Zezwii yɛ nɩkpa a 'dwi kʋgbä (4.000) lile 'nyɛ
8
'Tɛnyɩ ‑mɛmɛɛ ‑bhlʋ 'mö,
nɩkpa a 'kɔkɔmlɛ su'ɛ ‑lɛ Zezwii yɔwʋ,
wa'aa lililu ‑kä,
zaa 'n Zezwii yiɛ 'ɔ ‑gänɩwaa wäzɩ,
'n ɔ yuëë 'dɩ 'nyɛ nɩɩ:
2 «Nɩkpa nɩ,
ngäzɩ 'wʋ wa ‑bhööä,
wa 'ylɩ ta dɛ'ɛ na yɔwʋ,
'n wa'aa lililu ‑kä.
3 ‑Mumuë 'yuku wa 'bhöönɩɛ,
wa 'nɩ ‑lu li,
'n n ‑kʋä 'yi 'tatinɩ wa ‑kä wa 'bhili möö,
ngɔmʋ a za,
wa yi 'yio 'wʋ 'kplɛnɩ.»
4 'Ɔ ‑gänɩwaa lɛ naa:
«Miɛ ‑maa,
'klokwëjijo'wʋ ‑a ‑wʋä dɛ'ɛ,
zaa sɛ ‑a 'kä bhä 'zʋ a‑a 'kʋä bhä lile 'nyɛ?»
5 Zezwii lɛ naa:
«A'bhï 'fɔlɔbhï ‑zɩmö a ‑su bhä?»
Wa lɛ naa:
«‑A ‑su 'fɔlɔbhï ngbi'sɔ.»
6 'N ɔ yiɛ nɩkpaa 'wuë 'dɩ 'nyɛ nɩɩ:
«A nɩ glɩ dʋdʋ 'wʋ sɛ.»
'N ɔ yiɛ 'fɔlɔbhï ngbi'sɔ ‑kpɔ 'wʋ 'libhï,
'n ɔ yiɛ yɩ za Lagɔ bhälɩ,
'wë 'n ɔ yiɛ 'mö ‑dɩdɩnɩ,
'n ɔ yiɛ 'ɔ ‑gänɩwaa yowʋ 'nyɛ.
'N wa yiɛ nɩkpaa 'wuë dilanɩ.
7 Wa ‑sumö a 'yɛ zibhïyie.
'N ɔ yiɛ 'nyu 'pä,
'wë 'n ɔ yuënyɩɛ yowʋ 'nyɛ,
'wa kɩ nɩkpaa dilanɩmö.
8 Nɩkpaa 'wuë,
'n wa yiɛ li 'n wa yiɛ lʋ,
'n yɩ yiɛ 'wʋ tʋʋ.
Kïbhïï ‑yɩ tʋʋä 'wʋ wa ‑nyɛɛ möä,
yɩ yie ‑käkö ngbi'sɔ 'wʋ.
9 ‑Wa liɛ lile 'laa,
wa ‑bhli nɩkpa a 'dwi kʋgbä a sɛ (4.000).
Wa liɛ 'wëë,
'n Zezwii yuë 'dɩ 'nyɛ nɩɩ,
wa nɩ mö wa 'bhili.
10 Wa möä 'wëë cuu,
Zezwii ‑nyɛ 'ɔ ‑gänɩwaa 'sɔ,
'n wa yiɛ gɔlʋʋ 'wʋ 'libhï,
bhlɩɩ wa laa Damanutaa,
'n wa yiɛ ‑mä mö.
Falizɩɛwaa lɛ Zezwii nɩ 'pänɩ ‑lɛ wa 'yila 'klʋ zɩzɛ
11 'Ylɩ ‑bhlʋ 'mö,
Falizɩɛwa ‑mumuë mʋa ghlɩɛ ‑mä Zezwii,
wa ‑nyɔɔ 'kä kpɛnɩ,
wa 'kɔ ‑mä 'pä.
Wa lɛ naa:
«Tulanɩnyɩ 'ylimö nɩɩ Lagɔ mɔɔ tiamöä,
'pänɩ dɛ'ɛ ‑aa 'yila 'klʋ zɩzɛ!»
12 Wa gbää sa'aa,
'n Zezwii yiɛ nyɛmʋ slu ɔ lɛ naa:
«'Saa kä bhä 'nglɩ 'n ‑sɩkaa a nɩkpaa yɩbhä bhä wa 'kä zɩzɛli 'ylɩmö 'nɩ?
Abhʋa n nyɛɛ 'dɩ gbëaa,
zɩzɛ ‑bhlʋ a'bhë ‑ɛ 'kanyɩɛ 'ylimö tulanɩ nɩɩ Lagɔ mɔɔ tieaaa,
a 'naa 'kɛ 'ylɩmö.»
13 Ɔ gbää sa'aa 'wëë,
'n ɔ yuëë ‑gömö panɩ,
ɔ ‑nyɛ 'ɔ ‑gänɩwaa 'sɔ 'n wa yiɛ gɔlʋʋ 'wʋ 'libhï 'n wa yiɛ nyuu 'tʋ.
