2 Timotee 1

'Sɔnabɔgʋʋ Pɔɔlʋ 'cɛlɩɛ

Timotee

'wʋʋ

Bhälɩwɛlɩɩ

‑Amö Pɔɔlʋ,

‑amö Lagɔ ‑sɛɛ ‑lɛ,

n 'kä Zezwii Kliisɩ a tietienyɔ glɩnɩɩ,

‑amöö cɛlɩɛ dɛ'ɛ 'bɔgʋ nɩ.

‑Tiamö a ‑bhölɩbhölɛɛ Lagɔ gbää ɔ 'kä Zezwii Kliisɩ a za nɩkpa 'nyɛɛ,

n 'kä ɛ wɛlɩɩ bia,

nza Lagɔ ‑saaa ‑lɛ.

2 ‑Nmö na dlɩsɛkäyu Timotee,

‑nmö n cɛlɩɛ dɛ'ɛ 'wʋ.

‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

dlɩzɛmönanɔɔ,

'nyupälɩɩ 'n 'pʋpʋɛɛ ‑yɩ 'bhöönuëë 'möö,

yɩ nɩ ghälamö 'wʋ.

Pɔɔlʋ bhälɩ Lagɔ Timotee a za

3 Lagɔ ‑aa dɩbawa a dɩbawa bʋbɔ a‑a,

'mö n bʋbɔmö'ɛɛ na a,

ɔ dɔ'wʋ 'na dlɩɩ 'nɩɛ 'mö ‑dlinɩ.

Sɛɛ zlɩ zɩɛ,

sɛɛ swe yluä,

n ‑kɔɔ 'kwädlɩ bhibhee,

‑na 'wlumö n bhibhemöä 'n n bhälɔɔ ‑na za.

4 ‑Zlɩ n lɛ ‑kamöä yɔwʋ 'bhööä yi a sɛ ‑n 'wiɛ 'mɩɔɔ,

n'n‑ä ‑bhlɛ ‑sɩbhä 'wʋ dlʋ,

na'bhë ‑na 'tʋ lɩbhaa tenyii.

Zaa,

‑zlɩ ‑a ‑kä 'wʋ 'sɔ 'wʋ gbanɩɩ,

yɩ ‑yii tenyii 'mäna 'wʋ ‑bhö.

5 Sɛ ‑n 'tɛɛnɩɛ ‑tiasɛ Lagɔ dlɩɩ,

‑sɩbhä ‑nɩɩɛ ‑bhlɛ dlɩ 'wʋ 'mɔlɔ.

‑Na ‑da 'kɔdɔ Loyiisɩ ‑nyɛ ‑na ‑da Eniisɩ 'sɔ,

‑sɩbhä wa 'tɛɛnɩmö a 'yɛɛ wabhlɩ Lagɔ dlɩ.

N ‑yi sɛ nɩɩ,

wa saa,

‑sɩbhä ‑n 'tɛɛnɩmɔ'ɛɛ ‑naa dlɩ.

6 ‑Sɩbhä a za n ligbamöä dɛ'ɛ nɩɩ:

‑Zlɩ n zʋʋmöä kätɩkpö 'wlu a 'nyupälɩɩ Lagɔ ghälamöä 'wʋʋ,

yɩ nɩ ‑wʋmö ‑gömö 'yize.

7 Lagɔ,

'ɔ 'Wugɔmʋʋ ɔ zʋʋnyɩɛ ‑gömöö,

ɔ ‑nɩnyɩɛ nganɔ ku 'mö zʋ,

‑maa mɔɔ käa 'nglɩ a‑a 'tɛmanɩɛ 'yli yɔwʋ,

a‑a kää ‑wawʋ dlɩ zɛmö,

a‑a ‑yiɛ ‑anyɩ a ‑susɛ.

Pɔɔlʋ lɛ Timotee nɩ nyɔnʋ Lagɔwɛlɩɩ kɛ

8 Timotee,

‑Alowli Zezwii,

‑n 'kä ɔ 'dɩ nɩkpa 'nyɛ a dɔ'wʋ,

zʋ nɩ ‑tɩmö 'lɩbhä.

Na'bhë ‑amöö ‑wʋä dɛ'ɛ ɔ za ‑jie 'möö,

zʋ nɩ ‑tɩmö'ɛ na za 'lɩbhä.

‑Maa sɛ n yɩɛ 'ɔ 'Mänatɩtɩɩ a za 'klɩɩ,

‑n 'kä ‑sɩbhä 'klɩ 'yɩmö a dɔ'wʋ tɩ nimï ‑sɛ.

'Tɛɛnɩ Lagɔ 'a 'mötɛɛnɔɔ dlɩ.

9 Lagɔ mɔɔ puëanyɩɛ,

mɔɔ ‑sanyɩɛ ‑lɛ ‑a 'kä ɔ ‑nʋä glɩnɩ.

