Lwiikö 9

Zezwii yɛ 'ɔ ‑gänɩwaa kʋgbä'sɔ ‑kpɔ tie

(Matie 10.5‑15; Maakö 6.7‑13)

'Ylɩ ‑bhlʋ 'mö 'n Zezwii yiɛ 'ɔ ‑gänɩwaa kʋgbä'sɔ ‑kpɔ 'wlu 'yɩbha.

'N ɔ yuëë tie wa 'kä ɔ 'nglɩ 'mö zuzukuzokuu ‑gömö 'kämanɩ wa 'kɩ nɩkpa ‑gömö kpëti,

wa 'kä'ɛ guzuwa yɛmanɩ.

2 Ɔ lɛ naa:

«A nɩ mö,

'pɩwʋ mää Lagɔ 'kämanɩɛ a 'Mänatɩtɩɩ,

a 'kɩ saa 'wuë bia,

a 'kä'ɛ guzuwaa yɛmanɩ.»

3 'N ɔ yuëë 'dɩ 'mö zʋ,

ɔ lɛ naa:

«A ‑kä möä yii,

a nɩ tɩ 'yiobhlinɩlu ‑su.

A nɩ tɩ nɛmönɩpeyi ‑su,

a nɩ tɩ ‑kotoku ‑su,

a nɩ tɩ lile ‑su,

a nɩ tɩ moni ‑su,

a nɩ tɩ ‑banɩ 'sɔ 'sɔ ‑su.

4 A ‑kä glɔ 'mö ghlɛ 'n nɩkpɛ ‑kaanyɩ pälaa,

a nɩ gʋʋ ‑lɛ 'ligbë 'la 'mö ‑këë 'a mömötɛnyɩɩ ‑kä ghlɛ a 'kä mö.

5 ‑Maa a ‑kä glɔ ‑mumuu 'mö ghlɛ 'n ‑mä a ‑nʋa 'nanyɩ pälaa,

a nɩ 'plɩ.

‑Maa a ‑kä möä yii,

a nɩ gbɔtɔ 'a kplɩzɛmödʋdʋʋ.

‑Sɩbhä a dɔ'wʋ,

‑mä a ‑nʋa yi sɛ yɩbhlɩmanɩ nɩɩ,

wa ‑nyɛ Lagɔ 'sɔ a jijo'wʋ a wɛlɩa'aa.»

6 Zezwii 'zuëë 'dɩ 'mö 'wëë,

‑mä ‑gwlɩɩ 'wuë ‑gömö 'n wa yiɛ ‑mä Lagɔ 'a 'Mänatɩtɩɩ biaamö,

'n wa yɛmanɩɛ ‑mä a guzuwaa.

Sɛ'ɛ Eloodɩ gbää Zezwii a dɛ

(Matie 14.1‑12; Maakö 6.14‑29)

7 ‑Lɛ a 'tɛnyɩ 'la 'mö,

Eloodɩ ‑ɔ 'kämanɩɛ Galilee‑bhölɩɩ ‑gömöö,

ɔ 'nʋä ‑li 'la 'wuë a 'dɩɩ,

'n nyɛmʋ yoo 'wʋ lu.

Ɛ'ɛ ‑bhö nyɩasɛ,

‑maa ‑wa 'nyɔɔ Zezwii a 'tɩtɩɩ,

wa gla'mö ‑mumuë lɛ naa:

«Zaa Batisɩ mɔɔ 'wlʋä glu.»

8 ‑Mumuë lɛ naa:

«Elii mɔɔ yinɩɛ 'wʋ 'sɔ 'pɩwʋ.»

'N ‑mumuë nʋä wabhlɩ nɩɩ:

«Lagɔ 'a bhla'mö a 'möbhïlanɩwaa,

wa gla'mö a ‑nɔ ‑bhlʋ mɔɔ 'wlʋä glu.»

9 ‑Maa Eloodɩ a'bhë,

sɛ'ɛ ɔ nʋä nɩɩ:

«'Ɔ!

Zaa Batisɩ,

n nɛ wa nɩ ‑doo a 'wlu zaa,

wa kɔ a yɩ 'wlu ‑dɩ nɩɩ,

nɩkpɛ ‑mɔ nɩ ‑ɔnyɩ 'dɩ wa sɛɛ sɛ'ɛɛ,

dɛ ɔ 'bhöönɩ bhä 'nɩ?»

