Matie 10

Zezwii 'a tietiewaa kʋgbä'sɔ ‑kpɔ

(Maakö 3.13‑19; Lwiikö 6.12‑26)

'N Zezwii yiɛ 'ɔ ‑gänɩwaa kʋgbä'sɔ ‑kpɔ wäzɩ 'n ɔ yuëë 'mötɛɛnɔ 'nyɛ,

wa 'kä ɔ 'nglɩ 'mö nɩkpa zuzukuzoku ‑gömö kpëti.

Nɩmɛnɛkäwaa ‑nyɛ ‑muë gwi a kii 'wuë lɩbhää 'sɔ,

wa 'kʋä'ɛ yɛmanɩ.

2 Wa kʋgbä'sɔ ‑kpɔ ɔ laa 'ɔ tietiewaa,

wa nglɩɩ miɛ dɛ'ɛ:

Simɔɔ,

wa la'ɛɛ Piɛlɩ,

'n ɔ ‑daayu Adlee,

Zebedee a yowluwa Zaakö ‑nyɛ Zaa 'sɔ,

3 Filiipö,

Batlemii,

Tomaa,

Matie ‑ɔ glɩnɩ a 'yɛɛ lapoomoni a 'wʋbhlinyɔ,

Alɩfee a yowli Zaakö,

Tadee,

4 Simɔɔ ‑ɔ ‑wʋmö a‑a ‑mä ‑zɩkpaa wa laa Zɛlɔɔtɩ^a 'mö,

'n Zwidaa Yisikalio ‑ɔ 'kää zɩkö Zezwii plɩɩ.

Zezwii yɛ 'ɔ ‑gänɩwaa kʋgbä'sɔ ‑kpɔ tie

(Maakö 6.7‑13; Lwiikö 9.1‑6)

5 Nɩkpa 'la kʋgbä'sɔ ‑kpɔ 'mö Zezwii tiee.

Wa lɛ 'kää möä yii,

sɛ'ɛ ɔ 'zuëë 'dɩ 'mö,

ɔ lɛ naa:

«‑Waaa Zwiiföwa glɩnɩ 'a bhlɩɩ 'mö,

a nɩ tɩ ‑mä mö,

a nɩ tɩ'ɛ Samalii‑bhölɩɩ 'mö a glɔ ‑bhlʋ a'bhë 'mö plɛ.

6 ‑Maa Yizlaɛlɩ 'a ngëyii 'mö a ‑nʋa,

wa ‑muë ‑bhɩɛɛ wïlaa yɛ tʋʋ,

wa bɛyɩ,

‑mä a nɩ mö.

7 A ‑kä mö dɔ'wʋ ‑wʋʋ,

a nɩ 'nyɛ nɩkpa Lagɔwɛlɩɩ.

A nɩ 'nyʋä 'dɩ nɩɩ:

'Pɩwʋ mää Lagɔ 'kämanɩɛ yɛ 'dio.

8 A nɩ yɛmanɩ guzuwaa 'wuë,

a nɩ gäla ‑gäzɩ,

a nɩ yɛmanɩ 'zlalɩbhäwa wa 'kä 'wlɩlɩ plɛ,

a nɩ kpëti zuzukuzoku nɩkpa ‑gömö.

'Mötɛɛnɔ 'la n 'nyanyɩɛ,

a ‑nɩɩɛ wʋ 'wlumö 'pɛnɩ zaa,

a ‑kä libho 'la nʋʋ,

‑bɛ nɩ tanyɩ 'pɛnɩ.

9 A ‑kä möä yii,

a nɩ tɩ moni ‑su.

10 A nɩ tɩ ‑kotoku ‑su,

a nɩ tɩ ‑banɩ 'sɔ 'sɔ ‑su,

a nɩ tɩ 'siikpli ‑su,

a nɩ tɩ nɛmönɩpeyi ‑su.

