Nɩkpaa a 'päpägböö
15
'Ylɩ ‑bhlʋ 'mö,
Falizɩɛwa ‑mumuë ‑nyɛ Moyizɩ 'a Gböö a 'cɩawa ‑mumuë 'sɔ,
wa 'bhöönɩ Zeluzalɛɛmö,
'n wa yiɛ ‑mä Zezwii ghlɩ,
wa 'kɔ nimï 'yɩbhä,
wa lɛ naa:
2 «Sɛ yɩ ‑wʋ ɔ 'mö 'n ‑na'a ‑gänɩwaa 'nɩ 'zʋ bhä ‑aa dɩbawa a dɩbawaa a gböö 'klʋkpamö?
Ɛ'ɛ ‑bhö nyɩasɛ,
‑maa wa ‑kä wa 'kä lii,
sɛɛ gböö gbää wa nɩ wɔlʋ kɛɛ,
wa'a wɔlʋ ‑sɩbhä kɛ.»
3 Zezwii lɛ naa:
«Abhʋa a 'naa,
sɛ yɩ ‑wʋ ɔ 'mö 'n a zʋ bhä anyɩ 'a 'päpägböö 'klʋkpamö,
'n a sɛ bhä Lagɔ 'a Gböö 'klʋkpamö nɩ?
4 Ɛ'ɛ ‑bhö nyɩasɛ,
‑maa Lagɔ lɛ naa:
'Zʋ ‑na dɩba ‑nyɛ ‑na ‑da 'sɔ 'klʋkpamö.a
Sɛ'ɛ ɔ gbä'ɛ nɩɩ:
‑Ɔ ‑kä ɔ dɩba ‑nyɛ ɔ ‑da 'sɔ a gla'mö a ‑nɔ ‑bhlʋ a dɛ wɛlɩzoku bhïlaa,
wa kä wa 'kɔ 'lɩbhä ɔ 'kä 'ku.b
5 ‑Maa abhʋa abhlɩ,
sɛ'ɛ a 'cɩaa nɩkpa nɩɩ,
‑na dɩba ‑nyɛ ‑na ‑da 'sɔ,
n‑n ‑kä wa gla'mö a ‑nɔ ‑bhlʋ 'dɩ 'nyɛ nɩɩ,
'saa n ‑kamö a‑a 'nyɛ n ‑kamö 'wʋ yii,
Lagɔ 'mö n 'kʋa'aa 'nyɛ,
6 zaa n‑n 'nɔa'a ‑lu 'nyɛɛ,
yɩ nɛnɩ.
Sa'a ‑sɩbhä a sɛɛ Lagɔ 'a wɛlɩɩ sɛ 'n a zʋä anyɩgäsɛ 'a 'päpägböö 'klʋkpamö.
7 'Kwlɩsɔkäwanyɩ,
Lagɔ a 'möbhïlanɩnyɔ Ezayii,
a dɛ ɔ bhïla a‑a nɩɩ:
8 Lagɔ lɛ naa:
Nɩkpa nɩ,
gla 'klʋ wa 'ghlimanɩɛ na 'nglɩ,
‑maa wa dila ‑nɩɩɛ 'wʋ ‑wʋ.
9 Zaa,
wa ‑yii bʋbɔ ‑kë,
yɩ'ɩɛ dɛsɛ ‑kä.
Wa ‑kä 'cɩaa,
nɩkpa a 'päpägböö 'mö wa 'cɩaa.c»
‑Lii ‑yɩ plaa nɩkpɛ fɩ Lagɔ a 'yila 'klʋ a dɔ'wʋʋ
10 Zezwii 'nyɛɛ ‑sɩbhä Falizɩɛwaa 'dɩ 'wëë,
'n ɔ yiɛ nɩkpabhë wäzɩ,
ɔ 'kʋä 'dɩ 'nyɛmö.
Ɔ lɛ naa:
«A ‑pʋnɩ 'yukwli a 'kä sasɛ 'nʋ.