Sa'a ɔ gbää,

nza ɔ yɩbhää ɔ 'kä Zezwii 'ylɩmö.

Zezwii yɛ nɩkpa a 'dwi 'sɔ nɩkpa a gwlɩ kʋgbä (5.000) lile 'nyɛ

(Matie 14.13‑21; Maakö 6.30‑44; Zaa 6.1‑14)

10 Mää Zezwii tie a‑a 'ɔ tietiewaa,

'n wa yiɛ ‑mä 'bhöönɩ.

'N wa yoo 'saa 'wuë wa nʋä ‑mä a 'tɩtɩ 'nyɛ.

Wa 'nyɔɔ 'tɩtɩ 'wëë,

'n ɔ yuëë 'wʋ 'libhï,

ɔ ‑nyʋä 'sɔ a 'yize,

glɔ ‑bhlʋ wa laa Bɛtɩsayidaa a pɩɔ 'yli 'n wa yiɛ ‑mä mö.

11 ‑Maa nɩkpa 'wuë,

wa 'nʋä wa mömötɩtɩɩ,

'n wa yuëë 'bɩwʋ mö.

Wa ghlɛɛ ‑mä,

Zezwii 'nuëë 'wlu sɩbhä,

‑maa 'pɩwʋ mää Lagɔ 'kämanɩɛ a wɛlɩɩ,

'mö ɔ 'nyʋää.

Nɩkpa ‑waaa ‑yɛ,

sɛɛ gwi lɩbhʋää,

'n ɔ yuëë ‑sɩbhä yɛmanɩ.

12 Ylʋʋ ‑wʋ bhlie mö dɔ'wʋ,

'n 'ɔ tietiewaa kʋgbä'sɔ ‑kpɔ yoo yɔwʋ 'dio,

wa lɛ naa:

«‑Alowli,

'nyɛ yɩ nɩkpaa 'dɩ,

wa 'käa yɩ 'wʋ ‑sɔ,

mä'ä a ‑gwlɩɩ ‑nyɛ ‑gligbïï 'sɔ 'wʋ,

wa 'käa ‑mä mö,

wa 'käa ‑mä wanyɩ a lile sɛ tɛlɩ,

wa 'käa'ɛ ‑mä gʋʋdɛ sɛ tɛlɩ.

‑Maa dɛ ‑a ‑wʋä dɛ'ɛ,

'klokwëjijo'wʋä.»

13 ‑Maa Zezwii lɛ naa:

«A'bhï,

a nɩ 'nyʋä lile.»

Wa lɛ naa:

«‑A kɩ 'nʋ,

‑maa 'fɔlɔbhï ngbï 'n zibhïya 'sɔ a 'yize,

mö ‑a ‑suä cuu.

Zaa,

‑n yɩbhä bhä ‑a nɩ mö a 'kä nɩkpa nɩ 'wuë a lile pɩa ‑a?»

14 Nyɩasɛ wa'aa ‑sɩbhä gbä,

‑maa nɩkpa 'wuë ‑wa suä ‑lɛ,

‑n ‑kä nyɩbhɛlɩ a 'yize zɛlɩɩ,

wa ‑bhli nɩkpa a 'dwi kʋgbä'sɔ nɩkpa a gwlɩ kʋgbä (5.000) a sɛ.

'N ɔ yuëë 'dɩ 'nyɛ nɩɩ:

«A nɩ 'gïluë ‑zɩkpö ‑zɩkpö 'mö sɛ.

‑Zɩkpa ‑bhlʋ nɩ kä nɩkpa a gwlɩ 'sɔ nɩkpa kʋgbä a sɛ 'mö.»

15 'N wa yuëë ‑sɩbhä sɛ 'gïla.

16 'N Zezwii yiɛ 'fɔlɔbhï ngbï ‑kpɔ ‑nyɛ zibhïya 'sɔ ‑kpɔ 'sɔ 'wʋ 'libhï.

'N ɔ yiɛ ghäyɩ yɩlɩ 'n ɔ yiɛ yɩ za Lagɔ bhälɩ.

'N ɔ yiɛ 'mö ‑dɩdɩnɩ,

'n ɔ yiɛ 'ɔ ‑gänɩwaa yowʋ 'nyɛ.

'N wa yiɛ nɩkpa 'wuë dilanɩ.