Ɛ'ɛ ‑bhö nyɩasɛ,

‑maa ‑ɔ nʋä libhoo,

ɔ kä ɔ 'kä li.

11 A ‑kä glɔ 'mö ghlɛ,

ɛ yi ‑glɔ 'tikëyi oo,

ɛ yi ‑glɔ 'kɔdʋ oo,

a nɩ 'yɩbhä nimï,

nɩkpɛ a ‑mɔɔ yɩbhää ɔ 'kanyɩ päla ‑kä ‑mä ‑wʋ,

ɔ 'kanyɩ päla.

‑Ɔ ‑kaanyɩ pälaa,

a nɩ gʋʋ ‑lɛ 'ɔ 'ligbëa 'mö ‑këë 'a mömötɛnyɩɩ ‑kä ghlɛ a 'kä mö.

12 A ‑kä 'ligbë ‑bhlʋ 'mö ghlɛɛ,

a nɩ nʋ nɩɩ,

a 'wuë,

'pʋpʋɛ nɩ ghlanyɩ 'wʋ.

13 ‑Lɛ 'ligbë 'la mö a ‑nʋa ‑kaanyɩ pälaa,

'pʋpʋɛ yuë 'wʋ ghlɛ,

‑maa wa 'nanyɩ pälaa,

ɛ nɩ sɩbhanyɩ 'mö 'wlu.

14 ‑Maa dɛ a ‑kä ghlɛ,

ɛ yi glɔ 'mö oo,

ɛ yi 'ligbë 'mö oo,

'n ‑mä a ‑nʋa 'nanyɩ pälaa,

wa 'nanyɩ 'yukwli ‑pʋnɩɩ,

a nɩ 'plɩ.

‑Maa a ‑kä möä yii,

a nɩ gbɔtɔ 'a kplɩzɛmödʋdʋʋ.

15 ‑Tiamö n nyanyɩɛ dɛ'ɛ 'dɩ nɩɩ,

Lagɔ 'a ‑zijle 'kädaa a zlɩɩ ‑kä ghlɛɛ,

‑glɔ 'la 'mo a ‑nʋa 'a nyinylolii a 'pɛna Lagɔ 'kʋä 'nyɛɛ,

a yi 'mö 'tɛɛ a yi Sodɔɔmö ‑nyɛ Gomɔɔlʋ 'sɔ a ‑nʋa,

a ‑naa 'wʋ zi.

Sɛ'ɛ Zezwii gbää zwɩɩ ɔ ‑nʋa 'kää zi a dɛ

(Maakö 13.9‑13; Lwiikö 21.12‑17)

16 A yɩɛ,

sɛ wa pä'ɛ gbï jijo'wʋ wïlaa,

‑sɩbhä n ‑wʋanyɩɛ dɛ'ɛ nɩkpa jijo'wʋ tie dɔ'wʋ.

Zaa,

a ‑kä möö,

sɛɛ tɩmɛ 'nɛɛ'ɛ,

a nɩ 'nɛɛ ‑sɩbhä.

Sɛɛ ‑kpakʋ 'nɩ 'pä'ɛ nɩkpɛ 'wʋʋ,

a nɩ tɩ ‑sɩbhä nɩkpɛ 'wʋ 'pä.

17 A nɩ 'nɛmanɩa nɩkpaa 'wʋ,

‑maa 'wa ‑zijlituwa 'kädɩɩ a 'yila 'klʋ wa yeanyɩa ‑mä kwä.

‑Mä Zwiiföwaa 'a Lagɔbïdii 'mö,

wa yeanyɩa ‑mä kwä,

wa 'kanyɩ 'sɛlɩ.

18 Sɛ a glɩnɩɛ na ‑nʋa a za,

wa yeanyɩ 'kämanɩwa 'kädɩ ‑nyɛ 'bhlɩlowluwa 'sɔ a 'yila 'klʋ 'nigba,

wa 'kanyɩ ‑zijli tu.