A nɩ 'nɛmanɩ Falizɩɛwaa ‑nyɛ Eloodɩ 'sɔ 'a 'cɩawɛlɩɩ 'wʋ
14 Wa 'kää möä yii,
Zezwii 'a ‑gänɩwaa dlʋ wa dlʋä,
wa'aa 'fɔlɔ pɩa.
'Fɔlɔbhë ‑bhlʋ ‑kpöö 'mö wa ‑suä ‑mä gɔlʋʋ 'mö.
15 'N Zezwii 'yuëë 'dɩ 'mö zʋ,
ɔ lɛ naa:
«Falizɩɛwaa ‑nyɛ Eloodɩ 'sɔ,
a nɩ 'nɛmanɩ 'wa levii 'wʋ.»
16 Zezwii gbää sa'aa,
'ɔ ‑gänɩwaa kpɛnɩ wa kpɛnɩɛ wa 'yize,
sɛɛ wa'aa 'fɔlɔ ‑su a za.
17 Zezwii yɩbhlɩnɩɛ 'wa dlɩpäsaa,
'n ɔ yuëë nimï 'yɩbhä nɩɩ:
«'Saa bhä 'n a kpɛnɩ sɛɛ a'aa 'fɔlɔ ‑su a za 'nɩ?
A'aa ɔ ‑bhlɛ ‑lu 'mö 'nʋ ‑a?
'A dilaa 'mö yɩ 'tuunɩ bhä ‑a?
18 A kä 'yila 'klʋ 'n a'aa sɛ yɩlɩ,
a 'kä 'yukwïla 'wlu 'n a'aa ‑ngö.
A'a ligba bhä ‑a?
19 ‑Zlɩ n ‑dɩdɩnɩɛ 'fɔlɔbhï ngbï 'mö,
'n nɩkpa a 'dwi kʋgbä'sɔ nɩkpa a gwlɩ kʋgbä (5.000) yi a‑a lii,
‑käkö ‑yɩ yie 'fɔlɔkïbhï ‑yɩ tʋʋä 'wʋ a ‑nyɛɛ möä,
‑zɩmö yɩ ‑bhli a bhä 'nɩ?»
Wa lɛ:
«‑Käkö kʋgbä'sɔ.»
20 Ɔ lɛ naa:
«'N ‑zlɩ n ‑dɩdɩnɩ'ɛ 'fɔlɔbhï ngbi'sɔ 'mö 'n nɩkpa a 'dwi kʋgbä (4.000) yi a‑a lii,
'fɔlɔkïbhï wa sɩɛnɩɛ,
‑käkö ‑zɩmö yɩ ‑bhli a bhä'ɛ?»
Wa lɛ:
«‑Käkö ngbi'sɔ.»
21 Ɔ lɛ:
«Zaa,
a'aa bhä ‑bhlɛ da'a ‑lu 'mö 'nʋ 'yize ‑a?»
Zezwii yɛ 'kukwlekänyɔ yɛmanɩ
22 Zezwii ‑nyɛ 'ɔ ‑gänɩwaa 'sɔ wa ghlɛɛ ‑mä Bɛtɩsayidaa,
'n wa yoo 'kukwlekänyɔ ‑bhlʋ ‑lɛ,
'n wa yoo yɔwʋ bhibhe ɔ 'kɔ kɛ zɩ.
23 'N Zezwii yiɛ nɩkpɛɛ sɔ köbhänɩ,
'n ɔ ‑nyɔɔ yiɛ ‑mä glɔ 'mö 'wlʋ,
'n ɔ yoo ‑dɛlɛ 'ylimö 'daa,
'n ɔ yoo kätɩkpö 'yila 'klʋ zʋ.
'N ɔ yoo nimï 'yɩbhä nɩɩ:
«‑N yɩlɩ bhä ‑lu 'wʋ ‑a?»
24 Ɔ lɩa yilaa,
ɔ lɛ naa:
«N yɩlɩ nɩkpa 'wʋ,
wa ‑bhɩɛ swi,
'n wa nɛmöä.»
25 'N Zezwii yo'ɛɛ kätɩkpö 'yila 'klʋ zʋ.
Nɩkpɛɛ lɛ lɩa'a yilaa,
yɩ yɛ do,
yɩ lɩ sasɛ.
26 'N Zezwii yoo 'dɩ 'nyɛ nɩɩ:
«Mö 'ligbë 'mö,
‑maa tɩa'a ‑mä glɔ 'mö plɛ.»
Piɛlɩ lɛ Puënyɔɔ Lagɔ ‑sɛɛ ‑lɛ 'mö Zezwii glɩnɩɛ
27 Zezwii ‑nyɛ 'ɔ ‑gänɩwaa 'sɔ,
‑glɔɔ wa laa Filipö a Sezalee,
wʋ ‑kʋkʋyɔwʋ a ‑gwlɩɩ 'mö 'n wa yiɛ ‑mä mö.
Wa ‑wʋ mö dɔ'wʋ,
'n ɔ yuëë nimï 'yɩbhä nɩɩ:
«Nɩkpaa lɛ ‑mɔ n glɩnɩ bhä?»