17 Wa 'wuë,

'n wa yiɛ li 'n wa yiɛ lʋ.

'N yɩ yiɛ 'wʋ tʋʋ,

'fɔlɔkïbhï ‑nyɛ zibhï 'sɔ ‑yɩ tʋʋä 'wʋʋ,

wa 'libhiɛ,

yɩ yie ‑käkö kʋgbä'sɔ.

Piɛlɩ lɛ Zezwii mɔɔ glɩnɩɛ Puënyɔɔ Lagɔ ‑sɛɛ ‑lɛ

(Matie 16.13‑19; Maakö 8.27‑29)

18 'Ylɩ ‑bhlʋ 'mö,

Zezwii ‑wʋ ɔ 'yize Lagɔ bhibhe dɔ'wʋ,

'n 'ɔ ‑gänɩwaa yoo ‑mä ghlɩ.

Wa ghlɛɛ ‑mä,

'n ɔ yuëë nimï 'yɩbhä,

ɔ lɛ naa:

«Sɛɛ nɩkpa pä bhä na dɔ'wʋ dlɩ?»

19 Wa lɛ naa:

«‑Muë lɛ,

Zaa Batisɩ mö ‑n glɩnɩɛ.

‑Mumuë lɛ,

bhla'mö a Lagɔnɩkpɛ Elii mö ‑n glɩnɩɛ.

‑Mumuë lɛ,

Lagɔ 'a bhla'mö a 'möbhïlanɩwaa,

wa gla'mö a ‑nɔ ‑bhlʋ 'wlʋä glu,

mö ‑n glɩnɩɛ.»

20 Zezwii lɛ naa:

«N kɩ 'nʋ,

‑maa a'bhï abhlɩ,

sɛ a pä bhä na dɔ'wʋ dlɩ?»

'N Piɛlɩ yiɛ gbʋ ‑dɩ,

ɔ lɛ naa:

«Kliisɩ,

Puënyɔɔ Lagɔ ‑sɛɛ ‑lɛ,

mö ‑n glɩnɩɛ.»

Zezwii yɛ 'saa 'kɔɔ ghlɩ a 'dɩ ‑sɛ

(Matie 16.20‑28; Maakö 8.30–9.1)

21 Piɛlɩ gbää sa'a,

'n Zezwii yuëë wa 'wuë kä'mö 'titli nɩɩ:

«Sɛ n glɩnɩɛ Kliisɩ,

‑lɛ a wɛlɩɩ,

a nɩ tia nɩkpɛ 'nyɛ.

22 ‑Maa Nɩkpɛ a 'Yu,

ɔ kä ɔ 'kä 'zwɩ a ‑bɛ zi klɩpaa.

Zwiiföwaa 'a 'nɛɛnɩwa 'kädɩɩ muë,

'wa Lagɔbʋbɔwaa a 'kifiea muë,

'n Moyizɩ 'a Gböö a 'cɩawaa,

wa 'wuë,

wa yo nimï ‑sɛ.

Wa yi 'nglɩ ‑kä,

wa yo 'lɩbhä ɔ yi 'ku.

‑Maa ɔ ‑kä 'ku 'wë a ylɩɩ a tanɛɛ 'mö,

ɔ yi glu 'wlʋ.

23 ‑Maa a 'wuë,

abhʋa n nyɛɛ dɛ'ɛ 'dɩ nɩɩ,

‑ɔ ‑kä ɔ ‑kaa ‑gänɩɩ,

ɔ nɩ ‑sɛ ɔnyɩ dlɩ.

Sɛɛ zila zɩɛ 'yize,

ɔ nɩ ‑su 'ɔ 'klʋkʋnɩsuu ɔ ‑kaa ‑gänɩ.

24 Ɛ'ɛ ‑bhö nyɩasɛ,

‑maa ‑ɔ ‑kä 'ɔ pɩwʋʋ 'wʋ gwɩ ɔ 'käa 'pʋ a za‑a,

mɔɔ 'kää 'yli bhɩɛ.

‑Maa ‑ɔ ‑kä ɔnyɩ dlɩ ‑sɛ ɔ 'kä na gbʋ 'mö 'kuu,

ɛ nɩkpɛ 'la,

mɔɔ 'kää 'pʋ.

25 Sɛ'ɛ n gbää nɩɩ,

‑n ‑kä mä'ä 'pɩwʋ a ‑lii 'wuë ghlɩ 'wë,

'n ‑na'a 'wugaa ‑kä tʋʋ,

dɛ yɩ kä bhä ‑na dɔ'wʋ sɛ 'nɩ?

