Maakö 13

Zezwii lɛ wa yi Lagɔbudu 'Kɔdʋʋ wlɛ

(Matie 24.1‑2; Lwiikö 21.5‑6)

Zezwii ‑wʋ ‑mä Lagɔbudu 'Kɔdʋʋ 'mö 'wlʋ dɔ'wʋ,

'n 'ɔ ‑gänɩwaa a gla'mö a ‑nʋ ‑bhlʋ yiɛ nɩɩ:

«‑Atʋ,

yɩɛ,

sɛɛ Lagɔbuduu nɛnɩɛ 'ylimöö,

kpɩɩ wa 'sɩbhänuä,

yɩ'ɩɛ ‑sɩbhä a sɛ ‑wʋ.»

2 'N Zezwii yoo 'dɩ 'nyɛ ɔ lɛ naa:

«‑Buduu ‑n yɩlɩɛ da'a 'wʋʋ,

kpiyi 'naa 'kä kpiyi 'klʋ tʋʋ,

‑maa wʋ 'wuë,

wlɛ wa 'kʋä wlɛ.»

'Pɩwʋ a 'ylibhɩɛdaa

(Matie 24.3‑14; Lwiikö 21.7‑19)

3 Zezwii gbää sa'a 'wëë,

'n ɔ yɩɛ ‑mä Olivieswii a ‑gägaa 'wlu sɛ glɩɛ mö.

‑Gäga 'la,

Lagɔbudu 'Kɔdʋʋ 'mö a gööä 'yi.

Piɛlɩ mɔ,

Zaakö mɔ,

Zaa mɔ,

'n Adlee,

wa 'yize wa glɩ ‑lɛ ɔ yɔwʋ,

'n wa yoo nimï 'yɩbhä nɩɩ:

4 «‑Atʋ,

nyɩanyɩ 'dɩ,

Lagɔbudu 'Kɔdʋʋ ‑wʋnyɩɩ wɛlɩɩ n bhïlaa,

n‑n gbää wa yu wlɛɛ,

‑zlɩmɛ yi 'kä bhä 'yli 'wlʋnɩ?

‑Lii 'wuë a 'ylibhɩɛtɛnyɩɩ,

ɛ ‑kä ɛ 'kä 'yli 'wlʋnɩɩ,

'saa ‑a 'kɛ bhä 'mö yɩbhlɩnɩ?»

5 'N Zezwii yuë 'dɩ 'nyɛ ɔ lɛ naa:

«A nɩ 'nɛmanɩ anyɩ 'wʋ,

‑bɛ nɩ tanyɩa dula.

6 ‑Maa nɩkpa a ‑bɛ wa yia 'yli 'wlʋ,

wa yia 'na nglɩɩ 'pä,

wa yia nɩɩ,

Kliisɩ,

Puënyɔɔ Lagɔ ‑sɛɛ ‑lɛ 'mö wa glɩnɩɛ nʋ.

Wa yia sa'a nɩkpa a ‑bɛ dula.

7 ‑Lɛ a 'tɛnyɩ 'la 'mö,

a yia tʋgwɩwɛlɩ 'nʋ.

‑Maa dlɩ nɩ tanyɩ 'mö wɔlɔnɩ,

ɛ'ɛ ‑bhö nyɩasɛ,

‑maa tʋ yia saa 'wuë gwɩ klɩpaa.

‑Li 'la wuë yi ghlɛ,

‑maa,

ɛ'ɛ ‑bhö ‑bhlɛ da'a 'pɩwʋ a 'ylibhɩɛtɛnyɩ mɛ.

8 Bhlɩ ‑mɛmɛɛ ‑nyɛ bhlɩ ‑mɛmɛɛ 'sɔ yia tʋ gwɩ,

'bhlɩlowli ‑mɔmɔɔ a ‑nʋä ‑nyɛ 'bhlɩlowli ‑mɔmɔɔ a 'sɔ,

wa yia'ɛ tʋ gwɩ.

'Bhlɩ a ‑bɛ ‑gömö a dʋdʋʋ yia tɩtlɛnɩ,

ngɔmʋgupegupe yia'ɛ yi.

‑Maa ‑mi'la 'wuë,

sɛɛ gbadɩnglɔ a 'wlusɛsʋ a gbaapögbaapɛ tɛɛ'ɛɛ,

‑sɩbhä ma‑a da'a.