‑Sɩbhä yɩ 'kää 'wʋ 'plɩ,

nzɩɩ nɩkpaa ‑waaa Zwiiföwa glɩnɩ ‑nyɛ 'wa 'kädɩɩ 'sɔ a 'yila 'klʋ,

a 'kä ‑lɛ na dɛ bhïlanɩ.

19 ‑Maa wa ‑kaanyɩ ‑mä ‑zijlituwaa 'yila 'klʋ kwää,

'saa a 'kää ‑mä ‑zijle 'mö bhïlanɩ,

'n sɛ a 'kɩɛ 'möbhïlabhïlamö,

yɩ dɔ'wʋ,

dlɩ nɩ tanyɩ nyɩasɛ libho,

‑maa ‑lɛ a 'tɛnyɩ 'la ‑bhʋlʋ ‑kpɔ 'mö,

wɛlɩɩ a 'kää bhïlaa,

Lagɔ yeanyi ngli 'pä.

20 Anyɩgäsɛ abhʋa 'nɩɛ a 'kä bhïla,

‑maa a dɩba Lagɔ 'a 'Wugɔmʋʋ mɔɔ 'kanyɩɛ 'mö bhïlanɩ.

21 ‑Lɛ a 'tɛnyɩ 'la 'mö,

‑daayu yi ‑daayu tʋ kunɩ wa yo 'lɩbhä ɔ yi 'ku.

Dɩbawa yia ‑sɩbhä 'wa yuëa 'zʋmö.

Yuë ‑mumuë a'bhï,

wa yia wa ‑lowluwa 'mö 'bhɛlɔnɩ,

wa yuë tʋ kunɩ,

wa yuë 'lɩbhä wa yi 'ku.

22 Na za,

nɩkpaa 'wuë yeanyɩ ‑gblɩ,

‑maa nɩkpɛ ‑mɔɔ 'nɩ 'na wɛlɩɩ kɛ'mö ‑sɛ ‑këë,

‑ɔ ‑kä ‑mä 'gbë 'wʋ ghlɛɛ,

Lagɔ yo puë.

23 A ‑kä glɔ ‑bhlʋ 'mö 'na wɛlɩɩ biaa mö 'n ‑mä a ‑nʋa ‑kaanyɩ 'klɩ 'yɩaa,

a nɩ futo,

a 'kä ‑glɔ ‑mumuu 'mö mö.

‑Maa ‑tiamö n nyanyɩɛ dɛ'ɛ 'dɩ nɩɩ:

A 'naa 'kä ‑bhlɛ Yizlaɛlɩ‑bhölɩɩ 'mö a ‑gwlɩɩ 'wuë 'mö 'wʋ 'tʋ,

Nɩkpɛ a 'Yu,

'n ɔ 'kää yi.

24 Nɩkpɛ a ‑gänɩnyɔ 'nɩɛ ‑zɩ 'ghïli ɔ 'kä 'bhidɩba 'wʋ zi,

nɩkpɛ a libhonʋnyɔ 'nɩɛ'ɛ ‑zɩ 'ghïli,

ɔ 'kä ɔ 'bhidɩba 'wʋ zi.

25 ‑Maa nɩkpɛ a ‑gänɩnyɔ 'n ɛ ‑kä'ɛ ɔ libhonʋnyɔ,

sɛ wa zʋä ɔ 'bhidɩba,

wa ‑kɔɔ ‑sɩbhä 'zʋmöö,

yɩ nɩ nɛnɔ dlɩ yɔwʋ.

Zaa,

'n wa ‑kä 'ligbëlowlii Bɛzebilɩ laa,

sɛ wa 'kä bhäa'a 'ɔ 'ligbëa 'mö a ‑nʋa la 'nɩ?

Lagɔ 'mö nɩkpɛ kää ɔ 'kä ‑gu

(Lwiikö 12.2‑7)

26 Zaa,

a nɩ tɩ nɩkpa ‑gu.

