Matie 24

Zezwii lɛ wa yi Lagɔbudu 'Kɔdʋʋ wlɛ

(Lwiikö 21.5‑7)

Yɩ 'plɩɛ sa'a 'wëë,

'n Zezwii yiɛ ‑mä Lagɔbudu 'Kɔdʋʋ 'mö 'wlʋ,

ɔ ‑nyɛ 'ɔ ‑gänɩwaa 'sɔ.

Wa ‑wʋ mö dɔ'wʋ,

'ɔ ‑gänɩwaa lɛ naa,

‑Atʋ,

yɩɛ,

sɛɛ Lagɔbudu 'Kɔdʋʋ sɩbhää sasɛɛ.

2 Zezwii lɛ naa:

«‑Tiamö n nyanyɩɛ dɛ'ɛ 'dɩ nɩɩ,

‑budu nɩ a yɩlɩɛ dɛ'ɛ 'wʋʋ,

wlɛ wa 'kʋä wlɛɛ.

Kpiyi ‑bhlʋ a'bhë 'naa 'kä kpiyi 'klʋ tʋʋ.»

'Pɩwʋ ‑kä 'yli bhɩɛ yi a 'klɩyɩyɛ

(Maakö 13.3‑13; Lwiikö 21.7‑19)

3 Wa 'bhööä da'a 'wëë,

'n Zezwii yiɛ ‑mä Olivieswii a ‑gägaa 'wlu sɛ glɩɛ mö.

'N 'ɔ ‑gänɩwaa a 'yize yoo yɔwʋ 'dio,

wa lɛ naa:

«'Saa ‑n 'bhööä da'a Lagɔbudu 'Kɔdʋʋ a dɛ bhïlaa,

n‑n gbää wa yu wlɛɛ,

‑zlɩmɛ yɩ 'kä bhä 'yli 'wlʋnɩ?

‑Na'a 'kämanɔɔ a 'yliwlʋnɩzlɩɩ,

ɛ ‑nyɛ 'pɩwʋ a 'ylibhɩɛdaa 'sɔ,

‑lɛ a 'tɛnyɩ 'la,

ɛ ‑kä ghlɛɛ yii,

'saa ‑a 'kɛ bhä 'mö yɩbhlɩnɩ?»

4 Zezwii lɛ naa:

«A nɩ 'nɛmanɩ anyɩ 'wʋ,

‑bɛ nɩ tanyɩa dula.

5 ‑Maa nɩkpa a ‑bɛ yia 'yli 'wlʋ,

wa yia 'na nglɩɩ 'pä,

wa yia nɩɩ,

Puënyɔɔ Lagɔ ‑sɛɛ ‑lɛ 'mö wa glɩnɩɛ nʋ.

Wa yia sa'a nɩkpa a ‑bɛ dula.

6 ‑Lɛ a 'tɛnyɩ 'la 'mö,

a yia tʋgwɩwɛlɩ 'nʋ.

‑Maa dlɩ nɩ tanyɩ 'mö wɔlɔnɩ,

ɛ'ɛ ‑bhö nyɩasɛ,

‑maa tʋ yia saa 'wuë gwɩ klɩpaa.

‑Li 'la 'wuë yi ghlɛ,

‑maa,

ɛ'ɛ ‑bhö ‑bhlɛ da'a 'pɩwʋ a 'ylibhɩɛtɛnyɩ mɛ.

7 Bhlɩ ‑mɛmɛɛ ‑nyɛ bhlɩ ‑mɛmɛɛ 'sɔ yia'ɛ tʋ gwɩ,

'bhlɩlowli ‑mɔmɔɔ a ‑nʋä ‑nyɛ 'bhlɩlowli ‑mɔmɔɔ a ‑nʋä 'sɔ,

wa yia'ɛ tʋ gwɩ.

Ngɔmʋgupegupe yia yi.

'Bhlɩ a ‑bɛ ‑gömö a dʋdʋʋ yia'ɛ tɩtlɛnɩ.

8 ‑Maa ‑mi'la 'wuë,

sɛɛ gbadɩnglɔ a 'wlusɛsʋ a gbaapögbaapɛ tɛɛ'ɛɛ,

‑sɩbhä ma‑a.

9 Lɛ a 'tɛnyɩ 'la 'mö,

abhʋa na ‑nʋa,

wa yeanyɩa nɩkpa kä'mö plɩnɩ,

wa 'kanyɩ 'zwɩ zia,

wa 'kanyɩ 'lɩbhä a 'kä 'ku.