9 Abhʋa na ‑nʋa,

a nɩ ‑ligba a 'kä ‑lɛ glɩ,

‑maa wa yeanyɩa ‑zijli 'nyɛ.

‑Mä Zwiiföwaa 'a Lagɔbïdii 'mö,

wa yeanyɩa ‑mä kwä wa 'kanyɩ 'sɛlɩ.

Sɛ a glɩnɩɛ na ‑nʋa a za,

wa yeanyɩa köbhä,

wa 'kanyɩ 'bhlɩlowluwa ‑nyɛ 'kämanɩwa 'kädɩ 'sɔ a 'yila 'klʋ 'nigba,

wa 'kanyɩ ‑zijli tu.

Nzɩɩ,

‑mä wa 'yila 'klʋ a 'kä na dɛ bhïla.

10 'Bhlɩbhëa 'wuë 'maa 'kä Lagɔ 'a 'Mänatɩtɩɩ 'nʋ 'wë,

'n 'pɩwʋ 'kää bhäla 'yli bhɩɛ.

11 ‑Mi'la miɛ da'a.

‑Maa wa ‑kaanyɩ ‑lɛ ‑zijlituwa a 'yila 'klʋ kwää,

'saa a 'kää bhïla a dɔ'wʋ,

dlɩ nɩ tanyɩ nyɩasɛ libho,

‑maa ‑lɛ a 'tɛnyɩ 'la ‑bhlʋ ‑kpɔ 'mö,

wɛlɩɩ Lagɔ 'kanyɩɛ dlɩ 'wʋ 'pää,

'mö a nɩ bhïla.

Anyɩgäsɛ abhʋa 'naa 'kä bhïla,

‑maa 'Wugɔmʋʋ 'Wlɩlɩ mɔɔ 'kanyɩɛ 'mö bhïlanɩ.

12 ‑Lɛ a 'tɛnyɩ 'la 'mö,

‑daayu yi ‑daayu tʋ kunɩ wa yo 'lɩbhä ɔ yi 'ku.

Dɩbawa yia ‑sɩbhä 'wa yuëa 'zʋmö.

Yuë ‑mumuë a'bhï,

wa yia wa ‑lowluwa 'mö 'bhɛlɔnɩ,

wa yuë tʋ kunɩ,

wa yuë 'lɩbhä wa yi 'ku.

13 Na za,

nɩkpaa 'wuë yeanyɩ ‑gblɩ,

‑maa nɩkpɛ a ‑mɔɔ 'nɩ 'na wɛlɩɩ kɛ'mö ‑sɛ ‑këë ‑ɔ ‑kä ‑mä 'gbë 'wʋ ghlɛɛ,

Lagɔ yo puë.

Zezwii yɛ 'klɩ 'kädɛɛ ‑ɛ 'kää yi a dɛ bhïla

(Matie 24.15‑28; Lwiikö 21.20‑24)

14 Wa laa ‑tiamö a 'zokwë ‑ɔ nyima Lagɔ a 'nglɩ mɔɔ 'kää 'yli 'wlʋnɩ.

Mä ɔ'ɔɔ a‑a ‑kä ɔ 'kä plɛɛ,

‑mä ɔ 'kää plɛ.

Wɛlɩ nɩ,

yɩ kä zɛmö.

Zaa,

‑ɔ ‑kɩɩ 'mö zɛlɩɩ,

ɔ nɩ 'päni dlɩ kɛ,

ɔ 'kɩa 'mö 'nʋ.

‑Lɛ a 'tɛnyɩ 'la 'mö,

Zwidee‑bhölɩɩ 'mö a ‑nʋa,

wa nɩ mö ‑mä ‑gägö 'wlu ‑guë.

15 ‑Ɔ ‑kä ‑lɛ 'ligbë 'mö glɩ,

'n ‑lɛ a 'tɛnyɩ 'la ‑kä ghlɛɛ,

ɔ nɩ tɩ ‑mä ‑budu 'mö plɛ ɔ 'kä ɔ ‑lu 'wʋ 'libhï a za,

‑maa ɔ nɩ futo cuu.

16 'N ‑ɔ ‑kä'ɛ 'lagblɛ 'mö ‑wʋ,

‑lɛ a 'tɛnyɩ 'la ‑kä ghlɛɛ,

ɔ nɩ tɩ ‑mä glɔ 'mö 'ɔ lekwii kie mö 'wë,

‑maa ɔ nɩ futo cuu.

