'kä yi,

‑a 'kɔ ‑gɔmla yɔwʋ kwä wa 'kɔ ‑zijle 'nyɛ.»

21 Nɩkpa 'la,

'n wa yiɛ mö.

Wa ghlɛɛ ‑mä,

wa lɛ naa:

«‑Atʋ,

‑a ‑yi 'kwädlɩ sɛ nɩɩ,

gbëaa ‑n kää ngli.

‑Nn bhïla 'yizʋsɛ.

Nɩkpɛ yi 'kɔdɔ glɩnɩ ‑kë,

‑nn zizanɔɔ wɛlɩ 'yli,

‑maa sɛɛ Lagɔ yɩbhää nɩkpa nɩ nɛmöö,

‑sɩbhä ‑n nyɛɛ nɩkpa 'wuë 'dɩ gbëaa.

22 Zaa,

nyɩanyɩ 'dɩ,

Lagɔ 'a Gböö a dɔ'wʋ,

‑a kä bhä ‑a 'kä 'bhlɩlowli 'kɔdɔ Sezaa kä'mö lapoo 'pɛnɩ,

‑maa ‑a 'naa 'kʋ bhä 'pɛnɩ?»

23 Zezwii yɩbhlɩnɩɛ 'wa ylʋʋ,

ɔ lɛ naa:

24 «A ‑laaa ‑ka fälɛgöyi ‑bhlʋ n 'kɛ 'ylɩmö.»

Wa ‑nyɛɛ yiɛ,

'n ɔ yuëë nimï 'yɩbhä nɩɩ:

«‑Lɛ fälɛgöyii 'klʋ a 'wukpële nɩ ‑a ‑wʋä ‑lɛ,

'n ‑lɛ a nglɩɩ ‑yɩ cɛlɩɛ ‑lɛ,

‑ɔ ‑këlii bhä?»

Wa lɛ naa:

«'Bhlɩlowli 'kɔdɔ Sezaa a ‑liɛ.»

25 Zezwii lɛ naa:

«Miɛ!

Zaa,

‑yɩ glɩnɩɛ Sezaa a ‑lii,

a nɩ 'nyɩ Sezaa yowʋ,

‑yɩ glɩnɩɛ Lagɔ a ‑lii,

a nɩ 'nyɩ Lagɔ yowʋ.»

26 Zezwii 'nyʋää sa'a nɩkpabhë a 'yila 'klʋ 'dɩɩ,

kïbhë a ‑maa 'kɔɔ gbʋ köbhaa,

wa 'naa 'wuë ghlɩ.

‑Maa 'ɔ wɛlɩɩ ngli yɩ yɩʋää,

yɩ 'nuëë gbʋdɩdɛ 'nyɛ.

'Kuduwaa yi bhä glu 'wlʋ ‑a?

(Matie 23.23‑33; Maakö 12.18‑27)

27 ‑Mä Zeluzalɛɛmö,

‑zɩkpa ‑mämaa ‑wʋ a ‑mä.

'Mö wa laa Sadwisɩɛwaa.

Sɛ'ɛ wa 'cɩaa nɩkpa nɩɩ:

Nɩkpɛ ‑kä 'ku 'wë ɔ 'naa 'kä glu 'wlʋ.

Wa gla'mö a ‑mumuë,

'n wa yiɛ ‑mä Zezwii ghlɩ 'n wa yoo nimï 'yɩbhä.

28 Wa lɛ naa:

«‑Atʋ,

‑aa dɩba 'kɔdɔ Moyizɩ lɛ nɩɩ:

Nɩkpɛ ‑kä 'nglɔ ‑kä,

ɔ ‑nyɔɔ 'sɔ,

wa 'nɩ 'yu ghlɩ,

'n nɩkpɛ 'la ‑kä 'kuu,

ɔ ‑daayu kä ɔ 'kä 'kuzlenglɔɔ 'wʋ 'libhï,

ɔ ‑nyɔɔ 'sɔ wa 'kä 'yuë gwälɩ,

ɔ ‑daayu ‑ɔ 'kuä a 'wlumö.^b

29 Zaa,

nyɩbhɛlʋdaayuë ngbi'sɔ mʋa glɩɛ ‑lɛ.

Wa gla'mö a ‑nɔ ‑bhlʋ 'n ɔ yiɛ 'nglɔ kwä,

'n nɩkpɛɛ yiɛ 'ku,

‑maa ɔ'ɔɔ 'yu 'pɩwʋ tɩ.

30‑31 Sɔnanɔɔ ‑nyɛ tananɔɔ 'sɔ 'n wa yo'ɛ wabhlɩ 'wʋ 'libhï,

wa'aa'ɛ 'yu 'pɩwʋ tɩ 'n wa yiɛ 'ku.

‑Muë'la 'wuë,

‑sɩbhä wa ‑nɩɩ ‑wʋmöä.

32 Nglɔɔ a'bhë,

'n ɔ yiɛ ‑mä plɛ 'n ɔ yiɛ 'ku.

33 Zaa,

‑zlɩ 'kuduwaa ‑kä glu 'wlʋʋ,

ɔ yɛ yɩ wa ngbi'sɔ ‑kpɔ a 'nglɔ zʋ 'wë nɩɩ,

‑ɔ 'kɔ bhäa'aa ‑kälɩ?»

34 Zezwii lɛ naa:

«Mä'ä 'pɩwʋ a dɔ'wʋ,

nyɩbhɛlɩ ‑nyɛ 'ngwlɩ 'sɔ,

kwäkwänɩ wa kwäkwänɩɛ.