Sɛ a glɩnɩɛ na ‑nʋa a za 'bhlɩbhëa 'wuë yeanyɩa ‑gblɩ.

10 ‑Sɩbhä a za,

a gla'mö a ‑nʋa a ‑bɛ na dlɩtɛɛnɩgbʋ yuë dlɩ 'wʋ bhɩɛ.

Wa yi ‑gblɩgblɩnɩ,

wa yi wanyɩ 'wa ‑gblɩwaa kä'mö plɩplɩnɩ.

11 Nɩkpa a ‑muë Lagɔ 'nɩɛ tiee,

‑wa laa wanyɩ Lagɔ 'a 'möbhïlanɩwaa,

wa yi zumanɩ,

wa yi nɩkpa a ‑bɛ dula.

12 'Nyinylolii yi nɩkpa 'wlu 'mänanɩ tenyii,

‑sɩbhä a za,

nɩkpaa 'kɔkɔmlɛ,

wa 'bhɩa a ‑wawʋ yuë dlɩ zɛmö bhɩɛ 'lɩlɩlɩ.

13 ‑Maa ‑ɔ 'nɩ 'na wɛlɩɩ kɛ'mö ‑sɛ ‑këë ‑ɔ ‑kä ‑mä 'gbë 'wʋ ghlɛɛ,

Lagɔ yo puë.

14 ‑Mä bhlɩɩ a këtiea 'wuë 'wʋ,

'Mänatɩtɩɩ ‑yɩ bhïlaa 'pɩwʋ mää Lagɔ 'kämanɩɛ a dɛɛ,

‑mä wa 'kɩɛ bhïlanɩ,

nɩkpa 'wuë 'kɩɛ 'nʋ 'wë 'pɩwʋ 'kä 'yli bhɩɛ.

'Zwɩ 'kädɛɛ

15 ‑Maa Lagɔ a 'möbhïlanɩnyɔ Daniɛlɩ,

nɩkpɛ ɔ gaa a‑a,

wa laa ‑ɔ glɩnɩ ‑tiamö a 'zokwë,

‑ɔ nyima Lagɔ a 'nglɩ,

mɔɔ kää 'yli 'wlʋnɩ.

Bhlea a glɩnɩɛ Lagɔ 'a 'yize a ‑la,

‑lɛ ɔ 'kää plɛ.

Wɛlɩ nɩ yɩ kä zɛmö.

Zaa,

‑ɔ ‑kɩɩ 'mö zɛlɩɩ,

ɔ nɩ 'päni sasɛ dlɩ kɛ,

ɔ 'kɩ 'mö 'nʋ.

16 Lɛ a 'tɛnyɩ 'la 'mö,

Zwidee‑bhölɩɩ 'mö a ‑nʋa,

wa nɩ mö ‑mä ‑gägö 'wlu ‑guë.

17 ‑Ɔ ‑kä ‑lɛ 'ligbë 'mö glɩ 'n ‑lɛ a 'tɛnyɩ 'la ‑kä ghlɛɛ,

ɔ nɩ tɩ ‑mä ‑budu 'mö plɛ,

ɔ nɩ tɩ 'ɔ ‑lii kie mö 'wë,

‑maa ɔ nɩ futo cuu.

18 ‑Ɔ ‑kä'ɛ 'lagblɛ 'mö ‑wʋʋ,

ɔ nɩ tɩ ‑mä glɔ 'mö 'ɔ 'wʋpälekwii kie mö 'wë,

‑maa ɔ nɩ futo cuu.

19 ‑Lɛ a 'tɛnyɩ 'la 'mö,

gbadɩngwlɩɩ ‑nyɛ gwangwlɩɩ 'sɔ,

mʋa 'kää ngäzɩ 'wʋ ‑bhö tenyii.

20 Zaa,

a nɩ bhibhe Lagɔ,

‑lɛ a ‑li 'la,

yɩ tɩa ‑bëbëyitɛnyɩ 'mö ghlɛ,

yɩ tɩa'ɛ ‑gwlɛnɩzlɩ ghlɛ.

21 Ɛ'ɛ ‑bhö nyɩasɛ,

‑maa ‑lɛ a 'tɛnyɩ 'la 'mö a 'zwɩzizee,

ɛ 'naa 'kä ‑sɩbhä a sɛ ‑wʋ,

'mö ɛ 'kää 'tɛɛ.