26 'Dɩ n nyanyɩɛ dɛ'ɛ nɩɩ,

zɩla'a ‑kä yii,

Nɩkpɛ a 'Yu,

ɔ yi 'ɔ 'ghïlinɔɔ 'mö mä'ä dʋdʋ 'wʋ yinɩ.

‑Lɛ a dɔ'wʋ,

Lagɔ 'a 'ghïlinɔɔ mʋʋ 'kɔɔ ‑gömö ‑wʋ,

Lagɔzuzukuu 'kɔ ‑binɩ,

ɔ 'kä yi.

‑Maa ‑ɔ ‑kä na zʋ plɛ,

‑ɔ ‑kä'ɛ 'na wɛlɩɩ a zʋ plɛɛ,

Nɩkpɛ a 'Yuu,

‑zlɩ ɔ ‑kä yii,

ɔ yi'ɛ ɔblɩ ɔ zʋ plɛ.

27 ‑Tiamö n nyanyɩɛ dɛ'ɛ 'dɩ nɩɩ,

a gla'mö a ‑mumuë ‑wa glɩɛ dɛ'ɛɛ,

wa 'naa 'kää ‑bhlɛ 'ku 'n wa 'nɩɛ 'pɩwʋ mää Lagɔ 'kämanɩɛ a yiye 'ylɩmö 'wëë.»

Zezwii a ‑gänɩwa ta yɛ 'ɔ 'ghïlinɔɔ 'ylɩmö

(Matie 17.1‑8; Maakö 9.2‑8)

28 Zezwii 'nyʋää sa'a 'dɩ 'wëë,

‑lɛ a 'dimasi ‑bhlʋ a sɛ yɛ 'plɩ,

'n ɔ yiɛ ‑gäga ‑bhlʋ 'wlu mö.

Piɛlɩ mɔ,

Zaa mɔ 'n Zaakö,

'mö ɔ ‑nyɛɛ möä ‑mä,

ɔ 'kä ‑mä Lagɔ bhibhenɩ.

29 Wa ‑wʋ ‑mä,

Zezwii ‑wʋ bhibhe dɔ'wʋ,

'n 'ɔ klʋʋ yiɛ käbösɛ 'zʋ.

'N 'ɔ ‑banɩɩ yiɛ tenyii buu plɛ 'n yɩ yiɛ tenyii 'mö lɩ ‑gbägbadɛ a 'dɛlɩ a sɛ.

30 Wa lɛ zʋ a sɛ'ɛ,

‑lɛ ɔ yɔwʋ,

nɩkpa 'sɔ 'nɩgbö ‑lɛ.

Wa ‑nyɔɔ ‑wʋ 'dɩ ‑sɛ dɔ'wʋ,

Moyizɩ ‑nyɛ Elii 'sɔ,

muëë.

31 'Mö Lagɔ 'a 'ghïlinɔɔ ngälaa 'wʋ.

Sɛɛ Zezwii 'kää ‑mä Zeluzalɛɛmö 'kunɩ,

nzɩɩ ɔ 'kä libhoo Lagɔ tioo 'wʋ zɛmö bhɩɛɛ,

‑lɛ a wɛlɩɩ,

'mö wa ‑nyɔɔ ‑wʋä 'dɩ 'mö ‑sɛ dɔ'wʋ.

32 ‑Maa ‑lɛ a 'tɛnyɩ 'la 'wuë 'mö,

Piɛlɩ ‑nyɛ ɔ 'bhɩa 'sɔ,

wa yɛ a wabhlɩ ngämö cluclu.

‑Maa wa gɔlɔɔ 'n wa yiɛ Zezwii 'a 'ghïlinɔɔ 'ylɩmö.

Nɩkpa 'la 'sɔ ‑kpɔ 'nigboo yɔwʋ.

33 Nɩkpa 'la,

wa ‑wʋa'aa Zezwii yɔwʋ 'bhöö dɔ'wʋʋ,

Piɛlɩ lɛ naa:

«‑Atʋ,

yɩ nɛnɩ ‑a 'käa'a mä'ä glɩ.

Zaa,

‑a 'kä ‑gligbï ta 'sɩbhä,

‑na ‑na ‑bhlʋ,

Moyizɩ a ‑na ‑bhlʋ,

'n Elii a ‑na ‑bhlʋ.»