17 ‑Lɛ a 'tɛnyɩ 'la 'mö,

gbadɩngwlɩɩ ‑nyɛ gwangwlɩɩ 'sɔ,

mʋa 'kää ngäzɩ 'wʋ ‑bhö tenyii.

18 Zaa,

a nɩ bhibhe Lagɔ ‑lɛ a ‑li 'la tɩa ‑bëbëyitɛnyɩ 'mö ghlɛ.

19 Ɛ'ɛ ‑bhö nyɩasɛ,

‑maa ‑Lɛ a 'tɛnyɩ 'la 'mö a 'zwɩzizee,

ɛ 'naa 'kä ‑sɩbhä a sɛ ‑wʋ,

'mö ɛ 'kää 'tɛɛ.

Sɛɛ Lagɔ 'maa 'kä a 'pɩwʋ a ‑lii 'wuë ‑bhɛɛ,

‑bɛ 'nɩɛ ‑bhlɛ tɛkäsɛ ‑sɩbhä a 'zwɩzize 'ylɩmö.

'N ‑bɛ 'naa 'kä'ɛ 'kwädlɩ ‑sɩbhä a 'zwɩzize 'ylɩmö.

20 ‑Maa,

‑Alowli Lagɔ,

'ɔ nɩkpaa ɔ gbäzɩɛ 'möö,

wa za,

ɔ yi 'tɛnyɩzokwë 'la 'mö a zila 'wʋ ‑sɛnɩ,

‑maa 'n ɛ 'nɩ ‑bhö a ‑sɩbhä,

nɩkpaa 'wuë 'yli wa 'kä a‑a bhɩɛ.

21 ‑Lɛ a zlɩ 'la 'mö,

'n nɩkpɛ ‑kä nɩɩ,

Puënyɔɔ Lagɔ ‑sɛɛ ‑lɛ,

mɔɔ mä'ä,

‑mɔmɔɔ ‑kä'ɛ nɩɩ,

mɔɔ ‑wʋä mä'a nʋʋ,

a nɩ ti dlɩ 'wʋ ‑kä.

22 ‑Maa sa'a a nɩkpa a ‑bɛ,

wa yi saa 'wuë 'yli 'wlʋnɩ.

Wa yi nɩɩ,

Kliisɩ,

Puënyɔɔ Lagɔ ‑sɛɛ ‑lɛ 'mö wa glɩnɩɛ nʋ.

‑Maa Lagɔ mɔɔ 'nuë ‑sɛ.

'N ‑mumuë yi'ɛ nɩɩ,

Lagɔ a 'möbhïlanɩwaa wa glɩnɩɛ nʋ.

‑Maa Lagɔ mɔɔ 'nuëë tie.

Nɩkpa 'la,

wa yi zɩzɛ 'pä,

ɛ 'kä nɩkpabhë dula.

‑Mä 'wa zɩzɛpäpʋ 'la 'mö,

wa yi ‑li 'mö yɛla,

wa 'kä Lagɔ a ‑nʋa dulamö.

23 ‑Maa n kanyɩa'ɛ wa dɔ'wʋ 'dɩ 'nyɛ 'wë zaa,

a nɩ ‑ligba 'kɩ,

a 'käa ‑lɛ glɩ.

Nɩkpɛ a ‑Yu yi 'bɩwʋ yi

(Matie 24.29‑31; Lwiikö 21.25‑28)

24 ‑Lɛ a 'tɛnyɩzokwë 'la a 'zwɩzize ‑kä 'plɩ 'wë cuu,

'ylʋvälaa yi 'klʋ ylumanɩ.

Cʋʋ 'naa 'kä lɩ.

25 ‑Zɛlɩɩ yi ‑mä zlɩ 'mö 'bhöö,

yɩ yi bhli.

'Saa ‑wʋä ‑mä zlɩ 'mö 'wuë,

yɩ yi bidibidi 'wlu 'mlamlanɩ.^a

26 ‑Mi'la 'wuë ‑käa'a 'plɩ 'wëë,

'n zlɩɩ lɛ 'kää nuë do,

Nɩkpɛ a 'Yu,

'n ɔ 'kä ‑mä 'bhöönɩ,

ɔ 'kä 'ɔ 'kämanɔ 'kɔdʋʋ 'mö yinɩ,

ɔ ‑wʋ 'ylʋväla a 'dɛlɩ a sɛ lɩ dɔ'wʋ,

'n ɔ 'kää yi,

nɩkpaa yo 'ylɩmö.