Sɛɛ Lagɔ 'maa 'kä a 'pɩwʋ a ‑lii 'wuë ‑bhɛɛ,

‑bɛ 'nɩɛ ‑bhlɛ tɛkäsɛ ‑sɩbhä a 'zwɩzize 'ylɩmö.

'N ‑bɛ 'naa 'kä'ɛ 'kwädlɩ ‑sɩbhä a 'zwɩzize 'ylɩmö.

22 ‑Maa Lagɔ,

'ɔ nɩkpaa ɔ gbäzɩɛ 'möö,

wa za,

ɔ yi 'tɛnyɩzokwë 'la 'mö a zila 'wʋ ‑sɛnɩ,

‑maa 'n ɛ 'nɩ ‑bhö a ‑sɩbhä,

nɩkpaa 'wuë 'yli wa 'kä a‑a bhɩɛ.

23 ‑Lɛ a 'tɛnyɩ 'la 'mö,

'n nɩkpɛ ‑kä nɩɩ,

Puënyɔɔ Lagɔ ‑sɛɛ ‑lɛ mɔɔ mä'ä,

‑mɔmɔɔ ‑kä'ɛ nɩɩ,

mɔɔ ‑wʋä mä'a nʋʋ,

a nɩ to dlɩ 'wʋ ‑kä.

24 ‑Maa yiowaa ‑wa nʋä nɩɩ,

Puënyɔɔ Lagɔ ‑sɛɛ ‑lɛ 'mö wa glɩnɩ,

‑wa nʋ'ɛ nɩɩ,

Lagɔ a 'möbhïlanɩwaa wa glɩnɩɩ,

wa yia saa 'wuë 'yli 'wlʋ.

Nɩkpa 'la wa yi zɩzɛ 'kädɛ 'pä,

ɛ 'kä nɩkpabhë dula wa 'kʋä Lagɔnɩkpa 'mö 'wʋ 'libhï.

‑Mä 'wa zɩzɛpäpʋ 'la 'mö,

wa yi ‑li 'mö yɛla,

wa 'kä Lagɔ a ‑nʋa a'bhï dulamö.

25 ‑Maa n kanyɩa'ɛ wa dɔ'wʋ 'dɩ 'mö 'zʋ 'wë zaa,

a nɩ ‑ligba 'kɩ a 'käa ‑lɛ glɩ.

26 ‑Sɩbhä a za,

'n wa ‑kaanyɩ 'dɩ 'nyɛ nɩɩ:

A nɩ mö ‑mä 'muse 'klʋ,

‑maa Puënyɔɔ Lagɔ ‑sɛɛ ‑lɛ,

ɔ yɛ ‑mä 'yli 'wlʋnɩɩ,

a nɩ tɩ ‑mä mö.

'N wa ‑kä'ɛ nɩɩ ɔ yɛ dɛ'ɛ zizo nʋʋ,

a nɩ ti dlɩ 'wʋ ‑kä.

27 ‑Maa Nɩkpɛ a 'Yu,

'ɔ yiyizlɩɩ ‑kä ghlɛɛ,

sɛɛ ‑gbägbadɛ a 'dɛlɩ ngla'ɛ zlɩ 'wuë 'wʋʋ,

‑sɩbhä nɩkpa 'wuë 'kɔɔ 'ylɩmö.

28 Ɛ'ɛ ‑bhö nyɩasɛ,

‑maa wa lɛ naa:

Dɛɛ ‑gäzɛ pöä,

‑lɛ kökaa yɩbhää 'wlu.

Zezwii lɛ ɔ yi 'bɩwʋ yi

(Maakö 13.24‑27; Lwiikö 21.25‑28)

29 ‑Lɛ a 'tɛnyɩzokwë 'la a 'zwɩzize ‑kä 'plɩ 'wë cuu,

'ylʋvälaa yi 'klʋ ylumanɩ.

Cʋʋ 'naa 'kä lɩ.

‑Zɛlɩɩ yi ‑mä zlɩ 'mö 'bhöö,

yɩ yi bhli.

'Saa ‑wʋä ‑mä zlɩ 'mö 'wuë,

yɩ yi bidibidi 'wlu 'mlamlanɩ.^a

30 ‑Mi'la 'wuë ‑käa'a 'plɩ 'wëë,

'n 'saa a 'kää 'ylɩmö a 'kä sɛ ‑yi nɩɩ,

Nɩkpɛ a 'Yu ‑wʋ yi dɔ'wʋʋ,

'n wʋ 'kää ‑mä zlɩ 'mö 'yli 'wlʋ,

mä'ä dʋdʋ 'wʋ a ngäya 'wuë yi 'wi.