35 ‑Maa nɩkpaa Lagɔ 'kää zɩla'a glu ‑sɛ wa 'kä 'ɔ 'pɩwʋlelea ghlɩɩ,

‑wa mlɩnɩɛ ‑sɩbhä a ‑gba 'mö,

wa ‑kä ‑mä ghlɛɛ,

wa dɔ'wʋ nglʋkwäkwʋ 'naa 'käa'a ‑bhölɩ.

36 Nɩkpa 'la,

sɛɛ Lagɔ 'kʋää glu ‑sɛ ɔ 'kʋä zɩkpalelea 'nyɛ a za,

Lagɔ a 'yuë wa 'kää glɩnɩ,

wa 'naa 'käa'a 'kwädlɩ 'ku.

Lagɔzuzuku a sɛ wa 'käa'a ‑wʋ.

37 Lagɔ 'kä nɩkpa glu ‑sɛ a wɛlɩɩ,

Moyizɩ a'bhë mɔɔ 'nyanyɩɛ 'dɩ nɩɩ,

‑tiawɛlɩɛ.

‑Zlɩ ɔ 'yɩɛ ‑dɛglaklɔkwaa ‑a ngämɔɔ 'ylɩmöö,

sɛ'ɛ ɔ ‑dɩɛ ‑Alowli Lagɔ 'nglɩ nɩɩ,

Ablaamöa Lagɔ,

Yizaakö a Lagɔ,

Zakɔɔbö a Lagɔ.^c

38 Mɩɩ sɛɛ zɛmö nɩɩ:

Lagɔ 'nɩ ‑bhö 'kuduwa a Lagɔ ‑maa ‑bhölɩbhölɩwa a Lagɔ ɔ glɩnɩɛ.

Nyɩasɛ n'n‑ä ‑sɩbhä gbä ‑maa ɔ dɔ'wʋ wa 'wuë wa ‑bhölɩ.»

39 Zezwii 'nyʋää sa'a 'dɩɩ,

Moyizɩ 'a Gböö a 'cɩawaa a gla'mö a ‑mumuë lɛ naa:

«Nn!

‑Atʋ,

wɛlɩɩ 'wuë mö ‑n bhïlaa da'a.»

40 'Bhöönɩa'a ‑lɛ,

wa'aa'a 'yɩbhä wa 'kɔ 'kïbhë ‑bhlʋ a'bhë 'wʋ 'yɩbhänɩ.

Sɛ'ɛ Zezwii gbää Kliisɩ a dɛ

(Matie 22.41‑46; Maakö 12.35‑37)

41 Zwiiföwaa 'a 'kädɩ 'la,

'n Zezwii yuëɛ'ɛɛ ɔbhlɩ 'kïbhë ‑bhlʋ 'wʋ 'yɩbhänɩ,

ɔ lɛ naa:

«Wa lɛ Kliisɩ,

Puënyɔɔ Lagɔ ‑sɛɛ ‑lɛ,

'bhlɩlowli Daviidɩ a 'yu a 'yu ɔ 'kää glɩnɩ.

'Saa kä bhä 'nglɩ 'n wa nʋ ‑sɩbhä?

42 Daviidɩ a'bhë,

‑mä Lagɔ a 'nglɩghlimanɩlwɩɩ a 'bɔgʋʋ 'mö,

sɛ'ɛ ɔ nʋä nɩɩ:

‑Atʋ Lagɔ mɔɔ 'nyɛɛ na ‑lowli 'dɩ nɩɩ:

Glɩ dɛ'ɛ na luukɛ 'wʋ sɛ,

43 n 'kä ‑na'a ‑gblɩwaa ‑mä ‑na kplɩzɛmö 'zʋ.^d

44 Daviidɩ ‑kä sa'a gbää,

Kliisɩ,

'mö ɔ laa ɔ ‑lowli.

‑Maa Kliisɩ ‑ɔ glɩnɩɛ Daviidɩ a 'yu a 'yuu,

'saa 'kä bhä 'nglɩ ‑kä 'n Daviidɩ a'bhë 'kɔ bhä ɔ ‑lowli la?»

A nɩ tɩ Moyizɩ 'a Gböö a 'cɩawaa a saa 'zʋ

(Matie 23.1‑36; Maakö 12.38‑40)

45 Zezwii gbää sa'a 'wëë,

nɩkpaa 'wuë ‑wa ‑pʋnɔɔ a‑a 'yukwli a 'yila 'klʋ,

'n ɔ yiɛ 'ɔ ‑gänɩwaa 'dɩ 'mö 'zʋ,

ɔ lɛ naa:

46 «A nɩ 'nɛmanɩ anyɩ 'wʋ,

Moyizɩ 'a Gböö a 'cɩawaa a saa,

a tɩa ‑sɩbhä 'zʋmö.

Wa ‑kä 'wa ‑banɩ 'kädɩɩ 'mö päla 'wëë,

'yila wa tɛlɩɛ sɛ,

‑mä 'du mö,

wa yɩbhä nɩɩ,

nɩkpa 'wuë nɩ bhäluë.

'Kädɩɩ ‑kʋä wäzɩ wa ‑nyʋä 'kä 'wʋ linɩɩ,

'bhli a ‑bhlii 'mö wa gbäzɩɛ 'mö.

‑Mä Lagɔbïdii 'mö,

wa ‑kä ‑mä bhibhee möö,

wa yɩbhä wa 'kä'ɛ ‑mä 'yuku ‑wʋ.

47 Wa ‑kä Lagɔ bhibhee,

wa bhibhe ‑këkëkë.

‑Maa ‑tiamö a dɔ'wʋ,

ylʋplɛwa wa glɩnɩɛ,

'n wa sɛɛ 'kuzlengwlɩɩ a ‑lii 'wuë kä'mö.

Lagɔ yuë tenyii ‑zijli tu.»