Piɛlɩ 'kää sa'a gbää,

ɔ'ɔɔ dlɩ 'pä,

'n ɔ yiɛ ‑sɩbhä gbä.

34 Ɔ kɩ ngli cuu,

'n ‑kpu yuëë 'wlu yi.

Piɛlɩ ‑nyɛ ɔ 'bhɩa 'sɔ,

wa 'yɩɛ ‑kpuu 'ylɩmöö,

nganɔɔ köbhʋää.

35 ‑Mä ‑kpu 'la 'mö,

'n wɛlɩ yiɛ ‑mä 'bhöönɩ,

yɩ lɛ naa:

«‑Mɔ nɩ 'dɛɛ mɔɔ glɩnɩɛ 'na Yuu.

'Mö n ‑sɛɛ ‑lɛ.

'Mö a kää a 'kä 'yukwli ‑pʋnɩ.»

36 Wɛlɩɩ 'plɩɛ 'wëë,

wa lɛ zʋa'a sɛ'ɛ,

Zezwii a 'yize mɔɔ 'nɩgböa'a ‑lɛ.

‑Maa ‑li 'la 'wuë,

Piɛlɩwa 'yiɛ 'ylɩmöö,

wa'aa gbʋ ‑dɩ,

wa'a'ɛ nɩkpɛ yɩ 'dɩ 'nyɛ 'tɛnyɩ 'la 'wuë 'mö.

Zezwii yɛ yuu ‑ɔ kää zuzukwëzokwëa ‑gömö yɛmanɩ

(Matie 17.14‑18; Maakö 9.14‑27)

37 Zlɩ zɩɛ,

wa 'bhööä ‑mä ‑gäga 'wluu,

'n nɩkpa a ‑bɛ yiɛ Zezwii 'yio 'wʋ yi.

38 ‑Mä wa gla'mö,

'n nɩkpɛ ‑bhlʋ yiɛ ‑mä gbʋ ‑dɩ,

ɔ lɛ:

«‑Atʋ aa,

‑yayaya aa,

'na yuu,

'yoo yɩ ‑ka 'ylɩmö aa.

'Na nyɩbhɛlʋyuu ‑bhʋlʋ ‑kpɔ n kää,

mɔɔ aa.

39 Zuzukwëzokwë ɔ kää ‑gömö.

A ‑kɔɔ glu 'bhöö,

'mö ɔ kpaa,

'n a 'siasianɔɔ 'mö tenyii,

'n ɔ ngli pää 'pïpïli.

A 'maa 'kɔ sa'a tenyii yɔla ‑këë,

'n a gɔɔ 'wʋ.

40 Ɛ za n ‑nyɔɔ yiɛ,

'n n yiɛ ‑na'a ‑gänɩwaa yɔwʋ bhibhe nɩɩ,

wa nɩ kpëtoo zuzukwëzokwëa ‑gömö.

‑Maa wa yɛlaa ‑li 'möö,

yɩ'ɩɛ ‑mä mö.»

41 Nɩkpɛɛ 'nyɔɔ sa'a 'dɩɩ,

ɔ lɛ naa:

«‑Ɔɔɔ!

Nɩkpazokunyɩ,

'a Lagɔ a dlɩtɛɛnɩtɛnɛɛ 'nɩɛ ‑zu 'lɩlɩlɩ.

'Ylɩ ‑zɩmö n 'kanyɩ bhä ‑bhlɛ ‑sɩkaa jijo'wʋ ‑sɛ 'nɩ?

'Ylɩ ‑zɩmö n 'kanyɩ bhä ‑bhlɛ ‑sɩkaa kɛ yɔlɔnɩ 'nɩ?

Bhee n kɩ 'nʋ,

‑maa ‑laa ‑na'a yuu.»

42 'N dɩbaa ‑nyɛ yuu yiɛ yi.

Wa 'kää ‑lɛ ghlɛ cuu,

'n zuzukwëzokwëa yoo sɛ bhlɩ gbukluklu,

'n a yoo ‑glasɛ 'mö 'siasianɩ.

‑Maa yuu bhliɛ zɛmöö,

'n Zezwii yiɛ zuzukwëzokwëa yɔwʋkanɩsɛ 'dɩ 'nyɛ nɩɩ:

«'Bhöö yu nɩ ‑gömö!»

