1 Timotee i

Tɛkäbɔgʋʋ Pɔɔlʋ 'cɛlɩɛ

Timotee

'wʋʋ

'Bɔgʋ nɩ 'mö a wɛlɩɩ

Timotee, Likaoni‑bhölɩɩ 'mö a ‑glɔ 'kɔdʋʋ wa laa Lisiitɩ, ‑mä a nɩkpɛ ɔ glɩnɩɛ. Ɔ ‑da, Zwiiföylikwiɛ, 'n ɔ dɩba glɩnɩɛ Glɛköyi. Dɛɛ Pɔɔlʋ möä tɛkädɔ'wʋ ‑mä Lisiitɩ Zezwii 'a 'Mänatɩtɩɩ biaaa, ‑lɛ Timotee nglunɩɛ Lagɔ 'a wɛlɩɩ 'wʋ, 'n ɔ yiɛ Zezwii a ‑nɔ zʋ. Zaa, Pɔɔlʋ möä ‑mä Lisiitɩ 'ɔ 'sɔnalowluu 'möö, ‑lɛ ɔ 'libhïnɩɛ Timotee 'wʋ, 'n ɔ ‑nyɔɔ yiɛ ‑mä Efɛɛzɩ mö, nzɩɩ ɔ 'kɔ ‑Alowli 'a libhoo kwänɩ. ‑Maa Pɔɔlʋ tɩ ‑mä Timotee Efɛɛzɩ, 'n ɔ yiɛ ‑mä Masedʋanɩ‑bhölɩɩ 'mö mö.

Pɔɔlʋ yɩbhä a ɔ kä ‑mä Efɛɛzɩ 'bɩwʋ mö, ‑maa ɔ'ɔa'a ‑zlɩmɛ ‑yi, mɩɩ kää 'nglɩ, 'n ɔ yiɛ Timötee 'bɔgʋ nɩ 'wʋ 'pä. ‑Mä wʋ 'mö, sɛ'ɛ ɔ nyɔɔ 'dɩ nɩɩ, nɩkpaa ‑wa 'cɩaa käböwɛlɩɩ ‑yɩ ‑nyɛ Lagɔ 'a wɛlɩɩ 'nɩ mönɩɛ yɔwʋʋ, Timotee nɩ 'nɛmanuë 'wʋ wa tɩa Zezwii a ‑nʋa dula. 'Dɩ ɔ nyɔ'ɛɛ 'gämö nɩɩ, ɔ nɩ ‑sɛ Zezwii a ‑nʋa a ‑zɩkpa a 'yukugänɩwa ‑nyɛ ngäzɩwa a 'yliwʋwa 'sɔ.