Maakö 3

Zezwii yɛ nɩkpɛ ‑gwlɛnɩzlɩ yɛmanɩ

(Matie 12.9‑14; Lwiikö 6.6‑11)

'N Zezwii yiɛ'ɛ ‑mä Lagɔbuduu 'mö plɛ.

Nɩkpɛ ‑bhlʋ ‑wʋmö a ‑mä,

‑kwätasɩɛka ɔ kää.

2 Zezwii plɛɛ ‑mää,

kä'mö wa yiloo,

'n ɔ ‑käa nɩkpɛ 'la ‑gwlɛnɩzlɩ yɛmanɩɛ yi a za,

wa 'kɔ ‑zijle 'nyɛ.

3 Nɩkpɛɛ ‑ɔ kää ‑kwätasɩɛkaa,

'n Zezwii yoo wäzɩ.

Ɔ lɛ naa:

«‑Sɔ 'wʋ ‑n 'kä dɛ'ɛ nɩkpabhë a 'yila 'klʋ yi.»

4 'N ɔ yuëë nimï 'yɩbhä nɩɩ:

«Wa kä ɔ wa 'kä ‑gwlɛnɩzlɩ ‑li a ‑li nʋ?

‑Maa 'zoku 'mö wa kä ɔ wa kä nʋ ‑a?

Wa kä ɔ wa 'kä ‑gwlɛnɩzlɩ nɩkpɛ puë?

‑Maa 'yi wa 'kɔ bhä 'tatinɩ ɔ 'kä 'ku ‑a?»

Ɔ 'yɩbhʋää sa'a nimïï,

‑bɛ 'nɩɛ gbʋ ‑dɩ.

5 'N ɔ yuëë 'klɛsɛ ‑gömö yɩlɩ,

sɛɛ 'wa dilaa 'tunɩɛ 'mö a za,

'n swɩ a'bhë yoo yɔwʋ 'kunɩ,

'n ɔ yiɛ ‑kwätasɩɛkakänyɔɔ 'dɩ 'nyɛ,

nɩɩ:

«Plu ‑na'a sɔɔ 'mö.»

'N nɩkpɛɛ yiɛ sɔɔ 'mö plu,

'n 'ɔ kätɩkpaa yiɛ yɛmanɩ.

6 Falizɩɛwaa ‑wa ‑wʋmö a‑a ‑mä,

'n wa yiɛ ‑mä 'wlʋ.

'N wa yiɛ Eloodɩ 'a ‑zɩkpaa ‑mä ghlɩ,

wa ‑nyʋä 'sɔ 'n wa yiɛ ylɩ plɛ.

Sɛ wa 'kää 'zʋ wa 'kä Zezwii 'lɩbhä ɔ 'kä 'kuu,

wa 'kä ‑sɩbhä sɛ tɛlɩ.

Zezwii yɛ nɩkpa a ‑bɛ yɛmanɩ

(Matie 4.23‑25; 12.15‑16; Lwiikö 6.17‑19)

7 Zezwii ‑nyɛ 'ɔ ‑gänɩwaa 'sɔ,

wa 'bhööä ‑lɛ,

'n wa yiɛ ‑mä Galilee a 'nyu 'kɔdʋʋ a saa mönɩ.

Nɩkpa a 'kɔkɔmlɛ ‑gënuë.

‑Mumuë 'bhöönɩ Galilee‑bhölɩɩ ‑nyɛ Zwidee‑bhölɩ 'sɔ 'mö.

8 ‑Mumuë 'bhöönɩ Zeluzalɛɛmö,

‑mumuë 'bhöönɩ Yidumee,

‑mumuë 'bhöönɩ ‑mä Zludɛɛ ‑gömö,

‑mumuë 'bhöönɩ ‑mä Tiilɩ ‑nyɛ Sidɔɔ 'sɔ a ‑kʋkʋ yɔwʋ a ‑gwlɩ 'mö.

Nɩkpa a 'kɔkɔmlɛ,

wa 'nʋä 'saa Zezwii nʋä a 'tɩtɩɩ,

'n wa yoo yinɩ.

9 'N ɔ yiɛ 'ɔ ‑gänɩwaa 'dɩ 'nyɛ nɩɩ:

«A nɩ mö na 'gɔlʋ kie,

wa ‑tɩɩa ‑gbʋgbʋ nuë 'sunɩ.»