27 Ɔ ‑kä yii,

'n ɔ 'kää dʋdʋʋ a këtiea 'wuë 'wʋ Lagɔzuzukuu tie,

yɩ 'kä ɔ ‑nʋa saa 'wuë kie mö,

yɩ 'kʋä dɛ ‑bhlʋ 'wlu 'yɩbhanɩ.

Zezwii yɛ Fiigösuu a wɛlɩɩ 'wʋ pälɩ

(Matie 24.32‑44; Lwiikö 21.29‑33)

28 Fiigösuu,

'saa wʋ wɛlɩɩ 'cɩanyɩɛ,

a nɩ 'nwi sasɛ 'mö.

Su 'la,

wʋ ‑kä tɛpɔ,

wʋ ‑kä 'wʋ nɛmanɩɩ,

a ‑yi sɛ nɩɩ wʋ tlʋtlʋtɛnyɩɩ yɛ 'dio.

29 Sɛ ‑bhʋlʋ ‑kpɔ 'la,

‑sɩbhä ‑li 'la 'wuë n gaaa da'a a wɛlɩ ‑wʋä.

Yɩ ‑kä 'yli 'wlʋnɩ dɔ'wʋ ‑wʋʋ,

a nɩ yɩbhlɩnɩ sɛ nɩɩ,

Nɩkpɛ a 'Yu,

'ɔ yiyitɛnyɩɩ,

ɛ yɛ tenyii 'dio.

30 ‑Maa ‑tiamö n nyanyɩɛ dɛ'ɛ 'dɩ nɩɩ,

nɩkpaa ‑wa ‑bhölɩɛ ‑sɩkaa,

wa gla'mö a ‑mumuë 'naa 'kä ‑bhlɛ 'ku,

'n wa 'nɩɛ ‑li 'la 'wuë 'ylɩmö 'wëë.

31 Zlɩɩ ‑nyɛ dʋdʋʋ 'sɔ,

yɩ yi 'plɩ,

‑maa 'na bhïlawɛlɩɩ mɩɩ 'naa 'kää 'kwädlɩ 'plɩɩ.

32 ‑Maa zlɩɩ ‑nyɛ 'gïle 'la 'sɔ n 'kää 'mö yii,

‑bɛ 'niɛ ‑yi.

Lagɔzuzukuu 'niɛ ‑yi.

Yuu 'niɛ ‑yi,

'n ɛ 'nɩ ‑bhö Dɩbaa a 'yize mɔɔ.

33 Zaa,

a nɩ ‑ligba a 'kä ‑lɛ glɩ,

‑maa 'tɛnyɩ 'la,

a 'nɛɛ ‑yi.

34 A yɩɛ,

sɛ yɩ 'kää 'wʋ 'plɩ ‑sɩbhä ma‑a dɛ'ɛ:

Nɩkpɛ ‑bhlʋ 'kää lowlu 'mö möä yii,

'ɔ 'ligbëa 'mö ɔ tɩɛ 'ɔ libhonʋwaa yɔwʋ 'n ɔ yuëë bhʋlʋbhlʋ 'libhi 'yli 'zʋ,

'n ɔ yi'ɛɛ 'ligbëkʋnyɔɔ 'dɩ 'mö zʋ nɩɩ:

‑Kʋa sasɛ 'ligbëa,

‑maa tɩa ngämö.

35 Sɛ ‑bhlʋlʋ ‑kpɔ 'la,

a nɩ ‑ligba ‑sɩbhä a 'kä ‑lɛ glɩ.

‑Maa 'ligbëlowlii,

'tɛnyɩ ɔ 'kää 'mö yii,

a 'nɛa ‑yi.

‑Kidosɛ ɔ 'kä yi oo,

zlɩjijo'wʋ ɔ 'kä yi oo,

'zɔkpɔ 'pii 'mö ɔ 'kä yi oo,

a 'niɛ ‑yi.

36 Zɛmövusɛ ɔ 'kää yi.

‑Sɩbhä a za,

a nɩ tɩ ngämö.

37 Dɩɩ n zʋanyɩɛ dɛ'ɛ 'möö,

nɩkpaa 'wuë a ‑liɛ.

Sɛ'ɛ n gbää nɩɩ,

a nɩ ‑ligba a 'kä ‑lɛ glɩ.»