Ɛ'ɛ ‑bhö sɛɛ ‑a'a nʋnʋlii nɛnɩ a za,

‑maa 'ɔ slɛlɛɛ ɔ 'pää ‑a kä 'pʋ a za,

ɛ ‑nyɛ 'ɔ ngäzɩdlɩɩ 'sɔ a za‑a.

'Pɩwʋ a ‑lii 'wuë,

ɔ 'niɛ a ‑bhlɛ 'wäla,

'n ɔ yi a‑a Zezwii Kliisɩ a bɔɔmö a za ‑aa ngäzɩdlɩ 'pä.

10 ‑Aa Puënyɔ Zezwii Kliisɩ,

ɔ yiɛ mä'ä dʋdʋ 'wʋʋ,

‑lɛ yɩ 'wlʋnɩɛ ‑sɩbhä 'yli.

Mɔɔ bhɩaa 'kwie a 'mötɛɛnɔ 'yli,

sɛɛ nɩkpɛ 'kää 'pɩwʋ mää 'naa 'kää 'yli bhɩɛ ghlɩɩ,

'ɔ 'Mänatɩtɩɩ,

mɩɩ nyɩanyɩɛ ‑sɩbhä 'dɩ.

11 'Mänatɩtɩ 'la,

Lagɔ mɔɔ 'zʋaaa yɩ biabianyɔ,

ɔ tietienyɔ 'n yɩ 'cɩanyɔ 'wʋ.

12 ‑Sɩbhä a za n ‑wʋä zwɩ nɩ 'wuë zi dɔ'wʋ.

‑Maa yɩ 'wuë 'mö,

yɩ ‑nɩɩɛ zʋ 'wʋ ‑bhö,

ɛ'ɛ ‑bhö nyɩasɛ,

‑maa n ‑yi na a ‑mɔ n 'tɛɛnɩ dlɩɩ.

N ‑yi sɛ nɩɩ,

ɔ bhɛnɩ ɔ ‑kaa ‑su ‑këë 'ɔ yiyizlɩɩ 'kä ghlɛ,

nzɩɩ 'ɔ wɛlɩɩ ‑yɩnyɩɩ libho ɔ nyɩaaa,

yɩ tɩa nyimo.

13 Lagɔ 'a wɛlɩ a ‑wɛlɩɩ n nyɩamöä,

mö ‑n nɩ yɩlɩ 'klʋ.

‑Glɛ sasɛ Zezwii Kliisɩ 'wʋ,

nzɩɩ ɔ dlɩtɛɛnɩtɛnɛ ‑nyɛ ‑wawʋ 'sɔ,

‑n tia kɛ'mö ‑sɛ.

14 Sɛ'ɛ n gbää nɩɩ,

'saa 'wuë Lagɔ nyɩamöä,

'zʋni sasɛ 'yli.

'Wugɔmʋʋ 'Wlɩlɩ ‑ɔ ‑wʋnyɩɛ ‑gömöö,

ɔ ‑yimö ‑lɛ a 'mötɛɛnɔ 'nyɛ.

15 ‑N ‑yi sɛ nɩɩ,

Zezwii a ‑nʋa ‑wa ‑wʋä ‑mä Azii‑bhölɩɩ 'möö,

wa 'wuë,

wa ‑kaa nimï 'bhöö.

‑Mä wa gla'mö,

‑mä Fizɛɛlɩ ‑nyɛ Ɛmozɛɛnɩ 'sɔ a'bhë ‑wʋä.

16 Onezifɔɔ ɔbhlɩ,

ɔ ‑nyɛ 'ɔ ‑kosu yɔwʋ a ‑nʋa 'sɔ,

Lagɔ nɩ 'pʋä 'nyu.

Ɛ'ɛ ‑bhö nyɩasɛ,

‑maa ɔ ‑kaa ‑bɛ 'wʋ swɩ nyɛmʋ 'mö 'pä.

'Na sɛ n ‑wʋä dɛ'ɛ ‑jie 'möö,

‑sɩbhä 'nɔɔ zʋ 'wʋ ‑bhö.

17 ‑Maa mä'ä Ghlɔɔmö,

mä n ‑wʋä dɛ'ɛ ‑jie 'möö,

ɔ yiɛ ‑mä,

sɛ ɔ tɛlɩɩɛ ‑këë,

'n ɔ ‑yiiɛ ghlɩ.

18 ‑Na'bhë ‑n ‑yi sɛ nɩɩ,

‑a ‑wʋä ‑mä Efɛɛzɩ,

ɔ kwänɩɩ ‑bɛ 'wʋ.

‑Sɩbhä a za,

‑Alowli Lagɔ nɩ 'pä ɔ ngäzɩdlɩ,

'ɔ ‑zijle 'kädaa a zlɩ.