Maakö 7

Sɛ'ɛ Zezwii gbää nɩkpa a 'päpägböö a dɛ

(Matie 15.1‑9)

Falizɩɛwaa ‑nyɛ Moyizɩ 'a Gböö a 'cɩawaa ‑mumuë 'sɔ,

wa 'bhöönɩ Zeluzalɛɛmö,

'n wa yiɛ ‑lɛ Zezwii yɔwʋ yi.

2 'N wa yiɛ 'ɔ ‑gänɩwaa ‑mumuë 'ylɩmö,

wa 'kää lie yii,

'wa kätɩkpöö ‑plɛ fɩ 'n wa yiɛ li.

Miɛ nɩɩ,

wa'aa kɛ wɔlʋ.

3 Falizɩɛwaa ‑nyɛ Zwiiföwaa ‑muë'la 'sɔ,

wa dɩbawa a dɩbawa 'a gböö 'mö wa zʋä 'klʋkpamö,

zaa sɛɛ gböö gbää wa 'nɩ wɔlʋ kɛ,

wa 'nɩ ‑sɩbhä kɛ wɔlʋ 'wëë,

wa'a li.

4 Wa ‑kä'ɛ 'du 'mö 'bhöö,

sɛɛ gböö gbää wa nɩ bido wa 'käa 'wlɩlɩ plɛɛ,

wa 'nɩ ‑sɩbhä bido 'wëë,

wa'a li.

Wa kä'ɛ ‑sɩbhä a gbö ‑mimii,

mɩɩ glɩnɩɛ 'kɔpɩ ‑nyɛ ‑lakï 'sɔ 'n leyidi a 'möwɔlʋwlɛ.

5 Nza Falizɩɛwaa ‑nyɛ gböö a 'cɩawaa 'sɔ 'yɩbhää Zezwii nimï nɩɩ:

«Sɛ yɩ ‑wʋ ɔ 'mö,

'n ‑na'a ‑gänɩwaa 'nɩ zʋ bhä ‑aa dɩbawa a dɩbawaa 'a gböö 'klʋkpamö?

Miɛ nɩɩ,

sɛɛ gböö gbää wa nɩ wɔlʋ kɛ 'wë wa 'kä lii wa'aa wɔlʋ ‑sɩbhä kɛ.»

6 'N Zezwii yuëë 'dɩ 'nyɛ nɩɩ:

«'Kwlɩsɔkäwanyɩ,

‑tiamö Ezayii 'cɛlɩ a‑a a dɛ nɩɩ:

Nɩkpa nɩ,

gla 'klʋ wa 'ghlimanɩɛ na 'nglɩ,

wa dila ‑nɩɩɛ 'wʋ ‑wʋ.

7 Zaa,

wa ‑yii bʋbɔ ‑kë,

yɩ'ɩɛ dɛsɛ ‑kä.

Wa ‑kä 'cɩa,

nɩkpaa a 'päpägböö 'mö wa 'cɩaa.^a

8 Lagɔ 'a Gböö 'mö a panɩɛ ‑gömö 'n a zʋä nɩkpaa a 'päpägböö 'klʋkpamö.»

9 'N ɔ yiɛ nɩɩ:

«Ɛ ‑kä Lagɔ 'a Gböö a 'klʋkpamösɛ dɔ'wʋʋ,

'n a 'puloo.

'Mö a sɛɛ ‑tiamö nimï 'n a zʋa a dɩbawa 'a gböö 'klʋkpamö.»

10 Sɛ'ɛ Moyizɩ gbä a‑a nɩɩ:

'Zʋ ‑na dɩba ‑nyɛ ‑na ‑da 'sɔ 'klʋkpamö.

'N ɔ yi'ɛɛ nɩɩ:

‑Ɔ ‑kä ɔ dɩba ‑nyɛ ɔ ‑da 'sɔ a gla'mö a ‑nɔ ‑bhlʋ a dɛ wɛlɩzoku bhïlaa,

wa kä wa 'kɔ 'lɩbhä ɔ 'kä 'ku.^b

11 ‑Maa abhʋa abhlɩ,

sɛ'ɛ a 'cɩaa nɩkpa nɩɩ:

Nɩkpɛ ‑kä ɔ dɩba,

ɛ ‑kä'ɛ ɔ ‑da mɔ,

ɔ ‑kɔɔ 'dɩ 'nyɛ nɩɩ,

'saa n gbä a‑a n ‑kamö 'nyɛɛ,

Lagɔ 'mö n 'kʋä 'nyɛ.

12 ‑Sɩbhä a za 'n ɔ 'nɔa'a ‑lu 'nyɛɛ,

a lɛ yɩ nɛnɩ.