‑Maa 'saa ziza‑a ‑bhlɛ ‑sɩkaa 'yizee,

wʋ kä wʋ 'kä 'ylɩ ‑bhlʋ 'mö 'yli 'wlʋnɩ.

'Saa nɩkpa 'nɩɛ ‑bhlɛ ‑yii,

wʋ kä wʋ 'kä 'ylɩ ‑bhlʋ 'mö zɩkpa bhli.

27 Zaa,

wɛlɩɩ 'wuë n 'nyanyɩɛ 'wi 'möö,

a nɩ bhïlani nɩkpabhë a 'yila 'klʋ.

'Saa wa lɛtɛnanyɩɛ 'yukwli gwëë,

a nɩ biii wɛlɩpänyɔ a sɛ.

28 A nɩ tɩ nɩkpa ‑gu.

‑Maa wa ‑kä 'a kpökpaa 'lɩbhä 'wëë,

wa'aa bhɛnɩ wa 'kä 'a 'wugaa ‑lu nʋ.

‑Maa Lagɔ ‑ɔ ‑kä 'a kpökpaa 'lɩbhä 'wë,

‑ɔ bhɛnɩɛ ɔ 'kä 'a 'wugaa ‑kosu 'mö kwää,

'mö a nɩ ‑gu.

29 A yɩlɩɛ ‑ka 'bhuluyuëa 'wʋ.

A'bhï a ‑yi sɛ nɩɩ,

‑n ‑kä fälɛgïyi ‑bhlʋ ‑kä,

‑n yuë 'sɔ pɩa.

‑Maa 'bhuluyuëa ‑waaa sa'a dɛsɛ ‑kää,

wa gla'mö a ‑bhlʋ 'nɩɛ ‑zɩ dʋdʋ 'wʋ bhli,

'n a dɩba Lagɔ 'nɩɛ 'wʋ nguluu.

30 'A 'wlu a nyukwëa a'bhë,

Lagɔ ‑yi ‑zɩmö a yʋʋ ‑bhli.

31 Zaa,

a nɩ tɩ ‑gu.

‑Maa Lagɔ a 'yila 'klʋ a dɔ'wʋ,

a kä tenyii dɛsɛ,

a zi 'bhuluyuëa a ‑zɩkpa 'käda 'wʋ.

32 ‑Ɔ ‑kä nɩkpabhë a 'yila 'klʋ nɩɩ,

na ‑nɔ ɔ glɩnɩɛ nʋʋ,

na Dɩba ‑ɔ ‑wʋ ‑mä ghäyɩ 'wʋ a 'yila 'klʋ,

n yi'ɛ na a nɩɩ,

na ‑nɔ ɔ glɩnɩɛ nʋ.

33 ‑Maa ‑ɔ ‑kaa ‑lɛ nɩkpabhë a 'yila 'klʋ nimï ‑sɛnɩɩ,

‑amö na a 'yɛ,

na Dɩba ‑ɔ ‑wʋ ‑mä ghäyɩ 'wʋ a 'yila 'klʋ,

n yi nɩɩ ‑mɔ nɩ n 'nɔɔ ‑yi.

Zezwii a za nɩkpa yi 'ylimö ‑känɩ

(Lwiikö 12.51‑53; 14.26‑27)

34 A nɩ tɩ ‑tɔnɩ nɩɩ,

'na mä'ä dʋdʋ 'wʋ a yiye yi 'nglɩ ‑kä,

nɩkpa 'wuë yi ‑wanɩ 'yize.

Ɛ'ɛ ‑bhö sa'a ma,

‑maa ɛ yi 'nglɩ ‑kä,

nɩkpa yi 'ylimö ‑sɛnɩ.