'N a yoo ‑gömö 'bhöö,

'n ɔ yiɛ yɛmanɩ.

'N ɔ yoo ɔ dɩba yowʋ 'nyɛ.

43 ‑Maa nɩkpa 'wuë ‑wa ‑wʋ a‑a ‑lɛ,

sɛɛ Lagɔ 'a 'mötɛɛnɔɔ 'ghïliɛ,

wa 'yɩɛ ‑sɩbhä 'ylɩmöö,

zuzuu 'bhuëëë ‑gömö.

Zezwii yɛ 'wʋ 'sɔnadɔ'wʋ 'ɔ 'kwiea a dɛ bhïla

(Matie 17.22‑23; Maakö 9.30‑32)

'Saa 'wuë Zezwii nʋä a za,

nɩkpaa ‑wʋ ‑bhlɛ ɔ gbʋ 'mö klu dɔ'wʋ,

'n ɔ yiɛ 'ɔ ‑gänɩwaa 'dɩ 'nyɛ,

ɔ lɛ naa:

44 «Wɛlɩɩ n 'kanyɩɛ dɛ'ɛ 'nyɛɛ,

a nɩ 'zwia sasɛ 'wlumö.

Nɩkpɛ a 'Yu,

wa yoa'a ‑pa nɩkpa kä'mö plɩnɩ.»

45 Zezwii bhïlaa wɛlɩ 'laa,

ɔ 'nuënyɩɛ sasɛ kɛ 'klʋ kälɩnɩ zaa,

wa'aa yɩ zɛmö yɩbhlɩnɩ 'lɩlɩlɩ.

‑Maa dlɩ libhuë'ɛ mä'ä wa 'kɔ nimï 'yɩbhä a dɔ'wʋ.

‑Ɔ kä bhä dɛsɛ ‑ɔ zi ɔ ‑muë'la 'wuë 'wʋ?

(Matie 18.1‑5; Maakö 9.33‑37)

46 Zezwii 'a ‑gänɩwaa,

wa gla'mö a dɔ'wʋ,

‑ɔ kää dɛsɛ ‑ɔ ziɛ ‑muë'la 'wuë 'wʋ,

wa yɩbhä wa 'kɔ yɩbhlɩnɩ zaa,

yɩ wɛlɩɩ,

'mö wa kpɛnɩɛ 'mö.

47 Zezwii yɩbhlɩnɩɛ 'wa dlɩpäsaa,

'n ɔ yiɛ 'ywilɛ ‑bhlʋ 'wʋ 'libhï,

'n ɔ yoo ɔnyɩ yɔwʋ 'nigba.

48 'N ɔ yuëë 'dɩ 'nyɛ,

ɔ lɛ naa:

«Sɛ'ɛ a 'ywilɛ,

‑ɔ ‑kɔɔ na 'nglɩ 'mö pälaa,

na'bhë,

‑amö ɔ yɛɛ päla.

'N ‑ɔ ‑kaa pälaa,

‑ɔ tieaaa 'mö ɔ yɛɛ pälamö.

Ɛ'ɛ ‑bhö nyɩasɛ,

‑maa ‑mɔ a laa abhlɩ ‑mä a gla'mö a dɔ'wʋ 'tikëyii,

mɔɔ glɩnɩɛ 'kɔdɔɔ.»

‑Ɔ 'nanyɩ ‑gblɩɩ nimï ɔ ‑wʋanyɩɛ

(Maakö 9.38‑40)

49 ‑Mi'la 'plɩɛ 'wëë,

'n Zaa yiɛ Zezwii 'dɩ 'nyɛ,

ɔ lɛ naa:

«‑Atʋ,

‑a ghlɩ zɩla'a nɩkpɛ ‑bhlʋ,

ɔ kpëti ‑na 'nglɩ 'mö zuzukuzoku nɩkpa ‑gömö.

Zaa,

a‑a yoo 'dɩ 'nyɛ nɩɩ:

Tɩ sa'a zʋ,

‑maa ‑nn ‑bhö ‑aa 'wʋ‑bhlinɩnyɔɔ.»

50 Zaa gbää ‑sɩbhä,

Zezwii lɛ naa:

«A nɩ ‑sɔɔ kɛ yɔwʋ,

‑maa nɩkpɛ a ‑mɔɔ 'nanyɩ ‑gblɩɩ,

nimï ɔ ‑wʋanyɩɛ.»