10 Guzuwaa a ‑bɛ Zezwii yɛmanɩɛ zaa,

‑waaa ‑bhlɛ yɛmanɩɛ 'wʋ wa bhlinɔɔ,

wa yɩbhä wa 'kɔ kɛ zɩ.

11 ‑Wa kää zuzukuzoku ‑gömöö,

wa ‑kɔɔ 'ylɩmöö,

‑lɛ ɔ dlɩ 'mö ‑lɛ wa pää ‑kokomïladigbï glu,

'n yɩ kpaa 'mö,

'n yɩ nʋä:

«Lagɔ 'a yuu mö ‑n glɩnɩ!»

12 ‑Maa Zezwii,

yɔwʋkanɩsɛ ɔ nyɛɛ zuzuku 'la 'dɩ nɩɩ,

yɩ nɩ tɩ nɩkpa 'saa ɔ glɩnɩɛ sʋlʋnɩ.

Zezwii yɛ 'ɔ tietiewaa kʋgbä 'sɔ ‑kpɔ ‑sɛ

(Matie 10.1‑4; Lwiikö 6.12‑16)

13 ‑Mi'la 'plɩɛ 'wëë,

'n Zezwii yiɛ ‑gäga ‑bhlʋ 'wlu mö.

‑Muë ɔ yɩbhää 'n ɔ yuëë wäzɩ,

'n wa yoo ‑mä ghlɩ.

14 ‑Mä wa gla'mö,

ɔ ‑sɛ ‑mä nɩkpa kʋgbä 'sɔ,

['mö ɔ laa 'ɔ tietiewaa] wa 'kɔ 'kwädlɩ ‑gänɩ ɔ 'kʋä tie wa 'kä Lagɔ 'a 'Mänatɩtɩɩ bia.

15 Wa 'kä ɔ 'nglɩ 'mö nɩkpa zuzukuzoku ‑gömö kpëti.

16 Wa kʋgbä 'sɔ ‑kpɔ,

'wa nglɩɩ miɛ dɛ'ɛ:

Simɔɔ ɔ 'pää Piɛlɩ mɔ,

17 Zebedee ‑yowluwa Zaakö ‑nyɛ ɔ ‑daayu Zaa 'sɔ ɔ 'pää Buanɩzɛɛzɩ.

‑Yɩ sɛɛ zɛmö nɩɩ,

‑gbägbadɛ a 'yuë muë,

18 Adlee mɔ,

Filiipö,

Batlemii,

Matie,

Tomaa,

Alɩfee yowli Zaakö mɔ,

Tadee,

Simɔɔ ‑ɔ ‑wʋmö a‑a ‑mä ‑zɩkpaa wa laa Zɛlɔɔtɩ^a 'mö mɔ,

19 'n Zwidaa Yisikalio ‑ɔ 'kää zɩkö Zezwii plɩɩ.

Zezwii a ‑lowluwa lɛ ɔ 'wlumö yɛ nyimo

20 'N Zezwii yiɛ 'ligbë 'mö mö.

'N nɩkpa 'kɔkɔmlɛ yi'ɛɛ 'sɔ ‑lɛ ɔ yɔwʋ 'wlu 'titanɩ.

'Wa zunɔɔ a za,

Zezwii ‑nyɛ 'ɔ ‑gänɩwaa 'sɔ,

wa'a ghlɩ 'tɛnyɩ wa 'kä li.

21 Zezwii 'a ‑kosu yɔwʋ a ‑nʋa 'nʋä ɔ 'dɩɩ,

wa ‑tɔnɩ wabhlɩ ɔ 'wlumö yɛ nyimo,

zaa 'n wa yiɛ mö wa ‑nyɔɔ 'kä yi.

Zezwii yɛ Gböö a 'cɩawaa 'a wɛlɩɩ ‑gömö ‑sɛ

(Matie 12.22‑32; Lwiikö 11.14‑23; 12.10)

22 Gböö a 'cɩawaa ‑wa 'bhöönɩɛ Zeluzalɛɛmö lɛ:

«Zuzukuzoku a 'kifi Bɛzebilɩ mɔɔ ‑wɔɔ ‑gömö,

mɔɔ nyɔɔ 'mötɛɛnɔ 'n ɔ kpëtie zuzukuzoku nɩkpa ‑gömö.»