13 Sa'a ‑sɩbhä a sɛɛ Lagɔwɛlɩɩ sɛ,

a dɩbawa 'a dɩbawa 'a 'päpägböö a 'cɩacɩanɩɛ a za.

Sa'a a ‑lii a ‑sɛɛ 'wlumöö,

‑zu yɩ ‑zuä.

‑Lii ‑yɩ plaa nɩkpɛ fɩɩ Lagɔ a 'yila 'klʋ a dɔ'wʋʋ

(Matie 15.10‑20)

14 Zezwii 'nyɛɛ ‑sɩbhä Falizɩɛwaa 'dɩ 'wëë,

'n ɔ yiɛ ‑bʋbʋ wäzɩ 'n ɔ yuä 'dɩ 'nyɛ.

Ɔ lɛ naa:

«A 'wuë,

a nɩ ‑pʋnɩ 'yukwli,

a nɩ 'nʋɛ 'mö nɩɩ,

15 'saa nɩkpɛ liɛ mɩɩ 'nɔɔ fɩ päla Lagɔ a 'yila 'klʋ a dɔ'wʋ.

‑Maa ‑lii ‑yɩ 'bhöönɩɛ ‑mä ɔ dlɩ zɛmö mɩɩ plɔɔ fɩ.» [

16 ‑Ɔ ‑kä 'yukwïla 'wlu ‑kä ɔ 'kä 'nʋ a za‑a,

ɔ nɩ 'nʋ.]

17 Zezwii 'bhööä ‑bʋbʋʋ yɔwʋ,

ɔ plɛɛ ‑mä ‑budu 'möö,

'n 'ɔ ‑gänɩwaa yoo 'nine 'la 'wʋ 'yɩbhänɩ.

18 'N ɔ yuëë 'dɩ 'nyɛ nɩɩ:

«Ɛ kä ‑bhɩɛ sɛɛ ‑muë'la 'nɩɛ 'nɛɛnɔ ‑kä ‑sɩbhä a ‑wʋmö.

A'a bhä sɛ ‑yi nɩɩ lilea nɩkpɛ liɛ,

a'aa bhɛnɩ a 'kɔ fɩ päla Lagɔ a 'yila 'klʋ a dɔ'wʋ.

19 Lilea nɩkpɛ liɛ,

a 'nɔɔ dlɩ zɛmö mö,

‑maa 'mlɩ a gïloo sɛ 'wë 'n ɔ kwaa bhäla 'kwlɛ yɔwʋ.»

Wɛlɩɩ Zezwii bhïlaa da'aa,

mɩɩ sɛɛ zɛmö nɩɩ,

nɩkpɛ bhɛnɩ ɔ 'kä lilea 'wuë li.

20 'N Zezwii yi'ɛɛ nɩɩ:

«'Saa 'bhöönɩɛ nɩkpɛ dlɩ zɛmö,

mɩɩ bhɛnɩɛ yɩ 'kɔ fɩ päla Lagɔ a 'yila 'klʋ a dɔ'wʋ.

21 ‑Mä nɩkpɛ 'mö,

‑mä ɔ dlɩ zɛmö,

‑mä dlɩpäsɛzokwëa,

bidibidi a nɛmönɛmɛ,

'wighlighle 'n 'kulɩbhälɩbhʋ 'bhöönɩɛ,

22 nglʋsɛtɩlɩtɛlɛ,

nyɩbhɛlɩsɛtɩlɩtɛlɛ,

gugwagugu,

'kpʋkpʋpäpʋ,

nɩkpa a 'nglɩnyimanyimu,

bhabhʋ,

nɩkpa a ylʋnʋnwɛ 'n ‑ɔɔ'nɛɛnʋʋ,

23 ‑lizoku 'la 'wuë,

‑mä nɩkpɛ anyɩgäsɛ a dlɩ zɛmö ‑mä yɩ 'bhöönɩɛ,

mɩɩ plɔɔ fɩ Lagɔ a 'yila 'klʋ a dɔ'wʋ.»

Lɛgänglɔɔ ‑ɔ 'tɛɛnɩɛ Zezwii dlɩɩ

(Matie 15.21‑28)

24 Zezwii 'bhööä ‑lɛ,

'n ɔ yiɛ ‑mä Tiilɩ‑bhölɩɩ 'mö mö,

'n ɔ yiɛ ‑budu ‑bhlʋ 'mö plɛ.

Ɔ yɩbhä a nɩɩ,

nɩkpɛ nɩ tɩ sɛ ɔ yɛ yiɛ ‑yi.

‑Maa ‑sɩbhä yɩ ‑wʋ 'mö,

'n nɩkpa yiɛ sɛ yɩbhlɩmanɩ.