35 Nɩkpa 'kä 'ylimö ‑känɩ a za n yiɛ:

Nɩkpɛ ‑mɔmɔɔ ‑nyɛ ɔ yowli 'sɔ,

wa yi 'ylimö ‑känɩ,

nglɔ ‑mɔmɔɔ ‑nyɛ ɔ yɛnglɛ 'sɔ,

wa yi 'ylimö ‑känɩ,

'yu a 'nglɔ ‑nyɛ ɔ 'luwlida 'sɔ,

wa yi 'ylimö ‑känɩ,

36 'a ‑kosu yɔwʋ a ‑nʋa a'bhï,

mʋa 'kää a ‑gblɩwaa glɩnɩ.

37 Nza n gbää nɩɩ,

nɩkpɛ,

ɛ ‑kä ɔ dɩba,

ɛ ‑kä ɔ ‑da,

'mö ɔ ‑kä ‑wa 'n ɔ ‑kaa 'wʋ zii,

ɔ'ɔɔ na ‑gänɩnyɔ a ‑gba 'mö mlɩnɩ.

Nɩkpɛ,

ɛ ‑kä'ɛ ɔ yowli,

ɛ ‑kä'ɛ ɔ yɛnglɛ,

'mö ɔ ‑kä ‑wa 'n ɔ ‑kaa 'wʋ zii,

ɔ'ɔɔ'ɛ ɔbhlɩ na ‑gänɩnyɔ a ‑gba 'mö mlɩnɩ.

38 ‑Ɔ 'nɩ 'ɔ 'klʋkʋnɩsuu ‑su nzɩɩ ɔ ‑kaa ‑gänɩɩ,

ɔ'ɔɔ na ‑gänɩnyɔ a ‑gba 'mö mlɩnɩ.

39 Sɛ'ɛ n gbää nɩɩ,

‑ɔ ‑kä 'ɔ pɩwʋʋ 'wʋ gwɩ,

ɔ 'käa 'pʋ a za‑a,

mɔɔ 'kää 'yli bhɩɛ.

‑Maa ‑ɔ ‑kä ɔnyɩ dlɩ ‑sɛ ɔ 'kä na gbʋ 'mö 'kuu,

ɛ nɩkpɛ 'la,

mɔɔ 'kää 'pʋ.

‑Ɔ ‑kä Zezwii a tietienyɔ pälaa ɔ'bhë 'mö ɔ yɛɛ päla

(Maakö 9.41)

40 Abhʋa 'na tietiewaa,

‑ɔ ‑kaanyɩ pälaa,

‑amö ɔ yɛɛ pälamö.

Sɛ ɔ pälaa da'a a za,

‑ɔ tieaaa,

'mö ɔ yɛɛ pälamö.

41 Lagɔ a 'möbhïlanɩnyɔ,

sɛ ɔ glɩnɩɛ Lagɔ a 'möbhïlanɩnyɔ a za,

‑ɔ ‑kɔɔ pälaa,

Lagɔ yo yɩ 'ylimö a ‑lu 'nyɛ.

Miɛ nɩɩ,

'saa Lagɔ 'kää 'ɔ tietiewaa 'nyɛɛ,

ɔ yonyɩ 'nyɛmö.

Nɩkpɛ a ‑mɔɔ zlɔnɩɛ 'mö Lagɔ a 'yila 'klʋ a dɔ'wʋʋ,

‑ɔ ‑kɔɔ pälaa,

Lagɔ yo yɩ 'ylimö a ‑lu 'nyɛ.

Miɛ nɩɩ,

'saa Lagɔ 'kää 'ɔ nɩkpaa 'nyɛɛ,

ɔ yonyɩ 'nyɛmö.

42 ‑Tiamö n nyanyɩɛ dɛ'ɛ 'dɩ nɩɩ,

'na ‑gänɩwaa gla'mö a ‑nʋ ‑ɔɔɔ dɛsɛ ‑kä,

sɛ ɔ glɩnɩɛ na ‑nɔ a za,

‑ɔ ‑kɔɔ 'nɩmänɩmänyujieyie 'nyɛɛ,

Lagɔ yo yɩ 'ylimö a ‑lu 'nyɛ.»