23 Zaa,

n Zezwii yuë wäzɩ 'n ɔ yuë 'nine 'pänɩ.

Ɔ lɛ naa:

«Sɛɛ Sataa 'kä bhä Sataa kpëti nɩ?»

24 'N ɔ yiɛ'ɛɛ nɩɩ:

«'Bhlɩ ‑bhlʋ 'mö a nɩkpa ‑kä 'ylimö ‑känɩ,

wa ‑kä wa 'yize tʋ gwɩɩ,

‑pa wa saa 'kää 'yli bhɩɛ.

25 ‑Kosu ‑bhlʋ yɔwʋ a nɩkpa ‑kä 'mö donɩ,

‑pa wa bhɩɛ 'yli.

26 Zaa,

Sataa ‑kä ɔnyɩ tʋ ‑lɛ,

ɔ ‑nyɛ ɔ ‑nʋa 'sɔ wa ‑kä 'ylimö ‑känɩ ɔ 'naa 'kä gwälɛ,

'yli ɔ 'kää bhɩɛ.

27 Nɩkpɛ 'nɩɛ bhɛnɩ ɔ 'kä kanɩnyɔ a ‑budu 'mö plɛ nzɩɩ ɔ 'kä ‑mä a ‑lii 'wuë 'wʋ 'libhi 'n ɔ 'nɔ gwa 'wëë.

Ɔ ‑kɔɔ gwa 'wëë,

ɔ bhɛnɩ ɔ 'kä yɩ 'wuë 'wʋ 'libhï.

28 ‑Tiamö ‑n nyanyɩɛ 'dɩ nɩɩ,

nɩkpɛ yi ‑lizoku a kii 'wuë nʋ oo,

ɔ yi Lagɔ a dɛ wɛlɩzoku bhïla oo,

Lagɔ bhɛnɩ ɔ 'kä yɩ gbʋ 'yi 'tatinɩ.

29 ‑Maa nɩkpɛ a ‑mɔɔ ‑kä 'Wugɔmʋʋ 'Wlɩlɩ a dɛ wɛlɩzoku bhïlaa,

‑lɛ a 'nyinyloli 'la a gbʋʋ,

Lagɔ 'naa 'kʋ 'yi 'tatinɩ,

wʋ yo 'kwädlɩ ‑gömö ‑wʋ 'yize.»

30 Nyɩasɛ Zezwii 'nuëë ‑sɩbhä 'dɩ nyɛ,

‑maa wa lɛ zuzukwëzokwë ɔ kää ‑gömö,

nza ɔ 'nyʋää ‑sɩbhä 'dɩ.

Zezwii 'a ‑tiamö a waa

(Matie 12.46‑50; Lwiikö 8.19‑21)

31 Zezwii ‑wʋ ‑bhlɛ wɛlɩ 'la bhïla dɔ'wʋ,

ɔ ‑daayuë ‑nyɛ ɔ ‑da 'sɔ,

'n wa yiɛ yi.

Wa 'nɩgbö ‑mä 'pɩwʋ,

'n wa yoo nɩkpɛ 'wʋ tie.

32 Nɩkpa a 'kɔkɔmlɛ ‑binɔɔ,

'n nɩkpɛɛ wa tie a‑a yoo 'dɩ 'nyɛ nɩɩ:

«Yɩɛ,

‑na ‑da mɔ,

‑na nyɩbhɛlʋdaayuë muë 'n ‑na nglʋdaayuë,

wa 'nɩgbö ‑mä 'pɩwʋ,

wa yɩbhä wa ‑kamö 'ylɩmö.»

33 Zezwii lɛ naa:

«‑Mɔ ‑lɛ bhä na ‑da,

'n ‑muë ‑lɛ bhä na ‑daayuë 'nɩ?»

34 Ɔ yɩlɩɛ nɩkpaa ‑wa ‑binɔɔ ‑gömö ‑këë,

ɔ lɛ naa:

«A yɩɛ,

na ‑da ‑nyɛ na ‑daayuë 'sɔ muëë da'a.

35 Sɛɛ Lagɔ gbää ‑ɔ nɛmöä ‑sɩbhä mɔɔ glɩnɩɛ na ‑da,

mɔɔ glɩnɩɛ na nyɩbhɛlʋdaayu,

mɔɔ glɩnɩɛ na nglʋdaayu.»