28 Wa lɛ naa:
«‑Mumuë lɛ Zaa Batisɩ mö ‑n glɩnɩɛ.
‑Mumuë lɛ Elii mö ‑n glɩnɩɛ.
‑Mumuë lɛ Lagɔ 'a 'möbhïlanɩwaa a gla'mö ‑bhlʋ ‑n glɩnɩɛ.»
29 'N Zezwii yuëë nimï yɩbhä nɩɩ:
«Abhʋa abhlɩ,
a dɔ'wʋ,
‑mɔ n glɩnɩ bhä?»
'N Piɛlɩ yiɛ gbʋ ‑dɩ,
ɔ lɛ naa:
«Kliisɩ,
Puënyɔɔ Lagɔ ‑sɛɛ ‑lɛ,
mö ‑n glɩnɩɛ.»
30 'N Zezwii yuëë yɔwʋkanɩsɛ 'dɩ 'nyɛ nɩɩ:
«A nɩ tɩa 'saa n glɩnɩɛ a 'dɩ ‑bɛ 'nyɛ.»
Zezwii yɛ 'ɔ 'kwiea ‑nyɛ 'ɔ gluwlʋwlɛɛ 'sɔ a dɛ bhïla
31 Ɔ gbää sa'a 'wëë 'n ɔ yuëë 'dɩ 'nyɛ nɩɩ,
Nɩkpɛ a 'Yu,
ɔ yi 'zwɩ a ‑bɛ zi.
Zwiiföwaa 'a 'nɛɛnɩwa 'kädɩɩ muë,
'wa Lagɔbʋbɔwaa a 'kifiea muë,
'n Moyizɩ 'a Gböö a 'cɩawaa,
wa 'wuë,
wa yo nimï ‑sɛ.
Wa yo 'lɩbhä ɔ yi 'ku.
‑Maa 'ylɩ ta ‑kä 'plɩ ɔ yi glu 'wlʋ.
32 Ɔ 'nyʋä ‑sɩbhä gbëaa 'dɩɩ,
'n Piɛlɩ ‑nyɔɔ yiɛ zigbanɩ,
'n ɔ yoo 'lʋnɩ.
33 'N Zezwii yoo ‑gömö panɩ,
'n ɔ yiɛ 'ɔ ‑gänɩwaa 'yi gö,
'n ɔ yiɛ Piɛlɩ 'lʋnɩ.
Ɔ lɛ naa:
«Sataa,
'dionɩɩ gwë!
‑Nn 'pä Lagɔsɛ dlɩ,
nɩkpɛsɛ ‑n pää dlɩ.»
Sɛ ‑a kää ‑a 'kä Zezwii ‑gänɩɩ
34 'N Zezwii yiɛ nɩkpaa a ‑bʋbʋʋ ‑nyɛ 'ɔ ‑gänɩwaa 'sɔ wäzɩ,
'n ɔ yuëë 'dɩ 'nyɛ ɔ lɛ naa:
«‑Ɔ ‑kä ɔ ‑kaa ‑gänɩ nʋʋ,
ɔ nɩ ‑sɛ ɔnyɩ dlɩ.
Ɔ nɩ ‑su 'ɔ 'klʋkʋnɩsuu ɔ ‑kaa ‑gänɩ.
35 ‑Ɔ ‑kä ɔnyɩ 'wʋ gwɩ ɔ 'käa 'pʋ a za‑a,
mɔɔ 'kää 'yli bhɩɛ,
‑maa ‑ɔ ‑kä ɔnyɩ dlɩ ‑sɛ na za 'n Lagɔ 'a 'Mänatɩtɩ a za‑a,
mɔɔ 'kää 'pʋ.
36 Nɩkpɛ 'kä mä'ä 'pɩwʋ a ‑lii 'wuë ghlɩ a za,
'n ɔ ‑kä 'wʋ nglu ɔ 'kä 'ɔ 'pɩwʋ tɩɩ,
yɩ'ɩɛ ɔ ‑li a ‑li 'mö ‑kä.
37 'Saa nɩkpɛ 'kää 'wäla ɔ 'kä 'ɔ 'pɩwʋʋ zetii,
wʋ'ʋä'ɛ ‑bhölɩ.
38 ‑Sɩkaa a nɩkpaa ‑waa 'zʋä Lagɔ 'klʋkpamö,
‑wa panɔɔ ‑gömöö,
wa jijo'wʋ ‑mä a ‑wʋä.
A gla'mö a nɩkpɛ ‑mɔ n ‑kä zʋ 'wʋ ‑bhö,
'n ‑mɔ 'na wɛlɩɩ ‑kä zʋ 'wʋ ‑bhöö,
Nɩkpɛ a 'Yu,
‑zlɩ ɔ ‑kä ‑mä ɔ dɩba 'a 'ghïlinɔɔ 'mö yinɩ ɔ ‑nyɛ Lagɔzuzukuu 'sɔɔ,
nɩkpɛ 'la yo'ɛ ɔbhlɩ zʋ 'wʋ ‑bhömö.»