N nɛ naa:
11 'Saa nɩkpɛ liɛ,
mɩɩ 'nɔɔ fɩ päla Lagɔ a 'yila 'klʋ a dɔ'wʋ.
‑Maa ‑lii ‑yɩ ghlɛnɔɔ nglii,
mɩɩ plɔɔ fɩ.»
12 Zezwii gbää sa'aa,
'n 'ɔ ‑gänɩwaa yoo yɔwʋ 'dio,
wa lɛ naa:
«Wɛlɩɩ ‑n bhïlaa da'a Falizɩɛwaa a dɛɛ,
‑n ‑yi bhä sɛ yɩ këluë yɔwʋ ‑a?»
13 Ɔ lɛ naa:
«Na dɩba Lagɔ ‑ɔ ‑wʋ ‑mä ghäyɩ 'wʋ,
'saa ɔ'ɔɔ glʋʋ,
glu wʋ 'kää 'bhöö.
14 Zaa,
nɩkpa 'la a nɩ 'tatinuë 'yi.
‑Maa wa 'kä bhɩɛ 'kukwlekäwa a ‑muë yɩbhä'ɛ wa 'kä wa 'bhɩakukwlekäwa ‑su.
A ‑yi sɛ nɩɩ,
'kukwlekänyɔ ‑kä ɔ 'likukwlekänyɔ ‑suu,
wa 'sɔ ‑kpɔ,
'bhʋkwa 'mö wa 'kää bhlinɩ.»
15 'N Piɛlɩ yiɛ gbʋ ‑dɩ,
ɔ lɛ naa:
«Ninea ‑n 'pää ‑sɩkaa,
‑sɛnɩnya zɛmö.»
16 Ɔ lɛ naa:
«Abhʋa'ɛ abhlɩ,
a'a bhä 'nɛɛnɔ ‑kä zaa a 'naa bhä 'mö 'nʋ ‑a?
17 A'a bhä sɛ ‑yi nɩɩ,
lilea 'wuë nɩkpɛ liɛ,
a'a mɔ dlɩ zɛmö,
‑maa 'mlɩ a gïloo sɛ 'wë 'n ɔ kwaa bhäla 'kwlɛ yɔwʋ.
18 ‑Maa 'saa ghlɛnɩɛ nɩkpɛ nglii,
‑mä ɔ dlɩ zɛmö,
‑mä yɩ 'bhöönɩɛ.
Zaa,
mɩɩ bhɛnɩɛ yɩ 'kɔ fɩ päla.
19 Ɛ'ɛ ‑bhö nyɩasɛ,
‑maa ‑mä nɩkpɛ a dlɩ zɛmö ‑mä dlɩpäsɛzokwëa 'bhöönɩɛ,
ma‑a kää 'nglɩ 'n ɔ nʋä 'nyinyloli a kii 'wuë.
Ma‑a kää 'nglɩ,
'n ɔ lɩbhää 'ku,
'n nyɩbhɛlʋ tɛlɩɛ 'ngwlɩ sɛ,
'n 'nglɔ tɛlɩɛ nyɩbhɛlɩ sɛ.
Ma‑a kää 'nglɩ 'n nɩkpɛ ghliɛ ɔ 'bhɩa a ‑li 'wi.
'N ɔ 'libhïnɩɛ ɔ 'bhɩa widɩ 'wʋ,
'n ɔ nyimaa ɔ 'bhɩa a 'nglɩ.
20 ‑Lizoku 'la 'wuë,
mɩɩ plaa nɩkpɛ fɩ Lagɔ a 'yila 'klʋ a dɔ'wʋ.
‑Maa wa ‑kä wa 'kä li,
sɛɛ gböö gbää wa nɩ wɔlʋ kɛ,
n‑n nɩ ‑sɩbhä kɛ wɔlʋʋ,
mɩɩ naa ‑kamö fɩ päla.»
Lɛganglɔɔ ‑ɔ 'tɛɛnɩɛ Zezwii dlɩɩ
21 Zezwii 'nyʋää sa'a 'dɩ 'wëë,
'n ɔ yiɛ 'wʋ ‑sɔ.