Yɩ yi Nɩkpɛ a 'Yu 'ylɩmö,

ɔ ‑wʋ 'ylʋväla a 'dɛlɩ a sɛ lɩ dɔ'wʋ,

'n ɔ 'kää ‑mä zlɩ 'mö 'bhöö,

ɔ 'kä 'ɔ 'mötɛɛnɔ 'kɔdʋʋ 'mö yinɩ.

31 'Ɔ lɛglɛɛ 'kädɛɛ,

'n ɛ 'kää gbä,

'ɔ Lagɔzuzukuu,

'n ɔ 'kɩɛ ‑mä dʋdʋ a këtiea 'wuë 'wʋ tie,

yɩ 'kä ɔ ‑nʋa saa 'wuë kie mö,

yɩ 'kʋä dɛ ‑bhlʋ 'wlu 'yɩbhanɩ.

Fiigösuu a ninea a zɛmösɛsaa

(Maakö 13.28‑32; Lwiikö 21.29‑33)

32 Fiigösuu,

'saa wʋ wɛlɩɩ 'cɩanyɩɛ,

a nɩ 'nwi sasɛ 'mö.

Su 'la,

wʋ ‑kä tɛpɔ,

wʋ ‑kä 'wʋ nɛmanɩɩ,

a ‑yi sɛ nɩɩ wʋ tlʋtlʋtɛnyɩɩ yɛ 'dio.

33 Sɛ ‑bhʋlʋ ‑kpɔ 'la ‑sɩbhä ‑li 'la 'wuë n gaaa da'a a wɛlɩ ‑wʋä.

Yɩ ‑kä 'yli 'wlʋnɩ dɔ'wʋ ‑wʋʋ,

a nɩ yɩbhlɩnɩ sɛ nɩɩ,

'na yiyitɛnyɩɩ ɛ yɛ tenyii 'dio.

34 ‑Maa ‑tiamö n nyanyɩɛ dɛ'ɛ 'dɩ nɩɩ,

nɩkpaa ‑wa ‑bhölɩɛ ‑sɩkaa,

wa gla'mö a ‑mumuë 'naa 'kä ‑bhlɛ 'ku,

'n wa 'nɩɛ ‑li 'la 'wuë 'ylɩmö 'wëë.

35 Zlɩɩ ‑nyɛ dʋdʋʋ 'sɔ,

yɩ yi 'plɩ,

‑maa 'na bhïlawɛlɩɩ mɩɩ 'naa 'kää 'kwädlɩ 'plɩɩ.

‑Bɛ 'nɩɛ 'pɩwʋ a 'ylibhɩɛzlɩ ‑yi

(Maakö 13.32‑37; Lwiikö 17.26‑30,34‑36)

36 ‑Maa zlɩɩ ‑nyɛ 'gïle 'la 'sɔ n 'kää 'mö yii,

‑bɛ 'niɛ ‑yi.

Lagɔzuzukuu 'niɛ ‑yi.

Yuu 'niɛ ‑yi,

'n ɛ 'nɩ ‑bhö Dɩbaa a 'yize mɔɔ.

37 Zaa,

Nɩkpɛ a 'Yu,

ɔ ‑kä yie yii,

sɛɛ nɩkpaa zʋ a‑a Nowee a 'tɛnyɩ 'möö,

‑sɩbhä wa 'kää 'zʋ.

38 'Tɛnyɩ 'la 'mö dɛɛ nyuu 'nɩa'a ‑bhlɛ 'bhlɩbhëa 'wʋ yiee,

nɩkpaa ‑wa ‑bhölɩ a‑a,

lililibho,

nʋnɩmälibho,

nglʋkwälibho,

ghïlamölibho,

'mo wa kä a‑a.

'N 'gɔlʋ 'kɔdʋʋ ‑wʋ 'kä ‑bhɩɛɛ ‑buduu,

Nowee yi a‑a wʋ tɛlɩtɛlɛ zɛmö bhɩɛ,

'n ɔ yi a‑a ‑mä wʋ 'mö plɛ,

39 wa dila 'nɩɛ dɛ pö 'lɩlɩlɩ,

'n 'nyizakwëa yuë a‑a zɛmö ‑vu,

'n wa yi a‑a 'yli bhɩɛ.

Sɛ ‑bhʋlʋ ‑kpɔ 'la,

Nɩkpɛ a 'Yu,

ɔ ‑kä yie yii,

‑sɩbhä nɩkpaa 'kää 'zʋ.