25 'Nglɔ ‑bhlʋ,

'ɔ nglʋyuu mɔɔ kää zuzukwëzokwë ‑gömö,

ɔ 'nʋä Zezwii a yiyitɩtɩ cuu,

'n ɔ yoo ‑mä ghlɩ,

'n ɔ yiɛ ‑lɛ ɔ dlɩ 'mö ‑kokomïladigbï glu 'pä.

26 'N ɔ yoo yɔwʋ bhibhe ɔ 'kä ɔ nglʋyuu zuzukwëzokwëa ‑gömö kpëti.

Nglɔ 'la,

‑mä Silii‑bhölɩɩ 'mö a glɔ ‑bhlʋ wa laa Fenisii,

‑mä a Glɛkönglɔɔ.

27 'N Zezwii yoo 'dɩ 'nyɛ nɩɩ:

«'Tatinɩ Yuëa 'yi wa 'kä li wa 'kää lʋ 'wë.

Ɛ'ɛ ‑bhö nyɩasɛ,

‑maa wa 'nɩ ‑bhlɛ lʋʋ,

wa'a ‑sʋä lilea dlɩ 'mö wa 'ka gʋ 'yli 'pä.»

28 Zezwii gbää sa'aa,

nglɔɔ lɛ naa:

«‑Atʋ,

miɛ ‑tiamö,

‑maa yuëa ‑kä li a lilea ‑a bhliɛ,

'mö gʋʋ liɛ.»

29 'N Zezwii yoo 'dɩ 'nyɛ nɩɩ:

«Sɛ ‑n gbää da'a a za,

mö 'ligbë 'mö,

‑maa ‑na'a yuu zuzukwëzokwëa kɔ ‑gömö 'bhöö.»

30 'N nglɔɔ yiɛ 'ligbë 'mö mö.

Ɔ lɛ 'bhöö 'lɛ yuu pö ‑lɛ ‑bhɛlɛɛ 'klʋ,

zuzukwëzokwëa kɔ ‑gömö 'bhöö.

Zezwii yɛ nɩkpɛɛ ‑ɔɔɔ ‑ngö ‑ɔɔ bhïlaa yɛmanɩ

31 Zezwii 'bhööä ‑mä Tiilɩ‑bhölɩɩ 'möö,

'n ɔ yiɛ ‑mä ‑glɔɔ wa laa Sidɔɔ 'wʋ 'tʋ,

'n ɔ yiɛ ‑mä Galilee a 'nyu 'kɔdʋʋ yɔwʋ 'wlu sɩbhä.

Bhlɩɩ wa laa Dɛkapɔɔlɩ a ‑kʋkʋ yɔwʋ a gwlɩɩ 'mö,

'n ɔ yiɛ ‑mä ghlɛnɩ 'n ɔ yiɛ mö.

32 Ɔ ghlɛɛ ‑mä,

'n wa yoo nɩkpɛ ‑bhlʋ ‑lɛ.

Ɔ'ɔɔ ‑ngö,

ɔ'ɔ bhïlaa sasɛ 'n wa yiɛ ɔ za Zezwii yɔwʋ bhibhe,

ɔ 'kɔ kätɩkpö 'wlu zʋ ɔ 'kä yɛmanɩ.

33 'N Zezwii ‑nyɔɔ yiɛ cɩɔnɩ.

'N ɔ yoo wölɩya 'yukwli 'mö fä.

'N ɔ yi'ɛɛ wölɩya ‑dɛlɛ 'yli zʋ 'n ɔ yiɛ nɩkpɛɛ a mɩɔɔ kɛ zɩ.

34 'N ɔ yiɛ ghäyɩ yɩlɩ,

'n ɔ yiɛ nyɛmʋ slu.

Ɔ lɛ naa:

«Ɛfata!»

Mɩɩ sɛɛ zɛmö nɩɩ:

«Do!»

35 Cuu,

'n nɩkpɛɛ 'a 'yukwïlaa yiɛ do.

N 'ɔ mɩɔɔ yiɛ domö,

'n ɔ yiɛ sasɛ bhïla.

36 'N Zezwii yuëë 'dɩ 'nyɛ nɩɩ:

«'Saa a 'yɩɛ dɛ'ɛ 'ylɩmöö,

a nɩ tɩa yɩ 'dɩ ‑sɛ.»

‑Maa sɛ ɔ nyʋää ‑sɩbhä 'dɩɩ,

‑sɩbhä wa biaa ‑lɛ a dɩ 'la 'yize.

37 Nɩkpaa 'wuë ‑wa 'nwiɛ,

zuzuu 'bhuëëë ‑gömö.

'N wa nʋä:

«‑Lii 'wuë 'mö ɔ nɛmanɩɛ.

‑Waaa ‑ngö 'mö ɔ dɩɛ 'yukwïla,

'n ɔ dɩ'ɛɛ ‑waaa bhïla a mɩɩ.»