‑Gwlɩɩ wa laa Tiilɩ 'n Sidɔɔ,
yɩ yɔwʋ a bhlɩɩ 'mö 'n ɔ yiɛ ‑mä mö.
22 Ɔ ghlɛɛ ‑mä,
‑mä a 'nglɔ ‑bhlʋ,
mɔɔ yiɛ 'n ɔ yoo 'mö 'winɩ,
ɔ lɛ naa:
«‑Atʋ,
Daviidɩ a 'yu a 'yu,
na nglʋyuu,
ɔ'ɔɔ tenyii ‑yɛ.
Zuzukwëzokwë ɔ 'kää ‑gömö ma‑a zio tenyii 'zwɩ.
Zaa,
n bhiamö,
'pä na ngäzɩdlɩ ‑n 'kɔ puë.»
23 Nglɔɔ gbää sa'aa,
Zezwii 'nɔɔ ngli pälɩ 'lɩlɩlɩ.
Sa'a ‑këë,
'n 'ɔ ‑gänɩwaa yoo 'dɩ 'nyɛ,
wa lɛ naa:
«‑Atʋ,
'nyɛ nglɔɔ 'dɩ ɔ 'käa yɩ mö ‑maa zaa,
yɩɛ sɛ ɔ 'kpanɩnyɩɛ sa'a nimï 'möö.»
24 ‑Maa Zezwii lɛ naa:
«Yizlaɛlɩ 'a ngëyii Lagɔ ‑sɛɛ ‑lɛ 'mö a ‑nʋa ‑wa ‑bhɩɛɛ wïlaa yɛ tʋʋ,
wa 'yize 'mö Lagɔ tieaaa 'wʋ.»
25 Ɔ gbää sa'aa,
'n nglɔɔ yiɛ ‑lɛ ɔ dlɩ 'mö ‑kokomïladigbï glu 'pä,
ɔ lɛ naa:
«‑Atʋ yiii 'wʋ!»
26 Zezwii lɛ naa:
«Wa ‑kä yuëa a lilea 'wʋ 'libhï wa ‑kaa gʋʋ 'nyɛɛ,
yɩ'ɩɛ nɛnɩ.»
27 Nglɔɔ lɛ naa:
«‑Atʋ,
‑na wɛlɩ nɛnɩ,
‑maa ‑sɩbhä yɩ ‑wʋ 'mö,
gʋʋ ‑yɩ ‑wʋä ‑mä 'tebhlea zɛmöö,
yɩ ‑lowluwa ‑kä li a lilea ‑a bhliɛ,
'mö yɩ liɛ.»
28 Zezwii lɛ naa:
«'Ɔ!
'Nglɔ,
'nyɩɛ ‑n 'tɛɛnɩ Lagɔ dlɩ.
‑Sɩbhä a za,
'saa ‑n 'yɩbhää,
Lagɔ ‑yimu 'nyɛ.»
‑Lɛ a 'tɛnyɩ 'la ‑bhʋlʋ ‑kpɔ 'mö,
'n nglɔɔ a yuu yiɛ yɛmanɩ.
Zezwii yɛ guzuwa a ‑bɛ yɛmanɩ
29 Zezwii 'bhööä da'aa,
Galilee‑bhölɩɩ 'mö a 'nyu 'kɔdʋʋ yɔwʋ,
'n ɔ yiɛ ‑mä mö.
‑Mä a ‑gäga ‑bhlʋ 'wlu,
'n ɔ yiɛ ‑mä sɛ glɩɛ mö.
30 'N nɩkpa 'kɔkɔmlɛ yoo yinɩ.
Wa ‑su guzuwa a ‑bɛ:
'Wʋbhlinɩwa plɛ,
'kukwlekäwa plɛ,
nɩmɛnɛkäwa plɛ,
‑ɔɔwɛlɩkäwa plɛ,
'n guzuwa ‑mumuë a ‑bɛ kökä.
Wa 'wuë 'n wa yuëë ‑lɛ Zezwii a dlɩ 'mö ‑lɛ,
'n ɔ yuëë ‑sɩbhä yɛmanɩ.