40 ‑Lɛ a 'tɛnyɩ 'la 'mö,

nɩkpa 'sɔ,

wa yi 'lagblɛ ‑bhlʋ 'mö ‑wʋ,

wa yi ‑bhlʋ 'wʋ 'libhï,

‑mɔ'la yi ‑lɛ tʋʋ.

41 'Ngwlɩ 'sɔ,

wa yi libhï dɔ'wʋ ‑wʋ,

wa yi ‑bhlʋ 'wʋ 'libhï,

‑mɔ'la yi ‑lɛ tʋʋ.

42 Zaa,

a nɩ ‑ligba a 'kä ‑lɛ glɩ.

‑Maa 'tɛnyɩ a ‑Lowli 'kää 'mö yii,

a 'nɛɛ ‑yi.

43 Wɛlɩɩ n 'kanyɩɛ dɛ'ɛ 'nyɛɛ,

a nɩ köbhɩɩ sasɛ 'yukwli.

Sɛ'ɛ n gbää nɩɩ,

‑budulowli ‑kä a sabʋgïle ‑mɛ 'mö 'winyɔ 'kɔ 'wi 'wʋ ghlie ‑yii,

ɔ yi a ‑gä,

'winyɔ tɩa ‑mä 'ɔ ‑buduu 'mö plɛ.

44 ‑Sɩbhä a za,

abhʋa na ‑nʋa a nɩ ‑ligba a 'kä ‑lɛ glɩ,

‑maa Nɩkpɛ a 'Yu,

zlɩɩ a'aa ‑tɔnɩɩ,

'mö ɔ 'kää 'mö yi.

Libonʋnyɔ a ‑libhonʋnyɔɔ ‑nyɛ libonʋnyɔzokwëa 'sɔ a ninea

(Lwiikö 12.41‑48)

45 Nɩkpɛ ‑kä libhonʋwa a ‑bɛ ‑kä,

ɔ ‑kä lowlu 'mö möä yii,

'ɔ libhonʋwaa a gla'mö a ‑mɔɔ 'nɛɛ,

‑ɔ nʋä sasɛ libho,

ɔ kää dlɩ 'wʋʋ,

'mö ɔ tɩɛ ‑lɛ.

Nzɩɩ ɔ ‑kä mö 'wëë,

zila 'wuë 'mö,

lilitɛnyɩ ‑kä ghlɛɛ,

libhonʋnyɔ 'la,

ɔ 'kä ɔ 'bhɩalibhonʋwaa lilea dilanɩ wa 'kä li.

46 ‑Lɛ a libhonʋnyɔ 'la,

ɔ 'bhidɩba ‑kä lɛ 'bhöö 'lɛ,

ɔ ‑kä libhoo nʋ dɔ'wʋ ‑wʋʋ,

'ɔ ‑jɔlʋ!

47 ‑Tiamö n nyanyɩɛ dɛ'ɛ 'dɩ nɩɩ,

ɔ 'bhidɩba yo 'ɔ ‑lii 'wuë 'yli 'zʋnɩ.

48 ‑Maa libhonʋnyɔ 'la,

'n ɔ ‑kä ɔbhlɩ 'kpʋkpʋnyɔ glɩnɩɩ,

‑mä ɔ dlɩ zɛmö,

sɛ'ɛ ɔ 'kää nɩɩ:

Na 'bhidɩba 'nɩɛ ɔ 'kä ‑bhlɛ ‑sɩkaa yi.

49 'N ɔ 'kää ɔ 'bhɩa 'lɩbhä,

ɔ 'kä nʋnɩmäwa ‑mumuë wäzɩ,

ɔ ‑nyʋä 'sɔ wa 'kä li,

wa 'kä wanyɩ nʋ 'wʋ lua.

50 ‑Maa zlɩɩ 'n 'gïlee,

dɛɛ ɔ'ɔɔ ɔ 'bhidɩba 'wʋ pö 'lɩlɩlɩɩ,

‑lɛ ɔ 'kää yinɩ.

51 Ɔ ‑kä yii,

libhonʋnyɔ 'la,

ɔ yi gbʋ 'kɔdʋ ghlɩ.

'Kwlɩsɔkäwaa 'wuë,

mä wa möä,

ɔ yo ‑mä kwä.

‑Mä ɔ 'kää 'klʋ 'slunɩ,

ɔ 'kä mä 'winɩ.»