Samalii a nɩkpaa lɛ wa 'naa 'kä Zezwii päla

51 Lagɔ lɛ 'kää Zezwii mä'ä dʋdʋ 'wʋ ‑sɛ ɔ ‑nyɔɔ 'kä ‑mä ɔ yɔwʋ mö a 'tɛnyɩ 'dioo,

'n Zezwii yiɛ ɔnyɩ dlɩ ‑sɛ ɔ 'kä ‑mä Zeluzalɛɛmö mö.

52 'N ɔ yiɛ ɔnyɩ nɩkpa 'yuku tie.

Nɩkpa 'la,

wa möä,

Samalii a glɔ ‑bhlʋ 'mö,

'n wa yiɛ ‑mä plɛ,

wa 'kä ‑bhlɛ ‑mä 'wlu gïganɩ.

53 ‑Maa ‑mä a ‑nʋa,

wa 'nʋä nɩɩ,

‑mä Zeluzalɛɛmö ‑mä Zezwii ‑wʋä mö dɔ'wʋʋ,

wa lɛ wa 'naa 'kɔ päla.

54 Zezwii 'a ‑gänɩwaa a gla'mö a ‑nʋä 'sɔ,

Zaakö ‑nyɛ Zaa 'sɔ,

wa 'nwiɛ,

wa lɛ naa:

«‑Alowli,

‑n ‑kä 'wʋ ngluu,

‑a yi gbä,

‑kosu yi ‑mä ghäyɩ 'wʋ 'bhöö,

wʋ yi ‑glɔ nɩ 'mö a nɩkpaa 'yli bhɩa.»

55 ‑Maa Zezwii lɛ naa:

«N'nn,

a nɩ tɩ sa'a nʋ.»

Sɛ ‑a ‑kää ‑a 'kä Zezwii ‑gänɩɩ

(Matie 8.19‑22)

56 'N wa yiɛ 'plɩ 'n wa yiɛ ‑glɔ ‑mumuu 'mö mö.

57 Wa ‑wʋ mö dɔ'wʋ,

'n nɩkpɛ ‑bhlʋ yiɛ Zezwii ‑mä ghlɩ.

Ɔ lɛ naa:

«Dɛ ‑n ‑kä mö ‑kë,

n ‑yimö ‑gänɩ.»

58 Zezwii lɛ naa:

«‑Gätlɩzlɛya mɩɩ kää 'mögʋʋvïli,

'zɩ mɩɩ kää 'lwɩlwɩ.

‑Maa Nɩkpɛ a 'Yu,

dɛ a'bhë ɔ 'kä sɛ'ɛ 'ɔ 'wukpëlea sɛ 'pïlaa,

ɔ'ɔɔ ‑lɛ ‑kä.»

59 'N Zezwii yiɛ nɩkpɛ ‑mɔmɔɔ 'dɩ 'nyɛ,

ɔ lɛ naa:

«Yi,

‑n ‑kaa ‑gänɩ!»

Ɔ lɛ:

«‑Atʋ,

n ngulu abhlɩ 'wʋ,

‑maa,

n 'kää na dɩba ziza 'wë,

n 'kä bhäla yi.»

60 Ɔ lɛ naa:

«'Tatinɩ ‑gäzɩɩ 'yi,

yɩ 'kä zizazizanɩ.

‑Maa ‑nmö ‑naa,

sɛɛ Lagɔ 'kää nɩkpa ‑gömö 'kämanɩ a 'dɩ,

yi ‑n 'kɩ nɩkpa 'nyɛɛ mö.»

61 'N nɩkpɛ ‑mɔmɔɔ yo'ɛɛ ‑mä ghlɩ.

Ɔ lɛ naa:

«‑Atʋ,

n ‑yimö ‑gänɩ.

‑Maa 'nɩgböä 'tikïyie 'wʋ 'mö,

n 'kä na ‑lowluwa kɩnɩɛ mö 'wë,

n 'kä yi.»

62 Ɔ lɛ naa:

«Nɩkpɛ ‑mɔɔ plɛnɩɛ 'yioo 'wë ɔnyɩ dlɩ ‑gää nimïï,

'pɩwʋ mää Lagɔ 'kämanɩɛ a dɔ'wʋ,

ɔ 'naa 'kä 'yuku ghlɛ.»