31 ‑Waa a‑a wɛlɩ ‑kä,
'n 'wa wɛlɩɩ yiɛ do,
nɩmänɛkäwaa 'n wa yiɛ yɛmanɩ.
‑Wa bhlinɩ a‑a 'wʋʋ,
'n wa yiɛ nɛmö,
'kukwlekäwaa 'n wa yilaa yiɛ do.
Nɩkpaa 'wuë 'yɩɛ ‑sɩbhä 'ylɩmöö,
'n zuzu yuëë ‑gömö 'bhöö 'n wa yiɛ Yizlaɛlɩ a Lagɔ a 'nglɩ 'ghlimanɩ.
Zezwii yɛ nɩkpa a 'dwi 'sɔ (4.000) lile 'nyɛ
32 'N Zezwii yiɛ 'ɔ ‑gänɩwaa wäzɩ,
ɔ lɛ naa:
«Nɩkpa nɩ,
ngäzɩ 'wʋ wa ‑bhööä,
sɛ wa ‑kaa dɛ'ɛ 'ylɩ ta yɔwʋ ‑sɛ,
'n wa'aa lililu ‑kä a za.
Wa 'nɩ ‑lu li,
'n wa ‑kä wa 'bhili möö,
'yio 'wʋ wa yiɛ 'kplɛnɩɛ ngɔmʋ a za.
Zaa,
a‑a 'nuë lile 'nyɛ 'wëë,
'naa 'kʋä 'yi 'tatinɩ wa 'kä mö.»
33 Wa lɛ naa:
«Miɛ abhlɩ,
‑maa 'klokwëjijo'wʋ ‑a ‑wʋä dɛ'ɛ,
dɛ ‑a 'kä bhä nɩkpa a ‑bʋbʋ nɩ a lile ghlɩ?»
34 Ɔ lɛ naa:
«Yɩ ‑gä kɛ,
‑maa a'bhï,
'fɔlɔbhï ‑zɩmö a ‑su bhä?»
Wa lɛ naa:
«‑A ‑su 'fɔlɔbhï ngbi'sɔ 'n zibhïyie 'yɛ.»
35 Wa gbää sa'aa,
'n ɔ yiɛ nɩkpaa 'wuë 'dɩ 'nyɛ nɩɩ:
«A nɩ glɩ dʋdʋ 'wʋ sɛ.»
36 Wa glɩɛ sɛ 'wëë,
'fɔlɔbhï ngbi'sɔ ‑kpɔ ‑nyɛ zibhïï 'sɔ,
'n ɔ yiɛ 'wʋ 'libhï,
'n ɔ yiɛ yɩ za Lagɔ bhälɩ,
'wë,
'n ɔ yiɛ 'mö ‑dɩdɩnɩ,
'n ɔ yiɛ 'ɔ ‑gänɩwaa yowʋ 'nyɛ 'n wa yiɛ nɩkpaa 'wuë dilanɩ.
37 Nɩkpaa 'wuë,
'n wa yiɛ li 'n wa yiɛ lʋ,
'n yɩ yiɛ 'wʋ tʋʋ.
'Fɔlɔkïbhï ‑nyɛ zibhï 'sɔ ‑yɩ tʋʋä 'wʋʋ,
'ɔ ‑gänɩwaa 'libhiɛ,
yɩ yie ‑käkö ngbi'sɔ 'wʋ.
38 ‑Maa ‑wa liɛ ‑lɛ a lile 'laa,
wa ‑bhli nɩkpa a 'dwi kʋgbä (4.000).
Ngwlɩɩ ‑nyɛ yuëa 'sɔ,
'mö wa 'nɩɛ zɛlɩmö.
39 Zezwii 'nyʋää lile 'wëë,
'n ɔ yuëa'aa wa 'wuë 'yi 'tatinɩ 'n wa yiɛ mö.
Wa möä 'wëë,
'n ɔ yiɛ 'gɔlʋ 'wʋ 'libhï,
bhlɩɩ wa laa Magadaa 'n ɔ yiɛ ‑mä mö.